Rehefa tsy mahomby ny finoana: 10 andro hahitana an'Andriamanitra ao anatin'ny aloky ny fisalasalanaSantionany

Tao amin'ny Eksodosy, dia nasain'Andriamanitra nanala ny kapany i Mosesy. Ny antony dia satria nijoro teo amin'ny tany masina izy. Azo antoka fa mety gaga ihany Mosesy tamin'izany! Fantany tsara io faritra eo amin'ny tany efitra misy azy io. Efa-polo taona no nandehanany teo niandry ondry. Ho an’i Mosesy dia io no toerana fiasany. Tao an-tsainy dia tany mahazatra, feno vovoka, maloto, falehan'ny ondry io. Fa Andriamanitra kosa dia nilaza fa tany masina izany.

Ahoana raha feno fahamasinana ihany koa kay ny toerana misy anao ankehitriny io? Ahoana raha ny antsipiriany rehetra amin'ny fiainanao kay dia rakotry ny fanatrehan'Andriamanitra? Ahoana raha ao amin'ny rivotra manodidina anao io dia feno ny feon'Andriamanitra?

Miteny Andriamanitra. Mety tsy araka ny eritreritrao fotsiny izany.

• Miteny amin’ny alalan’ny olon-kafa izy. Na dia ireo manorisory anao aza.

• Miteny amin'ny alalan'ny zavakanto izy: boky, mozika, tononkalo, hira, ary sary.

• Afaka miteny amin’ny alalan’ny nofy izy. . . .

• Miteny amin’ny alalan’ny zavaboary Izy, rehefa mankafy ny hakanton’ny zavatra nataony isika.

• Miteny amin’ny alalan’ny faharesen-dahatra sy ny fahatsapana fa misy zavatra tsy mety Izy. (Indraindray dia tsy ny fahanginan'Andriamanitra no olana fa ny feon'ny ota izay mitabataba be. Te ho isan'ny feo mafy indrindra eo amin'ny fiainantsika ny ota. Aza avela hitranga izany.)

• Miteny amin’ny alalan'ireo sedra lalovantsika Izy.

• Miteny ao anatin’ny fahaverezantsika Izy.

• Miteny ao anatin’ny fisalasalantsika mihitsy aza Izy.

Raha misy Andriamanitra, dia tsy misy toerana tsotra na mahazatra izany. Masina daholo ireny. Masina io fotoana iainanao io sy ny toerana misy anao io na aiza na aiza misy anao. Manasa anao Andriamanitra hanala ny kapanao ary hiankohoka tanteraka eo anatrehany.

Manatrika eto izy.

Ny dian-tànan'Andriamanitra dia mandrakotra tanteraka ny fiainanao.