Jn 3
3
Nicodemo dojapegue' ñe'me Jesús
1'Uo ñe'me fariseo 'me lenaĝat Nicodemo, nach'eñe jiyaĝaua jo'ne yataqatelegue chiyaqauelo gaa'me lajoĝola'te jogaa'me judiopi. 2Nach'eñe jo'ne yec'ata ñe'me Jesús ca'li pi'yaq qama'le enaac:
—Am paĝaguenataĝanaĝaic, jayatenaq queda'me am namaĝaquena joñe'me Dios qaedi qo'mi auapaĝague'n, qa'a qom Dios ja uetaue ga'me jiyaĝaua qama'le ja yaqanatet ta'le ya'uo ga'me di'yoq jo'ne laloĝonataĝanaĝac 'me ena'am da'me aua'uo.
3Jesús 'yateguet:
—Eja da'me am ja'aĝatem: joga'me jo'ne ja yitaĝa niyiñe ja yaqanatet ta'le yauana da'me lejaliaĝa joñe'me Dios.
4Qama'le Nicodemo enaac:
—¿Qo'li yaqanatet ta'le niyiñe ga'me jiyaĝaua qom joote 'yaĝaic? ¡Yataqachiñe ja yaqanatet ta'le yitaĝa taue lauel jaga'me lat'e qaedi yitaĝa niyiñe!
5Jesús male 'yateguet:
—Eja da'me am ja'aĝatem: joga'me jo'ne ja niyiñe q'aen ga'me noĝop nataq'aen ñe'me Dios Lepaqal ja yaqanatet ta'le taue da'me lejaliaĝa joñe'me Dios. 6Joga'me jo'ne niyiñe q'aen gaa'me let'al jo'ne ch'e jiyaĝa'u, nach'e ena'am ch'e jiyaĝaua; nataq'aen joga'me jo'ne niyiñe q'aen ñe'me Dios Lepaqal, nach'e ena'am 'uo da'me 'loyaĝac jo'ne chiyaqayi ñe'me Dios Lepaqal. 7Ena'te aueualoĝona'aguet da'me dojo' jo'ne jeetac: «Ena'uaque da'me ami yitaĝa aniyiyiñe.» 8Ñe'me Dios Lepaqal ena'am ga'me layat jo'ne yajediñe gamachaqaega ta'ya; mate mane'e qodomachiya ga'me lajamaĝa qalaĝaja ja qoyayaten ga'me chiyaqayi nataq'aen ga'me dajoyi. Qama'le naq'aete' jogaa'me niyidiñe q'ae'n ñe'me Dios Lepaqal.
9Nicodemo yitaĝa 'viyelaĝalegue da'me yenat:
—¿Toqoch'e naq'aeta da'me dojo'?
10Jesús male 'yateguet:
—Am jo'ne p'ajaye napaĝaguenoqo't di'me Israel, ¿toqoch'e ja auayate'n naa'me naajo' jo'ne uo'oe? 11Eja da'me am ja'aĝatem: queda'me qo'mi ja'aĝataqatac da'me jo'ne mach'e jayatenaq, nataq'aen jechoqotaqatac da'me jo'ne joote jauanaĝa. Qalaĝaja da'me ami ja auacoñiyeguet da'me jo'ne ñenaĝataĝaye. 12Qom jayem auoqoleguechi da'me ami ja'aĝatema gaa'me uo'oe jena'me aleua, ¿qo'li ja nach'e ena'am jayem auoqoleguechi qom ja'aĝate'tape gaa'me uo'oe di'me piyem?
13“Qaya'te ta'le yec'adije'ma di'me piyem dite ñe'me jo'ne nenochiñe 'me chiyoĝogue di'me piyem, jo'ne nach'eñe Jiyaĝaua Lec'oĝot. 14Qama'le ena'am ñe'me Moisés ca'li yanajeguem ga'me nanaic di'me aleua jo'ne totapega't qaedi qonec'alaĝatedegue ga'me jiyaĝadipi, qama'le nach'e ena'am joñe'me Jiyaĝaua Lec'oĝot da'me qoyanajeguem qomle, 15qaedi ena'uaque jogaa'me jo'ne p'iida'a joñe'me yauata da'me 'loyaĝa'j jo'ne ja 'naidena'a.”
Dios noqopitalo gaa'me aleua laje'pi
16Qa'a naq'aeta da'me Dios noqopitalo ena'uaque gaa'me aleua laje'pi, queda'me yanegue ñe'me mach'e Lec'oĝot jo'ne onolec, qaedi ena'uaque jogaa'me jo'ne p'iida'a joñe'me ja yitaĝa yele'u dite da'me yauata da'me 'loyaĝa'j jo'ne ja 'naidena'a. 17Qa'a ñe'me Dios namaĝa'ña jena'me aleua ñe'me Lec'oĝot: ja namaĝa'ña jogaa'me aleua laje'pi qaedi ya'uo ga'me ne'uaĝanague'j, dite da'me qaedi nec'alaĝatedegue jogaa'me jiyaĝadipi.
