Awˬ hkuiˉ puiˍ ve li‸ 25
25
Aˍbraˍhanˍ ve awˬ ceuˬ awˬ hkʼaˇ teˇ hpaˍ
1Aˍbraˍhanˍ lehˬ, Keˍtuˇraˆ teh‸ kʼoˆ ve awˬ miˇ ma awˬ suhˉ teˇ gʼaˇ kʼaw‸ heuˆ ve yoˬ. 2Yaˇ miˇ oˇ ve geh Ziˆmaˍranˍ, Yoˆshanˍ, Meˍdanˍ, Meˇdiˍanˍ, Iˉshaˍbehˆ leh Shuˇ-aˍ hui paw la ve yoˬ. 3Yoˆshanˍ lehˬ, Sheˍbaˆ leh Deˍdanˍ hui ve awˬ pa hpeh‸ ve yoˬ. Deˍdanˍ ve yaˇ teˇ hpaˍ lehˬ, Aˍshuˆrenˍ, Leˍtuˆshenˍ leh Lunˍmenˍ hui hpeh‸ ve yoˬ. 4Meˇdiˍanˍ ve yaˇ teˇ hpaˍ lehˬ, Eˇhpaˍ, Eˇhpeˍraˆ, Eˇnawˆ, Aˍbiˆdaˆ leh Eˇlaˍdaˆ hui hpeh‸ ve yoˬ. Chaw chi teˇ hpaˍ lehˬ, Keˍtuˇraˆ ve awˬ ceuˬ awˬ hkʼaˇ teˇ hpaˍ hpeh‸ ve yoˬ.
5Aˍbraˍhanˍ lehˬ, yawˇ hkʼa cawˬ ve mawˇ jeˬ hkʼa peu-eˬ Iˉcaˆ hta‸ piˇ ve yoˬ. 6Yawˇ ve awˬ miˇ ma i teˇ hpaˍ geh lo paw la taˍ ve yaˇ teˇ hpaˍ hta‸ htawˇ, yawˇ maˇ suh sheˬ htaˇ la‸ shawnˍ teˇ hpaˍ piˇ leh, yawˇ ve yaˇ paˍ Iˉcaˆ chehˇ taˍ ve mvuhˇmiˬ mvuhˇ nyi tawˆ hpawˇ lo ca chehˇ tcuh ve yoˬ.
Aˍbraˍhanˍ suh-e ve
7-8Aˍbraˍhanˍ a sha‸ 175 hkʼaw‸ gaˬ leh suh-e ve yoˬ. 9Yawˇ ve yaˇ paˍ Iˉcaˆ leh Iˉshaˍmeˍlaˆ lehˬ, Maˍreˍ venˇ mvuhˇ nyi tawˆ hpawˇ, Hiˇtiˆ chaw Zawˇhaˍ ve yaˇ Eˇhpaˍronˍ ve miˬguiˬ hkʼaw cawˬ ve Maˆpeˍlaˆ haˉ kʼoˍ hkʼaw, yawˇ hui ve awˬ pa hta‸ yuˬ kʼai leh, yawˇ ve awˬ miˇ ma Saˍraˇ awˬ paˇ lo ca tuˍ piˇ ve yoˬ. 10Miˬguiˬ chi lehˬ, Hiˇtiˆ chaw geh Aˍbraˍhanˍ vuiˬ yuˬ taˍ ve miˬguiˬ hpeh‸ ve yoˬ. 11Aˍbraˍhanˍ suh peuˬ hkʼaw‸ nawˉ, Gʼuiˬsha lehˬ Iˉcaˆ hta‸ awˬ bon maˇ maˇ na‸ piˇ ve yoˬ. Iˉ caˆ lehˬ, Ngaˬ hta‸ mawˬ shehˍ hpaˇ Gʼuiˬsha ve nanˬ bawˍ, teh‸ kʼoˆ ve chehˇ kuiˬ awˬ paˇ lo chehˇ taˍ ve yoˬ.
