Awˬ hkuiˉ puiˍ ve li‸ 34
34
Diˉnaˆ hta‸ shu maˇ shawˍ maˇ caˆ te ve
1Teˇ nyi htaˇ, Leˇ-aˍ ve yaˇ miˇ Diˉnaˆ lehˬ Hkaˍnaˍniˆ yaˇ miˇ teˇ hpaˍ geh ca guiˇ kʼai ve yoˬ. 2Oˇ htaˇ, mvuhˇmiˬ oˇ ve hkʼaw jawˇmawˇ te chehˇ ve Hiˇviˆ chaw Haˍmawˍ ve yaˇ Sheˍ hkenˍ lehˬ, Diˉnaˆ hta‸ gʼa mawˬ leh yawˇ hta‸ hkʼa mvuhˇ hkʼa na te piˇ ve yoˬ. 3Diˉnaˆ lehˬ awˬ hkiˇ awˬ naˬ da‸ jaˇ ve pa taw, yawˇ yaˇ miˇ chi hta‸ gʼa tuˬ gʼaˇ hte‸ beˬ yuˬ ve yoˬ. 4Sheˍhkenˍ lehˬ yawˇ awˬ pa Haˍmawˍ geh laˬ leh, Yaˇ miˇ chi ngaˬ miˇ ma hpeh‸ la tuˬ ca lawˬ laˇ-oˆ, teh‸ kʼoˆ piˇ ve yoˬ.
5Sheˍhkenˍ lehˬ yawˇ ve yaˇ miˇ Diˉnaˆ hta‸ te luˬ peuˬ ve hta‸ Yaˍkoˆ gʼa shiˍ ve yoˬ. Ya‸ hkʼaˇ, yawˇ ve yaˇ teˇ hpaˍ heh puiˉ hkʼaw lo ceˇ ca hawˉ kʼai taˍ ve pa taw, yawˇ hui maˇ kʼaw‸ gaˬ la sheˬ ve ceh ceh, yawˇ te‸ chiˉ maˇ te leh law taˍ ve yoˬ. 6Oˇ htaˇ, Sheˍhkenˍ ve awˬ paˍ Haˍmawˍ Yaˍkoˆ geh laˬ leh awˬ lawn chi yawˇ geh ca jehˬ da‸ la ve yoˬ. 7Yaˍkoˆ ve yaˇ teˇ hpaˍ aˉ hkʼaw lo kʼaw‸ gaˬ la leh awˬ lawn chi hta‸ gʼa kaˇ htaˇ, yawˇ hui nyi ma zuhˆ jaˇ ve yoˬ. Awˬ lawn kʼo, yaˇ miˇ hta‸ chi hkʼe awˬ me‸ awˬ hponˇ te luˬ piˇ ve teˇ ceuˬ lehˬ, Iˉsaˍreˍlaˆ chaw awˬ pon cha‸ chiˆ ve kanˉ teˇ maˬ hpeh‸ ve pa taw yoˬ. 8Haˍmawˍ Yaˍkoˆ hta‸ kʼoˆ piˇ ve, Ngaˬ yaˇ paˍ Sheˍhkenˍ lehˬ nawˬ yaˇ miˇ hta‸ ha‸ jaˇ ve yoˬ. Hkʼe te leh, ngaˬ yawˇ hta‸ ca lawˬ la ve yoˬ. 9Ngaˬ hui ve yaˇ teˇ hpaˍ hta‸ heuˆ da‸ tcuh leh awˬ chawˇ te da‸-a veuˬ. 10Ngaˬ hui geh chehˇ taˍ-o‸. Ngaˬ hui ve mvuhˇmiˬhkʼaw nawˬ hui chehˇ gaˇ kuiˬ lo chehˇ leh, nawˬ hui te gaˇ ve hkʼe te chehˇ-oˆ, teh‸ kʼoˆ piˇ ve yoˬ.
11Sheˍhkenˍ htawˇ kʼoˆ ve, Ngaˬ lawˬ ve hkʼe a ciˉ te laˇ-oˆ. Nawˬ hui hkʼa lawˬ ve hkʼa peu-eˬ hta‸ ngaˬ piˇ laˇ tuˬ yoˬ. 12Yaˇ miˇ chi ve awˬ hpfuhˇ leh la‸ shawnˍ teˇ hpaˍ nawˬ hui hkʼaˬ ma lawˬ gaˇ ka‸ lawˬ-o‸. Yaˇ miˇ chi ve ngaˬ hta‸ pe‸ laˇ ve kʼo, nawˬ hui lawˬ ve hkʼe ngaˬ piˇ laˇ tuˬ yoˬ, teh‸ kʼoˆ piˇ ve yoˬ.
