Awˬ hkuiˉ puiˍ ve li‸ 32
32
Yaˍkoˆ Iˉsawˇ hta‸ hpuˇ da‸ tuˬ gu ve
1Oˇ ve hkʼaw‸ nawˉ, Yaˍkoˆ awˬ gʼuˇ suhˍ kʼaw‸ caˉ kʼai leh, Gʼuiˬsha ve mvuhˇ naw tcuh yaˇ teˇ hpaˍ hta‸ hpuˇ da‸ ve yoˬ. 2Oˇ htaˇ yawˇ kʼoˆ ve, Chi lehˬ Gʼuiˬsha ve ma‸ moˍ hpeh‸ ve yoˬ, teh‸ kʼoˆ leh chehˇ kuiˬ oˇ ve hta‸ Maˍhaˍnenˍ #32:2 Chi lehˬ, nyiˇ moˍ teh‸ kʼoˆ gaˇ ve yoˬ. teh‸ meh piˇ ve yoˬ.
3Yaˍkoˆ lehˬ, Eˇdonˍ mvuhˇmiˬ hkʼaw chehˇ taˍ ve yawˇ ve awˬ viˉ paˍ Iˉsawˇ geh yawˇ ve awˬ ceˬ teˇ hpaˍ hta‸ kʼai peu leh tawˇ chi hkʼe shanˍ feu piˇ ve yoˬ. 4Nawˬ ve awˬ ceˬ Yaˍkoˆ lehˬ, Laˍbanˍ geh ca hpaw chehˇ taˉ peuˬ hkʼaw‸ nawˉ, chi beu‸ kʼaw‸ la chehˇ ve yoˬ. 5Ngaˬ geh lo nuˇ, piˉlaˬ, yawˬ teˇ hpaˍ leh awˬ ceˬ maˇ maˇ cawˬ ve yoˬ. Nawˬ nyi ma sha la tuˬ, ngaˬ chaw hta‸ hpehˇ leh tawˇ chi hkʼe shanˍ feu laˇ ve yoˬ, teh‸ kʼoˆ feu piˇ ve yoˬ.
6Awˬ ceˬ paˍ oˇ ve teˇ hpaˍ Yaˍkoˆ geh kʼaw‸ gaˬ la leh, Ngaˬ hui nawˬ viˉ paˍ Iˉsawˇ geh gaˬ taˉ peuˬ. Yawˇ nawˬ hta‸ ca hpuˇ da‸ la tuˬ chaw awˇ ha gʼaˇ shiˍ leh nawˬ geh laˬ chehˇ ve yoˬ, teh‸ yawˇ hta‸ kʼoˆ piˇ ve yoˬ. 7Oˇ htaˇ, Yaˍkoˆ kawˆ jaˇ dawˇ haˍ jaˇ ve yoˬ. Yawˇ lehˬ, yawˇ ve chaw leh yawˇ ve nuˇ, yawˬ leh kaˍlaˍoˆ teˇ hpaˍ hta‸ nyiˇ moˍ pehˬ taˍ ve yoˬ. 8Teˇ moˍ moˍ hta‸ Iˉsawˇ mawˬ leh te luˬ te sheˆ ve hta‸ gʼa hkanˍ ve htawˇ, awˬ nu ve teˇ moˍ gʼa ponˬ tuˬ ve hta‸ yawˇ dawˇ taˍ ve yoˬ.
