Luku 1

Ide sinte

1-4Baakɔɔm Teofili, ilu bɛɛrɛ nla, ǹ wa n ceɛ fɔɔ.

Í sĩaam si n kɔɛ tiau ihɛ̃ wa n sɔ̃ɛ dee dee mii iyi í ce si anini nwa. Inɛ ŋa iyi à yɔɔ hai sinte, nɔ à baa à jɛ woo ce icɛi ideu, aŋai à sɔ̃ wa. Iyi inɛ ŋa à gbɔɔ, inɛ nkpɔ nkpɔi í ce kookaai ku ba a kɔɔ dee dee. Nɔ í sĩaam si amu mɔ n kɔɛ wa ku ba i mà kãm kãm iyi ide ŋa iyi à kɔɛ siu ntɔi, domi ǹ wũa ideu fei hai sinteɛ.

Amaleka* gɔ wa fɔ idei kubíi Zãa woo dasi inyi

5Si waati iyi Herodu wa jɛ ilaalui Zudee, woo weei Ilaaɔ̃ gɔ í wa bɛ à ya kpoo Zakari. Si wuai woo weei Ilaaɔ̃ ŋa iyi í jɛ ti Abiai í wa. Aboɛi à ya kpe Elizabɛti. Si dimii Arɔ̃ɔ iyi í jɛ woo wee nla sintei Ilaaɔ̃ui í wa. 6Aŋa minji fei à jɛ dee dee si wajui Ilaaɔ̃ Lafɛ̃ɛ nɔ à waa jirima woodaɛ ŋa do ideɛ fei mam mam. 7Amma a kù nɛ ama domi Elizabɛti gbɛndai, nɔ aŋa minji fei à gbo tã.

8Ajɔ nŋu gɔ, Zakari wa ce icɛi kuweeɛ si wajui Ilaaɔ̃ domi si wuaɛi kuweeu í to si. 9Wee à ya ta kpasai ku ba a mà inɛ iyi á lɔ si kpasɛ̃i Ilaaɔ̃ koo jo tuae. Ŋɔi ajɔ nŋu bɛ, kpasau í so Zakari, ŋɔi í jɔ̀ í lɔ inɔ ileu koo jo tuaeu. 10Nɔ zamaau fei wa ce kutɔɔ waduude si waati iyi wa jo tuaeu. 11Ŋɔi amalekai Ilaaɔ̃ gɔ í naa siɛ, wa leekĩ ikpa awɔ njɛi bi ku jo tuaeu. 12Iyi Zakari í yɔɔ ŋɔi zigiɛ í da, nɔ njo í muu hee í caa. 13Amma amalekau í sɔ̃ɔ í ni, maà jɔ̀ njo ku muɛ, Zakari. Ilaaɔ̃ í gbɔ kutɔɔɛ. Elizabɛti aboɛ á bíɛ ama inɛmɔkɔ nɔ i sɔɔ Zãa. 14Aa nɛ inɔ didɔ̃ nla nla nɔ inɛ nkpɔ á wɛɛ do inɔ didɔ̃ na kubíɛ, 15si na iyi í jɔ̀ inɛ nlai á jɛ si wajui Aɔ̃ Lafɛ̃ɛ. Kaa mɔ vɛ̃ɛ, hee má jɛ atɛ̃ kulele mmu gɔ. Nɔ á kɔ̃ò Hundei Ilaaɔ̃ hai inɔi iyeɛ. 16Á jɔ̀ inɛi Izirɛli nkpɔ ku kpaasi idɔ nɔ a nyi wa bi Aɔ̃ Lafɛ̃ɛ nŋa. 17Nŋui á cuaa Ilaaɔ̃ nɔ ku yɛ bɛi Elii walii nlai takou. Gbugbãɛ mɔ á yɛi bɛi ti Elii. Á jɔ̀ baa do ama nŋa ŋa a gbɔsi njɛ, nɔ á jɔ̀ hai gbɔ ide ŋa mɔ a ce lasabu bɛi inɛ dee dee ŋa, nɔ ku jɔ̀ inɛ ŋa a tã sɔɔlu a maa degbe Aɔ̃ Lafɛ̃ɛ.

