1 KORINTUS 4
4
Hubungan Paulus ru Jemaah Kote Korintus
1Engkek hodloh engkeneng jik adeh sebegei hambe-hambe Kristus de biog tugas untok jiperlei nerancang Jenang de pek bipanei ya mai ku dunia adeh. 2Bile numom hambe ya biog tugas, kek hodloh kibeh tugas ajeh ru setie. 3Gek pen eng pek ngpeduli hamapen engkek atao mong mai kilek de bepiker eng ngbeh salahka tok ku kerjak eng. Pendapat eng tentang diri lieng sendiri pen pek penteng juga. 4Eng ngpanei eng pek ngbesalah tapi hal ajeh pek bemaksod eng pek ngbeh salah. Had Tuhan taleh de mong hak Kaha-petentu eng ngbesalahka tok. 5Jadi, agokloh engkeurok numom besalahka tok kerana pekseg lei imase. Pojloh lei Tuhan Kihol doh. Kekloh doh de Kipeterang dikdij rahsie de bibercep ku kateh gengwer ru Kipasal dikdij niat de mong ku sengik manusia. Ku mase ajeh, baruloh jap-jap mai doh naikep penateh de patot naikep ju Jenang.
6Sesedara seiman! Ku kateh neajar eng cinek, eng ngguna diri lieng sendiri ru diri Apolos sebegei cuntoh ha engkek. Eng ngbeh begei ajeh ha bernor liengkek sendiri supaye engkepaham engrok pepatah adeh: “Joiloh neajar ru ernor de ya bipetetap.” Amen engkejoi engrok ajeh, doh pek mong mai ju engkap engkek de naibangge ha numom pemimpen ru naihina ha pemimpen de kilek. 7Engkek pek buleh engkebeh begei ajeh kerana engkek pek lebeh bor daripade mai kilek. Dikdij ma de mong ku engkek biog ya Jenang, jadi engkek pek buleh engkebelagak seolah-olah ma de mong ku engkek ajeh pek biog ya Jenang.
8Engkek bekelaku begei engkek ajeh ya mong dikdij ma de engkeperlu ru ya engkekaya ku kateh sinui rohani engkek. Engkek bekelaku begei engkek ya mula engkememerintah sebegei raja besama ru Kristus tapi jik tok pek begei engkek ajeh. Eng ngbeharap engkek mimang mula engkememerintah besama ru Kristus supaye jik pen buleh jimemerintah besama ru engkek! 9Ku peniker eng tentang diri lijik adeh, Jenang Kiog tempat de paleng hina nu jik Irasul-rasul. Jik adeh begei mai de biha-hukom dat ku ngar mai jengoi. Dikdij malikat-malikat ru manusia naineng jik adeh biha-perdat. 10Jeoi mai naineng jik adeh budoh kerana jiajar tentang Kristus. Tapi engkesangka engkek ajeh cerdeg kerana engkebenanek ru Kristus. Jeoi mai naineng jik adeh lemah tapi engkesangka liengkek ajeh kuat. Jeoi mai naihina jik tapi engkek bihormat ya mai! 11Lei hunen jicuag ru jihaus, baju jik betej ru niknej, jik bipet, jigei ru jibet ratah. 12Kuat jikerakjak jiha-kek caknak. Bile jik binyeh, jiberkat sengoi ajeh. Bile jik bianiaye, jibesabar taleh. 13Bile jik bipitnah, jibalas ya bengwal de bor. Lei hunen jik bineng begei ha sampah dunia, sama begei kenutor de bipej ya mai.
14Eng ngcot dikdij hal adeh apeka ngha-peselsel ha engkek tapi ngha-tegor engkek de begei ha kekenon lieng de nghok. 15Hamapen mong beribu-ribu guru de beajar engkek tentang Kristus Yesus, tapi engkek pek mong jeoi menek ru engloh menek engkek. Eng adeh ngjadi begei menek engkek kerana engloh de canuk beperlei Gah Bor nu engkek entem. 16Kerana ajeh, eng ngsemanj engkejoi ha cuntoh eng. 17Ajehloh isebab eng ngngeng Timotius nu engkek. Kek begei kenon lieng de nghok ru kek ajeh setie nu Tuhan. Timotius doh kipeingat engkek tentang care sinui eng telas ngpecaya nu Kristus Yesus. Care sinui ajeh ya ngajar nu jap-jap jemaah ku tempat-tempat kilek.
18Mong memerip urag ju engkek de ya naijadi sumbong kerana naisangka eng pek ngha-hol nij ngha-sueg engkek. 19Amen Tuhan Kiog, pek liu nij doh eng deras ngsueg engkek. Lalu eng doh ngneng mongka tok kuasa Jenang ku enai atao had naibual taleh. 20Kerana, amen Jenang Kimemerintah nenumom sebegei Raja, hal ajeh biperneng apeka ya ibengwal tapi ya kuasa Jenang de mong ku kek. 21Jadi, ilei belok de engkepileh? Engkehod nghol nu engkek ru ngajar ru kasar, atao engkehod ngajar ru haknok ru lemah lembot?
Voafantina amin'izao fotoana izao:
1 KORINTUS 4: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.