9Oˇ htaˇ Yaˍkoˆ bon lawˬ leh kʼoˆ ve, Ngaˬ puˍ Aˍbraˍhanˍ leh ngaˬ pa Iˉcaˆ ve Gʼuiˬsha-oˬ, ngaˬ ve bon lawˬ hkawˇ hta‸ na laˇ sheˬ. Nawˬ ngaˬ hta‸ ngaˬ ve chaw ceuˬ leh ngaˬ ve mvuhˇmiˬ lo kʼo‸-e tcuh laˇ leh, ngaˬ hta‸ ha‸ shaˉ laˇ tuˬ ka ti‸ te laˇ taˍ peuˬ ve yoˬ. 10Ngaˬ lehˬ nawˬ te laˇ ve awˬ bon hta‸ ha‸ yuˬ maˇ keunˍ ve chaw hpeh‸ ve yoˬ. Yawˇdanˍ gʼuiˬ hta‸ ngaˬ hkanˍ tawˆ la htaˇ, ngaˬ ve la‸ sheh hkʼaw te‸ chiˉ maˇ cawˬ. Juˇ fuiˍ teˇ maˬ ceh cawˬ ve yoˬ. Chi beu‸ lehˬ, ngaˬ geh chaw nyiˇ moˍ chehˇ taˍ ve yoˬ. 11Ngaˬ viˉ paˍ Iˉsawˇ ve la‸ sheh hkʼaw ngaˬ hta‸ a ciˉ ponˬ laˇ-oˆ. Awˬ lawn kʼo, yawˇ laˬ leh ngaˬ hta‸ maˇ kʼoˆ, ngaˬ ve miˇ yaˇ hkʼa peu-eˬ ve hta‸ maˇ kʼoˆ, tiˇ pehˍ laˇ ve hta‸ ngaˬ kawˆ jaˇ ve yoˬ. 12Nawˬ ngaˬ hta‸ awˬ bon maˇ maˇ na‸ laˇ leh, ngaˬ ve awˬ ceuˬ awˬ hkʼaˇ teˇ hpaˍ lehˬ gʼaw maˇ peuˬ htaˇ hkʼa gaˬ maˇ jaˇ ve shehˇ shiˍ hkʼa shuˍ hpeh‸ la tuˬ yoˬ, teh‸ nawˬ kʼoˆ laˇ taˍ ve tawˇ hta‸ a ciˉ dawˇ nawˇ laˇ-oˆ, teh‸ kʼoˆ ve yoˬ.
13Oˇ ve teˇ haˉ Yaˍkoˆ oˇ kaˬ lo haˉ ve yoˬ. Yawˇ ve awˬ viˉ paˍ Iˉsawˇ hta‸ la‸ shawnˍ te piˇ tuˬ, yawˇ ve ceˇ teˇ hpaˍ awˬ hkʼaw lo, 14aˉ che‸ awˬ ma 200 hkeh, aˉ che‸ awˬ paˍ 20 hkeh, yawˬ awˬ ma 200 hkeh, awˬ paˍ 20 hkeh, 15cuˉ nyiˉ dawˬ chehˇ ve kaˍlaˍoˆ awˬ ma 30 hkeh leh awˬ yehˇ ehˉ teˇ hpaˍ, nuˇ ma peuˍ 40 hkeh leh nuˇ paˍ lonˉ 10 hkeh, piˉlaˬ awˬ ma 20 hkeh leh awˬ paˍ 10 hkeh hta‸ leuˆ teh taˍ ve yoˬ. 16Peuˬ leh yawˇ leuˆ teh taˍ ve ceˇ chi teˇ hpaˍ hpaˍ, a shu yawˇ moˍ yawˇ te leh awˬ ceˬ paˍ teˇ hpaˍ hta‸ yawˇ awˬ gʼuˇ suhˍ lo gʼa‸ kʼai tcuh ve yoˬ. Yawˇ yawˇ hui hta‸ kʼoˆ piˇ ve, Nawˬ hui awˬ gʼuˇ suhˍ kʼai taˍ law. Ceˇ teˇ moˍ leh teˇ moˍ awˬ kaˍ lo a ciˉ yanˉ da‸ piˇ, teh‸ kʼoˆ ve yoˬ. 17Shu awˬ gʼuˇ suhˍ kʼai ve teˇ gʼaˇ hta‸ yawˇ kʼoˆ piˇ ve, Ngaˬ viˉ paˍ Iˉsawˇ nawˬ hta‸ mawˬ leh, Nawˬ a shu ve chaw le. Hkʼaˬ lo kʼai