Jɔn 8
8
Mbe gwi àyi mɔ̀ʼɔ ne we nɔ̀kɔ̀ mbaŋà
1Yeso ya bə̀ndi ghò ikaŋ iwum mə̀Olìf. 2Àsi isusu abɔ̀ʼ, wì ya bə̀ndi ghò inga mbàn Ŋwiye. Inɔ̰ bəd ya fete iban məd, wì si chughi aseg se chwìte inug inɔb. 3Icheg ne wi yaya ghàmà, mə̀chwitì mə̀nɔ̀ʼɔ̀ tì mə̀Farìsi ya gwi àyi mɔ̀ʼɔ ne we nɔ̀kɔ̀ mbaŋà. Mbi ya niŋ aməd ghò abə Yeso, pè nɔ̀ŋì wì təm imbìghè abə bəd məjìm. 4Mbi ya si ghà abə Yeso gha, “Àchwitìnùg, tè gwì àyi gho̰ ne we nɔ̀kɔ̀ mbaŋà. 5Mə̀nɔ̀ʼɔ̀ Muse gha tì tumbi iku-àyi gho̰ ane ateg, zwèti. Àghò ghà àze gha tì ghənə?” 6Mbi yaya bìre ane ni zì yaʼ atam igun Yeso, kə̀bə̀ gha wì gha anug mɔ̀ʼɔ ne mbi biri si chè igun zì isaʼi igun məd. Icheg ne mbi ya biri ane, Yeso ya gundi aseg ko se ŋwàʼrà ighi mɔ̀ʼɔ aseg ane ìfi ìfeg. 7Anyumə̀ ne mbi ya chè imbìghè ne bìre inug biri ibo, wì ya nɔ̀ri àzi atog ghà inɔb gha, “Wə̀d mɔ̀ʼɔ abɔ̀ʼ inən ne kyeri gha chəyi zìye kweʼì gùg anug, wì ko ni tumbi àyi gho̰.” 8Wì ya ghàm ane ywiri gùndi aseg ghi ŋwàʼrì ìmbi ighi ane ìfi ìfeg.
9Bəd ne ya zughi anug ne wì ya gha, ya ko gu tìyè anjìm nìme imɔʼ imɔʼ, ni ko igun bəd kyen ghò pè igun ngwàʼ bɔd. Yeso ya si tèn məyi tì àyi we igun asiŋi ze itəmi. 10Yeso ya si nɔ̀ʼ bìri abə àyi we gha, “Àyi gho̰, Bəd mbe mbeg? Àkə chəyi ìwi mɔ̀ʼɔ imɔʼ ne bùʼi anjìm ni sɔb isaʼi igun ine?”
11Àyi we ya ywìtì gha, “Masà, chəyi wə̀d mɔ̀ʼɔ, ka imɔʼ.” Yeso ya si ghà ibo gha, “Chəyi mo inum biri bə̀ sɔb isaʼi igun ine. Àghò gho awe. Anug ne angu ya gha, imbə̀ʼ àghò ywiri ghiyə awe inug tibɔ̀ŋ.”
Yeso ya ìzḛzḛ abə bəd ne yaʼi igun isəg
12Yeso ya ywìrì ghà abə bəd gha, “Mo ya ìzḛzḛ abə bəd mbe ne yaʼi igun isəg. Wə̀d we ne bḛ amə, chəyi wì biri ya yḛ̀ inga afub. Tengàŋ biri bèrì ìzḛzḛ we ne nàʼà ìtḛ̀.” 13Mə̀Farìsi ya ghà ibo gha, “Àghò we ghà inug imbə̀ʼ ìwe nyɔd ne kayi bì mbe tesiʼ.”
