Awˬ hkuiˉ puiˍ ve li‸ 33
33
Yaˍkoˆ Iˉsawˇ hta‸ hpuˇ da‸ ve
1Yaˍkoˆ chiˇ nyi leh, Iˉsawˇ lehˬ chaw 400 gʼaˇ hta‸ shiˍ leh yawˇ geh laˬ chehˇ ve hta‸ gʼa mawˬ ve yoˬ. Hkʼe te leh, yawˇ lehˬ Leˇ-aˍ, Raˍhkeˍlaˆ leh yawˇ ve awˬ ceˬ ma nyiˇ gʼaˇ hta‸ yaˇ teˇ hpaˍ pehˬ piˇ ve yoˬ. 2Peuˬ leh, yawˇ ve awˬ ceˬ ma nyiˇ gʼaˇ hta‸ a shu yawˇ ve yaˇ shiˍ leh awˬ gʼuˇ suhˍ kʼai tcuh ve yoˬ. Yawˇ hui hkʼaw‸ nawˉ, Leˇ-aˍ hta‸ yawˇ ve yaˇ teˇ hpaˍ hta‸ shiˍ leh kʼai tcuh ve yoˬ. Peuˬ hkʼaw‸ nawˉ, Raˍhkeˍlaˆ hta‸ yawˇ ve yaˇ paˍ Yoˇseh‸ hta‸ shiˍ leh shu hkʼaw‸ nawˉ leh leh kʼai tcuh ve yoˬ. 3Yaˍkoˆ lehˬ yawˇ hui hkʼa peu-eˬ awˬ gʼuˇ suhˍ kʼai leh, yawˇ awˬ viˉ paˍ Iˉsawˇ mehˆ gʼuˇ suhˍ lo suhˍ pawˆ hkʼa gaˬ hkui tcuhˉ teh leh oˉ kʼoˍ pui ve yoˬ. 4Iˉsawˇ yawˇ geh gʼuiˇ kʼai leh, yawˇ hta‸ behˇ kʼuˉ taˍ ve yoˬ. Yawˇ Yaˍkoˆ hta‸ boˆ nu piˇ leh, yawˇ huiˉ maˬ nyiˇ gʼaˇ gʼaˇ hawˬ ve yoˬ. 5Iˉsawˇ chiˇ nyi leh yaˇ miˇ leh yaˇ ehˉ teˇ hpaˍ hta‸ gʼa mawˬ ve teˇ yanˇ, Nawˬ geh te toˇ ve chaw chi teˇ hpaˍ a shu le, teh‸ na nyi ve yoˬ.
Oˇ htaˇ Yaˍkoˆ lehˬ, Chaw chi teˇ hpaˍ Gʼuiˬsha ngaˬ hta‸ piˇ laˇ ve yaˇ teˇ hpaˍ hpeh‸ ve yoˬ, teh‸ kʼoˆ piˇ ve yoˬ. 6Awˬ ceˬ ma oˇ ve nyiˇ gʼaˇ htawˇ, yawˇ hui ve yaˇ teˇ hpaˍ hta‸ shiˍ laˬ leh miˬ chaˇ hkʼoˆ boˆ taˍ ve yoˬ. 7Peuˬ hkʼaw‸ nawˉ, Leˇaˍ leh yawˇ ve yaˇ teˇ hpaˍ laˬ leh miˬ chaˇ hkʼoˆ boˆ taˍ ve yoˬ. Awˬ leh meuˇ Raˍhkeˍlaˆ leh Yoˇseh‸ htawˇ laˬ leh miˬ chaˇ hkʼoˆ boˆ taˍ ve yoˬ.
8Oˇ htaˇ Iˉsawˇ kʼoˆ ve, Ya‸ sheh htaˇ ya‸ kʼaw kʼaˉ lo ngaˬ gʼa mawˬ taˉ ve awˬ moˍ oˇ ve teˇ hpaˍ hkʼaˬ hkʼe ve le, teh‸ na nyi ve yoˬ.
Yaˍkoˆ kʼoˆ ve, Oˇ ve lehˬ nawˬ nyi ma sha tuˬ te laˇ taˍ ve yoˬ, teh‸ kʼaw‸ kʼoˆ piˇ ve yoˬ.
9Oˇ htaˇ Iˉsawˇ lehˬ, Ngaˬ nyi paˍ-oˬ, ngaˬ geh htawˇ hkʼa biˇ cawˬ ve yoˬ. Nawˬ ve ceˇ hta‸ nawˬ kʼaw‸ ha‸ shaˉ taˍ-o‸, teh‸ kʼoˆ piˇ ve yoˬ.
