ROM 9
9
Jenang ru Mai Israel de Kipileh
1Hal de ngha-bual adeh betol. Eng pek ngbelenglod. Kristusloh saksi eng. Sengik eng de bikuasa ya Kelog Santen kipeyaken eng pek ngbelenglod. 2Hal de ngha-bual ajeh begei adeh: Eng betol-betol ngsedeh ru sengik eng pek dij-dij kitesiksa 3kerana sesedara eng mai Israel, bangse lieng sendiri. Eng rele bikutok ya Jenang ru tepisah ju Kristus amen hal ajeh dapat kibeh enai bipeselamat. 4Enai ajehloh de biangkat naijadi kenon ya Jenang. Nu enailoh Jenang Kiperneng Ikemuliean, Kibeh Ijenanji-jenanji, Kiog Hukom Taurat, Kipasal care naisembah ha Ilei, ru Kiog Ijanji-janji. 5Enai ajehloh kenon-cenok Abraham, Ishak, ru Yakub, de bipileh ya Jenang entem. Ju enai ajehloh asal Peselamat de bijanji ya Jenang.#9:5 Peselamat de bijanji ya Jenang: Atao, Kristus. Kek Kiyos sebegei manusia ru Kek ajehloh Jenang nu dikdij ma de mong. Kek layak bipateh lei ditehjeh! Amin.
6Hamapen mai Israel nainyek ha Kristus, Jenang pek gagal Kipenohi Ijenanji. Jenang ya Kibejanji nu Abraham, Ishak, ru Yakub begei adeh: Kenon-cenok enai doh naikep Iberkat. Ma de bijanji ya Jenang ajeh ya tejadi kerana pek semua mai Israel ajeh sengoi-sengoi de bipileh ya Jenang. 7Ru juga, pek semua kenon-cenok Abraham ajeh kekenon Jenang kerana Jenang Kiurok nu Abraham, “Had kenon-cenok ju Ishak talehloh de doh bikira sebegei kenon-cenok hek.”#Kej 21:12 8Imaksodjeh, pek semua kenon-cenok Abraham ajeh kekenon Jenang tapi had kenon-cenok de yos kerana bijanji ya Jenang taleh. 9Jenang ya Kijanji begei adeh: “Ku tahut nu ngar doh ku mase de ya bipetetap, eng doh nglos nu madeh nij. Ku mase ajeh, kenah hek Sara doh mong numom kenon keral.”#Kej 18:10, 14
10Apeka ajeh taleh, hal ajeh juga tejadi mase Ribka kimakok rimnar kenon Ishak, jenang rak hik. 11Pekseg rimnar kenon kerbar ajeh baiyos, Jenang ya Kipileh numom supaye Inerancang bipetegoh. Jenang Kipileh pek Kijoi bahneh manusia tapi Kijoi cengreg Ilei sendiri. Ku mase rimnar kenon kerbar Ribka ajeh pekseg lagi baibeh hal de bor atao hal de niknej, 12Jenang ya Kiurok nu Ribka, “Ilei de sulog doh kilayan ilei de iloj.”#Kej 25:23 13Begei de bicot ku kateh Alkitab, Jenang Kiurok, “Eng nghok Yakub tapi Nggetek Esau.”#Mal 1:2-3
14Amen begei ajeh, bulehka hiurok Jenang ajeh pek adel? Tentuloh pek buleh! 15Kerana, Kek Kiurok nu Nabi Musa begei adeh: “Eng Ngyayak ha sengoi de Ngha-yayak, ru Eng bor sengik nu sengoi de sengik Eng kaha-beh bor.”#Kel 33:19 16Jadi, keputusan Jenang de Kipileh sengoi pek begantong ku heknod atao bahneh manusia tapi had begantong ku neyayak Ilei Sendiri taleh. 17Kerana, ku kateh Alkitab mong bicot Jenang Kiurok nu Raja Firaun, “Eng Ngpejadi hek raja untok Ngperneng kuasa Eng melalui hek supaye muh Eng bisebot-sebot ya dikdij mai ku bumi.”#Kel 9:16 18Jadi, Jenang Kiyayak ha sengoi de Kaha-yayak, ru Kibeh sengoi jadi degel nu bok taleh de Kihod naijadi degel.