14Yeso ya ywìtì gha, “Ka mə ya ghà inug imbə̀ʼ ìmə nyɔd, mə kyèri gha, inug ne mə gha ya mbe tesiʼ imbə̀ʼ icheg ne mə̀ kyèri asiŋi ne mə nɔʼi angu bə̀ kyèri asiŋi ne mə ghò angu. Àsi mbə̰, chəyi mbə̀ bi kyèri asiŋi ne mə̀ nɔʼi angu kə̀ bì kyèri asiŋi ne mə ghò angu. 15Ane, mbə̰ mbe sɔ̀bɔ isaʼi icheg ne bəd-aku mbe sɔ̀bɔ. Si ya gha, chəyi mə̀ sɔbi isaʼi igun wə̀d mɔ̀ʼɔ. 16Ka mə ya bè sàʼa bəd, mə ya sàʼa ane icheg ne koʼi imbə̀ʼ icheg ne chəyi mə sàʼa tèzìʼì. Mə ya sàʼa tì ìmə Mbaʼ we ne chà amə. 17Mbe ŋwàʼrì inga ìmbən mə̀nɔ̀ʼɔ̀ gha, bəd məbe mə̀ bḛ anug mɔ̀ʼɔ, kyeri gha anug ze ya anug tesiʼ. 18Mə ya ghà inug imbə̀ʼ ìmə nyɔd. Wə̀d ndəŋ ne ghà inug imbə̀ʼ amə ya ìmə Mbaʼ we ne cha amə.”
19Anyumə̀ ne wi ya gha ane, mbi ya biri ibo gha, “Ìwe Mbaʼ kə aya?” Yeso ya ywìtì gha, “Chəyi mbə̀ kyeri amə. Chəyi mbə̀ bə kyeri ìmə Mbaʼ. Àkə aghi ne mbə̀ kə kyèri amə, nji mbə biri bə kyeri ìmə Mbaʼ.” 20Yeso yaya ghà inug mbo̰ anyumə̀ ne wì yaya chwìte inug inga ikam mbàn Ŋwiye, iban asiŋi ne mbi yaya zìye ituti Ŋwiye. Chəyi wə̀d mɔ̀ʼɔ ya gwi aməd imbə̀ʼ icheg ne chəyi nyùmə̀ məd ni ku ya kiri koʼi.
21Yeso ya ywìrì ghà inɔb gha, “Mə ya anìŋ ghò amə. Ane, mbə biri kə̀b amə tèkan. Si ya gha, ìmbən inug tibɔ̀ŋ biri zweti awən. Chəyi tì mbə̰ yeʼe ane asiŋi ne mə ghò angu.”
22Anug azo̰ ne wì ya gha anìŋ, ya ghì itog bəd mə̀Ju mɔ̀ʼɔ se biri gha, “Wì wa biri zweti ìwi nyɔd, icheg ne wì gha, ‹Chəyi tì mbə̰ yeʼe ane asiŋi ne mə ghò angu?› ”
23Yeso ya chè imbìghè ghà inɔb gha, “Mbə̰ ya bəd igun isəg. Àsi mo, mə̀ ya wə̀d ne nɔ̀ʼi ikaŋ àbɔ̀ŋɔ. Mbə̰ ya bəd inga isəg gho̰, Àsi mo, chəyi mə̀ yaʼi wə̀d inga isəg gho̰. 24À ya aton ne mə gha inən gha, ìmbən inug tibɔ̀ŋ biri zweti awən. Àmə chəyi mbə bḛ gha mo ya wə̀d we ne mə̀ yaʼi ìwiwən, ìmbən inug tibɔ̀ŋ biri zweti awən.”
25Mbi ya biri abə Yeso gha, “Àghò àkə we?” Wi ya ywìtì gha, “Mo ya wə̀d we ne mə̀ ya fə ko gha inən kwàʼ a mbègtog. 26Mə bèrì inug nɔʼ nɔʼ ni ghà imbə̀ʼ awən. Mə bə̀ bèrì inug nɔʼ nɔʼ ni zì isaʼi igun inən. Wə̀d we ne ya cha amə we gha tesiʼ. Ane, inug mbe ne mə zughi ibo, à ya mbiwən ne mə ghà abə bəd igun isəg.”
27Chəyi ìmbɔb itog ya zḛ gha, Yeso ya ghàmà inɔb imbə̀ʼ ìwi Mbaʼ. 28Yeso ya si ghà inɔb gha, “Anyumə̀ ne mbə biri nɔ̀ Ŋwan Wə̀d ikaŋ azed abaʼri, mbə biri si kyèri gha mo ya wə̀d we ne mə̀ ya gha inən gha mo ya ìwiwən. Mbə biri bə si kyèri gha, chəyi mə fàʼà anug mɔ̀ʼɔ ane ìmə ighəm. Mə ya ghà məyi inug mbe ne ìmə Mbaʼ we ghà inum gha mə̀ gha. 29Wə̀d we ne ya cha amə we yi tì inum. Chəyi wì sàŋi mə tèzìʼì imbə̀ʼ icheg ne mə̀ ya ka fàʼà yaʼ anug ze ne bɔŋi ibo.” 30Bəd ndan ndàn ne ya zughi icheg ne Yeso yaya ghà inug mbo̰ ya zì ìwɔb ibḛfiŋ igun məd.
