Maaku 15

À bɔò Jesu si wajui Pilati

(Cɔ Matie 27:1-2, 11-14; Luku 23:1-5; Zãa 18:28-38)

1Ŋɔi daadaakɔ inɛ ngboi woo weei Ilaaɔ̃ ŋau do inɛ ngboi Zuifu ŋau do woo kɔ inɛ ŋa si wooda ŋau do inɛ ŋa iyi à gbe si igbɛi woo kiiti ŋau fei à tɔtɔɔ à wũa ideu ajɔ. Nɔ à dĩ Jesu à koo à daa Pilati si awɔ. 2Ŋɔi Pilati í beeɛ í ni, awɔi ì jɛ ilaalui Zuifu ŋa? Nɔ Jesu í jɛaa í ni, awɔi ì fɔɔ. 3Ŋɔi inɛ ngboi woo wee ŋau à má Jesu ide ikã ikã fei. 4Ŋɔi Pilati í beeɛ má í ni, i kù waa fɔ ide gɔ? I kù gbɔ bɛi à waa niɛ? 5Amma Jesu kù jɛ ide kãma má hee biti í mu Pilati.

À yɛ taalei Jesu a ba a kpaa

(Cɔ Matie 27:15-26; Luku 23:13-25; Zãa 18:39-19:16)

6Wee si jingaui Iku ku kua fei Pilati í ya jɔ̀ inɛi piisɔ̃ɔ akã iyi zamaa í bii. 7Wee inɛ gɔ í wa ile piisɔ̃ɔ bɛ do kpaasiɛ ŋa si na iyi í jɔ̀ à kpa inɛ gɔ si waatii ide ku kɔ̀ nŋa. Iriɛi Barabasi. 8Ŋɔi zamaau í bɔ bi Pilati à waa tɔɔɛ ku cea aŋa bɛi í ya ce nŋa adɔ̃ fei si jingauu. 9Ŋɔi Pilati í bee ŋa í ni, ì bi n jɔ̀ nŋɛ ilaalui Zuifu ŋau ŋa? 10Í fɔ bɛɛbɛi si na iyi í jɔ̀ wa mà sãa sãa iyi na igui í jɔ̀ inɛ ngboi woo weei Ilaaɔ̃ ŋau à daa nŋu Jesu si awɔ. 11Amma inɛ ngboi woo weei Ilaaɔ̃ ŋau à wasi ku mante zamaau à ni a sɔ̃ Pilati ku nya nŋa Barabasi. 12Nɔ Pilati í bee ŋa má í ni, to, bɛirei ì bi n cea inɛ iyi ì ya maa kpe ilaalui Zuifu ŋau ŋa. 13Ŋɔi à dɔ̃ anu à ni, kpakpaɛ si jĩi ku gaau. 14Nɔ Pilati í bee ŋa í ni, laalɔ yoomai í bɛi í ce. Amma bɛi Pilati wa fɔ fei, bɛɛbɛ mɔi inɛ ŋau à ya dɔ̃ anu hee lele a maa ni, kpakpaɛ si jĩi ku gaau. 15Si na iyi í jɔ̀ Pilati í bi ku ce iyi á dɔ̃a zamaau si, nŋui í jɔ̀ í nya nŋa Barabasi nɔ í mu Jesu í jɔ̀ à tɛaa kpɔtɔɔ. Si anyiɛ, nɔ í daa sooge ŋa si awɔ a koo a kpakpaɛ si jĩi ku gaau.

Sooge ŋa à waa yaako Jesu

(Cɔ Matie 27:27-31; Zãa 19:2-3)

16Ŋɔi sooge ŋau à gbã Jesu à lɔòɛ kabai ilu ilɛu, nɔ à tɔtɔɔ sooge ŋa iyi à gbe ŋau fei bɛ. 17Ŋɔi à daa Jesu si ibɔ nkpa sisɔ gɔ, nɔ à ba fulai agũ à daa si iriɛ. 18Ŋɔi à yaakoɛ à waa ni, fɔɔ ilaalui Zuifu ŋa.