Bengal ru Neyayak Jenang
19Mong ju engkek doh de beurok begei adeh nu eng: “Jadi, amen begei ajeh, kerana bokhentok pen de dapat belawan ha heknod Jenang, yama Jenang lekat Kiurok manusia ajeh naibesalah?” 20Agokloh bual begei ajeh. Engkek ajeh had manusia taleh ru pek buleh engkepesoal ha Jenang. Bende de bicipte pek buleh kiurok nu sengoi de becipte ha ilei, “Yama eng bicipte begei adeh?” 21Tukang bahbeh periok tik mong hak kaha-beh begeiharok taleh de kihod. Ju nukenapep tik kek buleh kibeh periok untok biguna mase majles istimewe ru untok biguna biasa jap arik.
22Begei ajehloh juga, Jenang buleh Kipejatoh Ibengal ru Kiperneng Ikuasa nu manusia. Tapi Kek ihad sabar nu sengoi-sengoi de layak nairasa Ibengal ru bipemusnah. 23Kek Kibeh begei ajeh supaye buleh Kiperneng Ikemuliean de ihad entoi nu sengoi-sengoi de Kiyayak. Jenang ya Kisedia enai canuk supaye naiterima ha kemuliean ajeh. 24Hik adeh juga ya temasok ku sengoi-sengoi de ya Kipileh ajeh, pek taleh ju mai Yahudi tapi ju mai pek Yahudi juga. 25Ku kateh kitab Nabi Hosea, Jenang Kiurok begei adeh tentang mai pek Yahudi:
“Sengoi-sengoi de enyuk pek sengoi Eng,
doh Ngcereg enai ‘sengoi-sengoi Eng.’
Sengoi-sengoi de pek Nghok,
doh Ngcereg ilei ajeh ‘haknok Eng.’ ”#Hos 2:22
26Ru,
“Ku tempat de ya biurok nu enai,
‘Engkek enyuk pek sengoi-sengoi Eng,’
ku pajeh enai doh bicereg ‘kekenon Jenang de sui.’ ”#Hos 1:10
27Ihad tegas Nabi Yesaya ya kibual tentang mai Israel begei adeh: “Hamapen ijengoi mai Israel begei ha paser ku beg pantei, tapi had nek gek taleh de bipeselamat doh 28kerana TUHAN doh deras Kipejatoh nehukom nu dikdij mai ku bumi.”#Yes 10:22-23 29Ku ayat kilek, Nabi Yesaya kiurok juga, “TUHAN de Ihad Bekuasa ya Kidek kenon-cenok ha hik, jadi dikdij lihik pek bipemusnah begei kote Sodom ru kote Gomora.”#Yes 1:9
Gah Bor ru Mai Israel
30Jadi, adehloh ikesimpulan: Mai pek Yahudi de pek naikerekwat naiha-jadi benar ku mat Jenang ya naijadi benar kerana naipecaya nu Ilei. 31Tapi mai Israel de selalo naikerekwat naijoi ha Hukom Taurat supaye dapat naijadi benar ku mat Jenang pek naikep hal de naikerekwat ajeh. 32Yamaloh? Kerana, enai naikerekwat naiha-jadi benar ku mat Jenang ya tenaat nu hukom, apeka kerana naipecaya nu Ilei. Enai ya naitades batu tenades. 33Tentang hal batu tenades ajeh mong bicot ku kateh Alkitab begei adeh:
“Nengloh, Eng mong Ngdek nanek batu ku kote Sion#9:33 Kote Sion: Adeh kirujok nu kote Yerusalem ku belok mong Lod Sion. de kibeh sengoi naitades.
Ilei ajeh batu entoi de kibeh naiyog.
Tapi, sengoi-sengoi de naipecaya nu Ilei
doh pek bihina.”#Yes 8:14; 28:16
Voafantina amin'izao fotoana izao:
ROM 9: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.