1 KORINTUS 3
3
Kerakjak Besama ha Jenang
1Sesedara seiman! Canukjeh, mase eng mong besama ru engkek ku pajeh, eng pek buleh ngajar engkek begei ngajar mai de mong Kelog Santen. Tapi ngajar engkek begei ngajar mai duniawi de lekat sanget kateh Kristus. 2Ku mase ajeh, eng ngajar engkek ngguna neajar de pek jerek imaksod. Engkek ajeh begei sanget de biog susu taleh. Eng pek ngajar ngguna neajar de jerek imaksod kerana engkek pekseg buleh engkecak caknak mai raknak. Tapi hunen pen engkek lekat pekseg buleh engkecak caknak ajeh 3kerana engkek lekat engkesui engkejoi heknod manusia. Bile engkecemburu ha sesedara seiman de kilek ru selalo engkebejawab ratak liengkek, kelaku engkek ajeh kiperneng sinui engkek lekat kijoi heknod manusia. Sinui engkek ajeh pek begei ha sinui mai de naikenal ha Jenang. 4Bile numom kiurok ilei ajeh pengikot eng, ru numom de kilek nij kiurok ilei ajeh pengikot Apolos, bengwal jenawab de begei ajehloh kelaku mai de pek naikenal ha Jenang.
5Ngha-tanya nu engkek. Apolos ajeh bok? Ru Paulus ajeh bok? Jar adeh hambe Tuhan taleh de jarpimpen engkepecaya nu Kristus. Jarbeh kerjak lijar memaseg de biog ya Tuhan. 6Eng de cekcet, Apolos de besiram, tapi Jenang Sendiri de Kipecuai ceknet ajeh. 7Mai de cekcet ru mai de besiram pek penteng. Had Jenang taleh de penteng kerana Kekloh de Kibeh ceknet ajeh kicuai. 8Mai de cekcet ru mai de besiram sama taleh. Jenang doh Kibalas bor nu enai Kijoi kerenjak liknai memaseg. 9Jik adeh mai de kerakjak besama ru Jenang, ru engkekloh selai ru deg Jenang.
10Kerana ya bernor sengik Jenang nu eng, eng ya ngbeh asas deg Jenang begei mai de panei bahbeh deg. Mai kilekloh de bahbeh deg ku kemil asas de ngbeh ajeh. Jap mai de bahbeh hodloh naibeh ru cermat 11kerana pek mong numom pen de buleh kibeh asas de kilek daripade asas de ya bibeh. Asas ajeh Yesus Kristus. 12Mong mai de naiguna mas, atao perak, atao batu permate naibeh deg ku kemil asas ajeh. Mong juga mai de naiguna jehuk, atao rumpot de sod, atao jog-jog bak. 13Pek kira barang ma taleh de biguna, borka tok kerjak de bibeh ya jap-jap mai ajeh doh biperneng ku arik helnol Kristus. Kerana, ku arik ajeh, os doh kiuji borka tok kerjak jap-jap mai ajeh. 14Amen deg numom ajeh tahan ru pek bicak ya os, kek doh kikep ibenalas bor. 15Tapi amen deg numom ajeh bicak ya os, kek doh kirugi tapi ilei doh bipeselamat. Begei sengoi de bipeselamat ju deg de ngej, sengoi ajeh doh lekat sui tapi ideg dij ngej.
16Tentu ya engkepanei tentang hal adeh: Engkek ajeh deg Jenang ru Kelog Jenang Kigei ku engkap engkek! 17Amen mong mai de kiperusak deg Jenang (imaksodjeh kibeh jemaah-jemaah naiceraklah), Jenang doh Kipebinasa sengoi ajeh kerana deg Jenang has ha Ilei Kihalei taleh ru engkek ajeh deg Jenang ajeh.
18Engkelenglod ha diri liengkek sendiri amen engkepiker diri liengkek ajeh cerdeg. Amen mong mai ku engkap engkek kirasa ilei cerdeg ku penilaian dunia adeh, kek hodloh kijadi begei mai budoh supaye kijadi cerdeg ku mat Jenang. 19Cerendeg dunia adeh bianggap budoh ya Jenang kerana ku kateh Alkitab mong bicot, “Jenang Kijerat mai de cerdeg ya cerendeg liknai sendiri.”#Ayb 5:13 20Juga mong bicot, “TUHAN Kipanei peniker mai de cerdeg ajeh pek beguna.”#Mzm 94:11 21Jadi, agokloh engkepemegah ha diri liengkek sendiri sebegei pengikot eng, atao pengikot Apolos, atao pengikot pemimpen de kilek. Kerana, dikdij hal biog ya Jenang ha bernor liengkek sendiri: 22Pek kira Pauluska, Apoloska, Petruska, dunia adehka, sinui atao dananka, hunen atao pigoi dohka, dikdij ajeh hak engkek 23ru engkek ajeh hak Kristus. Kristus ajeh hak Jenang.
Voafantina amin'izao fotoana izao:
1 KORINTUS 3: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.