Awˬ hkuiˉ puiˍ ve li‸ 24
24
Iˉcaˆ hta‸ awˬ miˇ ma ca piˇ ve
1Chi teˇ pawˆ Aˍbraˍhanˍ lehˬ mawˇ jaˇ peuˬ. Yawˇ te ve kanˉ teˇ ceuˬ le le hta‸ Gʼuiˬsha awˬ bon na‸ piˇ ve yoˬ. 2Aˍbraˍhanˍ yawˇ ve mawˇ jeˬ ha‸ shaˉ shehˍ hpaˇ hta‸ kʼoˆ piˇ ve, 3Nawˬ lehˬ ngaˬ yaˇ paˍ awˬ pon awˬ miˇ ma ca piˇ ve teˇ yanˇ, Hkaˍnanˍ mvuhˇmiˬ ve yaˇ miˇ hta‸ maˇ ca leh, 4ngaˬ ve mvuhˇmiˬ, ngaˬ ve awˬ ceuˬ awˬ hkʼaˇ awˬ hkʼaw lo ve yaˇ miˇ hta‸ ca veu laˇ piˇ tuˬ yoˬ, teh‸ miˬguiˬ mvuhˇ naw Gʼuiˬsha mehˆ gʼuˇ suhˍ hkanˍ leh ka ti‸ te tuˬ, nawˬ ve la‸ sheh ngaˬ ve pfuhˍ tehˉ kʼu hawˉ lo keu taˍ-o‸, teh‸ kʼoˆ piˇ ve yoˬ.
5Awˬ ceˬ paˍ kʼaw‸ kʼoˆ piˇ ve, Yaˇ miˇ oˇ ve ngaˬ geh mvuhˇmiˬ chi hkʼaw maˇ laˬ gaˇ ve kʼo hkʼaˬ hkʼe te tuˬ le. Nawˬ ve mvuhˇmiˬ lo nawˬ ve yaˇ paˍ hta‸ ngaˬ gʼa shiˍ kʼo‸-e piˇ tuˬ laˇ, teh‸ kʼoˆ piˇ ve yoˬ.
6Aˍbraˍhanˍ yawˇ hta‸ kʼaw‸ kʼoˆ piˇ ve, Hkʼaˬ hkʼe hpeh‸ ka‸ ngaˬ yaˇ paˍ hta‸ nawˬ oˇ kaˬ lo maˇ gʼa shiˍ kʼo‸-e. 7Gʼuiˬsha lehˬ, ngaˬ pa ve yehˬ leh ngaˬ ve awˬ ceuˬ awˬ hkʼaˇ teˇ hpaˍ chehˇ taˍ ve mvuhˇmiˬ hkʼaw, ngaˬ hta‸ shiˍ tawˆ-e laˇ leh mvuhˇmiˬ chi ngaˬ ve awˬ ceuˬ awˬ hkʼaˇ teˇ hpaˍ hta‸ piˇ laˇ tuˬ, ka ti‸ te laˇ taˍ ve yoˬ. Ngaˬ yaˇ paˍ awˬ pon awˬ miˇ ma ca gʼa tuˬ, yawˇ ve mvuhˇ naw tcuh yaˇ hta‸ nawˬ mehˆ gʼuˇ suhˍ lo kʼai tcuh taˍ tuˬ yoˬ. 8Yaˇ miˇ oˇ ve nawˬ geh maˇ laˬ gaˇ ve kʼo, nawˬ ngaˬ hta‸ ka ti‸ te taˍ ve chi hta‸ nawˬ gʼa ponˬ tuˬ yoˬ. Ya‸ hkʼaˇ, nawˬ lehˬ ngaˬ yaˇ paˍ hta‸ oˇ kaˬ lo maˇ gʼa shiˍ kʼo‸-e, teh‸ kʼoˆ piˇ ve yoˬ. 9Oˇ htaˇ, awˬ ceˬ paˍ lehˬ yawˇ ve la‸ sheh Aˍbraˍhanˍ ve pfuhˍ tehˉ kʼu hawˉ keu leh hkanˍ ve yoˬ.
