Fa nahoana ny Paska?Santionany

Fahafahana amin'ny inona?

Nanefa ny vidim-panavotana hanafaka antsika teo amin'ny hazo fijaliana i Jesoa tamin'ny alalan'ny rany.

Fahafahana amin'ny meloka

Na mahatsiaro tena ho meloka isika na tsia, dia samy meloka eo anatrehan’Andriamanitra avokoa isika rehetra noho ny fandikantsika matetika ny lalàny amin’ny saina sy ny teny ary ny asa. Tahaka ny olona manao heloka dia misy sazy tsy maintsy efainy, dia toy izany ihany koa ny sazy ho an’ny fandikana ny lalàn’Andriamanitra. ‘Fahafatesana no tambin’ny ota’ (Romana 6:23).

Ny vokatry ny zava-dratsy ataontsika dia ny fahafatesana ara-panahy, izany hoe ny fisarahana tanteraka amin'Andriamanitra ho mandrakizay. Mendrika hizaka izany sazy izany daholo isika rehetra. Teo amin’ny hazo fijaliana no nandraisan’i Jesoa ny sazy izay tokony hahazo antsika mba hahazoantsika famelan-keloka tanteraka sy hanesorana ny helotsika.

Fahafahana amin'ny fiankinan-doha

Nilaza i Jesoa fa ‘izay rehetra manota dia andevon’ny ota’ (Jaona 8:34). Maty Jesoa mba hanafaka antsika amin’izany fanandevozana izany. Tapaka ny herin'io fiankinan-doha io teo amin'ny hazo fijaliana. Na dia mety mbola lavo aza isika indraindray, dia efa tapaka ny herin’io fiankinan-doha io rehefa nanafaka antsika i Jesoa.

Fahafahana amin'ny tahotra

Tonga Jesoa mba 'handringanany amin'ny fahafatesana ilay manana ny herin'ny fahafatesana, dia ny devoly, ary mba hanafahany izay rehetra nandany ny fiainany rehetra tamin'ny fahandevozana noho ny tahotra ny fahafatesana' (Hebreo 2:14-15). Tsy mila matahotra ny fahafatesana intsony isika.

Tsy ny fahafatesana no fiafaran'ireo izay nafahan'i Jesoa. Fa izany no vavahady mankany an-danitra, izay hanafahana antsika na dia ny fanatrehan’ny ota aza. Rehefa nanafaka antsika tamin’ny tahotra ny fahafatesana i Jesoa, dia nanafaka antsika tamin’ny tahotra hafa rehetra koa.