Iˉshaˍmeˍlaˆ ve awˬ ceuˬ awˬ hkʼaˇ teˇ hpaˍ
12Chi ve lehˬ, Aˍbraˍhanˍ miˇ ma Saˍraˇ ve awˬ ceˬ ma Eˇjiˇtu‸ chaw Haˍgaˍraˆ, Aˍbraˍhanˍ awˬ pon paw la piˇ taˍ ve yaˇ paˍ Iˉshaˍmeˍlaˆ ve awˬ ceuˬ awˬ hkʼaˇ teˇ hpaˍ hpeh‸ ve yoˬ. 13Iˉshaˍmeˍlaˆ ve yaˇ teˇ hpaˍ lehˬ, Naˍbaˍyoˆ, Keˍdaˍ, Aˍdaˆbeˍlaˆ, Miˆbaˍsanˍ, 14Miˆshaˍmaˆ, Duˇmaˍ, Maˍsaˆ, 15Haˍdaˆ, Teˍmaˆ, Yeˍruˇraˆ, Naˍhpiˇshaˆ leh Keˍdaˍmaˍ hui hpeh‸ ve yoˬ. 16Iˉshaˍmeˍlaˆ ve awˬ ceuˬ awˬ hkʼaˇ oˇ ve teˇ hpaˍ lehˬ, chaw teˇ chi nyiˇ ceuˬ cawˬ leh, venˇ teˇ hpaˍ hta‸ htawˇ yawˇ hui ve awˬ meh yuˬ meh piˇ taˍ ve yoˬ. 17Iˉshaˍmeˍlaˆ a sha‸ 137 hkʼaw‸ gaˬ leh suh-e ve yoˬ. 18Iˉshaˍmeˍlaˆ ve awˬ ceuˬ awˬ hkʼaˇ teˇ hpaˍ lehˬ, Aˍsuˇriˆ mvuhˇmiˬ lo kʼai ve ya‸ kʼaw, Haˍviˇlaˍ venˇ hta‸ te leh Eˇjiˇtu‸ mvuhˇmiˬ mvuhˇ nyi tawˆ hpawˇ, Shuˇraˆ venˇ lo hkʼa gaˬ chehˇ taˍ ve yoˬ. Yawˇ hui lehˬ, Aˍbraˍhanˍ ve awˬ ceuˬ awˬ hkʼaˇ teˇ hpaˍ geh maˇ gʼa chehˇ.
Iˉsawˇ leh Yaˍkoˆ paw la ve
19Chi ve lehˬ, Aˍbraˍhanˍ ve yaˇ paˍ Iˉcaˆ ve awˬ lawn hpeh‸ ve yoˬ. 20Iˉcaˆ a sha‸ 40 hkʼaw‸ gaˬ ve teˇ yanˇ, Meˍsoˇpoˇtaˍmiˆ mvuhˇmiˬ hkʼaw chehˇ ve Aˍranˍ chaw, Beˍtuˍlaˆ ve yaˇ miˇ, Laˍbanˍ ve awˬ viˉ ma Reˍbehˆka‸ hta‸ heuˆ ve yoˬ. 21Reˍbehˆka‸ lehˬ yaˇ teˇ gʼaˇ ka‸ maˇ cawˬ ve pa taw, Iˉcaˆ Gʼuiˬsha geh bon lawˬ ve yoˬ. Gʼuiˬsha lehˬ yawˇ ve bon lawˬ hkawˇ hta‸ na yuˬ piˇ leh, Reˍbehˆka‸ hta‸ yaˇ hu la piˇ ve yoˬ. 22Yaˇ ehˉ teˇ hpaˍ awˬ e ve gʼoˇ peˬ hkʼaw gʼaˇ hte‸ hpeˆ dawˇ chehˇ ve pa taw, Aˬ hto‸ ma pa taw ngaˬ awˬ hkʼaw lo chi hkʼe hpeh‸ chehˇ ve le, teh‸ Reˍbehˆ ka‸ Gʼuiˬsha hta‸ na nyi ve yoˬ.
23Gʼuiˬsha yawˇ hta‸ kʼoˆ piˇ ve,
Nawˬ ve gʼoˇ peˬ hkʼaw chaw ceuˬ lonˉ nyiˇ ceuˬ chehˇ taˍ leh,
nawˬ geh maˇ cawˇ da‸ puiˉ ve chaw nyiˇ gʼaˇ paw la tuˬ yoˬ.
Teˇ gʼaˇ lehˬ, awˬ nu teˇ gʼaˇ a‸ kehˉ awˬ gʼaˇ uiˍ jaˇ tuˬ yoˬ.
Awˬ viˉ paˍ lehˬ awˬ nyi paˍ ve awˬ ceˬ gʼa te tuˬ yoˬ, teh‸ kʼoˆ piˇ ve yoˬ.
