ယောဟန် 6
6
လူငါးထောင်ကို ကျွေးခြင်း
(မဿဲ ၁၄:၁၃-၂၁၊ မာကု ၆:၃၀-၄၄၊ လုကာ ၉:၁၀-၁၇)
1ယင်းနောက် ယေရှုစာ ဂါလိလဲမြစ်ကမ်းတစ်ဖက်တို့ ကူးလီရေ။ ယင်းမြစ်ကို တိဗေရိမြစ်လည်း ခေါ်ရေ။ 2ရောဂါသေရို့ကို ယေရှု အကောင်းလုပ်စာ အံ့ဩဖွယ်-နိမိတ်လက္ခဏာတိကို လူအများကြီး မြင်ရကတ်လီရေ။ ယင်းအတွက်န သူရို့စာ ယေရှု နောက်က လိုက်ကတ်လီရေ။ 3ယေရှုစာ ကိုယ့်တပည့်ရို့ကို ယူပြီးကေ တောင်ထက်တို့ တက်ရို့ ထိုင်လီရေ။ 4ယင်းအချိန်ခါ ယုဒလူမျိုးရို့မာ လွတ်မြောင့်ခြင်းပွဲ ကျဖို့ပါးလာလီရေ။ 5ယေရှု ကြည့်လိုက်တေခါ လူအများကြီး ကိုယ့်တို့ လာကတ်စာကို မြင်လီရေ။ ယင်းခါ သူစာ ဖိလိပ္ပုနာမည်န ကိုယ့်မာ တပည့်တစ်ယောက်ကို မီးလီရေ၊ “ဒေလူရို့ စားဖို့အတွက် ငါရို့ စားစရာ ဇာက ဝယ်ဖို့လည်း?” 6ယေရှု ကိုယ်တိုင် ဇာလုပ်ရဖို့လည်းဆိုစာကို အယင်ကပင် သိထားလီရေ၊ ယေကေလည်း သူစာ ဖိလိပ္ပုကို စိတ်စမ်းဖို့အတွက် ထိုစကားကို မီးလီစာ ဖြစ်တေ။
7ယင်းခါ ဖိလိပ္ပုစာ အဖြေပီးလီရေ၊ “ဒေ လူရို့ အားကုံးသူကို ပေါင်မုန့် တစ်ဖဲ့တစ်ဖဲ့ ငအောင် ပီးရေဆိုကေလည်း ငွေသားတန်းကား အချပ်နှစ်ရာဖိုးနပင် လောက်ဖို့ မဟုတ်ပါ။” 8ယေရှု တပည့်ရို့အထဲမာ အန္ဒြေနာမည်န ပေတရုမာ ညီတစ်ယောက် ဟိလီရေ။ 9အန္ဒြေစာ ယေရှုကို ပြောလီရေ၊ “အသျှင်၊ ဒေမာ အသျှေတစ်ယောက် ဟိပါရေ။ ဒေ အသျှေဘားမာ ပေါင်မုန့်ငါးသျှက်န ငါးနှစ်ကောင် ဟိပါရေ၊ ယေကေလည်း ဒေလှောက်လူ စားဖို့အတွက် ပေါင်မုန့်ငါးသျှက်န ငါးနှစ်ကောင် ဇာပိုင်ပျင်ရို့ လောက်ပါဖို့လည်း?” 10ထိုလူရို့ စုကတ်စာ နေရာမာ မြက်အများကြီး ဟိလီရေ။ ယေရှုစာ လူရို့ကို ထိုမြက်တောမာ ထိုင်ဖို့ ခိုင်းလီရေ။ အရာ လူရို့ အားကုံးသူ မြက်တောမာ ထိုင်ကတ်လီရေ။ ယင်းနေရာမာ ယောက်ျား သက်သက် ငါးထောင်လှောက် ဟိလီရေ။ 11ယင်းနောက် ယေရှုစာ ပေါင်မုန့်ငါးသျှက်ကို ယူရို့ ထာဝရဘုရားကို ကျေးဇူးတင်လီရေ။ အရာ ထိုပေါင်မုန့်ငါးသျှက်ကို ထိုင်ရို့ ဟိကတ်စာ လူရို့ကို ဝိပီးလီရေ။ အရာ ငါးနှစ်ကောင်ကိုလည်း ယင်းပိုင်တထန် ဝိပီးလီရေ။ ယင်းခါ လူရို့စာ စိတ်တချင် ဝအောင် စားကတ်လီရေ။ 12လူရို့ ဝအောင် စားရို့ပြီးရေခါ ယေရှုစာ တပည့်ရို့ကို ပြောလီရေ၊ “စားရို့ ကျန်စာ အပဲ့အခြမ်းတိကို မပျက်မသိုးရအောင် တစ်နေရာတည်းမာ စုရို့ထားကတ်။” 13ပေါင်မုန့်ငါးသျှက်က စားရို့ကျန်စာ အပဲ့အခြမ်းတိကို တပည့်ရို့ ကောက်ရို့ စုကတ်တေခါ တစ်ဆယ့်နှစ်တောင်း ဖြစ်လီရေ။
14ယင်းနောက် လူရို့စာ ယေရှု လုပ်စာ ဒေ အံ့ဩဖွယ်အလုပ်ကို မြင်ရို့ ပြောကတ်လီရေ၊ “ဒေ လောကတို့ ကြီးမြတ်စာ ဘုရားသတင်းပို့သူတစ်ပါး ကြွလာဖို့စာ အကြောင်းကို ကျမ်းစာမာ ရွီးရို့ ဟိရေ။ ဒေလူ အမှန် ထိုဘုရားသတင်းပို့သူ ဖြစ်တေ။” 15ယင်းခါ ယေရှုစာ ထိုလူရို့ ကိုယ့်ကို ခေါ်ယူလားရို့ အားဒမ မင်းတင်ဖို့ အကြံချကတ်တေဆိုစာကို သိလီရေ။ ယင်းအတွက်န သူစာ လူရို့က ရှောင်ရို့ နူးချင်းတည်း တောင်ထက်တို့ တက်လီရေ။
ယေရှု ရီအထက်က ကြွခြင်း
(မဿဲ ၁၄:၂၂-၃၃၊ မာကု ၆:၄၅-၅၂)
16နီဝင်လာရေခါ ယေရှု တပည့်ရို့စာ ဂါလိလဲမြစ်ကမ်းနားတို့ ဆင်းကတ်လီရေ။ 17အရာ သူရို့စာ ကပေရနောင်မြို့သျှေတို့ လားဖို့အတွက် လောင်းမာ တက်ရို့ မြစ်ကို ကူးဖို့ စကတ်လီရေ။ ယင်းခါ နီဝင်ရို့ မှိုင်းလားခလီရေ၊ ယေကေလည်း ယေရှုစာ ကိုယ့်တပည့်ရို့တို့ ပြန်ရို့ မရောက်လီသိ။ 18ယင်းခါ လီအများကြီး ထရေအတွက်န ဂါလိလဲမြစ်မာ ရီလှိုင်းလုံးတိ ကြီးလာလီရေ။ 19တပည့်ရို့စာ လောင်းလှော်ရို့ သုံးလေးမိုင်လှောက် အဝီး ရောက်လားခကတ်လီရေ။ ယင်းခါ သူရို့စာ ယေရှုကို ရီအထက်က ကိုယ်ရို့တို့ ကြွလာစာကို မြင်ရကတ်လီရေ။ ယင်းအတွက်န သူရို့စာ ကောင်းကောင်း ကြောက်ကတ်လီရေ။ 20ယင်းခါ ယေရှုစာ တပည့်ရို့ကို ပြောလီရေ၊ “မကြောက်ကတ်ကေ့! ငါရာ။” 21အရာ တပည့်ရို့စာ ပျော်ရို့ ယေရှုကို လောင်းမာ တက်စီကတ်လီရေ အရာ သူရို့ လောင်းစာ လားစာနေရာတို့ ချက်ချင်း ရောက်လားခလီရေ။
