Tika Lisano Ya Kopamela Basusu | Eteni 2Mwa ndambo

NDENGE EBONGI KOSALELA NTANGO

Nasengeli kosala misala; kosala mosala ya Nzambe ezali likambo ya kopona te, kasi ezali likambo ya ntina mingi mpo na biso nyonso. Mosala ya Nzambe ezali monene mpe mingi, kasi tosengeli kosala yango mpe kosala yango na ntango oyo Nzambe apesi biso. Yesu ayebaki ndenge ya kosalela ntango na ye malamu, asalelaki ntango na ye awa na mabele na mokano mpe na ndenge ya malamu. Ezali mpenza mawa ete baklisto mingi bauebi te ndenge ya kosalela ntasngo na bango, bakanisi ete tozali tozali awa na nse mpo na libela na libela. Tozali awa mpo na mosala moko mpe soki ntango na biso ekoki, tosengeli kokende. Kobungisa ntango na yo te na makambo oyo ezali mokumba na yo te. Moto moko alobaki ete ntango ezali mosolo, atako nandimi maloba na ye, Nalingi naloba ete ntango eleki mosolo mpamba te mosolo ekoki kosomba ntango te kasi soki ozali na ntango okoki kosala mosolo.

Eloko nyonso ezali na ntango na yango mpe likambo na likambo na ntango na yango na nse ya lola. Soki ososoli ntango mpe bikeke te yeba ete osi okwei. Nayebisaka bilenge nyonso ete bokoki te kolanda bampoko mibale mbala moko bokobungisa bango nyonso mibale. Batindaka yo na eteyelo mpo na koyekola, kasi te mpo na kokende na bafeti. Ezali na ntango ya kosepela mpe na natngo ya koyekola, soki osali nyonso mibale na mbala moko okokwea. Ezali na ntango ya kobondela mpe na ntango ya kosala mosala. Osengeli kosalela ntango na yo na mayele. Eloko moko oyo bazwi mpe babola bazali na yango ezali ntango, bango nyonso mibale bazali na ngonga 24 na mokolo moko kasi bokeseni ezali na ndenge oyo moko na moko na bango azali kosalela natngo na ye.

Mangoma mosusu mazali kotosa ngonga te mpo na misala na bango ya lingomba, bakobansda ntongo nyonso na nsima mpe bakosilisa na nsima. Meka kotuna bango mpo na nini? Eyano ezali ete tozali kolanda litambwisi ya Molimo Mosantu, boye te ? Yesu atondaki na Molimo Mosantu kasi azalaki na limemya mpo na ntango mpe azalaki kosalela yango malamu, tika kopesa Molimo Mosantu foti mpo na kozanga kolonga na yo na oyo etali kosalela ntango na yo malamu. Zala na mokumba mpe salela ntango na yo malamu. Bato oyo batalelaka makambo na liseki te, bato oyo bazali na mokumba babungisaka ntango te, bazwaka ntango na motuya mingi.

Mokolo mpe Butu, na ndakisa oyo, mokolo ezali kotalisa bomoi mpe butu ezali komonisa liwa. Okoki kosala bobele na ntango ozali nano na bomoi kasi ntango ya liwa na yo te. Ata soki omoni likambo nini ya kosala, sala yango na makasi na yo nyonso mpe sa motema na yo mobima mpamba te pole ezali te, mwango ezali te, mosala mpe ezali te kuna na nkunda epai ozali kokende. Kozingisa makambo nsima ezali mabe, makambo oyo esengeli kosalema lelo esengeli kosalema lelo, kasi lobi te. Lobi ezali ya yo te, ezali ya Nzambe. Na yango, ntango oyo opesameli lelo, kolekisa ntango te kosala oyo osengeli kosala mpe sala yango malamu. Yeba été Nzambe apesi yo nyonso osengeli na yango, tika kobangabanga tika kobukana, pesa motuya na ntango, boya kozala goigoi, sala makasi ozala lokola Yesu, mpe longwa na esika oyo ozali komiyoka malamu.

Libondeli: Nzambe Tata, Kobanda lelo mpe kokende liboso nakotikala soko moke te kobebisa ntango oyo epesameli ngai na mokili oyo ya nse. Tangisa ngai kotanga mikolo na ngai eh Nkolo. Nakosala nyonso mpo na kosilisa mosala oyo Nzambe apesi ngai awa na nse, na nkombo ya Yesu nabondeli mpe nandimi, AMEN.

Botangi mosusu: Ba Efeso 5:15-16 | Nzembo 90:12 | Lisese 6:4 | Lisese 12:24 |