ROM 10
10
1Sesedara seiman, sengik eng betol-betol kihod mai Israel bangse lieng sendiri bipeselamat. Eng betol-betol ngbedoa ngsemanj nu Jenang begei ajeh. 2Eng ngpanei enai ajeh begeiharok. Enai ajeh naikerekwat naiha-pesenang ha sengik Jenang tapi bahneh enai ajeh pek kena ru penanei de sebenar ju Jenang. 3Kerana pek naipanei icare Jenang Kipejadi enai benar ku mat Ilei, jadi naikerekwat naijoi care liknai sendiri ru pek naiha-terima care Jenang. 4Kristus ya Kibeh Hukom Taurat ya pek mong ikuasa nij supaye dikdij mai de pecaya nu Ilei naijadi benar ku mat Jenang.
Jenang Kipeselamat Dikdij Mai
5Begei adehloh de bicot ya Nabi Musa tentang icare hijadi benar ku mat Jenang ya tenaat nu Hukom Taurat: “Sengoi de kitaat nu dikdij hukom doh kisui kerana kitaat.”#Im 18:5 6Tapi, adehloh de bicot ku kateh Alkitab tentang icare hijadi benar ku mat Jenang ya iman: “Agok tanya ku kateh sengik engkek, ‘Bok doh de kihuj nu serga?’ (untok kisemanj Kristus Kiceleh nu bumi), 7atao ‘Bok doh de kiceleh nu dunia mai dat?’ (untok kisemanj Kristus Kihuj nu bumi ju Idanan).” 8Tapi, adehloh de bicot ku kateh Alkitab: “Engrok Jenang ya mimang rek ru engkek. Ilei ajeh mong ku empag engkek ru ku sengik engkek.”#Ul 30:12-14 Ajehloh engrok de jipasal, de kiurok mai hod naipecaya nu Jenang. 9Engkek doh bipeselamat amen engkeaku ya empag engkek, “Yesus ajeh Tuhan,” ru amen sengik engkek betol-betol kipecaya Jenang ya Kiberkos Yesus ju Idanan. 10Kerana hik betol-betol hipecaya ku kateh sengik hik, hik biterima ya Jenang sebegei sengoi-sengoi de ya hijadi benar ku mat Ilei. Kerana hiaku ya empag lihik sendiri, hik bipeselamat. 11Ku kateh Alkitab mong bicot, “Bok taleh de naipecaya nu Ilei doh pek bihina.”#Yes 28:16 12Hal ajeh sama taleh nu dikdij mai, pek kira nu mai Yahudika mai pek Yahudi, kerana Tuhan ajeh Tuhan de sama nu dikdij mai. Kek pek dij-dij Kiberkat dikdij mai de sengmanj tenulog nu Ilei 13kerana ku kateh Alkitab mong bicot, “Jap-jap mai de naicereg nu muh Tuhan doh bipeselamat.”#Yl 2:32
14Tapi begeiharok naiha-cereg nu Tuhan amen pekseg naipecaya nu Ilei? Ru begeiharok naiha-pecaya nu Ilei amen pekseg naicerngai tentang Ilei? Begeiharok naiha-cerngai tentang Ilei amen pek mong mai de bepasal tentang Ilei nu enai? 15Ru begeiharok mai naiha-pasal tentang Ilei ajeh amen enai pek biutos? Begei de bicot ku kateh Alkitab, “Ihad bor helnol mai de naien gah bor ju Jenang!”#Yes 52:7 16Tapi pek dikdij mai Israel naiterima ha Gah Bor kerana Nabi Yesaya mong kiurok, “TUHAN, pek jeoi mai naipecaya nu gah de jiperlei.”#Yes 53:1 17Jadi, mai naijadi pecaya kerana naicerngai gah de bipasal. Ru gah de naicerngai ajeh Gah Bor tentang Kristus.
18Tapi ngtanya, betolka enai pekseg naicerngai gah ajeh? Tentu ya naicerngai kerana mong bicot,
“Gah ajeh bicerngai ya seluroh bumi.
Engrok ajeh ya lei nu mol bumi.”#Mzm 19:5
19Ngtanya nij, mai Israel pek naipahamka? Enai ya naipaham. Nabi Musa de mula-mula sekali beberlag tenanya ajeh melalui bengwal Jenang begei adeh:
“Eng doh Ngbeh engkek engkeiri sengik nu mai de enyuk pek sengoi-sengoi Eng.
Eng doh Ngbeh engkebelal nu bangse de pek naireti ma-ma.”#Ul 32:21
20Ru ihad berani Nabi Yesaya kiperlei bengwal Jenang begei adeh:
“Eng biburuk ya mai de pek naikek Eng.
Eng Ngperneng Diri LiEng nu mai de pek naitanya ha Eng.”#Yes 65:1
21Tapi tentang mai Israel, Nabi Yesaya ajeh kiperlei bengwal Jenang begei adeh: “Ju pegelap lei nu kelem Eng Ngulur teg Eng nu bangse de pek taat ru de nekbebantah ajeh.”#Yes 65:2
Voafantina amin'izao fotoana izao:
ROM 10: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.