ယောဟန် 8
8
သျှောက်ခိုးစာ မိန်းမ အကြောင်း
1ယေကေလည်း ယေရှုစာ သံလွင်တောင်တို့ ကြွလီရေ။ 2နောက်တစ်ရက်နိ စောစောက ယေရှုစာ ပြန်ရို့ ဝိပဿနာကျောင်းတို့ ကြွလာလီရေ။ ယင်းခါ ဟိသမျ လူရို့စာ ယေရှုတို့ လာကတ်လီရေ အရာ သူစာ ထိုင်ရို့ ထိုလူရို့ကို သွန်သင်ပီးဖို့ စလီရေ။ 3ယင်းအချိန်ခါ ကျမ်းဆရာရို့န ဖာရိရှဲအဖွဲ့သားရို့စာ အခြားယောက်ျားန သျှောက်ခိုးရို့ ဖမ်းရစာ မိန်းမတစ်ယောက်ကို ယေရှုတို့ ယူလာကတ်လီရေ။ ယင်းနောက် သူရို့စာ ယင်းမိန်းမကို အားကုံးသူ ရှိက ရပ်စီလီရေ။ 4အရာ သူရို့စာ ယေရှုကို မီးကတ်လီရေ၊ “ဆရာ၊ အကျွန်ရို့ ဒေ မိန်းမကို အခြားယောက်ျားန သျှောက်ခိုးရို့ ဖမ်းရလီပါရေ။ 5ဒေပိုင် သျှောက်ခိုးရို့ ဖမ်းရစာ မိန်းမကို ကျောက်ခဲန ဘိုက်ရို့ သတ်ရဖို့ ဟို့ မောရှေ၏ ပညှတ်တရားမာ ရွီးရို့ ဟိပါရေ။ ယေကေလည်း ကိုယ်ဘင် အကျွန်ရို့ကို ပြောပါ၊ အကျွန်ရို့ ဒေ မိန်းမကို ဇာ လုပ်ဖို့ သင့်ပါရေလည်း?”
6ယေရှု ဇာမဆိုတစ်ခု အမှားပြောရေဆိုကေ ယေရှုကို အပြစ်တင်ရို့ ဖမ်းဖို့ရလတ်အောင် ဂေါင်းဆောင်ရို့ ထိုစကားကို မီးရို့ စုံစမ်းလီကတ်စာ ဖြစ်တေ။ ယေကေလည်း ယေရှုစာ ငုံ့ရို့ မြေပြင်မာ လက်ညှိုးန ရွီးရို့ နီလီရေ။ 7ထိုဂေါင်းဆောင်ရို့စာ ယေရှုကို အပြန်ပြန် မီးကတ်လီရေ။ ယင်းခါ ယေရှုစာ သူရို့ကို မော်ကြည့်ရို့ ပြောလီရေ၊ “ကိုယ်ဘင်ရို့အထဲမာ တစ်ခါလည်း အပြစ် မလုပ်သူ ဟိရေလော? ဟိရေဆိုကေ ယင်းသူ ပထမဆုံး ဒေ မိန်းမကို ကျောက်ခဲ ဘိုက်ရို့ သတ်ခလိုက်။” 8ယင်းနောက် ယေရှုစာ အရာတစ်ပြန် ငုံ့ရို့ မြေပြင်မာ လက်ညှိုးန ရွီးရို့ နီလီရေ။
9ယေရှု ပြောစာစကားကို ကြားရို့ အသက်ကြီးသူကပင်စရို့ တစ်ယောက်ပြီးကေ တစ်ယောက် အားကုံးသူ ထွက်လားခကတ်လီရေ။ ယင်းခါ ယေရှု တစ်ပါးတည်း ယင်းမိန်းမန ကျန်ဟိလိုက်လီရေ အရာ ယင်းမိန်းမစာ ယေရှု ရှိက ရပ်ရို့ ဟိလီရေ။ 10ယင်းခါ ယေရှုစာ မော်ကြည့်ရို့ ယင်းမိန်းမကို မီးလီရေ၊ “နမှ၊ နင့်ကို ဖမ်းယူခသူရို့ ဇာတို့ လားခကတ်တေလည်း? နင့်ကို အပြစ်ဒါဏ် ခံသင့်ရေ ဟို့ တစ်ယောက်လည်း မပြောကတ်လော?” 11ယင်းမိန်းမစာ ယေရှုကို အဖြေပီးလီရေ၊ “အကျွန့်ကို အပြစ်ဒါဏ် ခံသင့်ရေ ဟို့ တစ်ယောက်လည်း မပြောကတ်ပါ ဆရာ။”
ယင်းခါ ယေရှုစာ ပြောလီရေ၊ “ငါလည်းသောက် နင့်ကို အပြစ်ဒါဏ် မပီး။ လားလီ၊ နင် အရာ အပြစ် မလုပ်လီကေ့ဖိ။”