18Amma Zakari í sɔ̃ amalekau í ni, amu wee ǹ gbo tã nɔ abom mɔ í ce inɛ ngbo. To, bɛirei an ce n mà iyi ideu á ce. 19Ŋɔi amalekau í jɛaa í ni, amui Gabiɛli. Amui ǹ ya n wa bi Ilaaɔ̃ n maa n ceaa icɛ. Nŋui í bɛm wa n na n baɛ ide ku fɔ nɔ n sisiɛ laabaau jiidau ihɛ̃. 20Amma i kù dasi idem nɔu naanɛ baa do iyi á na ku ce bii waatiɛ í to. Na nŋu, aa dekĩ, i kaa yɔkɔ i fɔ ide má í gbe ajɔ iyi ideu í cei.

21Wee inɛ ŋa à waa degbe Zakari, nɔ à biti do iyi wa kpɛ inɔ kpasɛ̃i Ilaaɔ̃ bɛ. 22Iyi í fita wa, kù yɔkɔ ku ba ŋa ide ku fɔ má, ŋɔi à mà iyi í ce kuyɛ gɔi si inɔ ileu bɛ. Wa ba ŋa ide ku fɔ do awɔ, amma kù yɔkɔ ku fɔ ide do gɛlɛ.

23Si anyii kuyɛu, Zakari í mɔsi icɛɛ má hee í koo í to ajɔ iyi icɛɛ í kpa iri inɔ kpasɛ̃ bɛ. Ŋɔi í nyi ideɛ. 24Si anyiɛ, Elizabɛti aboɛ í ba asĩ, nɔ wa singa araɛ zakai cukpa miiu, í ni, 25cɔ mii iyi Ilaaɔ̃ í ceem. Í cɔm do iju jiida nɔ í nyaam anyɔ si wajui amanɛ ŋa.

Amaleka* wa fɔ idei kubíi Jesu

26Iyi asĩi Elizabɛti í ba cukpa mɛɛfa, ŋɔi Ilaaɔ̃ í bɛ amaleka Gabiɛli Nazarɛti si ilɛi Galilee. 27Í bɔɔi bi mudɛ̃ɛ gɔ iyi kù mà mɔkɔ, amma à mua awaasũ gɔ iyi à ya kpe Zozɛfu, si dimii ilaalu Davidi. Irii mudɛ̃ɛui í jɛ Maari. 28Amalekau í lɔ bi tɛɛ í sɔ̃ɔ í ni, ǹ wa n ceɛ fɔɔ, awɔ iyi Ilaaɔ̃ í cea didɔ̃. Aɔ̃ Lafɛ̃ɛ í wɛɛ do awɔ.

29Ŋɔi Maari í biti do ideu nɔ wa bee araɛ ide wa ni, yoomai í jɛ yaasei fɔɔu ihɛ̃. 30Ŋɔi amalekau í sɔ̃ɔ í ni, maà jɔ̀ njo ku muɛ Maari. Ilaaɔ̃ í ceɛ didɔ̃. 31Aa ba asĩ i bí ama inɛmɔkɔ nɔ i sɔɔ Jesu. 32Á na ku jɛ inɛ nla. Amai Ilaaɔ̃i aa ya kpoo, nŋu iyi kù nɛ saa. Aɔ̃ Lafɛ̃ɛ á coo ilaalu, á náa bommai Davidi balaɛ. 33Nŋui á jɛ bomma si dimii Zakɔbu#1:33 Zakɔbu Zakɔbui à ya kpe Izirɛli má. Bii à ni á jɛ bomma si dimii Zakɔbu, si dimii inɛi Izirɛli ŋa feii à waa fãa. do ajɔ fei. Bommaɛ kaa nɛ kɔɔ. 34Ŋɔi Maari í bee amalekau í ni, bɛirei á ce ku ce, si bɛi n kù mà mɔkɔ.

