ROM 11
11
Jenang Pek Kinyek ha Sengoi-sengoi Ilei Sendiri
1Jadi ngtanya nij, Jenang ya Kinyek ha bangse Israel sengoi-sengoi Ilei Sendirika? Tentuloh tok! Lieng sendiri mai Israel ru kenon-cenok Abraham ju suku Benjamin. 2Jenang pek Kinyek ha Isengoi-sengoi de ya Kipileh sejak ju imemula. Liengkek ya engkepanei ku kateh Alkitab mong bicot tentang Nabi Elia. Kek kimengadu nu Jenang tentang kelaku niknej de bibeh ya mai Israel, 3“TUHAN, enai ya naiperdat nabi-nabi Jen ru ya naiteh tempat-tempat ennog pesembahan ha Jen. Eng numom taleh de lekat sui ru enai naiha-perdat ha eng juga.”#1 Raj 19:10, 14 4Ma de Jenang Kiberlag? “Eng ya Ngdek ru Ngpeaseg ha LiEng tujoh ribu urag de pek pernah naisembah ha behala Baal.”#1 Raj 19:18 5Jadi, begei ajehloh juga, hunen lekat mong gek mai Israel de ya bipileh ya Jenang kerana ya Ibernor sengik. 6Penileh Jenang ajeh pek kijoi bahneh manusia tapi kijoi ha Ibernor sengik. Amen penileh Jenang ajeh kijoi bahneh manusia, penileh ajeh pek buleh bisebot ‘bernor sengik Jenang.’ Kerana, bernor sengik Jenang ajeh pecume ru Kiog nu mai de pek layak naikep ha Ibernor sengik ajeh.
7Jadi, adehloh de tejadi: Mai Israel naikerekwat naiha-jadi benar ku mat Jenang tapi pek naikep hal ajeh. Had mai de bipileh ya Jenang taleh de kekkep hal ajeh tapi dikdij mai kilek naijadi degel 8kena begei de bicot ku kateh Alkitab, “Lei nu arik adeh, Jenang Kibeh enai pek naisedar, pek dapat naibakek, ru pek dapat naiceringai.”#Ul 29:4; Yes 29:10 9Begei de biurok ya Raja Daud,
“Biarloh caknak pesta enai kijadi jerat ru perangkap ha enai.
Biarloh enai naitades ru bihukom!
10Biarloh mat enai bipebuta supaye pek nainengneng.
Biarloh naijadi cungkoh lei ditehjeh ha kerana genulap enai nyeh.”#Mzm 69:23-24
11Eng ngtanya nij, mase mai Israel naitades, enai pek naikos-kos nijka? Tentuloh tok! Tapi ha kerana naibedosa, nong ha bangse-bangse pek Yahudi ya tebuka supaye enai bipeselamat. Hal ajeh tejadi supaye mai Israel naijadi iri sengik. 12Mai Yahudi naibedosa kerana nainyek ha Kristus, ru hal ajeh kibeh bangse-bangse kilek naikep berkat de pek dij-dij ju Jenang. Enai nairugi kerana nainyek ha Kristus tapi hal ajeh kijadi berkat de pek dij-dij nu mai pek Yahudi. Amen begei ajeh, lebeh entoi nij berkat de biog ya Jenang doh amen dikdij mai Yahudi bipeselamat!
Mai Pek Yahudi Bipeselamat
13Hunen eng ngbelwal nu engkek mai pek Yahudi. Eng ngjadi rasul ha mai pek Yahudi ru eng ngbangge ha tugas eng ajeh. 14Ngbeharap hal de ngbeh ajeh kipetimul rasa iri sengik bangse lieng sendiri supaye engleg ju enai dapat bipeselamat juga. 15Kerana enai binyek ya Jenang, jadi peluang ya tebuka nu dikdij bangse kilek ku dunia adeh supaye naijadi benar ku mat Jenang. Bile mai Yahudi biterima ya Jenang, ikeadaan doh sama begei mai dat de kisui nij!
16Amen nucahneh ju ruti biog nu Jenang, imaksodjeh dikdij ruti ajeh kijadi hak Jenang. Amen reis biog nu Jenang, icag pen kijadi hak Jenang juga. 17Memerip cag bibergot ju keneng zaiton de bicet. Telas ajeh cag ju keneng zaiton liar bikot ru bicantom nu keneng zaiton de bicet ajeh supaye cag ju keneng zaiton liar ajeh kikep zat de bor. Engkek mai pek Yahudi sama begei cag ju keneng zaiton liar ajeh. Engkek bicantom nu majeh supaye engkekep berkat-berkat de bisedia ha mai Yahudi. 18Kerana ajeh, agokloh engkejadi sumbong ru engkerasa liengkek ajeh lebeh bor daripade cag-cag de bibergot ajeh. Ingatloh, engkek ajeh had icag taleh. Apeka icag de kiog zat nu ireis tapi ireisloh de kiog zat nu cag-cag.
