ယောဟန် 7
7
ကိုယ့်ညီရို့န ယေရှု စကားပြောခြင်း
1 ယုဒဂေါင်းဆောင်ရို့စာ ယေရှုကို အသီသတ်ဖို့ ကြံကတ်လီရေ။ ယင်းအတွက်န သူစာ ယုဒပြည်နယ်တို့ မကြွဘိုင်းန ဂါလိလဲပြည်နယ်မာ အမျိုးမျိုး နေရာမာ လည်ရို့ နီလီရေ။
2ယင်းအချိန်စာ ယုဒလူမျိုးရို့မာ “တဲခုတ်သျှေပွဲ” ကျဖို့ပါးလာစာ အချိန် ဖြစ်တေ။ 3ယင်းအတွက်န ယေရှုမာ ညီရို့စာ သူ့ကို ပြောကတ်လီရေ၊ “နင့်မာ တပည့်ရို့ နင် လုပ်စာ အံ့ဩဖွယ်အလုပ်တိကို မြင်လတ်အောင် နင် ဒေ နေရာက ထွက်ရို့ ယုဒပြည်နယ်တို့ လားလီ။ 4အသူမဆို ကိုယ့်ကို နာမည်ကျော်လူတစ်ယောက် ဖြစ်ချင်ရေဆိုကေ သူစာ ကိုယ့်အလုပ်တိကို တစ်ခါလည်း ဖုံးရွှက်ရို့ မထား။ ဒေ အံ့ဩဖွယ်အလုပ် အားကုံးကို လုပ်ရို့ နင် ကိုယ့်ကို လောကသားရို့ဘားမာ ဖေါ်ပြ။” 5အကြောင်းကား ယေရှုမာ ညီရို့လည်း ယေရှုကို မကျုံကတ်တေအတွက်န ထိုစကားတိကို ပြောလီကတ်စာ ဖြစ်တေ။
6ယင်းခါ ယေရှုစာ ကိုယ့်ညီရို့ကို ပြောလီရေ၊ “ငါ့မာ ဒေဂုလည်း အချိန် မကျသိ၊ ယေကေလည်း နင်ရို့ကား ဇာအချိန်မာပင်မဆို လားနိုင်ကတ်တေ။ 7ဒေ လောကမာ လူရို့စာ နင်ရို့ကို မမုန်းနိုင်ကတ်၊ ယေကေလည်း ငါစာ သူရို့မာ ဆိုးယုတ်စာ အလုပ်တိကို ဖေါ်ပြရေအတွက်န သူရို့စာ ငါ့ကို မုန်းကတ်တေ။ 8ငါ့မာ အချိန် မကျသိရေအတွက်န ငါ ထိုပွဲတို့ မလားသိ။ ထိုပွဲတို့ နင်ရို့ လားလီကတ်။” 9ထိုစကားတိကို ပြောပြီးရေနောက် ယေရှုစာ ဂါလိလဲပြည်နယ်မာ ကျန်ဟိလိုက်လီရေ။
ယေရှု ယေရုရှလင်မြို့တို့ ကြွခြင်း
10ယေရှုမာ ညီရို့စာ ယုဒပြည်နယ် ယေရုရှလင်မြို့မာ ပွဲတို့ လားခကတ်လီရေ။ ယင်းနောက် ယေရှုလည်း ထိုပွဲတို့ ကြွလီရေ၊ ယေကေလည်း သူစာ အခိုးအရွှက် ကြွလီစာ ဖြစ်တေ။ 11ယုဒဂေါင်းဆောင်ရို့စာ ပွဲနိမာ ယေရှုကို ရှာရို့ အခြားလူရို့ကို မီးကတ်လီရေ၊ “ထိုလူ ဇာမာလည်း?”
