Ezekiela 27
27
Hira fisaonana noho ny faharavan’i Tiro
1Ary nisy tenin’ny TOMPO tamiko nanao hoe: 2«Ry ilay taranak’olombelona, manaova ianao hira fisaonana ny amin’ny tanànan’i Tiro, 3izay miorina eo amin’ny vava-ranomasina, ary manao varotra amin’ny firenena maro eny amoron-dranomasina. Ambarao aminy fa izao no lazain’ny Tompo ANDRIANANAHARY:
‹Ry Tiro#27.3 Tiro: jereo ny naoty momba ny 26.2. ô, Ianao dia nilaza ny tenanao
ho sambo tsara tarehy fatratra!
4Eny anivon-dranomasina ny faritaninao,
ary nataon’ireo mpandrafitra anao
ho tsara tarehy fatratra ianao.
5Hazo kipreso avy any Senira#27.5 Senira: anaran’ny tendrombohitra Hermôna (jereo Deot 3.9) na ankapobeny kokoa anaran’ilay tandavan-tendrombohitra eny atsinanan’ny tendrombohitr’i Libano ka i Hermôna no faratampony.
no nanamboarany manontolo ny vatan-tsambonao;
hazo sedera avy any Libano
no nalainy hanaovana ny andrin-tsambonao.
6Hazo ôaka avy any Basàna
no nanaovany ny fivoin-tsambonao.
Hazo sedera avy any amin’ny nosy Kitima
izay nasiana sisika ivoary
no nanamboarany ny tokotanin-tsambonao.
7Rongony madinika misoratsoratra avy any Ejipta
no natao lain-tsambonao
mba ho faneva hamantarana anao.
Lamba miloko volomparasy sy jaky
avy any amin’ny nosy Sipra
no natao labasy hiarovana ny entanao.
8Mponina avy any Tsidôna sy Arvada#27.8 Tsidôna sy Arvada: tanàna fenisianina roa teo amoron-tsiraka akaikin’i Tiro.
no nampiasainao ho mpivoy;
ny olona havanana teo aminao
no tantsambonao, ry Tiro ô,
9Mpahay taozavatra avy any Biblôsy,
izay za-draharaha sady kinga,
no mpanamboatra ny simba
amin’ny vatan-tsambonao.
Ny sambo rehetra izay teny an-dranomasina
dia nijanona avokoa teo aminao;
ka ny tantsambony no mividy ny entanao.
10Olona avy any Persia sy Loda ary Ponto#27.10 Loda sy Ponto: jereo ny naoty momba ny Is 66.19.
no miaramila nanompo tao amin’ny tafikao.
Nahantony tao anatin’ny tobinao
ny ampingany sy ny fiarovan-dohany,
ka nanomezany laza anao izany.
11Vatan-dehilahy avy any Arvada no niambina ny mandanao niaraka tamin’ny miaramilanao, ary olona avy any Gamada no niaro ny tilikambonao. Nanantona ny ampingany teny amin’ny manda manodidina anao#27.11 Gamada: faritany na tanàna tsy dia fantatra loatra. –Nahantona teny amin’ny manda ny ampinga mba ho toy ny fehiloha mandravaka azy (jereo Ton 4.4). izy. Ireo rehetra ireo no nahatonga anao ho tsara tarehy fatratra›. »
I Tiro renivohitry ny varotra
12«Ny olon’i Tarsîsy#27.12 Tarsîsy; toerana tsy voatondro mazava ara-jeôgrafia, jereo Sal 72.10; Jon 1.3. no nifanao varotra taminao momba ny harena zavon-tany isan-karazany. Volafotsy sy vy sy vifotsy ary firaka no natolony ho takalon’ny entanao. 13Ny olona avy any Gresy sy Tobala ary Mesèka#27.13 Tobala sy Mesèka: faritanin’i Azia Minôra, jereo koa 38.2. ihany koa dia nifanao varotra taminao, ka olona sy fanaka halimo no natolony ho takalon’ny entanao. 14Ny terak’i Bety-Tôgarmà#27.14 Bety-Tôgarmà: mety ho i Armenia izany, jereo 38.6. no nanolotra ny soavaly hoenti-miasa sy ny soavaly hoenti-miady ary ny boriky ho takalon’ny entanao. 15Nifandray ara-barotra taminao koa ny olona avy ao Dedàna#27.15 Dedàna: jereo 25.13 sy ny nta.. Nitatra tamin’ireo nosy maro ny tsenam-barotrao, ka tandroka ivoara sy hazomainty no natakalony ny entanao. 16Nividy entana betsaka taminao koa ny Edômita#27.16 Ny Edômita: araka ny stf hebreo maro sy ny dkt siriaka tranainy; ny RM mahazatra kosa manao hoe ny Sirianina. , ka vato emeralda sy lamba miloko volomparasy, lamba vita peta-kofehy sy rongony fotsy madinika ary koa akorandriaka sy vato robisy no natolony ho takalony. 17Nifandray ara-barotra taminao koa ny vahoakan’i Joda sy i Israely ka varimbazaha avy any Minita#27.17 Minita: tanàn-dehibe any amin’ny tanin’ny Hamônita ka tonga anarana fiantsoana karazana voamaina anankiray. sy ampemba sy tantely sy diloilo ary balsamo no natolony ho takalon’ny entanao. 