Jɔn 6
6
Yeso ya jə bəd chuʼ ita̰
(Mat 14:13-21; Mag 6:30-44; Lug 9:10-17)
1Nyùmə̀ mɔ̀ʼɔ ya chè Yeso tì ìmbi mə̀mə̀nənùg bani atəŋ ze a Galìli ghò injḭ iywin. Mbi yaya bə̀ kàrà atəŋ ze ane atəŋ ze a Tìberìyàs. 2Inɔ̰ bəd kwàʼ ìwi kyen ya bene abɔ̀ʼ Yeso imbə̀ʼ icheg ne mbi ya bàd iyeti inug ne wì yaya fàʼà. Wì yaya ghùyə̀ ighɔn igun bəd. 3Yeso ya kɔʼ ikaŋ iwum mɔ̀ʼɔ pè angu chùghi aseg tì ìmbi mə̀mə̀nənùg. 4Nyùmə̀ abə mə̀Ju ni jəg Iteri Chègun ya fə tinde.
5Yeso ya bàd inɔ̰ bəd ne ya kwàʼ ìwi kyen ne we yèʼe, ane wì ghabri biri abə Filib gha, “Tì kə ghi zon ighijəg aya ne biri kòʼ ni jə bəd mbo̰ məjìm?” 6Wì ya biri anìŋ ni zweʼri Filib. Tesiʼ ya gha, wì ya fə kyeri yi aghi ne wì biri ghì.
7Filib ya ywìtì gha, “Ka à ya bì ikab àfàʼì ane aməg ìfàmi, chəyi wi biri kòʼ ni zon ighi ne wə̀d ijìm biri bèrì achəpi aghi ni jəg.”
8Àmə̀nənùg mɔ̀ʼɔ inga mbe mə̀mə̀nənùg Yeso ne ikum məd ya Andrò, ifi we Sayimùn Pità, ya gha, 9“Ŋwan mbaŋà mɔ̀ʼɔ we aŋa ne beri chiŋ ngə̀ŋ balè#6:9 Ngə̀ŋ balè ya ngə̀ŋ ne mbi ya tànga ane iku kyì mɔ̀ʼɔ ne mbi ya kàrà ane balè. ita̰ tì su tibe. Si ya gha chəyi ti biri kòʼ abə bəd məjìm.” 10Yeso ya ywìtì gha, “Ghiyə bəd mbe chughi aseg.” Bəd ya chughi aseg igun agyen. Bəd mbe ya se ghò icheg mbaŋà chuʼ ita̰. 11Yeso ya si niŋ ngə̀ŋ ze nàʼ məyakà abə Ŋwiye, bə̀ʼri nàʼ gha mbe ghàpì abə wə̀d ijìm ne ya yaʼi angu. Wì ya bə̀ ghì ane tì su te tibe bə̀ ghàpì abə wə̀d ijìm. Wə̀d ijìm ya jəg icheg ne wì ya kə̀bi.
12Anyumə̀ ne wə̀d ijìm ya fə jəghi kɔd, Yeso ya ghà abə ìmbi mə̀mə̀nənùg gha, “Mbə̀ feti àbùʼì imbə̀ʼ àze mɔ̀ʼɔ bə yi.” 13Anyumə̀ ne bəd ya fə jəghi, mbi ya feti ibəʼri ane àbùʼì ane chiŋ ngə̀ŋ balè te ita̰, mbi zweg tiko ìghum chɔ̀b ibe.
14Anyumə̀ ne bəd ya bàri ayeti anug azo̰ ne Yeso ya ghi, mbi ya se gha, “Kwàʼ tesiʼ, wə̀d gho̰ ya wə̀dkə̀n Ŋwiye we ne Ŋwiye ya gha wì biri yeʼe igun isəg.” 15Yeso ya kyeri ìtɔb tikɔndi gha mbɔb mbe kə̀bə̀ ni yeʼe gwì aməd ane ika zɔʼ ane ifɔn. Ane, wì ya ywìrì nɔ̀ʼ kɔʼ ghò yi ikaŋ iwum tèzìʼì.
