Fa nahoana ny Paska?Santionany

Fahafahana ho amin'ny inona?

Tsy eto an-tany, ara-nofo, intsony i Jesoa, fa tsy namela antsika ho irery anefa Izy. Nandefa ny Fanahiny Masina ho amintsika Izy. Rehefa tonga ao anatintsika ny Fanahiny dia manome antsika fahafahana vaovao.

Fahafahana hahalala an’Andriamanitra

Ny zavatra tsy mety ataontsika dia miteraka sakana eo amintsika sy Andriamanitra: ‘Ny helokareo no efitra mampisaraka anareo amin'Andriamanitrareo’ (Isaia 59:2). Rehefa maty teo amin’ny hazo fijaliana i Jesoa dia nesoriny ny sakana izay nisy teo anelanelantsika sy Andriamanitra. Araka izany, dia nataony izay ahafahantsika mifandray amin’ny Mpamorona antsika. Lasa zanany lahy sy vavy isika. Manome antoka antsika ny amin’izany fifandraisana izany ny Fanahy, ary manampy antsika hahafantatra bebe kokoa an’Andriamanitra Izy. Manampy antsika hivavaka sy hahatakatra ny tenin’Andriamanitra (ny Baiboly) Izy.

Fahafahana mitia

‘Isika tia, satria Izy efa tia antsika taloha’ (1 Jaona 4:19). Rehefa mijery ny hazo fijaliana isika, dia takatsika ny fitiavan’Andriamanitra antsika. Rehefa tonga ao anatintsika ny Fanahin’Andriamanitra dia miaina izany fitiavana izany isika. Rehefa manao izany isika, dia mahazo fitiavana vaovao an’Andriamanitra sy ny olon-kafa. Afaka miaina fiainana feno fitiavana isika izay fiainana mifantoka amin’ny fitiavana sy fanompoana an’i Jesoa ary fitiavana sy fanompoana ny hafa, fa tsy fiainana mifantoka amin’ny tenantsika.

Fahafahana hiova

Mety milaza ny olona indraindray hoe: ‘Efa izao ianao. Tsy miova intsony ianao.’ Ny vaovao tsara dia hoe afaka miova isika noho ny fanampian’ny Fanahy. Ny Fanahy Masina no manome antsika fahafahana hiaina ny karazana fiainana izay efa nirintsika hatrizay hatrizay. Milaza amintsika i Md Paoly fa ny vokatry ny Fanahy dia ‘fitiavana, fifaliana, fiadanana, fahari-po, fahamoram-panahy, fanaovan-tsoa, fahamarinana, fahalemem-panahy, fahononam-po’ (Galatiana 5:22-23). Rehefa mangataka ny Fanahin’Andriamanitra isika mba ho tonga sy hiaina ao anatintsika, dia manomboka mitombo eo amin’ny fiainantsika ireo toetra mahafinaritra ireo.