လူရို့ ယေရှုကို ရှာခြင်း
22နောက်တစ်ရက်နိခါ လူရို့စာ တိဗေရိမြစ်ကမ်းတစ်ဖက်က ပြန်ရို့ စုကတ်လီရေ။ ထိုလူရို့စာ၊ “ညကခါ ဒေ နေရာမာ လောင်းတစ်စင်းတည်း ဟိလီရေ။ အရာ ထိုလောင်းမာ ယေရှု မပါဘိုင်းန သက်သက် သူ့တပည့်ရို့ တက်ရို့ လားခလီရေ” ဟို့ တွက်ရကတ်လီရေ။ 23ယင်းချိန်ခါ တိဗေရိမြို့က အခြားလောင်း သုံးလေးစင်း လာလီရေ။ အရာ ထိုလောင်းတိ ယေရှု ထာဝရဘုရားကို ကျေးဇူးတင်ပြီးရေနောက် လူရို့ ပေါင်မုန့် စားကတ်လီစာ နေရာအနားမာ ချိုင်းလီရေ။ 24လူရို့စာ ယင်းနေရာမာ ယေရှုန သူ့တပည့်ရို့ မဟိဆိုစာကို သိရကတ်လီရေ။ ယင်းခါ သူရို့စာ ထိုလောင်းတိမာ တက်ရို့ ယေရှုကို ရှာဖို့အတွက် ကပေရနောင်မြို့သျှေတို့ လားခကတ်လီရေ။
ယေရှု အသက်ပီးစာ ပေါင်မုန့် ဖြစ်ခြင်း
25ထိုလူရို့စာ ကပေရနောင်မြို့သျှေတို့ ရောက်ရို့ ယေရှုကို ရှာရို့ တွိရေခါ မီးကတ်လီရေ၊ “ဆရာ၊ ကိုယ်ဘင် ဒေမာ ဇာခါ ရောက်ပါစာလည်း?” 26ယင်းခါ ယေရှုစာ အဖြေပီးလီရေ၊ “ငါ ကိုယ်ဘင်ရို့ကို အမှန် ပြောရေ၊ ငါ လုပ်စာ အံ့ဩဖွယ်အလုပ် အဓိပ္ပါယ်ကို နားလည်ရေအတွက်န ကိုယ်ဘင်ရို့ ငါ့ကို ရှာကတ်စာ မဟုတ်။ ပေါင်မုန့်ကို ဝအောင် စားရရေအတွက်န ကိုယ်ဘင်ရို့ ငါ့ကို ရှာကတ်စာ ဖြစ်တေ။ 27သိုးလားဖို့စာ အစားအစာကို ရဖို့အတွက် ကိုယ်ဘင်ရို့ မကြိုးစားကတ်ကေ့။ ထာဝရအသက် ပီးနိုင်စာ အစားအစာကို ရဖို့အတွက် ကြိုးစားကတ်။ မနုသသားတော် ထိုအစားအစာကို ကိုယ်ဘင်ရို့ကို ပီးလိမည်၊ အကြောင်းကား ထိုအစားအစာကို မနုသသားတော် ပီးနိုင်ရေဆိုစာကို အဖထာဝရဘုရား ငါရို့ကို သက်သီပြလီရေ။”
28ယင်းခါ ထိုလူရို့စာ ယေရှုကို မီးကတ်လီရေ၊ “ထာဝရဘုရား၏ အလိုတော်ကို လိုက်နာဖို့အတွက် အကျွန်ရို့ ဇာလုပ်ရပါဖို့လည်း?” 29ယေရှုစာ သူရို့ကို အဖြေပီးလီရေ၊ “ထာဝရဘုရား ရွှတ်လိုက်သူကို ကျုံဖို့စာရာ ထာဝရဘုရား၏ အလိုတော် ဖြစ်တေ။”