toˇ ve le. Nawˬ gʼa‸ toˇ ve ceˇ chi teˇ hpaˍ a shu ve le, teh‸ na nyi laˇ ve kʼo, chi hkʼe kʼoˆ piˇ-oˆ. 18Chi ve lehˬ, nawˬ ve awˬ ceˬ paˍ Yaˍkoˆ ve ceˇ teˇ hpaˍ hpeh‸ leh, yawˇ ve jawˇmawˇ Iˉsawˇ hta‸ la‸ shawnˍ te piˇ tuˬ feu laˇ taˍ ve yoˬ. Yawˇ lehˬ ngaˬ hui hkʼaw‸ nawˉ laˬ chehˇ taˍ ve yoˬ, teh‸ kʼoˆ piˇ-oˆ teh‸ shanˍ piˇ taˍ ve yoˬ. 19Yawˇ awˬ gʼuˇ suhˍ lo ceˇ teˇ moˍ peuˬ teˇ moˍ gʼa‸ kʼai tuˬ ve yawˇ ve awˬ ceˬ paˍ teˇ gʼaˇ le le hta‸ htawˇ, Iˉsawˇ hta‸ hpuˇ da‸ htaˇ oˇ hkʼe ceh tiˉ kʼoˆ piˇ tuˬ tawˇ hkʼa deh‸ shanˍ piˇ taˍ ve yoˬ. 20Teˇ gʼaˇ le le hta‸ ka‸, Nawˬ ve awˬ ceˬ paˍ Yaˍkoˆ ngaˬ hui hkʼaw‸ nawˉ laˬ chehˇ taˍ ve yoˬ, teh‸ kʼoˆ piˇ tcuh taˍ ve yoˬ. Awˬ lawn kʼo yawˇ kʼoˆ ve, Chi beu‸ ngaˬ gʼuˇ suhˍ feu kʼai taˍ ve la‸ shawnˍ teˇ hpaˍ hta‸ yawˇ gʼa mawˬ ve kʼo, yawˇ nyi ma sha la leh ngaˬ yawˇ mehˆ gʼuˇ suhˍ gaˬ htaˇ, yawˇ ngaˬ hta‸ venˇbaˆ hpehˇ laˇ tuˬ yoˬ, teh‸ dawˇ taˍ ve yoˬ. 21Hkʼe te leh, yawˇ ve la‸ shawnˍ teˇ hpaˍ hta‸ awˬ gʼuˇ suhˍ lo feu kʼai taˍ ve yoˬ. Ya‸ hkʼaˇ, oˇ ve teˇ haˉ yawˇ oˇ kaˬ lo kʼaw‸ haˉ ve yoˬ.
Yaˍkoˆ chaw teˇ gʼaˇ hta‸ behˇ da‸ ve
22Oˇ ve teˇ haˉ Yaˍkoˆ tu leh yawˇ ve awˬ miˇ ma nyiˇ gʼaˇ, yawˇ ve awˬ ceˬ ma nyiˇ gʼaˇ leh yawˇ ve yaˇ paˍ teˇ chi teˇ gʼaˇ hta‸ shiˍ leh Yaˍboˆ iˉ kaˆ lawˬ coˇ paˉ lo hkanˍ tawˆ-e tcuh ve yoˬ. 23Yaˍkoˆ lehˬ yawˇ ve miˇ yaˇ leh yawˇ ve mawˇ jeˬ teˇ hpaˍ hta‸ yuˬ leh iˉ kaˆ lawˬ coˇ paˉ lo hkanˍ tawˆ-e tcuh peuˬ hkʼaw‸ nawˉ, yawˇ teˇ gʼaˇ tiˉ oˇ kaˬ lo chehˇ taˉ ve yoˬ.
24Oˇ htaˇ, chaw teˇ gʼaˇ laˬ leh mvuhˇ htiˇ la htaˇ hkʼa gaˬ yawˇ chaw oˇ ve hta‸ behˇ da‸ chehˇ ve yoˬ. 25Chaw oˇ ve lehˬ, Yaˍkoˆ hta‸ behˇ maˇ gʼaˇ taˬ ve hta‸ gʼa shiˍ ve teˇ yanˇ, Yaˍkoˆ ve pfuhˬ tehˉ kʼu hta‸ dawˆ piˇ leh, Yaˍkoˆ ve pfuhˍ tcuhˉ jiˆ sheˬ ve yoˬ. 26Oˇ htaˇ chaw oˇ ve lehˬ, Ngaˬ hta‸ hpehˇ laˇ-oˆ. Mvuhˇ htiˇ la peuˬ, teh‸ kʼoˆ ve yoˬ.