19Ŋɔi à ya maa cãa kpokpoo si iriɛ, a maa tu siɛ antɔ, nɔ à waa gulɛaa à waa sɛɛbata si wajuɛ. 20Iyi à yaakoɛ à tã, ŋɔi à nyaa ibɔ nkpau à bɛi à daa si ibɔɛ, nɔ à bɔòɛ waduude a koo a kpakpaɛ si jĩi ku gaau.

À kpakpa Jesu si jĩi ku gaau

(Cɔ Matie 27:32-44; Luku 23:26-43; Zãa 19:17-27)

21Wee inɛi Sirɛni gɔ iyi à ya kpe Simɔɔ wa baa hai iko, nɔ í to wa bɛ. Baai Alesandu do Rufusii. Iyi í to wa nɔ sooge ŋau à muu do gbugbã à kãa jĩi ku gaau bii aa kpakpa si Jesuu. 22Ŋɔi à bɔò nŋu do Jesu si inya gɔ iyi à ya kpe Gɔɔgɔta, waatɔ inya iyi í jɔ kokoi iri. 23Nɔ à ná Jesu atɛ̃ vɛ̃ɛ iyi à yɔgɛɛ do iwɔ iyi à ya kpe miru, amma í kɔ̀ ku mɔɔ. 24Ŋɔi à kpakpaɛ si jĩi nɔu. Si anyiɛ sooge ŋau à ta kpasa si jĩnɛɛ ŋa a ba a yɛ iyi inɛ fei á ba. Bɛɛbɛi à ce ikpɛ̃i jĩnɛɛ ŋau. 25Daakɔ zaka bɛi isɔ mɛɛsãi à kpakpaɛ si jĩi nɔu. 26Ŋɔi à kɔ kuraraɛ si jĩi gɔ à masi jĩi bii à kpakpaɛu, à ni ilaalui Zuifu ŋa. 27Ŋɔi à kpakpa ile minji gɔ ŋa bɛ má, inɛ akã ikpa awɔ njɛɛ, inɛ akã mɔ ikpa awɔ cangaɛ. [ 28Bɛɛbɛi kukɔi idei Ilaaɔ̃ í kɔ̃ iyi í ni, à dooaɛ si inɛ laalɔ ŋa.]

29Inɛ ŋa iyi à waa too do bɛ à ya maa gbugbã irii a buu a maa ni, ãhãa, kù jɛ awɔi ì ni aa lɛgɛ kpasɛ̃i Ilaaɔ̃u nɔ i maa má si afei ajɔ mɛɛta? 30To, faaba araɛ bɛ, kita hai si antaii jĩi ku gaauu. 31Bɛɛbɛ mɔi inɛ ngboi woo weei Ilaaɔ̃ ŋau do woo kɔ inɛ ŋa si wooda ŋau à waa yaakoɛ. À sɔ̃ njɛ à waa ni, í faaba inɛ gɔ ŋa amma kaa yɔkɔ ku faaba araɛ. 32Bɛbɛi, nŋu Kirisi ilaalui Izirɛliu ku kita wa hai si jĩi nɔu ku ba ka yɔɔ, nɔ ka dasiɛ naanɛ. Bɛɛbɛ mɔi, inɛ ŋa iyi à kpakpa do Jesu ajɔu à waa yaakoɛ.

