Matayo 12
12
Yesu, oMukama wesabato
1Oko mugulu oyo Yesu mwalaba omo marima wenganu oko kiro kyesabato; abiga buwe mobakwa enzala, moba tsuka eritwa amakundi wenganu neriryago. 2Nikwa omugulu abaFarisayo balangira, mobamubwira bati, Lebaya, abiga bawe bakakola ekitatolere omo bihano oko kiro kyesabato. 3Naye mwabwirabo ati, Simuritasoma ekyo Dawidi akola, omugulu akwa enzala, nababya haguma naye kwehi? 4ngoko ingira omo nyumba yoMungu mwarya obundu bweribyaho nabo, obo bihano bitaliga akaryabo kutse ababya haguma naye, nikwa banabahereri basa. 5Kutse simuritasoma omo bihano ngoko abahereri omo hekalu oko kiro kyesabato, bakaheraya sabato, isibari nolubanza kwehi? 6Ngababwira, nyiti, oyu labire ehekalu ane hano. 7Kumbe mwabya mwasi ekyo eki kikahula kiti, Ngasonda eriganyire, butsira amahere, kumbe simutatswera olubi abate nolubanza. 8Kusangwa oMugala womundu ni mukama we sabato.
Ebyala byumire
9Neryo mwalwayo mwingira omo nyumba yerihindana yabo. 10Lebaya, habya mundu owebyala byumire. Mobamubulya bati, Rinatolere oko bihano erilamya omo kiro kyesabato kwehi? kusangwa basonda erimuhandikirira. 11Naye mwabwirabo ati, Omundundi kwinywe, amabya awite embuli nguma yama togera omo buhya oko kiro kyesabato siarihambayo akasumbayo mubo kwehi? 12Ko mundu sialengire enzwere yembuli kutsibu kwehi? Nibya kitolere oko bihano erikola ebibuya oko sabato. 13Neryo mwabuga nomundu oyo ati, Lambula ebyala byawe. Naye mwalambulabyo mobyasuba mobyabyaho nge bindi. 14Nikwa abaFarisayo mobahuluka mobamuyira embita, ngoko bangamwita. 15Yesu iniabiriminya ebyo, mwalwaho. Na bangi mobamukwama, naye mwalamyabo abosi, 16mwa tegekabo ati, sibamukumayiraye. 17Ebi byabya kibererere ekyabugawa nomuminyereri Isaya: ati,
18Lebaya, omugombe wage oyo nayisoga,
Omwanze wage, omutima wage amatsemisibwa busana naye.
Nasyamuhira kweKirimu kyage,
Naye asyakangania eritswera oko Bihanda.
19Siendisyanegena kutse eribuya olukanda,
Kutse sihari mundu wasyowa omulenge wuwe omo syonzira;
20Siendisyatwa oluseke olubunikire
Kutse erihomberya embumba eyikatumba
Erihika aho asyaleta eritswera eryerikinda;
21Nomo rina riwe eBihanda byasyabana amaha.
Bakahula Yesu mo Belzebuli
22Neryo mobamuletera oyuri kwembinga ini ndimatime nemumu, naye mwamulamya, nomundu emumu mwabuga mwalangira. 23Nabandu bosi mobasweka, mobabuga ambu, Anganabya mugala waDawidi kwehi? 24Nikwa omugulu abaFarisayo bowa mobabuga bati, Omundu oyu akagusa esyombinga eyihya busana na Belzebuli omukama wesyombinga. 25Naye mwaminya eriganirya ryabo, mwabwirabo ati, Oburi bwami obugabene bukahera, nomuyi kutse enyumba ebigabene sibendisyahangana; 26kandi Setani yamagusa Setani eyihya, yamayigaba iyoyene; obwami bwayo ibwasyahangana buti kwehi? 27Nage namagusa esyombinga eyihya busana na Belzebuli, abana benyu bakagusasyo eyihya busana nandi kwehi? Ekyo kikaleka ibabya abatsweri benyu. 28Nikwa Ingye namagusa esyombinga eyihya busana neKirimu kyo Mungu, obwami bwoMungu bwabiribahikako. 29Kutse mundu angatoka eriingira mo nyumba yomundu ukalire mwati erihunga ebindu biwe amatindatsuka eriboha omundu oyo kalire kwehi? Neryo iniatoka erihunga enyumba yiwe. 30Oyute haguma nage ni nzigu yage, noyute kumakuma haguma nage akapanzapanza. 31Neryo ngababwira nyiti, oburi kibi neri tsuma byasyabuyirwa abandu, nikwa oyu katsuma eKirimu siendisyabuyirwa. 32Nomundundi oyu wasyabuga eKinywa kyobuyigu oko Mugala womundu asyabuyirwa; nikwa oyo wasyabuga eKinywa kyo buyigu oko Kirimu Kibuyirire siendi syabuyirwa, kutse oko mugulu oyu kutse oko mugulu akandi syasa. 33Muyire omuti owene, nebiguma byago byowene; kutse muyira omuti mo mubi nebiguma byago mo bibi; kusangwa omuti akaminyikala busana nebiguma byago. 34Inywe abana besyonzoka! mwagatoka muti eribuga ebibuya, mune babi kwehi? Kusangwa busana nebingi byomo mutima byo buno bukabuga. 35Omundu gowene busana nebindu biwe byowene akahulukaya ebyowene, nomundu mubi busana nebindu biwe bibi akahulukaya ebibi. 36Kandi ngababwira, oko kiro kyeritswera abandu basyabulibwa oburi kinywa kityakitya ekyo bakabuga; 37kusangwa busana nebinywa byawe wasya singana na busana nebinywa byawe wasyatswerwa lubi.
Ekitikotiko kya Yona
38Neryo abandi boko basaki nabaFarisayo mobabuga naye bati, Mukangirirya, tukasonda erilola oko kitikotiko ekikalwa ukuwe. 39Nikwa mwasubiryabo ati, Olulengo lubi nolusingiri lukasonda-sonda ekitikotiko; nikwa silwendisyahabwa ekitiko tiko kyene kitikotiko kyo muminyereri Yona. 40Kusangwa ngoko Yona abya amatungi asatu nebiro bisatu omonda yenyama nene yomo ngetsi, na ritya oMugala womundu asyabya amatungi asatu nebiro bisatu omo mutima we kihugo. 41Abandu beNinawe basyahangana okwitswera nolulengo olu basyatsweralo lubi; kusangwa mobabinduka okwikangirirya rya Yona, kandi lebaya, omukulu ko Yona ari hano. 42Omwami wobukali weLutambi asyahangana okwitswera nolulengo olu asyatsweralo lubi; kusangwa mwalwa oko syonduli sye kihugo eriowa amenge wa Solomono, kandi lebaya omukulu ku Solomono ane hano. 43Omugulu ekirimu kibi kyabirilwa oko mundu, kikalaba ahate magetsi erisonda aheriluhukira, nikwa sikibana ho. 44Neryo kikabuga kiti, Ngandisuba omo nyumba yage eyo nalwamo. Neryo kyamabihikamo ikyeyayo iniri bosa, inibirirye, ininakomire. 45Neryo kikagenda ikyaleta ebindi birimu birinda haguma nakyo ebirengirekyo obubi, ibingiramo ibikalamo; nenduli yomundu oyo iyabya nyibi kwilaba eyeri mbere. Ko bikandisyabya bitya oko lulengo lubi olu.
Nyinya na bagala babo
46Abere anemobuga nabandu, lebaya, nyinya nabagala babo mobimana eyihya, bakasonda erikania naye. 47Nomundu mwamubwira ati, Lebaya, koyo wawe na bagala benyu bani mene eyihya, bakasonda erikania nawe. 48Nikwa mwasubirya omundu oyo mwamubwira ati, Koyo ni nindi, na bagala betu ni bahi kwehi? 49Neryo mwakangania ebyala biwe oko biga buwe, ati, Hano ho koyo wage ari na bagala betu! 50Kusangwa oburi mundu oyu kakola erisonda ryaTata wage oyuri omo lubula ni mugala wetu, na mwali wetu, na koyo.
നിലവിൽ തിരഞ്ഞെടുത്തിരിക്കുന്നു:
Matayo 12: NTN62
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Le Nouveau Testament et les Psaumes en Ndandi © British and Foreign Bible Society, 1962.