13Sheˍhkenˍ yawˇ hui ve awˬ nyi ma hta‸ hkʼa mvuhˇ hkʼa na te piˇ ve pa taw, Yaˍ koˆ ve yaˇ teˇ hpaˍ Haˍmawˍ leh Sheˍhkenˍ hta‸ maˇ shawˍ maˇ caˆ te leh kʼaw‸ kʼoˆ piˇ ve, 14Ngaˬ hui lehˬ awˬ guiˬ meuˇ maˇ shoˍ ve chaw hta‸ ngaˬ hui ve awˬ nyi ma piˇ maˇ hpeh‸. Oˇ hkʼe te ve lehˬ, ngaˬ hui awˬ pon cha‸ chiˆ ve kanˉ hpeh‸ ve yoˬ. 15Nawˬ hui htawˇ ngaˬ hui hkʼa shuˍ te leh, hawˉ hkʼaˆ paˍ teˇ gʼaˇ le le awˬ guiˬ meuˇ shoˍ ve hta‸ hkanˍ yuˬ ve kʼo, 16ngaˬ hui ve yaˇ miˇ hta‸ heuˆ tcuh hpeh‸ ve yoˬ. (Oˇ hkʼe te ve kʼo, ngaˬ hui nawˬ hui geh chehˇ leh, ngaˬ hui lehˬ chaw teˇ ceuˬ ceh tiˉ hpeh‸ la tuˬ yoˬ.) 17Ya‸ hkʼaˇ, nawˬ hui lehˬ ngaˬ huiˬ kʼoˆ ve hkʼe awˬ guiˬ meuˇ maˇ shoˍ ve kʼo, ngaˬ hui ve yaˇ miˇ chi hta‸ shiˍ leh tawˆ kʼai tuˬ yoˬ, teh‸ kʼoˆ piˇ ve yoˬ.
18Yawˇ hui kʼoˆ ve tawˇ hta‸ Haˍmawˍ leh yawˇ ve yaˇ paˍ Sheˍhkenˍ nyi ma cawˇ leh ha‸ yuˬ ve yoˬ. 19Chaw oˇ ve lehˬ Yaˍkoˆ ve yaˇ miˇ hta‸ ha‸ jaˇ ve pa taw, yawˇ hui kʼoˆ ve hkʼe te ve yoˬ. Yawˇ lehˬ, yawˇ awˬ pa ve yehˬ yaˇ kʼa yaˇ teˇ hpaˍ awˬ hkʼaw lo shu a‸ kehˉ awˬ me‸ awˬ hponˇ cawˬ ve chaw hpeh‸ ve yoˬ.
20Oˇ ve hkʼaw‸ nawˉ, Haˍmawˍ leh Sheˍhkenˍ lehˬ chaw moˍ lonˉ hpawnˬ da‸ kuiˬ venˇ taˍ meu‸ hpe‸ lo kʼo‸-e leh, venˇ yaˇ teˇ hpaˍ hta‸ chi hkʼe kʼoˆ piˇ ve yoˬ. 21Chaw chi teˇ hpaˍ lehˬ ngaˬ hui hta‸ awˬ chawˇ te laˇ puiˉ ve yoˬ. Yawˇ hui hta‸ ngaˬ hui ve mvuhˇmiˬ hkʼaw chehˇ tcuh leh yawˇ hui te gaˇ ve hkʼe te tcuh piˇ-a veuˬ. Ngaˬ hui ve mvuhˇmiˬ chi lehˬ, yawˇ hui awˬ pon ka‸ hkʼa law‸ cawˬ taˍ ve yoˬ. Ngaˬ hui ve yaˇ leh yawˇ hui ve yaˇ teˇ hpaˍ hta‸ heuˆ da‸ tcuh-a veuˬ. 22Ya‸ hkʼaˇ, ngaˬ hui lehˬ yawˇ hui hkʼa shuˍ awˬ guiˬ meuˇ shoˍ ve hta‸ hkanˍ yuˬ htaˇ heh‸, yawˇ hui ngaˬ hui geh chehˇ leh ngaˬ hui hkʼa peu-eˬ chaw teˇ ceuˬ ceh tiˉ hpeh‸ la tuˬ yoˬ. 23Yawˇ hui ve ceˇ teˇ hpaˍ leh yawˇ hui ve hpu shi mawˇ jeˬ hkʼa peu-eˬ, ngaˬ hui ve mawˇ hpeh‸ la tuˬ ve maˇ heˆ laˇ. Yawˇ hui ngaˬ hui geh chehˇ hpeh‸ tuˬ, yawˇ hui kʼoˆ ve hkʼe na yuˬ leh te-a veuˬ, teh‸ kʼoˆ piˇ ve yoˬ. 24Venˇ yaˇ hkʼa peu-eˬ Haˍmawˍ leh Sheˍhkenˍ kʼoˆ ve hta‸ nyi ma cawˇ leh, hawˉ hkʼaˆ paˍ teˇ gʼaˇ le le awˬ guiˬ meuˇ shoˍ ve hta‸ hkanˍ yuˬ ve yoˬ.