Tesiʼ ya pùmnə wə̀d.
31Yeso ya ghà abə mə̀Ju mbe ne ya zi ibḛfiŋ igun məd gha, “Mbə̰ mə̀ nyimi ìmə ìngam, mbə biri yaʼ kwàʼ ìmbum mə̀mə̀nənùg. 32Mbə̰ biri kyeri tesiʼ, ane, tesiʼ we biri pumni awən.”
33Mbi ya ywìtì ibo gha, “Mba ya bɔn ane aghaŋ inəbi Abràham. Chəyi tì kweʼì yaʼ ìbòʼì abə wə̀d mɔ̀ʼɔ ka. Aton ne àghò gha tì biri pum àkə ane aghə?”
34Yeso ya ywìtì gha, “Mə gha tesiʼ inən gha, wə̀d ne ghìyə̀ inug tibɔ̀ŋ ya àbòʼì abə inug tibɔ̀ŋ. 35Chəyi àbòʼì beri ati inga inəbi ane ighə̀m imɔʼ. À ya ŋwan mbaŋà we bèrè ati inga inəbi ane ighə̀m imɔʼ. 36Ŋwan Wə̀d mə pùmni awən, ane ya gha, mbə̰ fə pum kwàʼ tesiʼ. 37Mə kyèri gha mbə̰ ya bɔn ane aghaŋ inəbi Abràham. Si ya gha, mbə̰ mbe chùʼrə nyɔd ni zweti amə imbə̀ʼ icheg ne, chəyi mbə̰ mbe bḛ inug mbe ne mə chwìte. 38Inug mbe ne mə gha inən ya tesiʼ. À ya inug ne ìmə Mbaʼ ya chwi inum anyumə̀ ne mə̀ ya yaʼi tì məd. Si ya gha mbə̰ ya ghìyə̀ yaʼ inug mbe ne mbə̀ ya zughi abə ìmbən mə̀mbaʼ.”
39Mbi ya ywìtì gha, “Abràham ya ìwa Mbaʼ.” Yeso ya si gha, “Àkə aghi ne mbə̀ yaʼi bɔn ìmbi Abràham, nji mbə̰ mbe fàʼà inug mbe ne Abràham yaya fàʼà. 40Àfàʼì ne mə fàʼà ya ni ghà tesiʼ we ne ìmə Mbaʼ ne ya Ŋwiye ya chwi inum inən. Si ya gha, mbə̰ mbe kə̀bə̀ ni zweti amə. Chəyi Abràham ya ghi iku anug we. 41Mbə̰ ya ghìyə̀ yaʼ inug mbe ne ìwən mbaʼ we ghìyə̀.” Mbi ya si gha, “À ya məyi Ŋwiye ne yaʼi ìwa Mbaʼ. Ane, Mba ya kwàʼ bɔn məd.”