30ထိုလူရို့စာ ယေရှုကို မီးကတ်လီရေ၊ “အကျွန်ရို့ ကိုယ်ဘင်ကို ကျုံလတ်အောင် အံ့ဩဖွယ်-နိမိတ်လက္ခဏာတစ်ခု လုပ်ပြပါ။ ကိုယ်ဘင် ဇာပိုင်ဇတ် အလုပ်ကို လုပ်ပြပါဖို့လည်း? 31ကျမ်းစာမာ၊ ‘ထာဝရဘုရားစာ သူရို့ စားဖို့အတွက် ဂေါင်းခင်ဘုံက ပေါင်မုန့် ချပီးလီရေ’ ဟို့ ရွီးရို့ ဟိပါရေ။ ယင်းပိုင်တထန် အကျွန်ရို့ အဖိုးအဖီးအစိုင်လာရို့စာ သဲကန္တာရတောပြင်မာ မန္နဆိုစာ ပေါင်မုန့်ကို စားကတ်လီရေ။”
32ယင်းခါ ယေရှုစာ ထိုလူရို့ကို ပြောလီရေ၊ “ငါ ကိုယ်ဘင်ရို့ကို အမှန် ပြောရေ၊ ကိုယ်ဘင်ရို့မာ အဖိုးအဖီးအစိုင်လာရို့ စားဖို့အတွက် ဂေါင်းခင်ဘုံက ပေါင်မုန့်ကို ဘုရားသတင်းပို့သူ မောရှေ ပီးလီစာ မဟုတ်။ ယေကေလည်း ငါ့အဖ ဂေါင်းခင်ဘုံက ပေါင်မုန့် အစစ်ကို ကိုယ်ဘင်ရို့ကို ပီးနီရေ။ 33ထာဝရဘုရားပီးစာ ပေါင်မုန့်အစစ်စာ ဂေါင်းခင်ဘုံက ဆင်းလာရို့ လောကသားရို့ကို အသက်ပီးရေ။”
34သူရို့စာ ယေရှုကို ပြောကတ်လီရေ၊ “ဆရာ၊ ယင်းပိုင်ဆိုကေ ထိုပေါင်မုန့်ကို အမြဲတိုင်း အကျွန်ရို့ကို ပီးပါ။” 35ယေရှုစာ သူရို့ကို ပြောလီရေ၊ “ငါ အသက်ပီးစာ ပေါင်မုန့် ဖြစ်တေ။ ငါ့တို့ လာသူစာ တစ်ခါလည်း အဝမ်းဆာလိမည် မဟုတ်။ အရာ ငါ့ကို ကျုံသူစာ တစ်ခါလည်း ရီသောက်မွတ်လိမည် မဟုတ်။ 36ကိုယ်ဘင်ရို့ ငါ့ကို မြင်ရို့လည်း မကျုံကတ် ဟို့ ငါ ကိုယ်ဘင်ရို့ကို ပြောလီရေ။ 37-38ငါ ကိုယ့်စိတ်တချင် အလုပ်လုပ်ဖို့အတွက် ဂေါင်းခင်ဘုံက ဆင်းလာလီစာ မဟုတ်။ ငါ့ကို ရွှတ်လိုက်စာ အဖ၏ အလိုတော်အတိုင်း အလုပ်လုပ်ဖို့အတွက် ငါ ဆင်းလာလီစာ ဖြစ်တေ။ ယင်းအတွက်န အဖ ငါ့အလက်မာ အပ်ပီးစာ လူရို့ အားကုံးသူ ငါ့တို့ လာကတ်လိမည်။ ငါ့တို့ လာကတ်စာ လူရို့ အားကုံးသူကို ငါ တစ်ခါလည်း နှင်ရို့ မဘိုက်။ 39ငါ့ကို ရွှတ်လိုက်စာ အဖ၏ အလိုတော် ဖြစ်တေကား၊ အဖက ငါ့အလက်မာ အပ်ပီးသူရို့ကို တစ်ယောက်ကိုလည်း ငါ မပျောက်စီရ၊ အကြောင်းကား သူစာ ငါ့ကို နောက်ဆုံးနိမာ သူရို့ အားကုံးသူကို သီရာက ပြန်ရှင်ထမြောင့်အောင် လုပ်စီချင်ရေ။ 40ငါ့အဖစာ သားတော်ကို မြင်ရို့ ကျုံသူရို့ကို ထာဝရအသက် ရစီချင်ရေ။ အရာ ငါစာ နောက်ဆုံးနိမာ သူရို့ကို သီရာက ပြန်ရှင်ထမြောင့်စီဖို့။”
41ယေရှုစာ ကိုယ့်ကို ဂေါင်းခင်ဘုံက ဆင်းလာစာ ပေါင်မုန့် ဖြစ်တေ ဟို့ ပြောလီရေ။ ယင်းအတွက်န ယုဒလူရို့စာ သူ့ကို ဆန့်ကျင်ရို့ ပြောကတ်လီရေ၊ 42“ဒေသူ ယောသပ်မာသား ယေရှု မဟုတ်လော? ဒေသူ အမိအဖကို ငါရို့ သိရေ မဟုတ်လော? ယင်းပိုင်ဆိုကေ ဒေသူ ဂေါင်းခင်ဘုံက ဆင်းလာရေ ဟို့ ဇာဖို့ ပြောစာလည်း?” 43ယေရှုစာ သူရို့ကို ပြောလီရေ၊ “ကိုယ်ဘင်ရို့ ကိုယ်ရို့အထဲမာ ငါ့ကို ဆန့်ကျင်ရို့ စကား မပြောနီကတ်ကေ့။ 44ငါ့ကို ရွှတ်လိုက်စာ အဖ မပို့ပီးကေ တစ်ယောက်လည်း ငါ့တို့ လာနိုင်ကတ်မည် မဟုတ်။ ငါ့တို့ လာသူရို့ကို ငါ နောက်ဆုံးနိမာ သီရာက ပြန်ရှင်ထမြောင့်စီဖို့။ 45ဘုရားသတင်းပို့သူရို့ ရွီးစာ ကျမ်းစာမာ၊ ‘ထိုသူရို့ အားကုံးသူ ထာဝရဘုရားက ဆုံးမဩဝဒ ရကတ်လိမည်’ ဟို့ ရွီးရို့ ဟိရေ။ ယင်းပိုင်တထန် အဖ၏ စကားကို နားထောင်ရို့ ဆုံးမဩဝဒကို ရသူရို့ရာ ငါ့တို့ လာကတ်တေ။ 46အဖကို တစ်ယောက်လည်း မမြင်ဖူးသိ၊ ထာဝရဘုရားက ကြွလာသူတစ်ပါးတည်းရာ အဖကို မြင်ဖူးရေ။ 47ငါ ကိုယ်ဘင်ရို့ကို အမှန် ပြောရေ၊ ငါ့ကို ကျုံသူစာ ချက်ချင်း ထာဝရအသက်ကို ရရေ။”
48“ငါ အသက်ပီးစာ ပေါင်မုန့် ဖြစ်တေ။ 49ကိုယ်ဘင်ရို့မာ အဖိုးအဖီးအစိုင်လာရို့စာ သဲကန္တာရတောပြင်မာ မန္နဆိုစာ ပေါင်မုန့်ကို စားကတ်လီရေ အရာ သူရို့စာ သီလားခကတ်လီရေ။ 50ယေကေလည်း ဒေ ပေါင်မုန့်စာ ဂေါင်းခင်ဘုံက ဆင်းလာစာ ပေါင်မုန့် ဖြစ်တေ။ ယင်းအတွက်န ဒေ ပေါင်မုန့်ကို စားသူစာ သီခြင်းက ရွတ်လိမည်။ 51ငါ ဂေါင်းခင်ဘုံက ဆင်းလာစာ အသက်ပီးစာ ပေါင်မုန့် ဖြစ်တေ။ ဒေ ပေါင်မုန့်ကို စားသူစာ ထာဝရပတ်လုံး အသက်ရှင်လိမည်။ ငါ ပီးဖို့စာ ပေါင်မုန့်စာ ငါ့အသား ဖြစ်တေ။ လောကသားရို့ အသက်ရှင်ကတ်ပတ်စီအတွက် ငါ ကိုယ့်အသားကို ပီးဖို့။”