Yeso ya yèn igun igyi
(Mat 14:22-23; Mag 6:45-52)
16À ya yaʼ ikwikwiri ne mə̀mə̀nənùg Yeso ya swiʼi ghò iban atəŋ ze a Galìli. 17Mbi ya pè nyi inga abaŋ igyi ko bani ghò a Kàpenàwum. Ituʼ ya fə fin ne chəyi Yeso ya kiri yeʼe kɔ̀ti awɔb. 18Afim ka ka mɔ̀ʼɔ ya ko chè se ghìyə̀ igyi se nɔ̀ʼɔ̀ ywìrè swìʼe kwàʼ ane ika. 19Anyumə̀ ne mbi ya fə tḭ abaŋ ze ghò inga atəŋ se ghò kwàʼ icheg mə̀kilometà məta̰ kə̀ tìfughə, mbi ŋa zə̰, mbi bàra Yeso ne we yḛ̀ igun igyi yèʼe abɔ̀ʼ inɔb. Mbɔb ya bɔ. 20Si ya gha, wì ya ywìtì inɔb gha, “À ya mo. Imbə̀ʼ mbə̰ bɔ awən.” 21Mbi ya taŋ gyèndi ni niŋ aməd gha wi nyi inga abaŋ igyi abɔ̀ʼ inɔb. Kwàʼ ati abaŋ igyi ze ya pè a ngò igyi.
Inɔ̰ bəd we kə̀bə̀ Yeso
22Isusu abɔ̀ʼ, bəd mbe ne ya tḛ ijin atəŋ ze ya bàd gha à ya məyi abaŋ amɔʼ ya yaʼi angu. Mbi ya bə̀ bàd gha chəyi Yeso ya nyi inga abaŋ igyi ze tì mə̀mə̀nənùg məd. Mə̀mə̀nənùg yaya ghò awɔb mbɔb mbɔb. 23Ibaŋ igyi mɔ̀ʼɔ a Tìberìyàs ya ghò təm iban asiŋi ze ne Anɔŋisəg ya niŋ ngə̀ŋ nàʼ məyakà abə Ŋwiye bə̀ʼri nàʼ abə bəd mbi jəg. 24Anyumə̀ ne inɔ̰ bəd we ya bàd gha chəyi Yeso kə̀ mə̀mə̀nənùg məd ya yaʼi angu, mbi ya nyi inga ibaŋ mbe ghò a Kàpenàwum ni kə̀b Yeso.
Yeso ya ngə̀ŋ ze ne nàʼà ìtḛ̀.
25Anyumə̀ ne mbi ya pè bàd aməd injḭ atəŋ ze, mbi ya biri ibo gha, “Àchwitìnùg àghò kə pe aŋa anyumə̀ weg?”
26Yeso ya ghà inɔb gha, “Mə gha tesiʼ inən gha, mbə̰ ya kə̀bə̀ amə imbə̀ʼ icheg ne mbə̀ kə jəghi ngə̀ŋ kɔd, kayi imbə̀ʼ iyeti inug ne mbə̀ kə bàri. 27Imbə̀ʼ mbə̰ fàʼa awən məyi ni beri ighijəg ne biri bə. Mbə̀ fàʼa yaʼ ni beri ighijəg ne biri ghì gha bəd beri ìtḛ̀ ighə̀m imɔʼ. Ighijəg mbe ya mbe ne Ŋwan Wə̀d biri nàʼ inən. Ŋwiye we ne yaʼi Mbaʼ fə nàʼ ika ibo gha wì ghiyə ane.”
28Mbi ya si bìri ibo gha, “Tì kə mənyìʼ ghì iye ni fàʼ inug mbe ne Ŋwiye we kə̀bə̀?”