19Engkek mungken engkeurok, “Tapi cag-cag ajeh bibergot supaye jik bicantom nu majeh!” 20Hal ajeh mimang betol. Tapi enai bibergot kerana pek naipecaya, ru engkek bicantom nu majeh kerana engkepecaya. Jadi, agokloh sumbong tapi hodloh engkesengoh 21kerana, amen Jenang buleh Kibergot mai Yahudi ju Ilei, Kek dapat Kibeh hal de sama nu engkek juga. 22Jadi, peratikloh ha Ibernor sengik ru Itenggas Jenang ajeh. Ilei ajeh tegas nu mai de pek naipecaya tapi Kek bor Isengik nu engkek, asal taleh engkek lekat engkebegantong ku bernor Isengik. Amen tok, engkek doh bibergot juga ju Ilei. 23Amen mai Yahudi pek naidegel ru naijadi pecaya nu Kristus, enai doh bicantom balek nu keneng asal kerana Jenang ajeh mimang bekuasa Kaha-beh begei ajeh. 24Engkek mai pek Yahudi ajeh begei ha cag de bibergot ju keneng zaiton liar ru bicantom nu keneng zaiton de bicet hamapen hal ajeh kibelawan ru sipat engkek sebegei keneng zaiton liar. Jadi, tentu lebeh senang Jenang Kiperjog mai Yahudi nu keneng de naibeasal ajeh.
Dikdij Mai Israel doh Bipeselamat
25Sesedara seiman, eng nghod engkepanei ha rahsie adeh supaye pek engkejadi sumbong ru bangge diri. Adehloh irahsie ajeh: Engleg ju mai Yahudi ajeh doh degel ru pek naipecaya nu Kristus lei ya genap ijengoi mai pek Yahudi de bipileh ya Jenang naipecaya nu Kristus. 26Begei ajehloh dikdij mai Yahudi doh bipeselamat begei de bicot ku kateh Alkitab,
“Peselamat doh Kihol ju kote Sion.
Kek doh Kipehapos dikdij jenghat ju kenon-cenok Yakub.
27Adehloh jenanji Eng ru enai
mase Ngampon dosa enai.”#Yes 59:20-21; 27:9; Yer 31:33-34
28Kerana mai Yahudi nainyek pek naiha-terima Gah Bor ju Jenang, enai naijadi musoh Jenang. Hal ajeh kijadi berkat nu mai pek Yahudi. Tapi kerana Jenang Kipileh enai, mai Yahudi lekat bihok ya Jenang kerana Jenang ya Kibejanji nu jenang rak enai. 29Amen Jenang ya Kipileh ru Kiberkat nenumom ajeh, Kek pek Kitarek balek hal de ya Kibeh ajeh. 30Entemjeh, engkek pek engketaat nu Jenang tapi hunen engkek ya engkekep neyayak ju Jenang kerana mai Yahudi pek naitaat nu Ilei. 31Hunen mai Yahudi pek naitaat nu Jenang supaye enai pen doh naikep neyayak ju Jenang sama begei neyayak de engkekep ju Jenang. 32Jenang ya Kibeh dikdij mai pek naitaat nu Ilei supaye Kek buleh Kiyayak ha dikdij enai ajeh.
Penateh ha Jenang
33Ihad entoi kenaya, cerendeg, ru penanei Jenang! Mustahel hiha-panei Ikeputusan ru hiha-paham Icare! 34Begei de bicot ku kateh Alkitab,
“Bokka de bepanei peniker TUHAN? Bokhentok!
Bokka de dapat kinasihat ha Kek? Bokhentok!#Yes 40:13
35Bokka de pernah naiengog nu Jenang
lei Kek hod Kibalas ennog enai ajeh? Bokhentok!”#Ayb 41:11
36Kerana, dikdij hal bicipte ya Ilei, Kipelihara ya Ilei, ru ha Ilei. Semoge Jenang bipemulie lei ditehjeh! Amin.
Voafantina amin'izao fotoana izao:
ROM 11: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.