10Awˬ ceˬ oˇ ve lehˬ, Aˍbraˍhanˍ ve kaˍlaˍoˆ teˇ chi hkeh hta‸ gʼa‸ veu leh Naˍhkawˍ chehˇ taˍ kuiˬ Meˍsoˇpoˇtaˍmiˆ mvuhˇmiˬ lo kʼai ve yoˬ. 11Mvuhˇ hpeu‸ la hpawˇ, yaˇ miˇ teˇ hpaˍ nanˬ bawˍ lo iˉ kaˆ ca hkʼo la ve awˬ yanˇ gaˬ htaˇ, yawˇ lehˬ venˇ awˬ paˇ lo cawˬ ve nanˬ bawˍ teˇ maˬ awˬ paˇ lo yawˇ ve kaˍlaˍoˆ teˇ hpaˍ hta‸ zuh‸ tcuh taˍ ve yoˬ. 12Oˇ htaˇ yawˇ bon lawˬ leh kʼoˆ ve, Ngaˬ ve awˬ shehˍ hpaˇ Aˍbraˍhanˍ ve Gʼuiˬsha-oˬ, ya‸ nyi ngaˬ dawˇ law taˍ ve hta‸ biˇ la piˇ leh, ngaˬ ve awˬ shehˍ hpaˇ Aˍbraˍhanˍ hta‸ awˬ bon a ciˉ te piˇ sheˍ. 13Ngaˬ lehˬ nanˬ bawˍ chi awˬ paˇ lo chehˇ taˍ leh, venˇ hkʼaw ve yaˇ miˇ teˇ hpaˍ choˬ kaˬ lo iˉ kaˆ ca hkʼo la tuˬ yoˬ. 14Ngaˬ lehˬ yaˇ miˇ teˇ gʼaˇ hta‸, Nawˬ aˉ mo‸ kʼoˍ hkʼaw ve iˉ kaˆ ngaˬ hta‸ a ciˉ taw laˇ-oˆ, teh‸ kʼoˆ piˇ ve teˇ yanˇ, nawˬ Iˉ caˆ awˬ pon leuˆ yuˬ taˍ ve yaˇ miˇ hpeh‸ ve kʼo, Dawˬ-o‸. Nawˬ ve kaˍ laˍoˆ teˇ hpaˍ hta‸ ka‸ ngaˬ iˉ kaˆ taw piˇ shaˍ, teh‸ kʼoˆ tcuh sheˬ. Chi hkʼe hpeh‸ la ve kʼo, nawˬ lehˬ ngaˬ ve awˬ shehˍ hpaˇ hta‸ awˬ bon te piˇ chehˇ ve hta‸ ngaˬ gʼa shiˍ tuˬ yoˬ, teh‸ kʼoˆ ve yoˬ.
15Yawˇ bon lawˬ ve maˇ peuˬ sheˬ ka‸, Reˍbehˆka‸ aˉ mo‸ kʼoˍ taˆ veu laˇ leh oˇ kaˬ lo gaˬ la ve yoˬ. Yawˇ lehˬ, Aˍbraˍhanˍ ve awˬ nyi paˍ Naˍhkawˍ ve awˬ hawehˍ, Beˍtuˍlaˆ ve yaˇ miˇ hpeh‸ ve yoˬ. 16Yawˇ lehˬ awˬ hkiˇ awˬ naˬ da‸ jaˇ ve yaˇ miˇ haˉ hpeh‸ ve yoˬ. Yawˇ nanˬ bawˍ lo ya‸-e leh, yawˇ ve aˉ moˆ kʼoˍ hkʼaw iˉ kaˆ nyiˉ keu peuˬ hkʼaw‸ nawˉ, kʼaw‸ taˆ la ve yoˬ. 17Aˍbraˍhanˍ ve awˬ ceˬ paˍ yawˇ geh gʼuiˇ kʼai leh, Nawˬ ve aˉ mo‸ kʼoˍ hkʼaw ve iˉ kaˆ ngaˬ hta‸ a ciˉ taw laˇ-oˆ, teh‸ kʼoˆ piˇ ve yoˬ.