12ယင်းခါ ထိုပွဲမာ လူအများကြီး ဟိကတ်လီရေ။ လူရို့စာ ယေရှု အကြောင်းကို ယူရို့ တတိုးသျှသျှပ် ပြောကတ်လီရေ။ တစ်ချိုးလူရို့စာ၊ “ယင်းလူကား သူတော်ကောင်း တစ်ယောက် ဖြစ်တေ” ဟို့ ပြောကတ်လီရေ။ ယေကေလည်း အရာတစ်ချိုးလူရို့စာ၊ “ဇာ သူတော်ကောင်း ဖြစ်ပြန်ဖို့လည်း! ယင်းသူ လူရို့ကို အမှားလမ်းတို့ ဆောင်ယူလားသူ တစ်ယောက် ဖြစ်တေ” ဟို့ ပြောကတ်လီရေ။ 13ယေကေလည်း သူရို့စာ ယုဒဂေါင်းဆောင်ရို့ကို ကြောက်တေအတွက်န တစ်ယောက်လည်း ယေရှု အကြောင်းကို ယူရို့ ပပွင့်လလင်း ပြောဖို့ မဝံ့ကတ်လီ။
ယေရှု ဝိပဿနာကျောင်းမာ သွန်သင်ခြင်း
14တဲခုတ်သျှေပွဲ အလယ်နိမာ ယေရှုစာ ဝိပဿနာကျောင်းတို့ ကြွရို့ လူရို့ကို သွန်သင်ပီးဖို့ စလီရေ။ 15ယင်းခါ ယုဒဂေါင်းဆောင်ရို့စာ အံ့ဩရို့ ပြောကတ်လီရေ၊ “ဒေလူ တစ်ခါပင် စာမသင်ဖူးဘိုင်းန ဇာပိုင်ပျင်ရို့ ဒေ ပညာတိကို တတ်စာလည်း?” 16ယေရှုစာ ဂေါင်းဆောင်ရို့ကို အဖြေပီးလီရေ၊ “ငါ ဟောပြောစာ တရားစာ ငါ့တရား မဟုတ်။ ငါ့ကို ရွှတ်လိုက်သူ၏ တရား ဖြစ်တေ။ 17ထာဝရဘုရား၏ အလိုတော်ကို လိုက်ချင်သူစာ ငါ ဟောပြောစာ တရားကို ထာဝရဘုရား၏ တရားလော၊ မဟုတ်ကေ ငါ့အလိုအတိုင်း ဟောပြောစာ တရားလောဆိုစာကို သိရလိမည်။ 18ကိုယ့်အလိုအတိုင်း ဟောပြောသူစာ ကိုယ့်ကိုကိုယ် ချီမွမ်းခြင်း ရဖို့အတွက် ကြိုးစားရေ။ ယေကေလည်း မှန်ကန်ခြင်းန ပြည့်စုံသူစာ ကိုယ့်ကို ရွှတ်လိုက်စာ ထာဝရဘုရားကို ချီမွမ်းဖို့အတွက် ကြိုးစားရေ။ ယင်းသူ စိတ်မာ တစ်ခုလည်း မရိုးသားစာ မဟိ။ 19မောရှေ ကိုယ်ဘင်ရို့ကို ပညှတ်တရား ပီးလီရေ မဟုတ်လော? ယေကေလည်း ကိုယ်ဘင်ရို့အထဲက ထိုပညှတ်တရားကို တစ်ယောက်လည်း မလိုက်နာကတ်။ ယင်းပိုင်ဆိုကေ ကိုယ်ဘင်ရို့ ငါ့ကို ဇာဖို့ အသီသတ်ဖို့ ကြိုးစားကတ်စာလည်း?”
20လူရို့စာ ယေရှုကို ပြောကတ်လီရေ၊ “အဝေး၊ နင့်ကို နတ်ဆိုး ကိုင်နီဗျာ! နင့်ကို အသူ အသီသတ်ဖို့ ကြိုးစားစာလည်း?” 21ယေရှုစာ သူရို့ကို ပြောလီရေ၊ “ငါ အံ့ဩဖွယ်အလုပ် တစ်ခု လုပ်တေအတွက်န ကိုယ်ဘင်ရို့ အားကုံးသူ အံ့ဩကတ်တေ။ 22မောရှေစာ ကိုယ်ဘင်ရို့ကို အရီဖျားလှီးမင်္ဂလာ လုပ်ဖို့ ထုံးစဉ်ကို ပီးလီရေ။ ယင်းအတွက်န ကိုယ်ဘင်ရို့ သတင်းနိမာလည်း အသျှေရို့ကို အရီဖျားလှီးမင်္ဂလာ လုပ်နီကတ်တေ။ (ယေကေလည်း အမှန် ပြောလိုက်ဖို့ဆိုကေ ယင်းထုံးစဉ်စာ မောရှေက လာစာ မဟုတ်။ အယင်ကခါ အဖိုးအဖီးအစိုင်လာရို့က လာစာဖြစ်တေ)။ 23မောရှေပီးစာ ထုံးစဉ်ကို လိုက်နာဖို့အတွက် ကိုယ်ဘင်ရို့ သတင်းနိမာလည်း အသျှေရို့ကို အရီဖျားလှီးမင်္ဂလာ လုပ်နီကတ်တေ။ ယင်းပိုင်ဆိုကေ ငါ လူတစ်ယောက်ကို သတင်းနိမာ အပြည့်အစုံ အကောင်းဖြစ်အောင် လုပ်တေခါ ကိုယ်ဘင်ရို့ ဇာဖို့ ငါ့ကို မန်ပါကတ်စာလည်း? 24ကိုယ်ဘင်ရို့ လူမျက်နှာကို ကြည့်ရို့ တရားမစစ်ဆေးကတ်ကေ့၊ တရားသဖြင့် စစ်ဆေးကတ်။”
ဒေလူ အမှန် ခရစ်တော်လော?