29Yeso ya ywìtì gha, “Anug ne Ŋwiye gha mbə̀ fàʼà ya gha: mbə̀ zìye ibḛfiŋ igun wə̀d we ne məd cha.”
30Mbi ya biri ibo gha, “Àkə ayeti anug azeg ne àghò biri ghì ni gha tì bara si nɔŋi ibḛfiŋ igun ine? Àkə anug azeg ne àghò biri ghìyə? 31Ìmba mə̀mbaʼ mbe te aneg ya jəg manà inga ibad zɔbi. Àze inga Àŋwàʼrì Ŋwiye gha, ‹Wì ya nàʼ ngə̀ŋ ne nɔ̀ʼi ikaŋ àbɔ̀ŋɔ gha mbe jəg.›”
32Yeso ya ghà inɔb gha, “Mə gha tesiʼ inən, kayi Muse ya nàʼi ngə̀ŋ ze ne nɔ̀ʼi ikaŋ àbɔ̀ŋɔ, à ya ìmə Mbaʼ we nàʼà ngə̀ŋ ze ne yaʼi kwàʼ ìze tesiʼ ne nɔ̀ʼɔ̀ ikaŋ àbɔ̀ŋɔ. 33Ngəŋ ze ne Ŋwiye we nàʼà à ya məd we ne swiʼi ikaŋ àbɔ̀ŋɔ. À ya məd we ne swiʼi ikaŋ àbɔ̀ŋɔ we nàʼà ìtḛ̀ abə bəd igun isəg.”
34Mbi ya ghà ibo gha, “Masà, àghò se nàʼà ngə̀ŋ ze ina.”
35Yeso ya ywìtì inɔb gha, “Mo ya ngə̀ŋ ze ne nàʼà ìtḛ̀. Wə̀d we ne yeʼe inum chəyi njèg biri nɔʼ zaŋ məd. Wə̀d ne zì ìwi ibḛfiŋ igun anug azo̰ ne mə ghà, chəyi adɔʼ mənib biri nɔʼ ko tengàŋ. 36Mə ya fə jiʼi gha inən gha mbə fə bàd amə, si ya gha chəyi mbə̀ kiri bḛ. 37Bəd məjìm mbe ne ìmə Mbaʼ fə nàʼi inum, mbi biri yeʼe inum. Wə̀d ne biri yeʼe inum, chəyi mə̀ biri kamni aməd. 38Aton ya gha, mə nɔ̀ʼ ikaŋ àbɔ̀ŋɔ yeʼe ni fàʼ inug mbe ne wə̀d we ne cha amə wì kə̀bi. Chəyi mə̀ yèʼe ni fàʼ yaʼ inug ne mə̀ kəbi. 39Anug ze ne wə̀d we ne chà amə we kə̀bə̀ ya gha, imbə̀ʼ wə̀d mɔ̀ʼɔ inga bəd məjìm mbe ne wì naʼi inum si nɔ̀ʼ nim. Wì kə̀b yaʼ gha, mə zwemni awɔb iwu ane aneg ìnwḭ.” 40Anug ze ne ìmə Mbaʼ we kə̀bə̀ ya gha, bəd məjìm ne zì ìwɔb ibḛfiŋ igun Ŋwan məd, mbɔb biri jəg ìtḛ̀ ighə̀m imɔʼ. Mə biri zwemni awɔb ane iwu ane aneg ìnwḭ.
41Anyumə̀ ne Yeso ya ghàmi ane, mə̀Ju mbe ya ko se zḭ̀ʼḛ̀ məd imbə̀ʼ icheg ne wì ya gha, “Mo ya ngə̀ŋ ne nɔʼi ikaŋ àbɔ̀ŋɔ.” 42Mbi yaya se gha, “Imbə̀ʼ wə̀d gho̰ ya Yeso, ŋwan Jòseb? Imbə̀ʼ tè kyèri mbaʼ məd fɔrɔ ngɔb məd? Wì kə se gha zìye nɔ̀ʼ ikaŋ àbɔ̀ŋɔ iye?”
