Jɔn 7
7
Yeso ghò ane iteri we ne mbe jə̀ghə ni wendi Izuŋ Ŋwiye
1Yeso ya nɔ̀ʼ a Kàpenàwum si ghò ŋa yḛ̀ yi yaʼ inga Galìli. Chəyi wì ya ywirì kə̀b ni yèn inga Jùdeyà imbə̀ʼ icheg ne itog bəd mə̀Ju mbe angu yaya kə̀bə̀ ni zweti aməd. 2Iteri mɔ̀ʼɔ ya yaʼ ne mə̀Ju yaya jə̀ghə ni wendi izuŋ Ŋwiye. Anyumə̀ ne nyùmə̀ iteri we ya kòʼi, 3məfi ìmbi Yeso ya si ghà ibo gha, “Imbə̀ʼ nji àghò ghò a Jùdeyà ni gha ìmbe mə̀mə̀nənùg bara iyeti inug ne àghò we ghìyə̀. 4Wə̀d ne kə̀bə̀ gha bəd kyeri inug ne məd we fàʼà, chəyi tengàŋ we fàʼà inug inə̀mbi. Icheg ne àghò we ghìyə̀ inug mbo̰ anìŋ, àghò chwi ìwe nyɔd asaŋ ni ghì gha bəd igun isəg ijìm kyeri awe.” 5Aton ne məfi məd ya ghàmi ane ya imbə̀ʼ icheg ne chəyi mbɔb ya bə nɔ̀ŋì ibḛfiŋ igun məd.
6Yeso ya ghà inɔb gha, “Nyùmə̀ ijìm inən ya nyùmə̀ ne kòʼi, àsi inum, chəyi ìmə nyumə̀ ni ghò ane iteri we kiri koʼi. 7Chəyi tì bəd inga isəg pàb awən. Mbɔb ya pàbà amə imbə̀ʼ icheg ne mə ghà inɔb gha inug mbe ne mbɔb mbe ghìyə̀ ya inug tibɔ̀ŋ. 8Mbə̀ gho awən ane iteri. Chəyi ìmə nyumə̀ ni ghò ane iteri kiri koʼi.” 9Yeso ya ghàm ane, tḛ̀ yi anjìm a Galìli.
10Anug ne angu ya gha, anyumə̀ ne məfi məd ya fə nɔ̀ʼi ghò ane iteri, məd ya bə̀ nɔ̀ʼ ghò. Chəyi wì yaya yḛ asaŋ asaŋ. Wì yaya yḛ yi inə̀mbi. 11Itog bəd mə̀Ju mbe ne ya yaʼi ane iteri we yaya nḛ̀ gha mbe bara aməd. Mbi yaya bə̀ yḛ̀ nè bìre gha, “Mbə wa bàra Yeso?”
12Bəd yaya jìte inug imbə̀ʼ Yeso inga inɔ̰ bəd we ne ya yaʼi ane iteri. Bəd mɔ̀ʼɔ yaya gha, “À ya wə̀d chɔ̀m.” Mə̀mbin yaya to̰ awɔb gha, “Indèʼ! À ya wə̀d ne kə̀bə̀ ni tàmbi bəd.” 13Chəyi wə̀d mɔ̀ʼɔ ne tì wì ya ghàm anug mɔ̀ʼɔ imbə̀ʼ aməd asaŋ asaŋ imbə̀ʼ icheg ne mbi yaya bɔ itog bəd mə̀Ju.
Yeso chwìti inug ane iteri we ne mbe jə̀ghə̀ ni wendi Izuŋ Ŋwiye
14Yeso ya chughi yi nyeʼ anene iteri nə̀ andəŋ andəŋ. Wì ya si nɔ̀ʼ kɔʼ ghò inga ikam mbàn Ŋwiye, pè ko ni chwiti inug. 15Anug ya chè itog bəd mə̀Ju, mbi si bìri gha, “Wə̀d gho̰ kə̀ che iye bèrì iku iwe gho̰ ne chəyi tì kyeri wə̀d ne chwiti inug mbo̰ ibo?”
16Yeso ya ywìtì gha, “Inug mbe ne mə chwìte kayi ìmbum. Mbi nɔ̀ʼ yaʼ abə Ŋwiye ne cha amə. 17Wə̀d mɔ̀ʼɔ mə̀ nɔ̀ŋì ìzi fìŋ ni fàʼ anug ne Ŋwiye kə̀bi, tengàŋ biri kyeri gha, inug mbe ne mə chwìte kə̀ nɔʼ abə Ŋwiye kə̀ àkə ìmbum? 18Wə̀d we ne chwìte ìmbi tì inug we ghìyə̀ ane imbə̀ʼ bəd ghùmne məd. Àsi wə̀d we ne fàʼà yaʼ ni ghì gha bəd ghumni wə̀d we ne cha aməd, tengàŋ ya wə̀d ne ghà tesiʼ. Chəyi məd we ghà inug ako.” 19Imbə̀ʼ Muse ya nàʼ mə̀nɔ̀ʼɔ̀ inən? Wə̀d abɔ̀ʼ inən ne nɔ̀ŋɔ̀ mə̀nɔ̀ʼɔ̀ mbe àkə we? Aton ne mbə̰ mbe kə̀bə̀ ni zweti amə àkə gha?
20Inɔ̰ bəd we ya ywìtì ibo gha, “Azwighi tibɔ̀ŋ ze inga ine. Wə̀d ne kə̀bə̀ ni zweti awe àkə we?”
21Yeso ya ghà inɔb gha, “Mə ghì ayeti anug amɔʼ, anug chè awən. 22Muse ya ghà inən gha, mbə̀ ya ŋwère bɔn mbaŋà. Ane, chəyi anug ne ŋwed bɔn mbaŋà ya ko abə Muse, ze ya ko abə ìmbən mə̀mbaʼ kyen. Mbə̰ mbe bə̀ ŋwère bɔn mbaŋà igun aneg àzwètì mə̀Ju. 23Mbə̰ mbe ŋwère ane məyi ni gha imbə̀ʼ mbə̰ nɔ̀ʼ gùg mə̀nɔ̀ʼɔ̀ Muse. Aton ne mbə̰ mbe se gàŋa tì inum gha mə ghù wə̀d igun aneg àzwètì, ghì nyɔd məd ijìm zen, àkə gha? 24Imbə̀ʼ mbə̰ saʼa awən wə̀d imbə̀ʼ inug ne mbə nḛ̀. Mbə saʼ wə̀d ane icheg ne koʼi.”
Yeso ya wə̀d we ne Ŋwiye zɔ̀ʼi
25Anyumə̀ we, bəd mɔ̀ʼɔ ne ya nɔ̀ʼi a Jèrusalèm ya ko se bìre gha, “Àkə kayi wə̀d we ne itog bəd mə̀Ju mbe kə̀bə̀ ni zweti gho̰? 26Mbə̀ nḛ məd gho̰ ghàmà yi asaŋ asaŋ abɔ̀ʼ bəd. Chəyi wə̀d mɔ̀ʼɔ ne ywiri kwe imbə̀ʼ aməd. Ighəm mɔ̀ʼɔ itog bəd fə bàd gha məd ya kwàʼ Kristo, wə̀d we ne Ŋwiye zɔ̀ʼi. 27Chəyi tì məd yaʼ ìwiwən. Anyumə̀ ne Wə̀d we ne Ŋwiye zɔ̀ʼi biri yeʼe, chəyi wə̀d mɔ̀ʼɔ biri kyeri asiŋi ne wì nɔ̀ʼi angu.” Àsi mbe gho̰, tè kyèri asiŋi ne wì nɔ̀ʼi angu.
