Mapookyony 2
2
1Naasa mashora a yuumba iruveeu na ulana na fyoose fiiyo akamarisywa, amwi na matorito a vayo moose. 2Nkonu wa mfungare, Iruva kaimuya kara irunda mashora moose. 3Iruva kauvikya mbora, nkonu wa mfungare kauvika mweele, nkonu eto kaimuya, kara irunda mashora. 4Nnyendo iruveeu na ulana fileumbwa.
Nnda wa Edeni
Nkonu ulya Nndumi Iruva alepooka yuumba iruveu na ulana, 5nkwei-fo mooro nta unyany lwa mbuveny lwemmimya-fo, mashika Iruva nyeleende mbua-fo, nta nkweifo nndu wa irema-fo. 6Nnsiny ukasaama ukanisa sumbai, 7Naasa Nndumi Iruva kaipoo uteeri yoo sumbai kaumba nndu kambuya mumuyo wa muu, efo mmbweny nndu katira muu. 8Nndumi Iruva karonga nnda efo Eden, taari ya ngama, kavika-fo nndu eto alemwuumba. 9Nndumi Iruva, kamiisa efo sumbai miri misha ivikaa ndunda shisha, eto usenyi miso uvaa ilya na nri wa muu kauvika nnang'ani kavii ya nnda ulya, na nri wa urango lweemanya mesha na makasha. 10Usoka lwa mura ukasokkya Edeni, naambo unise nnda ulya, na kuuka-u ukakwaava iva mira iina. 11Wa mbee ni Pishoni; nto uringitye uruka lwa Havila, efo kutiri saabu; 12Saabu ya uruka elo nshisha, efo kukavekaa-fo mafura afwaamaa nisha na mawe a wuuru uniini. 13Na mura wa kavii ni Gishoni nto uringitye uruka lwa Esopia. 14Irina lya mura wa kararu ni Trigrisi nto wiirye taari ya ngama ya uruka lwa Ashuru. Na mura wa kaana ni Frati. 15Nawe Nndumi Iruva, kaipoo nndu eto kammbika efo nndeny wa Edeni, naambo nauremyi na iuvavara. 16Nndumi Iruva kavavasa nndu eto, kammbia, “Ndunda ta wo nri kulyiiye, 17lyo ndunda ta nri wa imanya mesha na makasha kulashelya-fo, mashika nkonu eto kushelyaa ndunda ta nri eto ifwa nkuti kufwe.”
18Nasa Nndumi Iruva kaamba, “Nkivaa kisha nndu eto nakae we muni-fo, mmbo nshentannya mweeki ammbakye.” 19Naasa kyuukana na uteri Nndumi Iruva kaumba wo ifisi lya ngoroshonyi na wo ndeye, llyo kafyeende kwa nndu ulya alemuumba nalle mmbo aafishya marina-ki. Na marina alefishya fyuumbe efyo akava ng'u marina awo. 20Kyasia nndu yeto kafishya marina mafisi moose yoo aivikkywa na yoo a ngoroshonyi na ndeye toose. Lyo nnyalelollya-fo mweeki nta umwi ammbakkye-fo.
21Llyo Nndumi Iruva keengye Adamu rwe shiroo, karekkya rony. Koota uvari lwa nndu yeto lumwi, kaviirya-u nyama alya uvari lwekai. 22Uvari lulya Nndumi Iruva aleuta Adamu kaumba-fo nka, nawe kamweengye Adamu. 23Adamu kaamba, “Naasany yeu nyiffwa maffweny akwa na nyama nyameny takwa, nkyony mmbo ashevangwaa nka, mashika mmbo aleutwa kwa nndu nndumi.” 24Kweekyo ni indo nndu nndumi mmbo asheraa ndeye na maye nawe nandekunanavya na nka wakwe, nawo vashevaa mwiili umwi nsi. 25Nawo ve vavii vekee mbereto, Adamu na nkaakwe, lyo mbalelollya sony-fo.
Voafantina amin'izao fotoana izao:
Mapookyony 2: MAS2
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Holy Bible in Kimashami © Bible Society of Tanzania, 2016.