Mapookyony 4
4
Kaini na Abeli
1Naasa Adamu kakaa na nka wakwe Eva, kakufinga, kaira Kaini,#4:1 Kaini:Mbora. Kaamba, “Shammbonisa mwana wa womi mbora yooka kwa weekyi lwa Nndumi Iruva!” 2Kaengera keera mwana ungyi wa womi we Abeli. Abeli kava mwiivikya moonri, na Kaini kava mwirema si.
Firaso fya Kaini na Abeli
3Naasa elyi numa Kaini keende fimu kiraso kwa Nndumi Iruva, 4Abeli nawe keende ngurana shive eto shivanri auta efo mavikyeny akwe. Nndumi Iruva, kasenywa ni Abeli na firaso fyakwe. 5Kyaindi Kaini nalamwirikye, nta firaso fyakwe. Kaini katirwa ni unyafi nnu na kisangu kyakwe kikakukusha. 6Nndumi Iruva kavia Kaini, “Nkyiki elyi kutirwa ni unyafi? A nkyiki elyi kisangu kyafo kyikukushye? 7Kwakooya kwatana mesha mmbo kuraa kulawarywa? Kwanra kulatana mesha lola ulyamari mmbo lukuvereye yoo mwaangony, lukee ikulaaya, lyo nkuti kuluvinge.”
Kaini Awaa Mwanawo Abeli
8Kaini kavia mwanawo Abeli, “Nnde kulya imungony.” Naasa kyeeri vekee imungon, Kaini kawarana na mwanawo Abeli, kammbwaa.
9Nndumi Iruva kavia Kaini, “Mwanany Abeli nkwi akai?” Karouwa kaamba, “Nshiishi-fo”, Kaini karouwa. “Mmbo shikee nringyi wa mwaneru-ro?”
10Nndumi Iruva kammbia, “a nkyoki kwatana? Samu ya mwanany ikeeshifuuya mbee yakwa! 11Yewe mmbo kukee nndenge uka sumbai yeyo iletarammbwa kana ikawarya samu ya mwanany yuuka maakony afo. 12Elyi kusheremaa si nkushekiwonisaa fimu fisha-fo. Neewe kuvaa nndu mwirishiswa na mwiraaraa ulaniny.”
13Kaini kavia Nndumi Iruva, “Ngapo yakwa yang'ana nnu nshiifitaa-fo. 14Lola mmbo kwanshumbuta urukeny elu, shikee kwaasha na usangu lwafo, neeny nsheraa-raa shilatiri kirembo ulaniny, na wo nndu ashilollyaa mmbo akundaa ishiwaa.” 15Nndumi Iruva kammbia, “Kimmba ni indo, nndu awaa Kaini mmbo ashetaiywaa ka mfungare.” Nndumi Iruva kammbika wende naambo nndu allolyaa nalashemmbwaa. 16Kaini kooka kisanguny kya Nndumi Iruva, kandekaa urukeny lwa Nodi kufiitani na Eden.
Ngyeeri ya Kaini
17Kaini kakaa na nka wakwe, nawe kakufinga, kaira Enoki. Kaini katana muri kauvaanga Enoki, sha irina lya mwana eto wakwe.
18Enoki kaira Iradi,
Iradi nawe kaira, Mehuyaeli,
Mehuyaeli kaira Metushaeli
na Metushaeli kaira Lameki.
19Lameki karwaa vaka vavii, irina lya eto umwi ni Ada na lya eto wa kavii ni Sila. 20Ada kaira Yabali; yeu mmbwe ndeye wa vandu ewo vekaa yeemeny na ivikkya ng'umbe. 21Na irina lya mwanamaye ni Yubali, yeu mmbwe ndeye wa veekapa fivale. 22Sila nawe kaira Tabal-kaini, mfuru wa findo fya yaambo na minya. Na mfwamaye wa Tabal-Kaini ni Naama.
23Lameki kavia vaka valya vakwe, “Arannyiny unyanga lwakwa Ada na Sila; Eni vaka va Lameki, shaarannyiny ekyo nshambaa; mashika shiwaiye nndu aleshikaba mwana nkoo aleshivika kishavere. 24Kwakooya Kaini ashetaiyoo ka-mfungare. We Lameki mmbo ashetaiyoo ka makumi mfungare na mfungare”!
Seti na Enosi
25Adamu kakaa na nka wakwe-se, kaira mwana wa womi. Kamfishya irina lyake ni Seti, Nkyo kyaamba, “Iruva anshiniinga mwana ungyi ando a Abeli, ulya Kaini alemmbwaa.” 26Seti nawe kaira mwana, kambaanga Enosi. Yaa ng'u ando vandu valepooka irunda na irina lya Nndumi Iruva vemwiinndyaa Nndumi Iruva.
Voafantina amin'izao fotoana izao:
Mapookyony 4: MAS2
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Holy Bible in Kimashami © Bible Society of Tanzania, 2016.