10Ya‸ hkʼaˇ Yaˍkoˆ kʼaw‸ kʼoˆ ve, Chi hkʼe taˇ kʼoˆ. Nawˬ ngaˬ hta‸ nyi ma sha la peuˬ ve kʼo, ngaˬ piˇ laˇ ve la‸ shawnˍ chi teˇ hpaˍ hta‸ ha‸ yuˬ-o‸. Awˬ lawn kʼo, chi beu‸ ngaˬ nawˬ ve mehˆ hpfuhˇ hta‸ gʼa mawˬ ve lehˬ, Gʼuiˬsha ve mehˆ hpfuhˇ hta‸ gʼa mawˬ ve hkʼe hpeh‸ ve yoˬ. Nawˬ ngaˬ hta‸ ha lehˬ ha kʼa ha‸ yuˬ laˇ ve yoˬ. 11Ngaˬ yuˬ veu laˇ ve la‸ shawnˍ chi teˇ hpaˍ hta‸ a ciˉ ha‸ yuˬ laˇ-oˆ. Gʼuiˬsha lehˬ ngaˬ hta‸ ha kʼaˉ laˇ leh, ngaˬ loˍ ve awˬ ceuˬ hkʼa peu-eˬ ve hta‸ piˇ laˇ taˍ peuˬ, teh‸ kʼoˆ piˇ ve yoˬ. Yawˇ lawˬ hkawˉ jaˇ ve pa taw, Iˉsawˇ htawˇ la‸ shawnˍ oˇ ve teˇ hpaˍ hta‸ ha‸ yuˬ ve yoˬ.
12Oˇ htaˇ Iˉsawˇ lehˬ, Hkeu‸, ngaˬ hui gʼuˇ suhˍ kʼai-a veuˬ. Ngaˬ lehˬ nawˬ gʼuˇ suhˍ kʼai tuˬ yoˬ, teh‸ kʼoˆ piˇ ve yoˬ.
13Ya‸ hkʼaˇ Yaˍkoˆ kʼoˆ ve, Ngaˬ ve yaˇ teˇ hpaˍ i jaˇ sheˬ ve yoˬ. Ngaˬ ve ceˇ teˇ hpaˍ htawˇ awˬ yehˇ ehˉ hta‸ cuˉ taw piˇ chehˇ ve yoˬ. Yawˇ hui hta‸ teˇ nyi tiˉ oˇ kaˬ lo hkʼa gaˬ gʼa‸ kʼai ve kʼo, hkʼa peu-eˬ suh-e tuˬ yoˬ. 14Chi hta‸ pa taw, nawˬ awˬ gʼuˇ suhˍ kʼai taˍ law. Ngaˬ lehˬ yaˇ ehˉ chi teˇ hpaˍ leh ceˇ chi teˇ hpaˍ hta‸ shiˍ leh Eˇdonˍ mvuhˇmiˬ lo nawˬ geh gaˬ htaˇ hkʼa gaˬ, nawˬ hkʼaˇ suh a yehˉ yehˉ gʼa‸ laˬ tuˬ yoˬ, teh‸ kʼoˆ piˇ ve yoˬ.
15Oˇ htaˇ Iˉsawˇ kʼoˆ ve, Hkʼe te kʼo nawˬ hta‸ ha‸ shaˉ laˇ tuˬ, ngaˬ ve chaw teˇ hpaˍ nawˬ geh teh taˉ laˇ shaˍ, teh‸ kʼoˆ ve yoˬ.
Yaˍkoˆ kʼaw‸ kʼoˆ ve, Aˬ hto‸ ma te nawˬ ngaˬ hta‸ chi taw taw awˬ bon te laˇ ve le, teh‸ kʼoˆ ve yoˬ. 16Oˇ ve teˇ nyi Iˉsawˇ lehˬ Eˇdonˍ mvuhˇmiˬ lo kʼaw‸ kʼo‸-e ve yoˬ. Ya‸ hkʼaˇ, Yaˍkoˆ lehˬ Suˇkoˆ venˇ lo kʼai ve yoˬ. 17Oˇ kaˬ lo yawˇ chehˇ kuiˬ yehˬ hta‸ maˇ kʼoˆ, yawˇ ve ceˇ teˇ hpaˍ awˬ pon chehˇ kui hta‸ maˇ kʼoˆ te leh oˇ kaˬ chehˇ taˍ ve yoˬ. Hkʼe te leh, chehˇ kuiˬ oˇ ve hta‸ Suˇkoˆ #33:17 Chi lehˬ aˉ po kʼo ehˉ teh‸ kʼoˆ gaˇ ve yoˬ teh‸ meh piˇ ve yoˬ.
18Yaˍkoˆ lehˬ, Meˍsoˇpoˇtaˍmiˆ mvuhˇmiˬ hkʼaw tawˆ la leh, Hkaˍnanˍ mvuhˇmiˬ Sheˍhkenˍ venˇ lo ha lehˬ ha kʼa kʼaw‸ gaˬ la ve yoˬ. Yawˇ lehˬ venˇ oˇ ve awˬ paˇ lo aˉ po kʼo te leh chehˇ taˍ ve yoˬ. 19Yawˇ aˉ po kʼo te chehˇ taˍ kuiˬ miˬguiˬ oˇ ve hta‸ Sheˍhkenˍ ve awˬ pa Haˍmawˍ ve awˬ ceuˬ awˬ hkʼaˇ teˇ hpaˍ geh hpu teˇ ha hteh‸ piˇ leh vuiˬ yuˬ taˍ ve yoˬ. 20Oˇ kaˬ lo yawˇ Gʼuiˬsha hta‸ tuˉ tanˇ kuiˬ teˇ maˬ te leh, chehˇ kuiˬ oˇ ve hta‸ Eˇleˍlawˇ #33:20 Chi lehˬ Iˉsaˍreˍlaˆ ve Gʼuiˬsha teh‸ kʼoˆ gaˇ ve yoˬ teh‸ meh piˇ ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