18Yaˇ miˇ oˇ ve lehˬ, Jawˇmawˇ-oˬ dawˬ-o‸, teh‸ kʼoˆ leh yawˇ ve aˉ mo‸ kʼoˍ hta‸ chiˇ piˇ ve yoˬ. 19Yawˇ hta‸ iˉ kaˆ taw piˇ peuˬ hkʼaw‸ nawˉ, Nawˬ ve ka laˍoˆ teˇ hpaˍ hta‸ ka‸ iˉ kaˆ taw piˇ shaˍ, teh‸ kʼoˆ ve yoˬ. 20Yawˇ nanˬ bawˍ lo kʼaw‸ ya‸-e leh iˉ kaˆ ca kʼaw‸ hkʼo veu laˇ peuˬ hkʼaw‸ nawˉ, kaˍlaˍoˆ teˇ hkeh le le hta‸ iˉ kaˆ hkʼa bvuhˆ taw piˇ ve yoˬ. 21Awˬ ceˬ paˍ oˇ ve lehˬ, yawˇ ca te la ve kanˉ hta‸ Gʼuiˬsha ga laˇ, maˇ ga laˇ ve hta‸ shiˍ tuˬ, yaˇ miˇ oˇ ve hta‸ hkʼa deh‸ nyi tcuhˉ taˍ ve yoˬ.
22Kaˍlaˍoˆ teˇ hpaˍ iˉ kaˆ dawˬ peuˬ ve teˇ yanˇ, yawˇ lehˬ awˬ hpfuhˇ hkʼaˆ ve shi la‸ peˍ teˇ maˬ leh, shi la‸ kawˬ nyiˇ maˬ yaˇ miˇ oˇ ve hta‸ piˇ ve yoˬ. 23Nawˬ a shu ve yaˇ miˇ hpeh‸ ve le. Ngaˬ hta‸ a ciˉ hto laˇ-oˆ. Ya‸ puiˉ ngaˬ hui teˇ hpaˍ nawˬ ve yehˬ hkʼaw ca haˉ la hpeh‸ aw laˇ, teh‸ na nyi ve yoˬ.
24Yaˇ miˇ kʼaw‸ yaw hkʼaw‸ leh kʼoˆ ve, Ngaˬ lehˬ Naˍhkawˬ leh Miˆlaˍhkaˍ ve awˬ hawehˍ, Beˍtuˍlaˆ ve yaˇ miˇ hpeh‸ ve yoˬ. 25Ngaˬ hui ve yehˬ hkʼaw chi gʼawˇ leh awˬ nu ve caˇ tuˬ hkʼa biˇ cawˬ ve yoˬ. Ngaˬ hui geh ca haˉ la hpeh‸ ve yoˬ, teh‸ kʼaw‸ kʼoˆ piˇ ve yoˬ.
26Chaw oˇ ve lehˬ, Gʼuiˬsha hta‸ hkui tcuhˉ teh oˉ kʼoˍ pui leh, 27Ngaˬ ve awˬ shehˍ hpaˇ hta‸ hkʼaˬ htaˆ ka‸ awˬ bon te laˇ chehˇ ve Aˍbraˍhanˍ ve Gʼuiˬsha hta‸ chiˇ mvuh-o. Yawˇ lehˬ, ngaˬ ve awˬ shehˍ hpaˇ ve awˬ viˉ awˬ nyi hui ve yehˬ lo gaˬ htaˇ hkʼa gaˬ ngaˬ hta‸ shiˍ veu laˇ taˍ peuˬ, teh‸ kʼoˆ ve yoˬ.
