Maaku 16

Kujĩi Jesu hai si balɛ

(Cɔ Matie 28:1-8; Luku 24:1-12; Zãa 20:1-10)

1Iyi ajɔi kusĩmi í lɔ, ŋɔi Maari inɛi Madalau do Salomee do Maari iyei Zaaki, à ra tuae iyi aa koo a fãsi ikui Jesu. 2Ŋɔi ajɔ amaazuma daadaakɔu abo ŋau à waa bɔ bi balɛu, 3ŋɔi à waa bee njɛ si kpãau à waa ni, yooi á tale nwa kutau hai si andɛi balɛu ya. 4À waa fɔ bɛɛbɛi si na iyi í jɔ̀ kutau í la í caa. Amma iyi à cɔ waju à yɛ kutau í bimbili. 5Ŋɔi à lɔ inɔ balɛu nɔ à yɛ awaasũ gɔ wa buba do awɔ njɛ bɛ, wa dasi jaba fũfũ, nɔ njo í mu ŋa jiida jiida. 6Ŋɔi í sɔ̃ ŋa í ni, i maà jɔ̀ njo ku mu ŋɛ. Ǹ mà iyi Jesu inɛi Nazarɛtiui ì waa dɛdɛ ŋa, iyi à kpakpa si jĩi ku gaauu. Í jĩ hai si balɛ, kù wa ihɛ̃ má. I cɔ tengi bii à dasiɛu wo. 7Amma i koo bɛbɛi i koo i sɔ̃ mɔcɔɛ ŋau do Piɛɛ takaɛ i ni, á cua nŋɛ ku bɔ ilɛi Galilee. Bɛi aa koo i yɔɔ ŋa si bɛi í sɔ̃ ŋɛ wo.

8Ŋɔi à fita wa à sa hai bi balɛu do kuyaya domi njo í mu ŋa ntɔ ntɔ. A kù nɔ a kù sɔ̃ inɛ gɔ ideu na irii njo iyi í mu ŋau.

Jesu í tusɛa Maari inɛi Madalau araɛ

(Cɔ Matie 28:9-10; Zãa 20:11-18)

[ 9Iyi Jesu í jĩ hai si balɛ ajɔ amaazuma daadaakɔu, bi Maari inɛi Madalaui í tako í nyisi araɛ. Maariui Jesu í tako í lelea inɛi inɔɔko mɛɛje wo. 10Ŋɔi abou í koo í sɔ̃ kpaasii Jesu ŋa laabaauu. Aŋai à waa too Jesu wo nɔ à wɛɛò inɔ kufɔ à wasi ku kpata. 11Iyi í ni Jesu í jĩ má, nŋu í yɔɔ, a kù dasiɛ naanɛ.

Jesu í tusɛa mɔcɔ minji gɔ ŋa araɛ

(Cɔ Luku 24:13-35)

12Si anyii nŋu, ŋɔi Jesu í tusɛ araɛ bi mɔcɔ minjiɛ gɔ ŋa iyi à waa nɛ si kpãa, à waa bɔ ilɛɛko. Amma í kpaasi araɛ si kuyɛ nŋa. 13Ŋɔi inɛ ŋau à baa inɔ ilu nɔ à koo à sɔ̃ inɛ bubu ŋau, amma kpaasi ŋau a kù dasi aŋa mɔ naanɛ má.

Jesu í tusɛa mɔcɔ maatakã ŋau araɛ

(Cɔ Matie 28:16-20; Luku 24:36-49; Zãa 20:19-23; Woo bɛ ŋa 1:6-8)

14Si anyiɛ Jesu í koo í tusɛ araɛ bi mɔcɔ maatakã ŋau bii à waa jɛ. Ŋɔi í gbagba si ŋa na naanɛ hai dasi nŋa do na idɔ kulele nŋa, si na iyi í jɔ̀ a kù jɛsi idei inɛ ŋa iyi à yɔɔ í jĩ hai si balɛu. 15Ŋɔi í sɔ̃ ŋa í ni, i bɔ si andunya fei, nɔ i waazoa inɛ baa yooma fei laabaau jiidau ŋa. 16Inɛ iyi í dasi naanɛ nɔ í jɔ̀ à dasiɛ inyi á ba faaba, amma inɛ iyi kù dasi naanɛ, Ilaaɔ̃ á yɛ taaleɛ ku kpãa iju. 17Maamaake gɔ ŋa iyi woo dasim naanɛ ŋa aa ce wee. Aa lele inɛi inɔɔko ŋa do irim, nɔ aa fɔ ide do fee ŋa iyi a kù waa gbɔ. 18Aa mu njo ŋa do awɔ, nɔ baa bii à mɔ kɔ̃ɔtɛ̃ gɔ kaa ce nŋa ide kãma. Aa lesi bɔ̃ɔ ŋa awɔ nɔ a ba iri.

Jesu í nyi bi Ilaaɔ̃ má

(Cɔ Luku 24:50-53; Woo bɛ ŋa 1:9-11)

19Iyi Lafɛ̃ɛ Jesu í sɔ̃ ŋa ideu í tã, ŋɔi à soo lele í koo í buba si awɔ njɛi Ilaaɔ̃. 20Ŋɔi mɔcɔ ŋau à koo à waa waazoa inɛ ŋa bii fei. Nɔ Lafɛ̃ɛ wa sobi ŋa si icɛu, í jɔ̀ à ya maa ce maamaake ŋa ku ba inɛ ŋa a mà iyi ide nŋa í jɛ ntɔ.]

നിലവിൽ തിരഞ്ഞെടുത്തിരിക്കുന്നു:

Maaku 16: MKL

ഹൈലൈറ്റ് ചെയ്യുക

പങ്ക് വെക്കു

പകർത്തുക