ယေရှု လောက၏ အလင်းဖြစ်ခြင်း
12ယင်းနောက် ယေရှုစာ အရာတစ်ပြန် လူရို့ကို ပြောလီရေ၊ “ငါစာ လောက၏ အလင်းဖြစ်တေ။ ငါ့နောက်က လိုက်သူစာ တစ်ခါလည်း အမိုက်မှောင်မာ နီလိမည် မဟုတ်။ သူစာ အသက်ပီးစာ အလင်းကို ရလိမည်။” 13ယင်းခါ ဖာရိရှဲအဖွဲ့သားရို့စာ ယေရှုကို ပြောကတ်လီရေ၊ “နင် ကိုယ့်အကြောင်းကိုကိုယ် သက်သီပီးနီရေအတွက်န နင်ပီးစာ သက်သီ မမှန်။”
14ယေရှုစာ သူရို့ကို ပြောလီရေ၊ “ငါ ကိုယ့်အကြောင်းကိုကိုယ် သက်သီ ပီးကေလည်းသောက် ငါပီးစာ သက်သီ မှန်ရေ၊ အကြောင်းကား ငါစာ ဇာက လာရို့ ဇာတို့ လားရေဆိုစာကို သိရေ။ ယေကေလည်း ငါ ဇာက လာရို့ ဇာတို့ လားရေဆိုစာကို ကိုယ်ဘင်ရို့ မသိကတ်။ 15ကိုယ်ဘင်ရို့စာ လောကသားရို့ပိုင်တထန် တရားစစ်ဆေးနီကတ်တေ။ ယေကေလည်း ငါ တစ်ယောက်ကိုလည်း တရားမစစ်ဆေး။ 16ငါ တရားစစ်ဆေးကေလည်း ငါ တစ်ယောက်တည်း တရားစစ်ဆေးစာ မဟုတ်။ ငါ့ကို ရွှတ်လိုက်စာ အဖလည်း ငါနအတူ တရားစစ်ဆေးရေ။ ယင်းအတွက်န ငါ စစ်ဆေးစာတရား မှန်ရေ။ 17လူနှစ်ယောက် တစ်ချက်တည်း သက်သီ ပီးရေဆိုကေ မှန်ရေ ဟို့ ကိုယ်ဘင်ရို့ ပညှတ်တရားမာ ရွီးရို့ ဟိရေ။ 18ငါစာ ကိုယ့်အကြောင်းကို သက်သီ ပီးရေ အရာ ငါ့ကို ရွှတ်လိုက်စာ အဖလည်း ငါ့အကြောင်းကို သက်သီ ပီးရေ။ ငါန ငါ့အဖ နှစ်ယောက်စုံ တစ်ချက်တည်း သက်သီ ပီးရေ။” 19ယင်းခါ ဖာရိရှဲအဖွဲ့သားရို့စာ ယေရှုကို မီးကတ်လီရေ၊ “နင့် အဖ ဇာမာလည်း?” ယေရှုစာ သူရို့ကို အဖြေပီးလီရေ၊ “ကိုယ်ဘင်ရို့ ငါ့ကို မသိကတ် အရာ ငါ့အဖကိုလည်း မသိကတ်။ ကိုယ်ဘင်ရို့ ငါ့ကို သိကတ်ဖို့ဆိုကေ ငါ့အဖကိုလည်း သိကတ်ဖို့။”
20ယေရှု ထိုစကားတိကို ဝိပဿနာကျောင်းထဲမာ ဌာပ္ပနာဗူးဟိစာ အခန့်မာ ရပ်ရို့ လူရို့ကို သွန်သင်ပီးလီရေ။ ယေကေလည်း ယေရှုမာ အချိန် မကျသိရေအတွက်န တစ်ယောက်လည်း သူ့ကို မဖမ်းကတ်လီ။
ကိုယ်သီဖို့စာ အကြောင်းကို ပြောပြခြင်း
21ယေရှုစာ ဖာရိရှဲအဖွဲ့သားရို့ကို အရာတစ်ပြန် ပြောလီရေ၊ “ငါ လားဖို့ဗျာ။ ကိုယ်ဘင်ရို့ ငါ့ကို ရှာကတ်လိမည်၊ ယေကေလည်း ကိုယ်ဘင်ရို့ ငါ လားစာနေရာတို့ လာနိုင်ကတ်လိမည် မဟုတ်။ ကိုယ်ဘင်ရို့ ကိုယ့်အပြစ်အကြောင်းန ကိုယ် သီရကတ်လိမည်။” 22ယင်းခါ ယုဒဂေါင်းဆောင်ရို့စာ ပြောကတ်လီရေ၊ “ဒေသူ၊ ‘ငါ လားစာ နေရာတို့ ကိုယ်ဘင်ရို့ လာနိုင်ကတ်လိမည် မဟုတ်’ ဟို့ ဇာဖို့ ပြောစာလည်း? ဒေသူ ကိုယ့်ကိုကိုယ် သတ်ရို့ သီဖို့စာလော?”