18Ny mponin’i Damasy dia nifanao varotra taminao momba ny taozavatrao sy ny harenao zavon-tany isan-karazany. Divay avy any Helbôna sy volonondry avy any Tsahara#27.18 Damasy: renivohitr’i Siria (and. 16). –Helbôna: faritany any avaratr’i Damasy, malaza fahizany hatrany Asiria noho ny divainy. –Tsahara: tsy dia fantatra loatra, kanefa tsy maintsy tanàna mifanakaiky amin’i Helbôna. no nataony takalony. 19Avy ao an-tanànan’i Ozala ny mponin’i Vedàna sy i Javàna#27.19 Vedàna sy i Javàna: eto ireo dia toa foko arabo mpiompy andiam-biby mifindrafindra lasy ka ny tanànan’i Ozala no foibe ivotoerany. no manolotra ny vy voatefy sy ny kanela ary ny veromanitra ho takalon’ny entanao. 20Ny olona avy any Dedàna kosa nifandray ara-barotra taminao ka nitondra lamba fandrakofan-tsoavaly. 21I Arabia sy ireo mpitondra rehetra any Kedara#27.21 Kedara: faritanin’i Arabia, jereo Is 21.13-17 sy Ton 1.5. dia nifanao varotra taminao. Zanak’ondry sy ondrilahy ary osilahy no natakalony ny entanao. 22Ny mpivarotra avy any Sebà sy Rahemà#27.22 Sebà sy Rahemà: faritany any atsimon’i Arabia, jereo Gen 10.7; 1 Mp 10.1. ihany koa dia nifandray ara-barotra taminao ka zava-manitra ambony karazana sy vatosoa ary volamena no natolony ho takalon’ny entanao. 23Ny ao an-tanànan’i Haràna sy i Kane ary i Hedèna koa dia nifandray ara-barotra taminao toy ireo mpivarotra avy any Sebà mbamin’ireo tanànan’i Asora sy i Kilmady#27.23 Haràna, Kane, ary Hedèna dia tanàn-dehibe tany amin’ny lohasahan’i Eôfrata. I Kilmady dia mety ho tanàna mifanila amin’i Asora eny amoron’ny ony Tigra.. 24Nivarotra fitafiana mihaja taminao izy, ka entiny eny an-tsenanao ny fitafiana miloko volomparasy sy ny lamba vita peta-kofehy, karipetra misoratsoratra ary tady voarandrana mafy. 25Ireo sambo vaventy no mpitatitra ny entam-barotrao.»
Tohin’ny hira fisaonana momba an’i Tiro#27.25 Ampit Apôk 18.11-19 ity tohin’ny hira fisaonana ity.
«Toa sambo feno entana ianao
ka navesatra dia navesatra,
teny anivon’ny ranomasina.
26Nentin’ireo mpivoinao teny amin’ny ranobe ianao
ka ny rivotra avy any atsinanana
no nahavaky anao teny anivon’ny ranomasina.
27Ny fanananao sy ny vokatrao
mbamin’ny entam-barotrao rehetra,
ny tantsambonao sy ny mpanampy azy,
ireo mpanamboatra ny simba
amin’ny vatan-tsambonao,
ireo mpivarotra mpanondrana entana,
ny miaramila rehetra niasa tao aminao,
ary ny vahoaka rehetra nandeha taminao,
dia samy nilentika any an-dranomasina
tamin’ny andro naharendrika anao.
28Noho ny fidradradradràn’ireo tantsambonao
dia mangovitra ny mponina amoron-tsiraka.
29Miala ny sambony avy ireo mpivoy rehetra
sy ireo tantsambo rehetra eny an-dranomasina
ka samy maka toerana eny an-tanety.
30Heno migogogogo noho ny manjo anao izy,
sady manao fidradradradrana mafy.
Mandraraka vovoka amin’ny lohany izy,
ary mihosinkosina amin’ny lavenona.
31Manaratra loha sady mitafy gony#27.31 Jereo 7.18 sy nta.
noho ny aminao izy,
ka mitomany anao fa mangidy ny manjo
ary mangidy ny fisaonany.
32Tamin’alahelo no niventesany
hiram-palahelovana ny aminao,
dia hiram-pisaonana manao hoe:
Iza no tahaka an’i Tiro
izay tonga mangina ankehitriny
eo anivon’ny ranomasina?
33Rehefa tonga avy any an-dranomasina any ianao
ka nampidinina ny entam-barotrao,
dia firenena maro no voavatsy tamin’izany.
Ny habetsahan’ny harenao aman’entanao
no nampanan-karena ireo mpanjakan’ny tany.
34Ankehitriny novakîn’ny onjan-dranomasina ianao
ary tafalentika ao anaty rano lalimbe.
Ny entanao sy ny vahoaka rehetra nandeha taminao
dia niaraka rendrika taminao avokoa.
35Nalahelo mafy ny aminao
ny mponina rehetra amoron-tsiraka;
raiki-tahotra ny mpanjakany
ka tonga hatsatra ny endriny.
36Ny mpivarotry ny firenen-kafa
dia misiotsioka talanjona ny aminao,
satria tonga fampitahorana ianao,
sady tsy hisy intsony mandrakizay.»
Voafantina amin'izao fotoana izao:
Ezekiela 27: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.