52ယင်းစကားကို ကြားရို့ ယုဒလူရို့စာ၊ “ဒေလူ ဇာပိုင်ပျင်ရို့ ငါရို့ စားဖို့အတွက် ကိုယ့်အသားကို ပီးနိုင်ဖို့လည်း” ဟို့ ကိုယ်ရို့အချင်းချင်း အငြင်းအခုံ ဖြစ်ကတ်လီရေ။ 53ယေရှုစာ သူရို့ကို ပြောလီရေ၊ “ငါ ကိုယ်ဘင်ရို့ကို အမှန် ပြောရေ၊ ကိုယ်ဘင်ရို့ မနုသသားတော် အသားန သွီးကို မစားမသောက်ဆိုကေ ကိုယ်ဘင်ရို့မာ အသက် ဟိလိမည် မဟုတ်။ 54ငါ့အသားန ငါ့သွီးကို စားသောက်သူစာ ထာဝရအသက်ကို ရရေ၊ အရာ ငါ ယင်းသူကို နောက်ဆုံးနိမာ သီရာက ပြန်ရှင်ထမြောင့်စီဖို့။ 55ငါ့အသားစာ စားစရာ အစစ် ဖြစ်တေ အရာ ငါ့သွီးစာ သောက်စရာ အစစ် ဖြစ်တေ။ 56ငါ့အသားန ငါ့သွီးကို စားသောက်သူစာ ငါန တစ်ကိုယ်တည်း ဖြစ်ရို့ နီထိုင်ရေ အရာ ငါလည်း ယင်းသူန တစ်ကိုယ်တည်း ဖြစ်ရို့ နီထိုင်ရေ။ 57အသက်သျှင် အဖစာ ငါ့ကို ရွှတ်လိုက်တေ အရာ ငါစာ အဖအကြောင်းန အသက်အရှင် ဟိရေ။ ယင်းပိုင်တထန် ငါ့အသားကို စားသူရို့လည်း ငါ့အကြောင်းန အသက်ရှင်ကတ်လိမည်။ 58ဒေ ပေါင်မုန့်စာ ကိုယ်ဘင်ရို့မာ အဖိုးအဖီးအစိုင်လာရို့ စားလီစာ ပေါင်မုန့်န မတူ။ ကိုယ်ဘင်ရို့မာ အဖိုးအဖီးအစိုင်လာရို့စာ ထိုပေါင်မုန့်ကို စားကတ်လီရေ၊ ယေကေလည်း သူရို့စာ အခြားလူရို့ပိုင် သီလားခကတ်လီရေ။ ဒေ ပေါင်မုန့်စာ ဂေါင်းခင်ဘုံက ဆင်းလာစာ ပေါင်မုန့် ဖြစ်တေ။ ဒေ ပေါင်မုန့်ကို စားသူစာ ထာဝရပတ်လုံး အသက်ရှင်လိမည်။” 59အသျှင်ယေရှုစာ ကပေရနောင်မြို့သျှေမာဟိစာ ဘာသားရေး တရားဇရပ်မာ ဒေ ဟိသမျ စကားကို သွန်သင်ပီးလီရေ။
ယေရှု၏ သွန်သင်ချက်ကို ငြင်းပယ်ခြင်း
60ယေရှု တပည့်ရို့အထဲမာ တပည့်အများကြီး ထိုသွန်သင်ချက်ကို ကြားရို့ ပြောကတ်လီရေ၊ “ဒေ သွန်သင်ချက် ကောင်းကောင်း ခက်ခဲရေ၊ အသူပင် လိုက်နာနိုင်ဖို့လည်း?”