23ယေရှုစာ သူရို့ကို ပြောလီရေ၊ “ကိုယ်ဘင်ရို့ အောက်က မွီးဖွားလာသူရို့ ဖြစ်ကတ်တေ။ ငါစာ အထက်က ဆင်းလာသူ ဖြစ်တေ။ ကိုယ်ဘင်ရို့ ဒေ လောကသား ဖြစ်ကတ်ကေလည်း ငါစာ ဒေ လောကသား မဟုတ်။ 24ယင်းအတွက်န၊ ‘ကိုယ်ဘင်ရို့ ကိုယ့်အပြစ်အကြောင်းန ကိုယ် သီရကတ်လိမည်’ ဟို့ ငါ အယင်တစ်ခေါက် ကိုယ်ဘင်ရို့ကို ပြောလီရေ။ ငါစာ ထိုသူ ဖြစ်တေဆိုစာကို ကိုယ်ဘင်ရို့ မကျုံဆိုကေ ကိုယ်ဘင်ရို့ ကိုယ့်အပြစ်အကြောင်းန ကိုယ် သီရကတ်လိမည်။” 25ယင်းခါ ယုဒဂေါင်းဆောင်ရို့စာ ယေရှုကို၊ “နင် အသူလည်း” ဟို့ မီးကတ်လီရေ။
ယေရှုစာ သူရို့ကို ပြောလီရေ၊ “ငါ အသူလည်းဆိုစာကို ပထမကပင် ငါ ကိုယ်ဘင်ရို့ကို ပြောပြီးဗျာ။ 26ငါ့မာ ကိုယ်ဘင်ရို့ကို တရားစစ်ဆေးဖို့စာန အပြစ်တင်ရို့ စကားပြောဖို့စာ အများကြီး ဟိရေ၊ ယေကေလည်း ငါ မပြော။ ငါ့ကို ရွှတ်လိုက်သူ ပြောစာစကားကို ကြားရို့ရာ ငါ လောကသားရို့ဘားမာ ပြောပြရေ။ ငါ့ကို ရွှတ်လိုက်သူစာ မှန်ကန်ခြင်းန ပြည့်စုံရေ။”
27ယေရှုစာ ကိုယ့်အဖ အကြောင်းကို သူရို့ဘားမာ ပြောလီစာ ဖြစ်တေ၊ ယေကေလည်း သူရို့စာ နားမလည်ကတ်လီ။ 28ယင်းခါ ယေရှုစာ သူရို့ကို ပြောလီရေ၊ “ကိုယ်ဘင်ရို့ မနုသသားတော်ကို အမြင့်မာ မြှောင့်ရို့ထားရေခါ ငါ ထိုသူ ဖြစ်တေဆိုစာကို ကိုယ်ဘင်ရို့ သိရကတ်လိမည်။ အရာ ငါ ကိုယ့်စိတ်တချင် တစ်ခုလည်း မလုပ်၊ အဖ ငါ့ကို သွန်သင်ပီးရေအတိုင်း ငါ ပြောရေဆိုစာကိုလည်း ကိုယ်ဘင်ရို့ သိရကတ်လိမည်။ 29ငါ့ကို ရွှတ်လိုက်သူစာ ငါနအတူ ဟိရေ။ ငါ အမြဲတိုင်း သူ နှစ်သက်ဖို့စာ အလုပ်ကို လုပ်နီရေအတွက်န သူစာ ငါ့ကို နူးချင်းတည်း ဘိုက်ရို့ မထား။” 30ယေရှု ထိုစကားတိကို ဟောပြောရေအတွက်န လူအများကြီး သူ့ကို ကျုံကတ်လီရေ။
အပြစ်က လွတ်မြောင့်ခြင်း အကြောင်း