25ယင်းခါ ယေရုရှလင်မြို့သား လိုင်းကေယောက် ပြောကတ်လီရေ၊ “ဒေ လူကို ဂေါင်းဆောင်ရို့ အသီသတ်ဖို့ ကြံကတ်တေ မဟုတ်လော? 26ကြည့်ကတ်၊ ဒေလူ အားကုံးသူ ရှိထက်က ပပွင့်လလင်း သွန်သင်နီရေ၊ ယေကေလည်း ဒေလူကို တစ်ယောက်လည်း မဟန့်ကတ်ကား! ယင်းပိုင်ဆိုကေ ဒေလူ အမှန် ခရစ်တော် ဖြစ်တေဆိုစာကို ဂေါင်းဆောင်ရို့ သိကတ်ပျာလော? 27ယေကေလည်း ဒေလူ ဇာက လာရေလည်းဆိုစာကို ငါရို့ သိရေ။ ယေကေလည်း ခရစ်တော် ကြွလာရေခါ ဇာက ကြွလာဖို့လည်းဆိုစာကို တစ်ယောက်လည်း သိကတ်လိမည် မဟုတ်။”
28ယေရှု ဝိပဿနာကျောင်းမာ သွန်သင်ပီးရေခါ အားန ပြောလီရေ၊ “ငါ အသူလည်းဆိုစာကို ကိုယ်ဘင်ရို့ သိကတ်တေ၊ အရာ ငါ ဇာက လာရေဆိုစာကိုလည်း ကိုယ်ဘင်ရို့ သိကတ်တေ၊ ယေကေလည်း ငါ ကိုယ့်အခွင့်အာဏာန လာစာ မဟုတ်။ ယင်းထက်ပင် မှန်ကန်ခြင်းနပြည့်စုံစာ ထာဝရဘုရား ငါ့ကို ရွှတ်လိုက်စာ ဖြစ်တေ။ 29ကိုယ်ဘင်ရို့ ထာဝရဘုရားကို မသိကတ်၊ ယေကေလည်း ငါ ထာဝရဘုရားက လာလီရေအတွက်န ထာဝရဘုရားကို သိရေ။ ထာဝရဘုရားရာ ငါ့ကို ရွှတ်လိုက်စာ ဖြစ်တေ။”
30ယင်းခါ ထိုလူရို့စာ ယေရှုကို ဖမ်းဖို့ ကြည့်ကတ်လီရေ၊ ယေကေလည်း ယေရှုမာ အချိန် မကျသိရေအတွက်န တစ်ယောက်လည်း သူ့ကို မဖမ်းကတ်လီ။ 31ယေကေလည်း ဝိပဿနာကျောင်းမာ လူအများကြီး ယေရှုကို ကျုံရို့ ပြောကတ်လီရေ၊ “ခရစ်တော် ကြွလာရေခါ ဒေလူထက် အရာလည်း အများကြီး အံ့ဩဖွယ်-နိမိတ်လက္ခဏာ အလုပ်တိကို လုပ်ပြဖို့သိလော? ဒေ လူကား အများကြီး အံ့ဩဖွယ်-နိမိတ်လက္ခဏာ အလုပ်တိကို လုပ်ပြဗျာ။”
ယေရှုကို ဖမ်းဖို့ ရွှတ်ခြင်း
32လူရို့ ယေရှု အကြောင်းကို ယူရို့ တတိုးသျှသျှပ် ပြောကတ်စာကို ဖာရိရှဲအဖွဲ့သားရို့ ကြားကတ်လီရေ။ ယင်းခါ သူရို့စာ ယုဒလူမျိုးရို့မာ ယဇ်ပုရောဟိတ်အကြီးရို့န တိုင်ဘင်ရို့ ယေရှုကို ဖမ်းဖို့အတွက် ဝိပဿနာကျောင်းမာ အစောင့်သား လိုင်းကေယောက်ကို ရွှတ်လိုက်ကတ်လီရေ။ 33ယင်းခါ ယေရှုစာ လူရို့ကို ပြောလီရေ၊ “ငါ ကိုယ်ဘင်ရို့နအတူ ရက်တာရှည် မနီဗျာ၊ ငါ့ကို ရွှတ်လိုက်သူတို့ ငါ ပြန်လားဖို့ဗျာ။” 34ယင်းခါ ကိုယ်ဘင်ရို့ ငါ့ကို ရှာကတ်လိမည်၊ ယေကေလည်း တွိကတ်လိမည် မဟုတ်။ အရာ ငါ နီဖို့စာ နေရာတို့ ကိုယ်ဘင်ရို့ လာနိုင်ကတ်လိမည် မဟုတ်။