61ယေရှုစာ ထိုအကြောင်းကို ယူရို့ တပည့်ရို့ မနှစ်သက်စာကို သိလီရေ။ ယင်းအတွက်န သူစာ တပည့်ရို့ကို ပြောလီရေ၊ “ငါ့သွန်သင်ချက် အကြောင်းန နင်ရို့ စိတ်ဒုက္ခ ရကတ်စာလော? 62ယင်းပိုင်ဆိုကေ မနုသသားတော်ကို ကိုယ့်နိုင်ငံတော်တို့ ပြန်ရို့ ကြွစာကို မြင်ရေခါ နင်ရို့ ဇာပိုင် မှတ်ကတ်ဖို့လည်း? 63လူအားခွန်န တစ်ခုလည်း မလုပ်နိုင်၊ ယေကေလည်း သန့်ရှင်းသောဝိညာဉ်တော်ရာ အသက် ပီးနိုင်ရေ။ ငါ နင်ရို့ကို ပြောစာစကားတိစာ ဝိညာဉ်၏ စကား ဖြစ်တေ။ ဒေ ဝိညာဉ်၏ စကားတိစာ အသက် ပီးရေ။ 64ယေကေလည်း နင်ရို့အထဲမာ တစ်ချိုးလူရို့ ငါ့ကို မကျုံကတ်။”
ယေရှုစာ ကိုယ့်ကို အသူရို့ မကျုံလည်း အရာ အသူ ရန်သူရို့အလက်မာ ဖမ်းပီးဖို့လည်းဆိုစာကို ပထမကပင် သိထားလီရေ။ 65ယင်းအတွက်န ယေရှုစာ အယင် တစ်ခေါက် ပြောစာစကားကို ပြောလီရေ၊ “ငါ့အဖ အခွင့်ရေး မပီးကေ တစ်ယောက်လည်း ငါ့တို့ မလာနိုင်ကတ်။”
ယေရှုကို ခရစ်တော် ဟို့ ဝန်ခံခြင်း
66တပည့်ရို့အထဲမာ တပည့်အများကြီး ယေရှု ပြောစာစကားကို ကြားရို့ ယေရှုကို စွန့်ရို့ လားခကတ်လီရေ။ အရာ သူရို့စာ ယေရှုနောက်က မလိုက်ကတ်လီဗျာ။ 67ယင်းအတွက်န ယေရှုစာ တပည့်တစ်ဆယ့်နှစ်ယောက်ကို#၆:၆၇ တပည့်တစ်ဆယ့်နှစ်ယောက်သူရို့စာ နောက်အနာဂါတ်မာ တမန်တော် ဖြစ်ဖို့သူရို့ ဖြစ်ပါရေ (မဿဲ ၁၀:၂-၄)။ မီးလီရေ၊ “နင်ရို့လည်း ငါ့ကို စွန့်ရို့ လားချင်ကတ်စာလော?” 68ယင်းခါ ပေတရုစာ ယေရှုကို ပြောလီရေ၊ “အသျှင်၊ အကျွန်ရို့ အသူ့တို့ လားပါဖို့လည်း? ထာဝရအသက်ပီးစာ တရားတော်ကား ကိုယ်တော်ဘားမာရာ ဟိပါရေ။ 69အကျွန်ရို့ ကိုယ်တော်ကို ကျုံပါရေ။ အရာ ကိုယ်တော် ထာဝရဘုရားက ကြွလာစာ သန့်ရှင်းသူတစ်ပါး ဖြစ်တေဆိုစာကို အကျွန်ရို့ သိပါရေ။”
70ယင်းခါ ယေရှုစာ တပည့်ရို့ကို ပြောလီရေ၊ “ငါ နင်ရို့ တစ်ဆယ့်နှစ်ယောက်ကို ရွီးကောက်ယူလီရေ မဟုတ်လော? ယေကေလည်း နင်ရို့အထဲမာ နတ်မိစ္ဆာ တစ်ကောင် ဟိရေ။” 71ယေရှု တပည့် တစ်ဆယ့်နှစ်ယောက်အထဲမာ ရှိမုန်ရှကာရုတ်မာသား ယုဒရှကာရုတ်တစ်ယောက် ဟိလီရေ၊ ယေကေလည်း သူစာ နောက်တို့ ယေရှုကို ရန်သူရို့အလက်မာ ဖမ်းပီးဖို့သူ ဖြစ်တေ။ ယင်းအတွက်န ယေရှု သူ့အကြောင်းကို ရိပ်ရို့ ပြောလီစာ ဖြစ်တေ။
Voafantina amin'izao fotoana izao:
ယောဟန် 6: RMZ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©2023 Wycliffe Bible Translators, Inc.