18Jogaa'me jo'ne p'iida'a ñe'me Dios Lec'oĝot qaya'te ne'uaĝanague'j; qalaĝaja jogaa'me jo'ne ja p'iida'a joote 'uo da'me ne'uaĝanague'j queda'me ja p'iida'a ñe'me Dios Lec'oĝot 'me onolec. 19Joote 'uo da'me ne'uaĝanague'j qa'a yauo'oe jogaa'me jo'ne ja 'noe'n, qama'le ca'li novi' ñe'me necoyadaĝanaĝat jo'ne nec'achi'ña jena'me aleua qama'le gaa'me jiyaĝadipi ja yec'adeta joñe'me qa'a noqopideta da'me 'lalaĝa, ja noqopideta da'me 'yoqochiñe. 20Chane'eja ena'uaque jogaa'me jo'ne yauote da'me ja no'en 'uo da'me louelaqataĝanaĝac ñe'me necoyadaĝanaĝat, nataq'aen da'me ja nec'adeta joñe'me qaedi ja qoyecoyadelegue da'me 'yetedac jo'ne ja no'en. 21Qalaĝaja gaa'me jo'ne uetedaue da'me yataqatelegue male yec'adeta joñe'me necoyadaĝanaĝat qaedi qoyauanalo ena'uaque gaa'me 'lonataqa jo'ne 'yamaqate'n ñe'me Dios.
Ñe'me Juan jo'ne chilaĝanataĝanaĝaic 'viyelaĝalegue da'me 'yaĝatetac ñe'me Jesús
22Ca'li yem da'me dojo', qama'le Jesús ec, lequiaĝa'u jogaa'me lapaĝaguenataqa da'me dajotegue ga'me aleua jo'ne Judea, di'me jo'ne ue'tague ñe'me Jesús da'me dachilaĝanataĝatac. 23Choqoñe'me Juan nach'e ena'am dachilaĝanataĝatac ca'li ue'ta di'me Enón jo'ne yauaqa'a di'me Salim, qa'a 'uo ga'me noĝop jo'ne let'adaic, qama'le joga'me jiyaĝadipi yec'adeta joñe'me qama'le nach'e ena'am qonachilaĝa'n. 24Jenjo' jo'ne 'uo ca'li cha'li jona'li qoyanaue jaga'me coñetaĝanaĝaiqui ñe'me Juan.
25Qalaĝaja jogaa'me lapaĝaguenataqa ñe'me Juan 'uaeñe da'me nec'onaĝadapegue' joga'me jo'ne judío le'ec yajouaĝat da'me qoyadalaĝat ga'me jo'ne 'nejola't nataq'aen da'me qoyen yoqovita, 26qama'le yec'adeta joñe'me Juan gaa'me lapaĝaguenataqa qaedi qot'aqataĝanem:
—Am paĝaguenataĝanaĝaic, jo'me jo'ne am ue'tajop ca'li oue'ta di'me lajego di'me Jordán, jo'me jiyaĝaua jo'ne qo'mi a'uaĝatapema, joote dachilaĝanataĝatac, nataq'aen ena'uaque joga'me jiyaĝadipi quetegue joñe'me.
27Juan male 'yategueta jogaa'me:
—Qaya'te ta'le 'uo ga'me ua'ajop joga'me jiyaĝaua qom ja Dios ya'uo ga'me yanem. 28Nach'e ami jo'ne jayem auomachiiya ca'li da'me jo'ne ja'aĝatetac 'me yataqatelegue, da'me ja naqayem ta'le jayem Dios Liquiyac; nach'edata da'me jayem namaĝajec jo'ne le'uauaĝanatac joñe'me. 29Da'me 'nonáĝac, joga'me jo'ne 'uoneguet jaga'me lojaĝaua, nach'ega joga'me nojaĝaua; qalaĝaja joga'me jo'ne ch'e naigaĝaua joga'me nojaĝaua, jo'ne nach'e ena'am ue'ta lae joga'me, qama'le uotaĝa domachiya, qama'le 'uo da'me lamaic queda'me domachiya. Qama'le nach'e ena'am jayem, 'uo da'me yamaic jo'ne yataqachiñe nalo'ta't nayi. 30Joñe'me jo'ne Dios Liquiyac male nichiquetaye da'me 'namaqatenataĝanaĝac, qama'le da'me jayem nichique'tat da'me 'namaqatenataĝanaĝac.
Ñe'me jo'ne chiyoĝogue di'me p'ajeguem
31Joñe'me jo'ne chiyoĝogue di'me p'ajeguem napacalegue ena'uac; gaa'me jo'ne ueda'ña jena'me aleua nach'egaua jo'ne ch'e aleua laje' nataq'aen da'me 'yaĝate'tape gaa'me uo'oe jo'ne ch'e ueda'ña jena'me aleua. Qalaĝaja joñe'me jo'ne chiyoĝogue di'me piyem nach'eñe jo'ne napacalegue ena'uac, 32nach'eñe jo'ne 'yaĝatetac ga'me jo'ne mach'e yauana nataq'aen da'me domachiya, qalaĝaja qaya'te ta'le yaconeguet da'me 'laqataĝanaĝac. 33Joga'me jo'ne yaconeguet da'me 'laqataĝanaĝac joñe'me, nach'ega en yataqatelegue q'aen joñe'me Dios; 34qa'a joñe'me jo'ne namaĝaquena ñe'me Dios 'yaĝate'tape jonaa'me 'laqataqa, qa'a nach'eñe yanem da'me lañoqotaĝanaĝac ñe'me Lepaqal. 35Ñe'me Net'a 'uo da'me loqopich'i ñe'me Lec'oĝot, chane'eja yanem da'me lañoqotaĝanaĝac qaedi nejaliaĝatelo'te ena'uac gaa'me uo'oe. 36Joga'me jo'ne p'iya'a ñe'me Lec'oĝot yauana da'me 'loyaĝac jo'ne ja 'naidena'a; qalaĝaja joga'me jo'ne ja yoqo'cha ñe'me Lec'oĝot ja yauana da'me lec'alaĝa, dite da'me taue da'me ne'uaĝanaguec 'me chiyaqayi joñe'me Dios.
Селектирано:
Jn 3: TSN
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Nuevo Testament Toba del Oeste © 2010 Sociedad Bíblica Argentina