Mapookyony 3
3
Nndu Alyamara
1Naasa shoka yetiri urango lwa ulembi ngota mafisi engyi moose Nndumi Iruva aleumba. Shoka ikavesa nka, “Vai-le, ni dede Iruva mmbo alemuvavasa mulalye ndunda ta nri moose kunu ndeny?”
2Nka karouwa shoka, “Ndunda ta nri moose wa kunu nndeny lushiidimaa ikulyiiya, 3indi lyo ndunda ta nri eto ukee yoo nndeny nnang'ani kavii ya nnda Iruva mmbo aleluvya, ‘mulalye ndunda ta nri yeto-fo nta mulaupaani-fo, naambo mulashe-ifwa.’”
4Nayo shoka ikarouwa, “Ekyo nshi dede-fo, mmushefwaa-fo, 5Iruva mmbo eeshi sheelyi nkonu eto mushelyaa, mmbo mushemmbakaa na imanya ekyo kisha na kikasha.”
6Nka akyilollya-se nri ulya nkyeelya kisha, ukaveesenya na miso, nato ushiidimisyaa nndu iranggwa! Nalyo kadova ndunda ta vayo kalya kaniinga na mmi, nawe kavelya. 7Vakaambuka miso ve-vavii, vakasukkywa elyi vakee mbereto, vakafuma maru a nri akava mbita ya kisiny. 8Vakasheita ntiri wa Nndumi Iruva erua-rua efo nnden elyi mwi warya. Adamu na nkaakwe vakaovya miso a Nndumi Iruva nnang'ani ya miri, 9Naasa Nndumi Iruva kavaanga Adamu kammbesa, “Nkwi kukai?” 10Kammbia, “Mmbo shaita, ntiri vafo kunu nndeny shairyaa, mashika elyi shikee mbereto shoovya.” 11“A mmbovi akuvia kwiifo mbereto? A mmbo kwallya ndunda ta nri ulya shilekuvavasa kulalye?” 12Adamu kaamba, “Nka yeu kulenshiniinga nakae neeny mmbwe aleshiniinga ndunda ta nri eto, neeny shalya.”
13Nndumi Iruva kavia nka,
“a nkyoki eki kuletana?”
Nka kammbia, “Nshoka ileshilemba, shalya.”
Iruva Arumbwa Mwaandu
14Naasa Nndumi Iruva kavia shoka,
“Mashika elyi kuletana indo yewe mmbo kukee n-denge ngota
Findo fyoose fyeevikya na ngota mafisi moose a ngoroshony;
Mmbo kufurukaa na ndeu,
Kulye uteeri kyeeri kyoose kya muu wafo.
15Neeny nshevikaa kiduva kyafo na kya nka eto
Na nnang'ani ya ufyari lwafo na lwa nka,
Ufyari lwakwe lushekupeetaa nrwe,
Neewe kushemwaasa tutun.”
16Kaindukya nka,
“Nkya dede nshekufumbutyaa ngatara yafo kyeeri kya iwona lyafo;
Kushewonaa vana na mavina,
Indi kushelanga mmi wafo
Nawe ashekwitoryaa.”
17Kooka-fo, kavia Adamu,
“Kimmba kulearanya unyanga lwa nka wafo,
Na kwalya ndunda ta nri ulya shilekuwavasa kulalye
Summbai mmbo yadengwa kimaruma kyafo,
Mmbo kushelya fya nrike kyeeri Kyoose,
18Myeera na miinga fiingyifywa,
Kushelya nyany ta mbuveny.
19Mmbo kushelyaa shoonga yafo na nrike wa kisangu,
Kutani kwawuya uteerin,
Mashika mfo kuukye,
Nyelyi kukee kiluulyi
Neewe mmbo kushewuyaa-fo.”
20Adamu kafishya nkaakwe irina ni Eva, nkyo mmbwe akee maye wa vandu woose. 21Iruva Nndumi kasongesya Adamu na nka soori ta shonyi ya ifisi, kavavika.
Adamu na Eva Vaumbutwa Kulya Nndeny
22Nndumi Iruva kaamba, “Naasa, akau nndu ammeva sheese, ammemanya fisha na fikasha, Naasa ulaalu nalashe yoorrwa woko nadove ndunda ta nri wa muu, nalye nakee na muu llung'anu!” 23Naasa Nndumi Iruva kamuumbuta kulya Eden, nanderema sumbai efo autywa, 24Naasa koombuta nndu eto na taari ya ngama ya nnda ulya wa Eden kavika-u usu lwa muro lumikaa na iveruka-veruka taari toose, iringa yoo shia yeyo yeekooya nri eto wa muu.
Voafantina amin'izao fotoana izao:
Mapookyony 3: MAS2
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Holy Bible in Kimashami © Bible Society of Tanzania, 2016.