Waati iyi Jesu í ku

(Cɔ Matie 27:45-56; Luku 23:44-49; Zãa 19:28-30)

33Ŋɔi dasã nkpau ilu í kuku si ilɛu fei hee í koo í to isɔ mɛɛtai alɛ. 34Ŋɔi si isɔ mɛɛtau Jesu í dɔ̃ anu hee lele í ni, Eloi, Eloi, lema sabatani, waatɔ Ilaaɔ̃ Lafɛ̃ɛm, Ilaaɔ̃ Lafɛ̃ɛm, na mii í ce ì fũsim awɔ.#15:34 Cɔ Iri ku kɔ̃ 22:2. 35Ŋɔi inɛ gɔ ŋa iyi à wa bɛu à gbɔ anu ku dɔ̃u. Nɔ à ni, i gbɔ, wa kpe Elii. 36Ŋɔi inɛ akã nŋa í sɛi í koo í dĩ kanya si golo gɔ í sɔsi inyiikã í bɛi í naa í toa Jesu ku cɔ̃ɔcɔ̃ɔɛ, nɔ í ni, ka leekĩ, ka cɔ mà Elii á naa ku kitaɛ hai si jĩi ku gaauu. 37Ŋɔi Jesu í dɔ̃ anu hee lele í bɛi í ku.

38Asee, waati bɛɛbɛ si ilui Zeruzalɛmu, ridoo iyi í wa kpasɛ̃i Ilaaɔ̃u í ga í kpɛ̃ minji hai lele hee ku bɔ ilɛ. 39Inɛ ngboi sooge ŋa iyi í wa wajui Jesuu í yɛ yaase bɛi í ce í bɛi í ku, nɔ í ni, ntɔ ntɔ, inɛɛu ihɛ̃ Amai Ilaaɔ̃i.

40Ŋɔi inaabo gɔ ŋa mɔ à wa bɛ à waa cɔ ilu wa hai jĩijĩ. Si inɔ nŋa Maari inɛi Madalau í wa bɛ do Salomee do Maari iyei Zozee do Zaaki iyi í jɛ ama awaasũu. 41Wee hai tako, waati iyi Jesu í wa ilɛi Galilee, aŋai à tooɛ à ya maa ceaa icɛ. Nɔ inaabo nkpɔ gɔ ŋa mɔ à wa bɛ, iyi aŋaò ŋa à sì Jesu wa iyi wa naa Zeruzalɛmu.

À dasi ikui Jesu balɛ

(Cɔ Matie 27:57-61; Luku 23:50-56; Zãa 19:38-42)

42-43Iyi alɛ í lɛ, ŋɔi Zozɛfu inɛi Arimateeu í koo bɛ. Zozɛfuu, ilu bɛɛrɛi si inɔi Zuifu woo kiiti ŋau, nɔ wa cɔ kpãa iyi Ilaaɔ̃ á na ku jɛ bomma. Wee ajɔi sɔɔlui jingaui. Iju kumáɛ ajɔi kusĩmii á jɛ. Na ŋɔi í jɔ̀ Zozɛfu í bɔ bi Pilati do wɔɔkɔ ku tɔɔɛ ikui Jesu. 44Ŋɔi Pilati í biti do iyi í gbɔ à ni í kú tã. Ŋɔi í kpe inɛ ngboi sooge ŋau í beeɛ mà Jesu í kú í kpɛ. 45Iyi inɛ ngboi sooge ŋau í sisiaa yaase bɛi Jesu í kuò, ŋɔi í jɛsi Zozɛfu koo nya ikuu. 46Ŋɔi Zozɛfu í koo í ra acɔ fũfũ, nɔ í nya ikui Jesu wa hai si jĩi ku gaauu, í woo do acɔu. Nɔ í suu si isai kuta gɔ iyi à gbe wo. Si anyiɛ í bimbili kuta nla gɔ í dĩò andɛi balɛu. 47Ŋɔi Maari inɛi Madalau do Maari iyei Zozee à yɛ bii à waa dasi ikui Jesuu.

നിലവിൽ തിരഞ്ഞെടുത്തിരിക്കുന്നു:

Maaku 15: MKL

ഹൈലൈറ്റ് ചെയ്യുക

പങ്ക് വെക്കു

പകർത്തുക