43Yeso ya ghà inɔb gha, “Imbə̀ʼ mbə̰ zḭ̀ʼḛ̀ awən. 44Chəyi wə̀d mɔ̀ʼɔ ne tì wì yèʼe inum ne chəyi ìmə Mbaʼ we ne chà amə ghi gha wì yeʼe. Mə biri zwemni wə̀d we, ane aneg ìnwḭ. 45Bədkə̀n Ŋwiye ŋwàʼrì inga Àŋwàʼrì Ŋwiye gha, ‹Ŋwiye biri chwiti inug abə wə̀d ijìm.›#6:45 Àzayà 53:13 Wə̀d ne zughi anug ne Ŋwiye we ghà bə̀ zùgri inug mbe, tengàŋ biri yeʼe inum. 46Chəyi wə̀d mɔ̀ʼɔ ne kweʼì bàd ìmə Mbaʼ chèyi ane wə̀d we ne nɔ̀ʼi abɔ̀ʼ Ŋwiye. À ya məyi məd ne kweʼì bàd Ŋwiye ne yaʼi Mbaʼ. 47Mə gha tesiʼ inən gha, wə̀d ne bḛ anug azo̰ biri jəg ìtḛ̀ ighə̀m imɔʼ. 48Mo ya ngə̀ŋ ze ne nàʼà ìtḛ̀. 49Ìmbən mə̀mbaʼ ya jəghə manà inga ibad zɔbi, si ya gha, mbi ya bə̀ kiri ku. 50Àsi ngə̀ŋ ìzo̰ ne nɔ̀ʼi ikaŋ àbɔ̀ŋɔ yèʼe, wə̀d mə jəg ìziwən chəyi tengàŋ biri nɔʼ ku. 51Mo ya ngə̀ŋ ze ne swiʼi ikaŋ àbɔ̀ŋɔ ne nàʼà ìtḛ̀. Mbə̰ mə̀ jəg ngə̀ŋ izo̰, mbə biri chughi izɔm ane ighə̀m imɔʼ. Ngə̀ŋ ze ne mə̀ biri nàʼ abə wə̀d ijìm igun isəg gha wì jəg bèrì ìtḛ̀, à ya ìmə nyàmnyɔd.”
52Mə̀Ju ya zug anìŋ gaŋ se ghàmà tàŋì inug mbɔb mbɔb gha, “Wə̀d gho̰ kə ghi chè iye ni nàʼ ìzi nyàmnyɔd ina gha tì kud?”
53Yeso ya ghà inɔb gha, “Mə ghà tesiʼ inən, àmə chəyi mbə̀ kuri nyàmnyɔd Ŋwan Wə̀d bə̀ no anəm məd, chəyi mbə̀ biri jəg ìtḛ̀. 54Wə̀d ne kuri ìmə nyàmnyɔd bə̀ no àmə anəm, wì biri jəg ìtḛ̀ ighə̀m imɔʼ. Mə biri zwemni aməd ane iwu igun aneg ìnwḭ. 55Aton ya gha, ìmə nyàmnyɔd ya kwàʼ tijəg tesiʼ. Àmə anəm ya bə̀ kwàʼ mənoʼ tesiʼ. 56Wə̀d ne kuri ìmə nyàmnyɔd bə no àmə anəm tengàŋ biri yaʼ ane anug amɔʼ tì inum, mə bə̀ yaʼ ane anug amɔʼ tì məd. 57Icheg ne ìmə Mbaʼ we ne yaʼi izɔm ya cha amə, mə we izɔm imbə̀ʼ aməd. À ya bə̀ icheg ne wə̀d ne kuri ìmə nyàmnyɔd biri bə yaʼ ika imbə̀ʼ amə. 58Ngə̀ŋ ìzo̰ ya ze ne nɔ̀ʼi ikaŋ àbɔ̀ŋɔ. Ìmbən mə̀mbaʼ aneg ya kurə manà bə̀ kiri ku, si ya gha, wə̀d ne jəghi ngə̀ŋ ìzo̰ biri yaʼ izɔm ane ighə̀m imɔʼ.” 59Yeso ya ghà inug mbo̰ anyumə̀ ne wì yaya chwìte inug inga ichamì Ŋwiye a Kàpenàwum.