28Yeso yaya kiri chwite inug inga mbàn Ŋwiye. Ane, wì ya si ghàm ane gì ka ka gha, “E! Mbə̰ mbe tì mbə̰ kyeri amə bə̀ kyèri asiŋi ne mə̀ nɔʼi angu. Si ya gha, chəyi mə̀ yeʼe igun isəg ane ìmə ighəm. Wə̀d we ne cha amə, ya wə̀d ne ghà tesiʼ. Chəyi mbə̀ kyeri aməd. 29À ya mo kyeri aməd imbə̀ʼ icheg ne mə nɔ̀ʼ abɔ̀ʼ məd. À ya məd bə chà amə.”
30Anyumə̀ ne mbi ya zughi ane, mbi ya kirə ika ni gwì aməd. Si ya gha, chəyi wə̀d mɔ̀ʼɔ ne ya bètì aməd ane abo imbə̀ʼ icheg ne chəyi nyùmə̀ məd ni ku icheg ne Ŋwiye ya chuʼri nɔ̀ŋì, ya kiri koʼi. 31Anug ne angu ya gha, bəd ndan ndàn inga inɔ̰ we ya nɔ̀ŋì ìwɔb ibḛfiŋ igun məd. Mbi yaya bìre gha, “Anyumə̀ ne Wə̀d we ne Ŋwiye zɔ̀ʼi biri yeʼe, wì wa biri fàʼ iyeti inug ne che mbo̰ ne wə̀d gho̰ we fàʼà?”
Mə̀sogyì Mbàn Ŋwiye kə̀b ni gwì Yeso
32Mə̀farìsi ya zug icheg ne inɔ̰ bəd we we jìte inug imbə̀ʼ Yeso. Ane, itog bəd inga mbàn Ŋwiye ya chà mə̀sogyì ne fàʼà inga mbàn Ŋwiye gha, “Mbə̀ gwiye aməd niŋ yèʼe.”
33Yeso ya gha, “Chəyi mə̀ biri yaʼ tì inən ane nyùmə̀ ne sa. Mə biri bə̀ndì ghò amə abə wə̀d we ne cha amə. 34Mbə̰ biri se kə̀bə̀ amə, si ya gha, chəyi mbə biri bàd. Asiŋi ne mə̀ biri yaʼ angu ya asiŋi ne chəyi wə̀d mɔ̀ʼɔ abɔ̀ʼ inən ne tì wì yèʼe angu.”
35Itog bəd mə̀Ju ya se ghàmà mbɔb mbɔb gha, “Asiŋi ze ne mbe gho̰ biri ghò angu ne tì biri kə̀b aməd tèkan àkə aya? Ighəm mɔ̀ʼɔ wì biri ghò yi abɔ̀ʼ ìmba bəd mbe ne saka ghò inga aben mə̀Grig ni chwiti inug inɔb.” 36Àmə kayi ane, nji aton ne wì gha, tì biri kə̀b aməd tèkan, bə̀ gha, chəyi tì tì ghò abɔ̀ʼ məd, àkə gha?
37Igun aneg kyen ze ne iteri ya se mèghè, Yeso ya nɔ̀ʼ təm ghàm ane gì ka ka gha, “Wə̀d ne adɔʼ mənib ze ko aməd, tengàŋ yèʼe inum mə biri nàʼ mənib ibo. 38Wə̀d ne nɔŋi ìwi ibḛfiŋ igun inum, wì yeʼe no icheg ne ze yaʼi inga Àŋwàʼrì Ŋwiye gha, àdùrì ne nàʼà ìtḛ̀ biri se dùwə̀ ibo inga fìŋ icheg igyi kyen.” 39Mənib mbe ne nàʼà ìtḛ̀ ya Yeso yaya gha Azwighi Ŋwiye ne biri si yèʼe igun bəd mbe ne nɔŋi ìwɔb ibḛfiŋ igun məd. Anyumə̀ we ne məd yaya ghàmà ane, chəyi Azwighi Ŋwiye ya kiri yèʼe inga bəd imbə̀ʼ icheg ne chəyi Ŋwiye ya kiri nɔ̀ Yeso ikaŋ bə̀ ghì wì beri ighumni.