25Oˇ ve hkʼaw‸ nawˉ, shehˆ nyi ponˬ peuˬ leh hawˉ hkʼaˆ paˍ teˇ hpaˍ naˬ jaˇ chehˇ htaˇ, Diˉnaˆ ve awˬ viˉ paˍ Suˉmonˍ leh Leˍviˆ lehˬ, aˉhtaw teˇ gʼaˇ teˇ maˬ pfuhˇ veu leh venˇ hkʼaw lo‸-e ve yoˬ. Venˇ hkʼaw hkʼa chehˇ taˍ ve hawˉ hkʼaˆ paˍ hkʼa peu-eˬ hta‸ yawˇ huiˉ maˬ tiˇ pehˍ piˇ ve yoˬ. 26Yawˇ huiˉ maˬ Haˍmawˍ leh yawˇ ve yaˇ paˍ Sheˍhkenˍ hta‸ ka‸ tiˇ pehˍ leh, Diˉnaˆ hta‸ Sheˍhkenˍ ve yehˬ hkʼaw shiˍ tawˆ-e ve yoˬ. 27Yawˇ hui ve awˬ nyi ma hta‸ hkʼa mvuhˇ hkʼa na te piˇ ve pa taw, Yaˍkoˆ ve yaˇ teˇ hpaˍ venˇ hkʼaw lo‸-e leh, venˇ oˇ ve hta‸ te luˬ piˇ ve yoˬ. 28Yawˇ hui lehˬ venˇ hkʼaw maˇ kʼoˆ, ti mi hkʼaw maˇ kʼoˆ, hkʼa chehˇ taˍ ve yawˬ, nuˇ, piˉ laˬ leh venˇ hkʼaw hkʼa cawˬ taˍ ve mawˇ jeˬ hkʼa peu-eˬ hta‸ yuˬ kʼai ve yoˬ. 29Chi hkʼoˆ ka‸ yawˇ hui ve yaˇ miˇ, yaˇ ehˉ teˇ hpaˍ leh yehˬ hkʼaw hkʼa cawˬ ve mawˇ jeˬ hkʼa peu-eˬ ve hta‸ htawˇ hiˉ yuˬ kʼai ve yoˬ.
30Oˇ htaˇ, Yaˍkoˆ Suˉmonˍ leh Leˍviˆ hta‸ kʼoˆ piˇ ve, Nawˬ huiˉ maˬ lehˬ ngaˬ awˬ hkʼoˆ lo dawˇ haˍ tuˬ gaˬ la piˇ ve yoˬ. Mvuhˇmiˬ chi hkʼaw chehˇ ve Hkaˍ naˍniˆ chaw leh Hpeˍraˍziˆ chaw teˇ hpaˍ chi beu‸ ngaˬ hta‸ canˇ tuˬ yoˬ. Ngaˬ geh lo chaw a ciˉ ceh tiˉ cawˬ ve yoˬ. Yawˇ hui chaw shawˍ leh ngaˬ hta‸ ca bawˆ la ve kʼo, ngaˬ hui ve miˇ yaˇ hkʼa peu-eˬ gʼa luˬ gʼa sheˆ tuˬ yoˬ, teh‸ kʼoˆ piˇ ve yoˬ.
31Oˇ htaˇ yawˇ huiˉ maˬ lehˬ, Ngaˬ hui ve awˬ nyi ma hta‸ meh maˬ lanˉ hkʼe shawˍ taˍ maˇ hpeh‸, teh‸ kʼaw‸ yaw hkʼaw‸ piˇ ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