35ယေရှု ပြောစာစကားကို ကြားရို့ ယုဒဂေါင်းဆောင်ရို့စာ ကိုယ်ရို့အချင်းချင်း ပြောကတ်လီရေ၊ “ငါရို့ ရှာရို့ မတွိလတ်အောင် ဒေသူ ဇာနေရာတို့ လားဖို့စာလည်း? ယုဒမဟုတ်သူရို့ မြို့တိမာ ငါရို့ ယုဒလူမျိုးရို့ ကွဲကြင်းရို့ ဟိကတ်တေ။ ဒေသူ ထိုမြို့တိမာ လားရို့ ယုဒမဟုတ်သူရို့ဘားမာ သွန်သင်ပီးဖို့စာလော? 36‘ကိုယ်ဘင်ရို့ ငါ့ကို ရှာကတ်လိမည်၊ ယေကေလည်း တွိကတ်လိမည် မဟုတ်။ အရာ ငါ နီဖို့စာ နေရာတို့ ကိုယ်ဘင်ရို့ လာနိုင်ကတ်လိမည် မဟုတ်’ ဟို့ ဒေသူ ပြောစာစကား အဓိပ္ပါယ် ဇာလည်း?”
သန့်ရှင်းသောဝိညာဉ်တော် အကြောင်း
37တဲခုတ်သျှေပွဲ နောက်ဆုံးနိစာ ရက်ကြီးရက်မြတ် ဟိလီရေ။ ယင်းနိမာ ယေရှုစာ ရပ်ရို့ အားန အော်ရို့ ပြောလီရေ၊ “ရီသောက်မွတ်သူ ဟိရေဆိုကေ ငါ့တို့ လာရို့ သောက်ခလိုက်။ 38ငါ့ကို ကျုံသူစာ ကျမ်းစာမာ ရွီးရို့ ဟိစာပိုင် သူ့စိတ်နှလုံးမာ ရီမျက်တွင်းတည်ရို့ အသက်ပီးစာ ရီထွက်နီလိမည်။” 39သန့်ရှင်းသောဝိညာဉ်တော် အကြောင်းကို ယေရှု ပြောလီစာ ဖြစ်တေ။ ယေရှုကို ကျုံသူရို့စာ ထိုသန့်ရှင်းသောဝိညာဉ်တော်ကို ရကတ်ဖို့၊ ယေကေလည်း ယင်းအချိန်ခါ ယေရှုမာ ဘုန်းတန်ခိုးအပြည့်အစုံ ပြန်ရို့ မရလီသိ။ ယင်းအတွက်န လူရို့ကို သန့်ရှင်းသောဝိညာဉ်တော် မပီးလီသိ။
ယေရှုကို ယူရို့ လူရို့အထဲမာ စိတ်သဖေါကွဲခြင်း
40လူအများကြီး ယေရှု ပြောစာစကားတိကို ကြားကတ်တေခါ သူရို့အထဲက တစ်ချိုးလူရို့စာ ပြောကတ်လီရေ၊ “ဒေလူ အမှန် ငါရို့ မျှော်လင်းနီကတ်စာ ဘုရားသတင်းပို့သူတစ်ပါး ဖြစ်တေ။”
41အရာ တစ်ချိုးလူရို့စာ ပြောကတ်လီရေ၊ “ဒေလူ ခရစ်တော် ဖြစ်တေ။”