Yaˍkoˆ kʼaw‸ kʼoˆ ve, Nawˬ ngaˬ hta‸ awˬ bon maˇ na‸ laˇ ve ceh ceh ngaˬ nawˬ hta‸ maˇ hpehˇ, teh‸ kʼoˆ piˇ ve yoˬ.
27Oˇ htaˇ yawˇ lehˬ, Nawˬ aˬ hto‸ ma meh ve le, teh‸ Yaˍkoˆ hta‸ na nyi ve yoˬ.
Ngaˬ Yaˍkoˆ meh ve yoˬ, teh‸ yawˇ kʼaw‸ yaw hkʼaw‸ piˇ ve yoˬ.
28Oˇ htaˇ chaw oˇ ve kʼaw‸ kʼoˆ ve, Ya‸ nyi hkʼaw‸ nawˉ nawˬ hta‸ Yaˍkoˆ teh‸ maˇ gʼa kʼaw‸ kuˬ. Nawˬ hta‸ Iˉsaˍreˍlaˆ #32:28 Chi lehˬ Gʼuiˬsha hta‸ behˇ da‸ ve teh‸ kʼoˆ gaˇ ve yoˬ teh‸ gʼa kʼaw‸ kʼoˆ tuˬ yoˬ. Awˬ lawn kʼo, nawˬ lehˬ Gʼuiˬsha hta‸ ka‸ chaw yaˇ hta‸ ka‸ behˇ da‸ leh gʼaˇ peuˬ, teh‸ kʼoˆ piˇ ve yoˬ.
29Yaˍkoˆ lehˬ chaw oˇ ve hta‸, Nawˬ ve awˬ meh ngaˬ hta‸ a ciˉ hto laˇ-oˆ, teh‸ kʼoˆ piˇ ve yoˬ.
Chaw oˇ ve lehˬ, Aˬ hto‸ ma pa taw nawˬ ngaˬ ve awˬ meh hta‸ na ve le, teh‸ kʼaw‸ kʼoˆ piˇ leh yawˇ hta‸ awˬ bon na‸ piˇ ve yoˬ.
30Hkʼe te leh, Yaˍkoˆ lehˬ chehˇ kuiˬ oˇ ve hta‸ Peˍniˍlaˆhi #32:30 Chi lehˬ Gʼuiˬsha ve mehˆ hpfuhˇ teh‸ kʼoˆ gaˇ ve yoˬ teh‸ meh piˇ ve yoˬ. Awˬ lawn kʼo yawˇ kʼoˆ ve, Ngaˬ lehˬ Gʼuiˬsha hta‸ mehˆ hpfuhˇ tawˍ da‸ leh gʼa mawˬ peuˬ. Chi beu‸ hkʼa gaˬ ngaˬ te‸ chehˇ sheˬ, teh‸ kʼoˆ ve yoˬ. 31Yaˍkoˆ lehˬ Peˍniˍlaˆ hkʼaw tawˆ kʼai htaˇ, mvuhˇ nyi htawˇ tawˆ la peuˬ. Yawˇ lehˬ pfuhˍ tcuhˉ jiˆ sheˬ ve pa taw, ya‸ kʼaw hkʼa deh‸ juˇ maˇ gʼa ve yoˬ. 32Yaˍkoˆ ve pfuhˍ tehˉ kʼu hta‸ oˇ hkʼe te dawˆ heuˆ ve pa taw, Iˉsaˍreˍlaˆ chaw teˇ hpaˍ ya‸ nyi hkʼa gaˬ pfuhˍ tehˉ kʼu shaˍ hta‸ maˇ caˇ.
Lahu Bible Edited © Thailand Bible Society and Bible Society of Myanmar, 2010, 2020.