24Yawˇ yaˇ paw tuˬ awˬ yanˇ gaˬ la ve teˇ yanˇ, yaˇ cehˬ kʼa paw tawˆ la ve yoˬ. 25Awˉ lawˉ peuˇ paw la ve teˇ gʼaˇ lehˬ, awˬ shaˍ nyiˉ-ehˍ cawˬ leh, awˬ to teˇ to hkʼa peu-eˬ shaˍ guiˬ kʼuˉ hkʼa shuˍ awˬ mvuh buiˇ-ehˍ cawˬ ve yoˬ. Hkʼe te leh, yawˇ hta‸ Iˉsawˇ #25:25 Chi lehˬ awˬ mvuh hoˆ beh taˍ ve teh‸ kʼoˆ gaˇ ve yoˬ. teh‸ meh piˇ ve yoˬ. 26Oˇ ve hkʼaw‸ nawˉ, awˬ nyi paˍ teˇ gʼaˇ lehˬ awˬ viˉ paˍ ve hkui kʼawˍ lehˍ hta‸ vawˆ leh tawˆ la ve yoˬ. Hkʼe te leh yawˇ hta‸ Yaˍkoˆ #25:26 Chi lehˬ hkui kʼawˍ lehˍ hta‸ vawˆ taˍ ve teh‸ kʼoˆ gaˇ ve yoˬ. teh‸ meh piˇ ve yoˬ. Yawˇ huiˉ maˬ paw la ve teˇ yanˇ Iˉcaˆ a sha‸ 60 hkʼaw‸ gaˬ peuˬ ve yoˬ.
Iˉsawˇ yawˇ ve awˬ shinˉ hawˇ caˇ ve
27Yaˇ paˍ chi ve nyiˇ gʼaˇ uiˍ la leh, Iˉsawˇ lehˬ cheuˬ jaˇ ve shaˍ bawˆ paˍ hpeh‸ la ve yoˬ. Ya‸ hkʼaˇ, Yaˍkoˆ lehˬ aˉ hkʼaw lo tiˉ ta‸ iˉ gawˬ lehˍ chehˇ gaˇ puiˉ ve chaw hpeh‸ ve yoˬ. 28Iˉsawˇ lehˬ awˬ pa hta‸ shaˍ bawˆ caˍ piˇ puiˉ ve pa taw, awˬ pa yawˇ hta‸ ha‸ ve yoˬ. Reˍbehˆka‸ lehˬ Yaˍkoˆ hta‸ ha‸ ve yoˬ.
29Teˇ nyi htaˇ, Yaˍkoˆ lehˬ nawˆ shiˍ awˍ chiˇ te chehˇ ve teˇ yanˇ, Iˉsawˇ shaˍ ca bawˆ kʼaw‸ la ve yoˬ. 30Yawˇ awˍ meu‸ jaˇ leh, Ngaˬ heuˬ jaˇ peuˬ. Nawˬ te chehˇ ve awˍ chiˇ gʼuiˬ ngaˬ hta‸ a ciˉ taw laˇ-oˆ, teh‸ Yaˍkoˆ hta‸ kʼoˆ piˇ ve yoˬ. (Chi hta‸ pa taw, yawˇ hta‸ Eˇdonˍ #25:30 Chi lehˬ nyiˉ-ehˍ ve teh‸ kʼoˆ gaˇ ve yoˬ. teh‸ meh piˇ ve yoˬ.)
31Oˇ htaˇ Yaˍkoˆ lehˬ, Yaˇ paˍ uiˍ ve aˉ yaˇ nawˬ ngaˬ hta‸ maˇ piˇ laˇ ve kʼo, ngaˬ maˇ taw laˇ, teh‸ Iˉsawˇ hta‸ kʼaw‸ kʼoˆ piˇ ve yoˬ.
32Iˉsawˇ kʼaw‸ kʼoˆ ve, Ngaˬ awˬ meu‸ ve suh la yoˬ. Ngaˬ ve yaˇ paˍ uiˍ aˉ yaˇ lehˬ ngaˬ hta‸ aˬ hto‸ ma awˬ bon pe‸ laˇ gʼa tuˬ le, teh‸ kʼoˆ ve yoˬ.
33Yaˍkoˆ kʼaw‸ kʼoˆ ve, Nawˬ ka ti‸ maˇ te laˇ sheˬ ve ceh ceh ngaˬ maˇ taw laˇ, teh‸ kʼaw‸ kʼoˆ piˇ ve yoˬ.
Hkʼe te leh, Iˉsawˇ ka ti‸ te leh yawˇ ve yaˇ paˍ uiˍ aˉ yaˇ Yaˍkoˆ hta‸ piˇ ve yoˬ. 34Oˇ htaˇ Yaˍkoˆ lehˬ, Iˉsawˇ hta‸ hkaoˍmonˇ leh nawˆ shiˍ awˬ chiˇ gʼuiˬ caˍ piˇ ve yoˬ. Iˉsawˇ htawˇ caˇ peuˬ taˉ leh tawˆ kʼai ve yoˬ. Iˉsawˇ lehˬ yawˇ ve yaˇ paˍ uiˍ aˉ yaˇ hta‸ maˇ shawˍ maˇ caˆ te ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
