Ezekiela 26
26
Loza mananontanona hamelezana an’i Tiro
1Tamin’ny taona faha-11 taorian’ny fahababoana, nony andro voalohan’ny volana#26.1 ny taona faha-11... volana: izany hoe ny taona 587 tal J.K.. Tsy tondroin’ny RM mazava kosa anefa ny volana resahina eto., dia nisy tenin’ny TOMPO tamiko nanao hoe: 2«Ry ilay taranak’olombelona, nandatsa an’i Jerosalema ny mponin’i Tiro ka manao hoe: ‹Hià! Sakoa izay! Potika ilay tanàna fandalovan’ny olona rehetra! Isika indray izao no hangoron-karena satria rava i Jerosalema#26.2 I Tiro dia tanàna fenisianina miorina eo amin’ny nosy iray sady anisan’ireo tanàna matanjaka ara-barotra tamin’izany fotoana izany (ampit 27.3). Tany am-boalohany izy aloha dia nomba an’i Jerosalema mba hanohitra ny Babilônianina (jereo nta 21.33) avy eo vao nandao azy. Misy ampahany amin’ny entam-barotra ho any Tiro no nandalo tao Jerosalema ka ny faharavan’ity farany dia tombontsoa lehibe ho an’ny Tirianina. –Momba ny 26.2–28.9, jereo ny naoty momba ny Is 23.1.!› 3Koa izao no lazain’ny Tompo ANDRIANANAHARY: ‹Hirotsaka hamely anao Aho, ry tanànan’i Tiro. Hasaiko manafika anao ny firenena maro, ka hifanesy hiady aminao tahaka ny onjan-dranomasina. 4Horavany ny mandanao, ary harodany ny tilikambonao. Hofafako hatramin’ny vovotaninao ka vatolampy mangadihady no sisa havelako; 5dia ho toerana fanahazan’ireo mpanarato ny haratony eny afovoan-dranomasina izany. Izaho Tompo ANDRIANANAHARY no manambara; teny hentitra avy amiko izany. Fa ho avy ny firenen-kafa handroba anao, ry Tiro, 6sy handringana amin’ny sabatra ireo tanànakely mifanila aminao eny amoron-tsiraka eny. Amin’izay dia hoekenao fa Izaho no TOMPO.
7«Izao koa no lazain’ny Tompo ANDRIANANAHARY aminao: ‹Hoentiko avy any avaratra hamely anao, ry Tiro, ny mpanjaka mahery indrindra, dia i Nebokadnetsara mpanjakan’i Babilôna. Ho avy hanafika anao izy, miaraka amin’ny soavaly sy kalesy ary mpitaingin-tsoavaly mbamin’ny miaramila betsaka navoriny. 8Haringany amin’ny sabatra ireo tanàna kely mifanila aminao eny amoron-tsiraka. Hamelezana anao dia handavaka hady sy hanangana tovon-tany ireo fahavalonao sady hampijoro rindrin’ampinga hiarovan-tena. 9Homontsaniny amin’ny kanontabe ny mandanao, ary horavany amin’ny lapika ny tilikambonao. 10Ho rakotry ny vovoka indaosin’ny soavaly betsaka ianao, ary hihovitrovitra ny mandanao noho ny firodorodon’ny mpitaingin-tsoavaly sy ny fingodongodon’ny kodiaran-kalesy. Tahaka ny ibosesehana eo amin’ny manda voabanga no hidiran’ny fahavalo eo amin’ny vavahadinao. 11Ny kitron-tsoavaliny no hanitsakitsahany ny lalambenao rehetra; ny mponinao hovonoiny ho faty amin’ny sabatra ary ireo andrim-batonao hazerany amin’ny tany#26.11 Ny resahina eto dia ireo andry roa izay manotrona ny fidirana ao amin’ny tempolin’ny andriamanitra sampy Melkarta, andriamanitra lohalaharana tao Tiro.. 12Hangalariny ireo harenao ary horobainy ireo tahirin’entanao. Harodany ny mandanao, horavany ny tranonao tsara tarehy; ka ny vato sy ny hazo ary ny ampiantany tamin’ireny kosa dia hariany any an-dranomasina. 13Hatsahatro ny tabataban-kiranao, ary tsy ho re intsony ny feon-dokanganao. 14Vatolampy mangadihady sisa no havelako ao aminao mba hanahazan’ny mpanarato ny haratony, ka tsy harenina intsony ny tanànanao. Izaho TOMPO no manambara; teny hentitra avy amiko Tompo ANDRIANANAHARY izany.›
15«Izao koa no lazain’ny Tompo ANDRIANANAHARY amin’ny tanànan’i Tiro hoe: ‹Ny mponina any amoron-tsiraka lavitra any dia hangovitra raha mandre ny firodanao sy ny tolokon’ireo naratra tamin’ny fandringanana tao anatinao. 16Hidina hiala amin’ny sezafiandrianany ny andriana rehetra mifehy ireo vahoaka any amoron-tsiraka any, ka hanaisotra ny fitafiany sy ireo akanjony mirenty#26.16 Ireo fihetsika ireo dia atao ho mariky ny fisaonana, jereo Jôn 3.6; Mik 1.8.. Ho raiki-tahotra sy hipetraka amin’ny tany izy ka tsy hitsaha-mangovitra, satria ory loatra noho ny manjo anao. 17Ary hihira izao hira fisaonana izao ny aminao izy hoe:
Indrisy! Rava tokoa ilay tanàna malaza,
fongotra teo an-dranomasina izy.
Nahery teo an-dranomasina izy sy ny mponiny
ka nampihorohoro ny besinimaro.
18Ankehitriny kosa ny mponina amoron-tsiraka
dia mangovitra noho ny andro nirodanany;
ary ny mponin’ny nosy any an-dranomasina
dia varahontsana noho ny nanjavonany.›
19«Fa izao no lazain’ny Tompo ANDRIANANAHARY: ‹Hataoko tahaka ireo tanàna rava tsy misy mponina ianao. Hampiakariko avy any amin’ny lalina ny ranobe hanafotra anao. 20Hampidiniko any an-davaka misy ireo maty hatrizay ianao. Hamponeniko any ambanin’ny tany tahaka ireo sisan-drava fahagola ianao miaraka amin’ireo maty talohanao. Tsy ho afa-miakatra intsony ianao, ary tsy hanan-toerana eo amin’ny tanin’ny velona intsony#26.20 Tsy ho afa-miakatra intsony ianao: dkt hafa «tsy honenana intsony ianao.» –tsy hanan-toerana intsony: araka ny dkt grika tranainy izany, fa ny RM kosa manao hoe «haveriko (ho an’ny tanin’ny velona) ny famirapiratany».. 21Ho raiki-tahotra ny olona rehetra noho ny nanjo anao satria tsy ho eo intsony ianao. Hokarohina ny sisa momba anao, nefa tsy hisy hahita anao intsony na oviana na oviana; teny hentitra avy amiko Tompo ANDRIANANAHARY izany›. »
Voafantina amin'izao fotoana izao:
Ezekiela 26: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.