31ယေရှုစာ ကိုယ့်ကို ကျုံကတ်စာ ယုဒလူရို့ကို ပြောလီရေ၊ “ကိုယ်ဘင်ရို့ ငါ့ သွန်သင်ချက်ကို လိုက်နာကတ်။ ယင်းပိုင်ဆိုကေ ကိုယ်ဘင်ရို့ အမှန် ငါ့တပည့် ဖြစ်ကတ်တေ၊ 32အရာ ကိုယ်ဘင်ရို့ မှန်ကန်ခြင်းကို သိရကတ်လိမည်။ ထိုမှန်ကန်ခြင်းစာ ကိုယ်ဘင်ရို့ကို လွတ်မြောင့်ခြင်း ပီးလိမည်။” 33ယင်းခါ ယုဒလူရို့စာ ယေရှုကို ပြောကတ်လီရေ၊ “ငါရို့ အာဗြဟံ၏ အမျိုးအနွယ်သား ဖြစ်ကတ်တေ။ ငါရို့ တစ်ယောက်ဘားမာလည်း ကျွန်မခံဖူးသိ။ နင် ငါရို့ကို ဇာဖို့ လွတ်မြောင့်ခြင်းကို ရလိမည် ဟို့ ပြောစာလည်း?”
34ယေရှုစာ သူရို့ကို အဖြေပီးလီရေ၊ “ငါ ကိုယ်ဘင်ရို့ကို အမှန် ပြောရေ၊ အပြစ် လုပ်နီသူစာ အပြစ်၏ ကျွန် ဖြစ်တေ။ 35ကျွန်စာ အိမ်မာ အိမ်သားအနေန ထာဝရပတ်လုံး မနီ၊ ယေကေလည်း အိမ်တွင်းမာဟိစာ သားအရင်းစာ အိမ်သားအနေန ထာဝရပတ်လုံး နီရေ။ 36ယင်းအတွက်န သားတော်စာ ကိုယ်ဘင်ရို့ကို လွတ်မြောင့်ခြင်း ပီးရေဆိုကေ ကိုယ်ဘင်ရို့ အမှန် လွတ်မြောင့်ခြင်းကို ရကတ်လိမည်။ 37ကိုယ်ဘင်ရို့ အာဗြဟံ၏ အမျိုးအနွယ်သား ဖြစ်တေဆိုစာကို ငါ သိရေ၊ ယေကေလည်း ကိုယ်ဘင်ရို့ ငါ့ သွန်သင်ချက်ကို လက်မခံချင်ကတ်။ ယင်းအတွက်န ကိုယ်ဘင်ရို့ ငါ့ကို အသီသတ်ဖို့ ကြိုးစားနီကတ်တေ။ 38ငါစာ ငါ့အဖက မြင်ရေအတိုင်း ဟောပြောနီရေ။ ယေကေလည်း ကိုယ်ဘင်ရို့စာ ကိုယ်ဘင်ရို့မာ အဖ ပြောစာပိုင် လုပ်နီကတ်တေ။”
ယုဒလူရို့ကို မာရ်နတ် သားသမီးန နှိုင်းယှဉ်ခြင်း
39ယင်းခါ ယုဒလူရို့စာ ယေရှုကို ပြောကတ်လီရေ၊ “အာဗြဟံ ငါရို့မာ အဖ ဖြစ်တေ။” ယေရှုစာ သူရို့ကို ပြောလီရေ၊ “ကိုယ်ဘင်ရို့ အမှန် အာဗြဟံ၏ သားသမီးဖြစ်ကတ်ဖို့ဆိုကေ အာဗြဟံ လုပ်စာတိကို ကိုယ်ဘင်ရို့ လုပ်ကတ်ဖို့။ 40ငါ ထာဝရဘုရားက ကြားရေအတိုင်း မှန်ကန်ခြင်းကို ကိုယ်ဘင်ရို့ဘားမာ ဟောပြောရို့ လာဗျာ။ ယေကေလည်း ကိုယ်ဘင်ရို့ ငါ့ကို အသီသတ်ဖို့ ကြည့်ကတ်တေ။ အာဗြဟံ ဒေပိုင် အလုပ်တိကို မလုပ်ခလီ။ 41ကိုယ်ဘင်ရို့စာ ကိုယ်ဘင်ရို့မာ အဖလုပ်စာ အလုပ်တိကို လုပ်နီကတ်တေ။”