35Ŋɔi amalekau í jɛaa í ni, Hundei Ilaaɔ̃i á naa siɛ, nɔ gbugbãɛ ku biiɛ bɛi jĩjĩ. Nŋui í jɔ̀ ama iyi aa na i bíu á jɛ inɛ kumá nɔ a kpoo Amai Ilaaɔ̃. 36Elizabɛti nyaanzeɛu mɔ iyi à ya maa kpe gbɛndau, do si agboɛu fei, í nɛ asĩi ama inɛmɔkɔ. Í wɛɛ si cukpa mɛɛfasiaɛ nsɛi. 37Maari, jɔ̀ i mà iyi nkãma kù wɛɛ iyi Ilaaɔ̃ í mɔngɔ.

38Ŋɔi Maari í ni, amu woo ce icɛi Aɔ̃ Lafɛ̃ɛi. Fei ndɛɛ ku ceem bɛi ì sɔ̃m nɔu. Ŋɔi amalekau í nɛ.

Maari í bɔ Elizabɛti ku cɔ

39Si anyii nŋu, ŋɔi Maari í dede do saasa í dasi kpãa wa nɛ ikpa geete ŋa, í bɔ ilu gɔ si ilɛi Zudee. 40Iyi í to bɛ ŋɔi í lɔ kpasɛ̃i Zakari nɔ í ce Elizabɛti fɔɔ. 41Waati iyi Elizabɛti í gbɔ fɔɔi Maariu, ŋɔi amau í yaga si inɔɛ, nɔ Elizabɛti í kɔ̃ò Hundei Ilaaɔ̃. 42Nɔ í dɔ̃ anu hee lele í ni, Ilaaɔ̃ í weeɛ í re inaabo fei, nɔ kuweeu á sɔ si ama iyi aa na i bíu. 43Yooi ǹ jɛ hee iyei Lafɛ̃ɛm í naa bi tom. 44Waati iyi ǹ gbɔ fɔɔɛu bɛ, ama iyi í wa inɔm í yaga do inɔ didɔ̃. 45Ilu inɔ didɔ̃i awɔ iyi ì dasi naanɛ iyi mii iyi Ilaaɔ̃ í sɔ̃ɛ á na ku ce.

Iri ku kɔ̃i Maari

46Nɔ Maari í ni,

idɔm wa saabu Aɔ̃ Lafɛ̃ɛ.

47Nɔ ǹ wɛɛò inɔ didɔ̃ na irii Ilaaɔ̃ Woo faabam,

48si na iyi í jɔ̀ í kãsim iju jiidaɛ,

amu woo ce icɛɛ iyi n kù jɛ ngɔgɔ.

Nɔ hai nsɛi inɛi andunya ŋa fei

aa maa ni amu ilu inɔ didɔ̃i,

49domi Ilaaɔ̃, ilu gbugbã fei í ceem mii nla nla.

Í jɛ inɛ kumá.

50Í ya ce araarei inɛ ŋa iyi à waa jirimaɛ hee do ajɔ fei.

51Í ce icɛ gbugbã ŋa do gbugbãi awɔɛ

nɔ í fangaa inɛ ŋa iyi lasabui idɔ nŋa í nɛ faau.

52Í kɛkɛ ilaalu ŋa si batai bomma nŋa ŋa,

nɔ í so ilu are ŋa lele.

53Í jɔ̀ inɛ ŋa iyi ari wa kpa à jɛ mii jiida ŋa à yo,

amma í lele ilu fia ŋa awɔ ngbɛ.

54-55Í sobi inɛi Izirɛli woo ce icɛɛ ŋa,

í ce araare nŋa hee do ajɔ fei

bɛi í tako í sɔ̃ Aburahamu do tɔkuɛ ŋa

aŋa iyi à jɛ bala nwa ŋa.

56Iri iyi Maari í kɔ̃u mbɛ. Si anyiɛ nɔ í buba bi Elizabɛti bɛ zakai cukpa mɛɛta, í bɛi í nyi ideɛ.

Kubíi Zãa woo dasi inyiu

57Awaati í to bii Elizabɛti á bí amaɛ, nɔ í bí ama inɛmɔkɔ. 58Kpaasiɛ ŋa do nyaanzeɛ ŋa à gbɔ iyi Aɔ̃ Lafɛ̃ɛ í ce araareɛ ntɔ ntɔ, nɔ aŋaò ŋa à wɛɛò inɔ didɔ̃ ajɔ. 59Si ajɔ mɛɛjɔsia à naa ku dasi amau bango, nɔ à waa bi à kpoo Zakari, irii baaɛu. 60Amma iyeɛ í so ide í ni, aawo, Zãai aa kpoo. 61Ŋɔi à sɔ̃ɔ à ni, si nyaanzeɛ inɛ kãma kù nɛ dimii iriu bɛ.

