Ezekiela 28
28
Loza mananontanona hamelezana ny mpanjakan’i Tiro
1Nisy tenin’ny TOMPO tamiko nanao hoe: 2«Ry ilay taranak’olombelona, ambarao amin’ny mpanjakan’i Tiro fa izao no lazain’ny Tompo ANDRIANANAHARY: ‹Fo miavonavona no nilazanao ny tenanao ho andriamanitra sady mipetraka amina sezafiandrianana mendrika an’ireo andriamanitra, dia sezafiandrianana eo anivon-dranomasina. Nihevi-tena ho mitovy amin’ireo andriamanitra ianao nefa olombelona ihany fa tsy andriamanitra akory. 3Nihambo ho hendry noho i Daniela ianao ka afaka mamantatra na dia ny zavatra miafina indrindra aza#28.3 Danela na Daniela: jereo ny 14.14 sy nta.. 4Nahazo harena ianao noho ny fahendrenao sy ny fahiratan-tsainao, ka nanangona raki-tsarobidy toy ny volamena sy ny volafotsy. 5Nanangona tombom-barotra ianao noho ny fahaizanao ara-barotra; ary izany harena izany no niavonavonan’ny fonao.›
6«Koa izao no lazain’ny Tompo ANDRIANANAHARY: ‹Nihevi-tena ho mitovy amin’ireo andriamanitra ianao. 7Koa indro hitondrako vahiny hamely anao, dia izay lozabe indrindra amin’ny hafa firenena; ka hopotipotehiny amin’ny sabatra izay zava-tsoan’ny fahendrenao ary hozimbazimbainy ny fiandriananao. 8Havariny any an-davaka ianao, ka ho faty vokatry ny famonoana an-keriny anao eo anivon’ny ranomasina. 9Mbola sahy hihambo ho andriamanitra ve ianao eo anatrehan’izay hamono hahafaty anao? Olombelona ihany ianao fa tsy andriamanitra, rehefa mby eo an-tanan’izay hamono hahafaty anao! 10Fahafatesana mahafa-baràka toy ny an’ny olona tsy voafora no hahafaty anao eo an-tanan’ny vahiny. Izaho Tompo ANDRIANANAHARY no manambara; teny hentitra avy amiko izany›. »
11Dia nisy indray tenin’ny TOMPO tamiko nanao hoe: 12«Ry ilay taranak’olombelona, manaova hira fisaonana ny amin’ny mpanjakan’i Tiro. Ambarao aminy fa izao no lazain’ny Tompo ANDRIANANAHARY: ‹Modely tonga lafatra ianao satria feno fahendrena sady tsara tarehy aoka izany. 13Tao Hedèna, zaridainan’Andriamanitra, no niainanao, dia ilay Hedèna voahodidina tamboho rakotry ny vatosoa isan-karazany: robisy, tôpaza, diamondra, krizôlita, berila, jaspa, safira, robina, emeralda. Firavaka sy haingo volamena voaomana hatramin’ny andro nahariana anao no nentinao#28.13 Hedèna: jereo Gen 2.8-15. –Tsy azo antoka ny fitanisana ny anaran’ireo karazam-batosoa.. 14Napetrako teo anilanao ny kerobima iray mpiaro goavana be#28.14 ny kerobima mpiaro: jereo Gen 3.24. –Ny tendrombohitra voatokana ho an’Andriamanitra dia milaza ny toerana voafaritra honenan’ny mpanjakan’i Tiro.; dia niaina teo amin’ilay tendrombohitra voatokana ho an’Andriamanitra ianao ary nandehandeha teo anivon’ny vato manjelanjelatra. 15Tsy nisy hokianina ny fitondrantenanao hatramin’ny andro nahariana anao ka mandra-pisehon’ny ratsy teo aminao. 16Ny fandrosoan’ny varotrao no nampihanaka ny herisetra teo anivonao sy nampanota anao. Koa dia aetriko ho sarambabembahoaka ianao ary roahiko tsy ho eo amin’ilay tendrombohitr’Andriamanitra. Ny kerobima mpiaro no mandroaka anao lavitr’ireo vato manjelanjelatra#28.16 Ny kerobima mpiaro no mandroaka anao: araka ny dkt grika tranainy, jereo ny and 14 sy ny nta.. 17Ny hatsaran-tarehinao no nampiavonavona ny fonao, ary ny fahombiazanao mamirapiratra no nahasimba ny fahendrenao. Dia azerako amin’ny tany ianao ary atolotro hampitalanjona ireo mpanjaka. 18Maro tokoa ny helokao satria tsifahamarinana no nitondranao ny varotrao ka voazimbazimbanao ireo toeram-pivavahanao. Izany no andrehetako afo ao an-tanànanao handevona anao. Izay rehetra hijery anao dia hahita fa hataoko tonga lavenona ianao eto an-tany. 19Ny firenena rehetra izay mahalala anao dia ho gaga ny aminao, satria ho tonga fampitahorana ianao, sady tsy hisy intsony mandrakizay›. »
Loza mananontanona an’i Tsidôna
20Ary nisy tenin’ny TOMPO tamiko nanao hoe: 21«Ry ilay taranak’olombelona, mitodiha manandrify ny tanàna Tsidôna#28.21 Tsidôna: tanàn-dehibe fenisianina teo akaikin’i Tiro ary matetika voatonona miaraka aminy, jereo Is 23.1 sy ny nta., ary ijoroy ny maha-mpaminany anao mba hamelezako azy. 22Ambarao aminy fa izao no lazain’ny Tompo ANDRIANANAHARY: ‹Hirotsaka hamely anao Aho, ry Tsidôna, ary homem-boninahitra eo afovoanao. Amin’izay dia hoekena fa Izaho no TOMPO, rehefa hampihariko aminao ny didim-pitsarako ary hasehoko eo aminao ny maha Andriamanitra masina Ahy. 23Halefako hamely anao ny areti-mandringana, ary handriaka eny an-dalambenao ny ra. Hananganana ady hatraiza hatraiza ianao, ka hiampatrampatra ao aminao ny fatin’ny mponina. Amin’izay dia hoekena fa Izaho no TOMPO›. »
Hiaina am-pilaminana i Israely
24«Ireo firenena manodidina an’i Israely dia tsy hisy hanao tsinontsinona azy intsony. Tsy hamelively azy intsony ireo ka mova tsy roy manindrona na tsilo mandrangotra. Amin’izay dia hoekena fa Izaho no TOMPO.
25«Izao no lazain’ny Tompo ANDRIANANAHARY: Hangoniko avy any amin’ny firenen-kafa izay nanelezako azy ny Israelita, ka hasehoko eo imason’ireo hafa firenena fa Izaho no Andriamanitra masina. Honina ao amin’ny taniny izy, dia ny tany izay efa nomeko an’i Jakôba mpanompoko. 26Ao izy no honina am-pilaminana ka hanorina trano sy hamboly voaloboka; eny, honina am-pilaminana izy satria hampiharako famaizana ireo rehetra manodidina azy ka nanao tsinontsinona azy. Amin’izay dia hoekena fa Izaho no TOMPO Andriamaniny.»
Voafantina amin'izao fotoana izao:
Ezekiela 28: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.