ယင်းခါ ယုဒလူရို့စာ ယေရှုကို ပြောကတ်လီရေ၊ “ငါရို့ အဖ မဟိဘိုင်းန ရစာသားသမီး မဟုတ်။ ထာဝရဘုရား တစ်ပါးတည်းရာ ငါရို့မာ အဖ ဖြစ်တေ။” 42ယေရှုစာ သူရို့ကို ပြောလီရေ၊ “ထာဝရဘုရား အမှန် ကိုယ်ဘင်ရို့မာ အဖဖြစ်ဖို့ဆိုကေ ကိုယ်ဘင်ရို့ ငါ့ကို ချစ်ကတ်ဖို့၊ အကြောင်းကား ငါ ထာဝရဘုရားက လာစာ ဖြစ်တေ အရာ ငါ ဒေဂုပင် ကိုယ်ဘင်ရို့ ရှိက ရပ်ရို့ ဟိရေ။ ငါ ကိုယ့်အခွင့်အာဏာန လာစာ မဟုတ်၊ ထာဝရဘုရား ငါ့ကို ရွှတ်လိုက်စာ ဖြစ်တေ။ 43ကိုယ်ဘင်ရို့ ငါ့ သွန်သင်ချက်ကို နားမထောင်နိုင်ကတ်။ ယင်းအတွက်န ကိုယ်ဘင်ရို့ ငါ့စကားကို နားမလည်ကတ်။ 44ကိုယ်ဘင်ရို့ မာရ်နတ် သားသမီး ဖြစ်ကတ်တေ။ မာရ်နတ်စာ ကိုယ်ဘင်ရို့မာ အဖ ဖြစ်တေ။ ယင်းအတွက်န ကိုယ်ဘင်ရို့ မာရ်နတ် အလိုကို လိုက်နာနီကတ်တေ။ မာရ်နတ်စာ အယင်ကပင် လူသတ်သမား ဖြစ်တေ။ သူ့မာ မှန်ကန်ခြင်း မဟိရေအတွက်န သူစာ အမြဲတိုင်း မှန်ကန်ခြင်းကို ဆန့်ကျင်နီရေ။ သူစာ မုတ်သားစကား ပြောရေခါလည်း ကိုယ့်အကျင့်ဇာရိတ္တအတိုင်း ပြောနီရေ၊ အကြောင်းကား သူစာ မုတ်သားစကား ပြောသူ ဖြစ်တေ အရာ မုတ်သားအဖလည်း ဖြစ်တေ။ 45ယေကေလည်း ငါစာ အမှန် စကားကို ပြောရေအတွက်န ကိုယ်ဘင်ရို့ ငါ့ကို မကျုံကတ်။ 46ငါ့မာ အပြစ် ဟိရေ ဟို့ ကိုယ်ဘင်ရို့အထဲက အသူ သက်သီ ပြနိုင်ဖို့လည်း? ငါ အမှန် စကားကို ပြောနီရေဆိုကေ ကိုယ်ဘင်ရို့ ဇာဖို့ ငါ့ကို မကျုံကတ်စာလည်း? 47ထာဝရဘုရား၏ လူစာ ထာဝရဘုရား၏ စကားတော်ကို နားထောင်ရေ။ ကိုယ်ဘင်ရို့စာ ထာဝရဘုရား၏ လူမဟုတ်။ ယင်းအတွက်န ကိုယ်ဘင်ရို့ ထာဝရဘုရား၏ စကားတော်ကို နားမထောင်ကတ်။”
အာဗြဟံထက် ယေရှု ကြီးမြတ်ခြင်း
48ယင်းခါ ယုဒလူရို့စာ ယေရှုကို အသရေရှုတ်ချရို့ ပြောကတ်လီရေ၊ “နင် ရှမာရိပြည်နယ်သား တစ်ယောက် ဖြစ်တေ၊ အရာ နတ်ဆိုးကိုင်သူ တစ်ယောက်လည်း ဖြစ်တေ ဟို့ ငါရို့ နင့်ကို အမှန် ပြောလီရေ မဟုတ်လော?” 49ယေရှုစာ သူရို့ကို ပြောလီရေ၊ “ငါ့ကို နတ်ဆိုးကိုင်စာ မဟုတ်။ ငါစာ အဖကို ရိုသေရေ၊ ယေကေလည်း ကိုယ်ဘင်ရို့ ငါ့ကို အသရေရှုတ်ချကတ်တေ။ 50ငါ ကိုယ့်အတွက် ချီမွမ်းခြင်းကို မရှာ။ ယေကေလည်း ငါ့ကို ချီမွမ်းသူတစ်ပါး ဟိရေ၊ သူစာ တရားသူကြီး ဖြစ်တေ။ 51ငါ ကိုယ်ဘင်ရို့ကို အမှန် ပြောရေ၊ ငါ့ စကားကို လိုက်နာသူစာ တစ်ခါလည်း သီရလိမည် မဟုတ်။”