62Nɔ à bee baaɛ do awɔ ku ba a mà bɛi í bi a kpe amau. 63Ŋɔi Zakari í tɔɔ mii gɔ si bii á kɔ si, nɔ í kɔ í ni, Zãai í jɛ iriɛ. Nɔ aŋa fei à biti. 64Ŋɔi gbakã Zakari í yɔkɔ í fɔ ide do gɛlɛɛ, nɔ í lɔsi ide ku fɔ wa saabuò Ilaaɔ̃. 65Ŋɔi njo í mu hee do inɛ ŋa iyi à wa amɛɛ amɛɛ fei. Nɔ si ilɛɛkoi geetei Zudee ŋa fei inɛ ŋa à wasi ku ce faajii ideu. 66Inɛ ŋa iyi à gbɔ ideu fei à ya maa muui si idɔ nŋa nɔ a maa ni, debɛi, bɛirei amau ihɛ̃ á na ku jɛ.

Mii ŋa iyi í ceu ihɛ̃ fei wa nyisi iyi gbugbãi Ilaaɔ̃ í wɛɛ do nŋu.

Iri ku kɔ̃i Zakari

67Ŋɔi Zakari baai amau í kɔ̃ò Hundei Ilaaɔ̃, nɔ í ce walii í ni,

68saabui í jɛ ti Ilaaɔ̃ Lafɛ̃ɛi inɛi Izirɛli ŋa

si na iyi í jɔ̀ í naa bi inɛɛ ŋa í naa í ya ŋa.

69Nɔ í naa nwa woo faaba ilu gbugbã wa

si nyaanzei ilaalu Davidi amaacɛɛu,

70si bɛi í jɔ̀ walii kumáɛ ŋau à fɔ wo hai ku kpɛ.

71Nŋui á faaba wa hai si awɔi mbɛɛ nwa ŋa,

do hai bi inɛ ŋa iyi à cé wa fei.

72Bɛɛbɛi í nyisi bala nwa ŋa araareɛ,

nɔ wa yeò gigii akabuu kumáɛ.

73Akabuuui í jɛ kuwã iyi í cea Aburahamu bala nwa,

74í ni nŋu á nya wa hai si awɔi mbɛɛ nwa ŋa,

nɔ nŋu ku jɔ̀ ka cea nŋu icɛ do wɔɔkɔ.

75Nɔ icɛ iyi aa ka ceau ku jɛ do idɔ kumá

nɔ ka jɛ dee dee si wajuɛ do ajɔ fei si kuwɛɛ nwa.

76Nɔ awɔ amam, aa kpeɛ waliii Ilaaɔ̃, nŋu iyi kù nɛ saa,

domi aa cuaa Lafɛ̃ɛ i maa teesea kpãa,

77nɔ aa jɔ̀ inɛɛ ŋa a mà iyi aŋa aa ba faaba

waati iyi Ilaaɔ̃ á nya dulum du ŋa.

78Ntɔ ntɔ, araarei Ilaaɔ̃ Lafɛ̃ɛ nwa í lá si wa.

Na saabui araareɛui í jɔ̀ inya kumá í naa si wa

hai lele bɛi nunui daakɔ,

79ku ba ku má inya si inɛ ŋa iyi à waa buba

si ilu kuku do si jĩjĩi iku

ku maa nɛò awa fei si kpãai laakai akã.

80Iri iyi Zakari í kɔ̃u mbɛ. Si anyii nŋu amau wa la, nɔ bisiɛ wa kɔ̃ɔsi nɔ í koo í wa gbaa hee í koo í tóò ajɔ iyi í nyisi araɛ bantuma si wajui inɛi Izirɛli ŋa.

നിലവിൽ തിരഞ്ഞെടുത്തിരിക്കുന്നു:

Luku 1: MKL

ഹൈലൈറ്റ് ചെയ്യുക

പങ്ക് വെക്കു

പകർത്തുക