42Yeso ya ghà inɔb gha, “Àkə aghi ne Ŋwiye yaʼi ìwən Mbaʼ, nji mbə̰ mbe kɔ̀ŋɔ̀ amə imbə̀ʼ icheg ne mə nɔ̀ʼ yaʼ abɔ̀ʼ Ŋwiye yèʼe aŋa. Chəyi mə̀ yeʼe ane ìmə ighəm. À ya məd cha amə. 43Àkə aghə ghi chəyi ìmbən itog kiri zḛ imbə̀ʼ inug mbe ne mə ghà? À ya imbə̀ʼ icheg ne chəyi mbə̀ kəbi ni zug anug ne mə̀ ghà. 44Mbə̰ ya bɔn Debrə̀ we ne yaʼi ìwən mbaʼ. Mbə̰ ya kə̀bə̀ ya ni ghì məyi inug mbe ne ìwən mbaʼ kə̀bi. Məd yaya zwète bəd kwàʼ ane isəg ya ko. Chəyi wì kweʼì bḛ tesiʼ imbə̀ʼ icheg ne chəyi tesiʼ yaʼi inga məd. Anyumə̀ ne we ghà inug ako, wì ya fàʼà yaʼ àzi atog àfàʼì imbə̀ʼ icheg ne məd ya wə̀d inug ako. Məd ya bə̀ wə̀d ne inug ako ijìm nɔʼi ibo. 45Si ya gha, mə̀ ya ghà yaʼ tesiʼ inən. À ya aton ne chəyi mbə̰ mbe bḛ anug ne mə ghà. 46Wə̀d abɔ̀ʼ inən ne tì wì chwi anug tibɔ̀ŋ ne mə ghi àkə we? Mə mə̀ ya ghà yaʼ tesiʼ, aton ne chəyi mbə̰ mbe kə̀bə̀ ni bḛ àkə gha? 47Wə̀d Ŋwiye ya zùghə anug ne Ŋwiye we ghà. Aton ne chəyi mbə̰ mbe zùgrə Ŋwiye ya imbə̀ʼ icheg ne mbə̰ kayi bɔn Ŋwiye.”
Yeso bèrì ati chè Abràham
48Mə̀Ju ya biri abə Yeso gha, “Àkə chəyi tì koʼi ni ghà gha àghò ya wə̀d a Sàmarìyà, bə̀ ghà gha azwighi tibɔ̀ŋ ze inga ine?”
49Yeso ya ywìtì gha, “Chəyi azwighi tibɔ̀ŋ mɔ̀ʼɔ inga inum. À ya gha mə we ghùmnə ìmə Mbaʼ. Àsi awən, chəyi mbə̰ mbe ghùmnə amə. 50Chəyi mə kə̀bə̀ gha mbə̀ ghumni amə. Wə̀d we angu ne kə̀bə̀ ighumni we. À ya məd we sàʼa bəd ane icheg ne koʼi. 51Mə gha tesiʼ inən gha, wə̀d mə ya zùgrə ìmə ìngam, chəyi tengàŋ biri nɔʼ ku.”
52Wì ya gha ane, mə̀Ju si ghà ibo gha, “Tè kə kyeri amad anìŋ gha azwighi tibɔ̀ŋ ze inga ine. Abràham ya ku, bədkə̀n Ŋwiye bə̀ ku, àghò gho̰ se gha, wə̀d ne zùgrə ìwe ìngam chəyi wì biri nɔʼ ku. 53Àghò wa bèrì ati chè ìwa mbaʼ Abràham? Wì ya ku, bədkə̀n Ŋwiye ya bə̀ ku. Àghò kə kɔ̀ndɔ gha àghò kə we?”
54Yeso ya ywìtì gha, “Mo mə̀ ya ghùmnə yaʼ ìmə nyɔd, ighumni ya ati ako. Ìmə Mbaʼ ne mbə̰ mbe ghà gha à ya ìwən Ŋwiye, à ya məd we ghìyə̀ gha bəd ghumni amə. 55Ka chəyi mbə̀ kyeri aməd, mo kyèri aməd. Mo mə̀ gha chəyi mə̀ kyeri aməd, ze biri chwi gha mə ya ghàmà inug ako icheg inən. Mə kyèri aməd. Mə we bə̀ zùgrə ìngam məd. 56Ìwən mbaʼ Abràham ya kɔ̀ŋ, ni bàd nyùmə̀ we ne mə̀ biri yeʼe. Wì ya bə̀ bàd bə̀ gyèndi.”
57Mə̀Ju mbe ya ywìtì ibo gha, “Chəyi àghò kiri koʼi tituʼ ìghum ita̰, àghò kə̀ si bàd Abràham aya?”
58Yeso ya ywìtì gha, “Mə gha tesiʼ inən gha, bɔŋ mbi ya se gwìye Abràham, mo ya fə se amə angu!” 59Anyumə̀ ne wi ya gha ane, mbi ya gwe ateg ni tumbi məd. Si ya gha, Yeso ya nə̀mbì nyaʼ dù yi inga mbàn Ŋwiye.
Voafantina amin'izao fotoana izao:
Jɔn 8: MBTP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019 CABTAL