52ယုဒလူရို့စာ ယေရှုကို ပြောကတ်လီရေ၊ “နင့်ကို နတ်ဆိုး ကိုင်နီရေဆိုစာကို ငါရို့ ဒေဂု အမှန် သိရကတ်ပျာ။ အာဗြဟံန ဘုရားသတင်းပို့သူရို့ တိုင်အောင်ပင် သီလားခကတ်ပျာ။ ယေကေလည်း နင် ပြောရေ၊ ‘ငါ့စကားကို လိုက်နာသူစာ တစ်ခါလည်း သီရလိမည် မဟုတ်။’ 53နင် ကိုယ့်ကိုကိုယ် ဇာ မှတ်တေလည်း? နင် ဇာလည်း ငါရို့မာ အဖ အာဗြဟံထက် ကြီးမြတ်တေလော? အာဗြဟံကား သီလားခဗျာ အရာ ဘုရားသတင်းပို့သူရို့လည်း သီလားခကတ်ပျာ။” 54ယေရှုစာ သူရို့ကို အဖြေပီးလီရေ၊ “ငါ ကိုယ့်ကိုကိုယ် ချီမွမ်းရေဆိုကေ ငါ့ ချီမွမ်းခြင်း တစ်ခုလည်း တန်ဖိုး မဟိ၊ ယေကေလည်း ငါ့အဖစာ ငါ့ကို ချီမွမ်းခြင်း ပီးရေ။ ကိုယ်ဘင်ရို့စာ ထာဝရဘုရားကို ငါရို့ ဘုရား ဟို့ ပြောနီကတ်တေ။ 55ကိုယ်ဘင်ရို့ ထာဝရဘုရားကို မသိကတ်ကေလည်း ငါ သိရေ။ ငါစာ ထာဝရဘုရားကို မသိ ဟို့ ပြောရေဆိုကေ ငါလည်း ကိုယ်ဘင်ရို့ပိုင် မုတ်သားပြောသူ ဖြစ်ဖို့။ ငါ ထာဝရဘုရားကို သိရေအတွက်န သူ၏ စကားတော်ကို ငါ လိုက်နာနီရေ။ 56ကိုယ်ဘင်ရို့မာ အဖအာဗြဟံစာ ငါ ကြွလာဖို့စာ နိရက်ကို မြင်ရဖို့ ဟို့ စိတ်အပျော်န မျှော်လင်းလီရေ။ သူစာ ထိုနိရက်ကို မြင်ရရို့ ကောင်းကောင်း ပျော်လီရေ။”
57ယင်းခါ ယုဒလူရို့စာ ယေရှုကို ပြောကတ်လီရေ၊ “နင့် အသက် ဒေဂုပင် ငါးဆယ် မပြည့်သိ။ နင် ဇာပိုင်ပျင်ရို့ အာဗြဟံကို မြင်ဖူးစာလည်း?” 58ယေရှုစာ သူရို့ကို ပြောလီရေ၊ “ငါ ကိုယ်ဘင်ရို့ကို အမှန် ပြောရေ၊ အာဗြဟံ မမွီးဖွားခါ အယင်ကပင် ငါ ဟိရေ။” 59ထိုစကားကို ကြားရို့ ယုဒလူရို့စာ ယေရှုကို ဘိုက်ဖို့အတွက် ကျောက်ခဲ ကောက်ကတ်လီရေ၊ ယေကေလည်း ယေရှုစာ ကိုယ့်ကို လူရို့ မမြင်ရအောင် ဝိပဿနာကျောင်းက ထွက်ရို့ ကြွလီရေ။
Voafantina amin'izao fotoana izao:
ယောဟန် 8: RMZ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©2023 Wycliffe Bible Translators, Inc.
