Matayo 14
14
Herode akita Yoane
1Oko mugulu oyo omwami Herode mowa engulu ya Yesu; 2mwabwira abagombe buwe ati, Oyu ni Yoane Mubatisa, yo walubukiri; ekyo kyalekire emibiri eyi yamaka iyakoleka omwisi wuwe. 3Kusangwa Herode iniabiritsimba Yoane erimuboha nerimuhira omo nyumba yomuliki, busana na Herodia, 4muka mugala wabo Filipo; kusangwa Yoane abwira Herode ati, Siritolere oko bihano ukamwimya. 5Kandi nomo abya anzire erimwita, mubaha abandu, kusangwa bamuminya kwari muminyereri. 6Nikwa omugulu ekiro Herode abutawa kyahika, mwali wa Herodia mwasatira embere yendeko, atse mesya Herode, 7kyaleka iniamulaga alahirya erimuha ekyo angamutswa. 8Abere ahanwa na nyinya wuwe, mwabuga ati, Omba omutwe wa Yoane Mubatisa hano oko kisya. 9Nikwa omwami mwakwa obulige; nikwa busana nerilahirya riwe na busana na bageni buwe mwategeka ahabawego; 10neryo mwatuma eriyatwa omutwe wa Yoane omo nyumba yomuliki,
11nomutwe wuwe mwaletwa omo kisya mwahabwa mwana muto oyo, naye mwaleterago nyinya. 12Nabiga buwe mobasa mobimya omubiri mobatago; kandi mobaya bwira Yesu.
Yesu na bandu 5000
13Nikwa omugulu Yesu owa ebyo, mwalwaho omo bwato eriya handi ahate abandu. Nikwa omugulu esyondeko bowago, mobalwa oko miyi mobamukwama omo bisandu. 14Omugulu asabuka mwalangira endeko nene; mwaganyirabo, mwalamya abakoni babo. 15Nomugulu bwasonda erihombera, abiga mobamuhikako mobamubwira bati, Hano sihari bandu, na lino bukahombera; lagana nabandu bagende omo hiyi neriyi gulira akaryo. 16Yesu mwabuga nabo ati, Sibatolere erigenda; muhebo ebyerirya. 17Nabo mobamubwira bati, Tuwite hano amandu atanu masa na mahere abiri. 18Neryo mwa bwirabo ati, Mundeterebyo hano. 19Neryo mwategeka abandu eriikala oko biti; mwimya amandu atanu ayo na mahere abiri mwalalamira elubula, mwatsumulabyo, mwatsutsanga amandu mwahago abiga, nabiga mobahago esyondeko. 20Nabosi mobarya mobuguta. Mobakumakuma ebihandebihande ebya saka mobusulya ebitiri erikumi ne bibiri. 21Nabaryago babya nga maelfu atanu balume, abakali nabana bataganzire kubo.
Yesu akatandayira oko ngetsi
22Neryo mwahatikana abiga eriingira omo bwato batsuke eyisiria, alagane nesyondeko. 23Neryo amabilagana nesyo ndeko, mwaya oko hitwa iyowene eriya saba. Omugulu erigologolo ryahika mwabyaho iyowene, 24nikwa oko mugulu oyo obwato bwabya hali oko mukokoro ngolugendo lwekilo metres, nebisunda ibikayiswiraya kubo; kusangwa erihunga ryabya rikasire embere syabo. 25Noko bisisimuko bini byekiro mwahika kubo, akatandayira oko ngetsi. 26Nikwa omugulu abiga bamulolako akatandayira oko ngetsi, mobaha hukya omutima, bati, Ni Kirimu! Mobalaka busana neriubaha. 27Nikwa neryo-neryo mwabuga nabo ati, Musikaye emitima; nIngye; simubahe. 28Petero mwamusubirya ati, Mukama, amabya ini nawe, unyibwire nyiye aho uri, nyigendere oko magetsi. Naye mwabuga ati, Wase. 29Neryo Petero mwalwa omo bwato mwagendera endata oko magetsi erihika oko Yesu; 30nikwa omugulu alangira erihunga mubaha, neritsuka erito bera mwalaka ati, Mukama unyilamaye. 31Neryo-neryo Yesu mwakakya ebyala biwe mwamuhamba, mwamubwira ati, Uwe mundu werikirirya ike, busana naki uriatikatika kwehi? 32Babere babihika omo bwato erihunga moryumbya. 33Na babya omo bwato mobamukukamira bati, Kwenene uri Mugala woMungu.
34Babere babisoka, mobahika oko kihugo kya Genezareti. 35Nomugulu abandu beyo bamabimuminya, mobatumira e kihugo ekyo kyosi mobamuletera abosi babya balwere, 36mobamugonga-gonga batoke eritula risa oko musike wolu kimba luwe; nabosi abatula kulo mobalamibwa.
നിലവിൽ തിരഞ്ഞെടുത്തിരിക്കുന്നു:
Matayo 14: NTN62
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Le Nouveau Testament et les Psaumes en Ndandi © British and Foreign Bible Society, 1962.