ယေကေလည်း တစ်ချိုးလူရို့စာ ပြောကတ်လီရေ၊ “ခရစ်တော် ဇာပိုင်ပျင်ရို့ ဂါလိလဲပြည်နယ်က ကြွလာဖို့စာလည်း? 42‘ခရစ်တော်စာ ဒါဝိဒ်မင်း၏ သားတော် ဖြစ်ဖို့ အရာ သူစာ ဒါဝိဒ်မင်း မွီးဖွားစာ ဗက်လင်မြို့က ကြွလာဖို့’ ဟို့ ကျမ်းစာမာ ရွီးရို့ ဟိရေ မဟုတ်လော?” 43ယင်းပိုင် လူရို့အထဲမာ ယေရှု အကြောင်းကို ယူရို့ စိတ်သဖေါကွဲကတ်လီရေ။ 44တစ်ချိုးလူရို့စာ ယေရှုကို ဖမ်းဖို့ ကြည့်ကတ်လီရေ၊ ယေကေလည်း သူ့ကို တစ်ယောက်လည်း မဖမ်းကတ်လီ။
ဂေါင်းဆောင်ရို့ ယေရှုကို မကျုံခြင်း
45ယေရှုကို ဖမ်းဖို့ ရွှတ်လိုက်လီစာ အစောင့်သားရို့စာ ယဇ်ပုရောဟိတ်အကြီးရို့န ဖာရိရှဲအဖွဲ့သားရို့တို့ ပြန်လာကတ်လီရေ။ ယင်းခါ သူရို့စာ အစောင့်သားရို့ကို မီးကတ်လီရေ၊ “နင်ရို့ ဇာဖို့ ယင်းသူကို ဖမ်းရို့ မယူခကတ်စာလည်း?” 46ယင်းခါ အစောင့်သားရို့စာ ပြောကတ်လီရေ၊ “ထိုလူ စကားပြောစာပိုင် အခြားတစ်ယောက်လည်း တစ်ခါပင် မပြောကတ်ပါသိ။”
47ယင်းအတွက်န ဖာရိရှဲအဖွဲ့သားရို့စာ ပြောကတ်လီရေ၊ “ယင်းပိုင်ဆိုကေ နင်ရို့လည်း ယင်းသူဘားမာ အလိမ်ခံကတ်ပျာလော? 48ယေကေလည်း ဂေါင်းဆောင်ရို့န ငါရို့အထဲက တစ်ယောက်လည်း ယင်းလူကို မကျုံကတ်ကား! 49မောရှေ၏ ပညှတ်တရားကို နားမလည်ကတ်သူရို့စာ ထာဝရဘုရား၏ ကျိန်ဆဲထည့်ခြင်းကို ခံရနီကတ်တေ။”
50ဖာရိရှဲအဖွဲ့သားရို့အထဲမာ နိကောဒန်နာမည်န လူတစ်ယောက် ဟိလီရေ။ သူစာ အယင် တစ်ခေါက် ယေရှုတို့ လာလီရေ။ 51နိကောဒန်စာ ပြောလီရေ၊ “ငါရို့ ပညှတ်တရားအတိုင်း လူတစ်ယောက်ကို တရားစစ်ဖို့အတွက် ပထမဆုံး ထိုလူ စကားကို နားထောင်ရဖို့ အရာ သူ ဇာလုပ်တေလည်းဆိုစာကို သိရဖို့။” 52ဖာရိရှဲအဖွဲ့သားရို့စာ နိကောဒန်ကို ပြောကတ်လီရေ၊ “နင်လည်း ဂါလိလဲပြည်နယ်သားလော? နင် ကျမ်းစာမာ ရှာကြည့်ကေ သိရလိမည်၊ ဂါလိလဲပြည်နယ်ထဲက ဘုရားသတင်းပို့သူတစ်ပါးလည်း ကြွလာဖို့ စကား မဟိ။”
[ပထမဆုံး ရွီးလီစာ ဂရိဘာသာ ကျမ်းစာအဟောင်းတိမာ ဒေ ၇:၅၃-၈:၁၁ မာ စကားတိ ရွီးရို့ မဟိပါ။]
53ယင်းနောက် သူရို့ အားကုံးသူ ကိုယ်ရို့အိမ်တို့ ပြန်လားခကတ်လီရေ။
Voafantina amin'izao fotoana izao:
ယောဟန် 7: RMZ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©2023 Wycliffe Bible Translators, Inc.