Mə̀mə̀nənùg nɔʼ nɔʼ ya nɔ̀ʼ waʼa Yeso
60Anyumə̀ ne mə̀mə̀nənùg nɔʼ nɔʼ ìmbi Yeso ya zughi anug ne Yeso ya gha, mbi ya gha, “Anug azo̰ kà, wə̀d ne biri bḛ tiku inug ìto̰ àkə we?”
61Yeso ya kyeri inga fìŋ gha mə̀mə̀nənùg mbe zḭ̀ʼḛ̀ imbə̀ʼ anug ze ne wì gha, wì si bìri inɔb gha, “Ìngam gho̰ wa ghì mbə gaŋ? 62Mbə̀ kə ghum si ghì iye anyumə̀ ne mbə̀ bari Ŋwan Wə̀d we ghò yi ikaŋ, asiŋi ze ne wi yaya bè angu? 63À ya Azwighi Ŋwiye ze nàʼà ìtḛ̀. Chəyi tì wə̀d naʼ ìtḛ̀. Ìngam gho̰ anìŋ ne mə ghàmi inən ya ìngam ne nàʼà ìtḛ̀. À ya ìngam ne nɔʼi abə Azwighi Ŋwiye. 64Si ya gha, chəyi bəd mɔ̀ʼɔ abɔ̀ʼ inən kiri bḛ.” Yeso ya ghàm ane imbə̀ʼ icheg ne wì ya fə kyeri yi bəd mbe ne chəyi mbi biri bḛ anug məd bə̀ kyèri wə̀d we ne biri fèn aməd. 65Wi ya chè imbìghè, gha, “Aŋa ya aton ne mə gha inən gha, chəyi tì wə̀d mɔ̀ʼɔ yeʼe inum ne chəyi ìmə Mbaʼ ghì gha wì yeʼe.”
66Ni ko ane nyumə̀ we, mə̀mə̀nənùg məd nɔʼ nɔʼ ya nɔ̀ʼ abɔ̀ʼ məd. Chəyi mbi ywiri bène abɔ̀ʼ məd. 67Yeso ya si bìri abə mə̀mə̀nənùg məd mbe ìghum chɔ̀b ibe gha, “Mbə̰ inən wa bə̀ kə̀b ni ghò awən?” 68Sayimùn Pità ya biri ibo gha, “Anɔŋisəg, tì kə ywiri ghò abə we? À ya məyi àghò beri ìngam we ne nàʼà ìtḛ̀ ighə̀m imɔʼ. 69Tè kyèri bə̀ bḛ gha àghò ya wə̀d ìzḛzḛ we ne nɔ̀ʼi abə Ŋwiye.”
70Yeso ya ywìtì gha, “Imbə̀ʼ à ya mo chɔʼi awən, mbə̰ mbo̰ ìghum chɔ̀b ibe? Si ya gha, wə̀d ifibì abɔ̀ʼ inən ya Debrə̀!” 71Yeso yaya ghàmà ane ne wì yaya ghà yaʼ Judàs ne yaʼi ŋwan Sayimùn Ikarìyɔ̀d. Judàs ya yaʼ àmə̀nənùg mɔ̀ʼɔ inga mə̀mə̀nənùg mbe ìghum chɔ̀b ibe. Si ya gha, à ya məd ya ghò fḛ Yeso.
Voafantina amin'izao fotoana izao:
Jɔn 6: MBTP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2019 CABTAL