40Anyumə̀ ne bəd ya zughi ane, bəd mɔ̀ʼɔ inga inɔ̰ we ya gha, “Wə̀d gho̰ mənyìʼ yaʼ Wə̀dkə̀n Ŋwiye we ne te ghɔ̀mɔ̀.” 41Mbi mɔ̀ʼɔ tì bəd ya si gha, “Məd ya Wə̀d we ne Ŋwiye zɔ̀ʼi.” Mə̀mbin ya se bìre gha, “Tì Wə̀d we ne Ŋwiye zɔ̀ʼi yaʼ wə̀d ne nɔ̀ʼi a Galìli? 42Imbə̀ʼ Àŋwàʼrì Ŋwiye gha Wə̀d we ne Ŋwiye zɔ̀ʼi biri yaʼ wə̀d inga inəbi ifɔn Dèvid, ne nɔ̀ʼi a Betèlèhem, asiŋi ze ne mbi ya gwi ifɔn Dèvid angu?” 43Ane, inɔ̰ bəd we ya ghàpà. Bəd mɔ̀ʼɔ yaya ghàmà inug chɔm imbə̀ʼ aməd, mə̀mbin se ghàmà inug tibɔ̀ŋ. 44Bəd mɔ̀ʼɔ inga inɔ̰ we ya kə̀b ni gwì aməd, si ya gha, chəyi wə̀d mɔ̀ʼɔ ne ya bèti aməd ane abo.
Chəyi itog bəd mə̀Ju ya bḛ Yeso
45Mə̀sogyì mbàn Ŋwiye mbe ne mbi ya tɔmi awɔb ya bə̀ndì ghò abə itog bəd mbàn Ŋwiye fɔrɔ mə̀Farìsi. Itog bəd mbo̰ ya se gàŋa inɔb gha chəyi mbi gwiye Yeso.
46Mə̀sogyì mbe ya si ghà inɔb gha, “Chəyi wə̀d mɔ̀ʼɔ ne kə kweʼì ghàm inug mbe ne Wə̀d gho̰ we ghàmà.”
47Mə̀Farìsi ya biri inɔb gha, “Ane ya gha wì fə bə̀ tàmbi awən. Kə kayi ane? 48Mbə wa bàd wə̀d mɔ̀ʼɔ abɔ̀ʼ itog bəd ne tùmbə̀ aben kə̀ Farìsi mɔ̀ʼɔ ne nɔŋi ibḛfiŋ igun məd? 49À ya məyi inɔ̰ bəd gho̰ ne chəyi mbi kyeri anug mɔ̀ʼɔ imbə̀ʼ mə̀nɔ̀ʼɔ̀. Ndɔ̀n ze igun inɔb.”
50Nìkòdemòs ya Farìsi mɔ̀ʼɔ abɔ̀ʼ inɔb. Məd ya fə bi kweʼì ghò abə Yeso. Nìkòdemòs ya si bìri abə itog bəd mbe tì mə̀Farìsi mbin gha, 51“Ìmba mə̀nɔ̀ʼɔ̀ wa chwiti gha mbe sɔb isaʼi igun wə̀d mɔ̀ʼɔ ane anug ne wì ghi ne chəyi mbi zughi isaʼi məd?”
52Mbi ya ywìtì ibo gha, “Àghò wa kə̀ wə̀d a Galìli bə? Àghò nḛ inga mə̀nɔ̀ʼɔ̀ kwàʼ icheg chɔm. Àghò biri bàd gha chəyi tì wə̀dkə̀n Ŋwiye nɔ̀ʼ a Galìli.” #7:52 Chəyi ìŋwàʼrì nun mɔ̀ʼɔ bere Jɔn 7:53-8:11 53Mbɔb ya si nɔ̀ʼ sàkà. Wə̀d ghò yi ini achan, wə̀d ghò yi ini achan.
Voafantina amin'izao fotoana izao:
Jɔn 7: MBTP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019 CABTAL