28Oˇ htaˇ, yaˇ miˇ oˇ ve gʼuiˇ kʼo‸-e leh hpeh‸ la peuˬ ve awˬ lawn hkʼa peu-eˬ, yawˇ ve awˬ e hta‸ ca kʼaw‸ hto piˇ ve yoˬ. 29Reˍbehˆka‸ lehˬ, Laˍbanˍ teh‸ kʼoˆ ve awˬ nyi paˍ teˇ gʼaˇ cawˬ ve yoˬ. 30Yawˇ lehˬ Reˍbehˆka‸ tcuhˉ taˍ ve la‸ peˍ leh la‸ kawˬ teˇ hpaˍ hta‸ gʼa mawˬ ve awˬ hkʼoˆ, chaw oˇ ve yawˇ ve awˬ viˉ ma Reˍbehˆka‸ hta‸ kʼoˆ piˇ ve tawˇ hkawˇ teˇ hpaˍ hta‸ gʼa kaˇ ve teˇ yanˇ, yawˇ chaw oˇ ve geh nanˬ bawˍ lo gʼuiˇ kʼai ve yoˬ. Chaw oˇ ve lehˬ, nanˬ bawˍ paˇ lo yawˇ ve kaˍlaˍoˆ teˇ hpaˍ geh huˉ chehˇ taˍ ve hta‸ gʼa mawˬ ve teˇ yanˇ, 31Gʼuiˬsha ve awˬ bon na‸ piˇ ve chaw-oˬ, aˉ hkʼaw lo laˬ-o‸. Aˬ hto‸ ma pa taw, awˬ baˬ hpawˇ lo huˉ chehˇ ve le. Awˬ lawn kʼo, nawˬ awˬ pon maˇ kʼoˆ, nawˬ ve kaˍlaˍoˆ teˇ hpaˍ awˬ pon maˇ kʼoˆ, ngaˬ chehˇ kuiˬ gu taˍ peuˬ, teh‸ yawˇ hta‸ kʼoˆ piˇ ve yoˬ.
32Hkʼe te leh, yawˇ lehˬ chaw oˇ ve hta‸ yawˇ ve yehˬ lo shiˍ kʼai leh, kaˍlaˍoˆ teˇ hpaˍ hta‸ chi gʼawˇ leh awˬ nu ve caˇ tuˬ teˇ hpaˍ caˍ piˇ ve yoˬ. Peuˬ leh chaw oˇ ve leh yawˇ ve awˬ chawˇ teˇ hpaˍ awˬ pon hkui sheh tsuhˇ tuˬ iˉ kaˆ yuˬ veu laˇ piˇ ve yoˬ. 33Caˇ tuˬ dawˬ tuˬ htawˇ gu leh yawˇ hui hta‸ caˍ piˇ ve yoˬ. Ya‸ hkʼaˇ, awˬ ceˬ paˍ oˇ ve lehˬ, Ngaˬ kʼoˆ tuˬ cawˬ ve tawˇ hta‸ maˇ gʼa kʼoˆ sheˬ ve ceh ceh, caˇ tuˬ hta‸ ngaˬ maˇ caˇ, teh‸ kʼoˆ piˇ ve yoˬ.
Laˍbanˍ lehˬ, Hkʼe te kʼo chi beu‸ kʼoˆ loˬ, teh‸ yawˇ hta‸ kʼoˆ piˇ ve yoˬ.
34Oˇ htaˇ yawˇ kʼoˆ ve, Ngaˬ lehˬ Aˍbraˍhanˍ ve awˬ ceˬ hpeh‸ ve yoˬ. 35Gʼuiˬsha ngaˬ ve awˬ shehˍ hpaˇ hta‸ bon maˇ maˇ na‸ piˇ leh, yawˇ lehˬ paw sha jaˇ ve chaw hpeh‸ ve yoˬ. Gʼuiˬsha yawˇ hta‸ nuˇ, yawˬ, aˉ che‸, hpu, shi, awˬ ceˬ paˍ awˬ ceˬ ma, kaˍlaˍoˆ leh piˉ laˬ maˇ maˇ piˇ taˍ ve yoˬ. 36Ngaˬ ve yehˬ shehˍ ma Saˍraˇ a sha‸ mawˇ la ve teˇ yanˇ, yaˇ paˍ teˇ gʼaˇ paw la leh, yawˇ ve awˬ pa lehˬ yawˇ hta‸ awˬ shinˉ hkʼa peu-eˬ chiˇ a‸ piˇ taˍ ve yoˬ. 37Chi hta‸ pa taw, ngaˬ ve awˬ shehˍ hpaˇ ngaˬ hta‸ chi hkʼe kʼa ti‸ te leh hkanˍ tcuh laˇ ve yoˬ. Nawˬ lehˬ ngaˬ ve yaˇ paˍ awˬ pon awˬ miˇ ma ca piˇ ve teˇ yanˇ, Hkaˍnanˍ mvuhˇmiˬ hkʼaw chehˇ ve yaˇ miˇ hta‸ taˇ ca. 38Ngaˬ pa ve yehˬ hkʼaw chehˇ ve ngaˬ ve awˬ ceuˬ awˬ hkʼaˇ yaˇ miˇ teˇ gʼaˇ hta‸ yawˇ awˬ pon ca veu laˇ piˇ-oˆ, teh‸ ngaˬ hta‸ kʼoˆ laˇ taˍ ve yoˬ. 39Oˇ htaˇ ngaˬ lehˬ, Yaˇ miˇ oˇ ve ngaˬ geh maˇ laˬ gaˇ ve kʼo hkʼaˬ hkʼe gʼa te tuˬ le, teh‸ kʼaw‸ na nyi piˇ ve yoˬ. 40Yawˇ kʼaw‸ kʼoˆ laˇ ve, Ngaˬ hkʼaˬ htaˆ ka‸ nyi hkʼaˇ suh leh a sha‸ te‸ chehˇ ve Gʼuiˬsha lehˬ, yawˇ ve mvuhˇ naw tcuh yaˇ teˇ gʼaˇ nawˬ geh kʼai tcuh leh nawˬ te ve kanˉ teˇ hpaˍ hta‸ awˬ bon na‸ laˇ tuˬ yoˬ. Nawˬ lehˬ ngaˬ ve yaˇ paˍ awˬ pon, ngaˬ pa ve awˬ ceuˬ awˬ hkʼaˇ yaˇ miˇ teˇ gʼaˇ hta‸ gʼa ca shiˍ veu laˇ piˇ tuˬ yoˬ. 41Nawˬ lehˬ ngaˬ ve awˬ ceuˬ awˬ hkʼaˇ teˇ hpaˍ geh gaˬ leh, yawˇ hui yaˇ miˇ maˇ piˇ laˇ ve htawˇ nawˬ ngaˬ hta‸ te taˍ ve ka ti‸ chi hta‸ nawˬ gʼa ponˬ tuˬ yoˬ, teh‸ kʼoˆ laˇ ve yoˬ.
42Chi hta‸ pa taw ya‸ nyi ngaˬ nanˬ bawˍ lo gaˬ la leh bon chi hkʼe lawˬ ve, Ngaˬ ve awˬ shehˍ hpaˇ Aˍbraˍhanˍ ve Gʼuiˬsha-oˬ, ya‸ nyi ngaˬ dawˇ law taˍ ve hta‸ a ciˉ te laˇ-oˆ. 43Ngaˬ lehˬ nanˬ bawˍ chi ve awˬ paˇ lo chehˇ taˍ tuˬ yoˬ. Yaˇ miˇ teˇ gʼaˇ gʼaˇ iˉ kaˆ ca hkʼo la ve kʼo, ngaˬ yawˇ geh iˉ kaˆ lawˬ dawˬ tuˬ yoˬ. 44Yawˇ lehˬ, ngaˬ ve awˬ shehˍ hpaˇ ve yaˇ awˬ pon nawˬ leuˆ yuˬ taˍ ve yaˇ miˇ hpeh‸ ve kʼo, ngaˬ ve kaˍlaˍoˆ teˇ hpaˍ hta‸ htawˇ iˉ kaˆ taw piˇ tcuh-o, teh‸ ngaˬ bon lawˬ ve yoˬ. 45Ngaˬ bon lawˬ maˇ peuˬ sheˬ ka‸, Reˍbehˆka‸ aˉ mo‸ kʼoˍ taˆ veu laˇ leh iˉ kaˆ ca hkʼo la ve yoˬ. Ngaˬ yawˇ geh kʼai leh, Ngaˬ hta‸ iˉ kaˆ a ciˉ taw laˇ-oˆ, teh‸ kʼoˆ piˇ ve teˇ yanˇ, 46yawˇ lehˬ teˇ cawˬ haˉ yawˇ ve aˉ mo‸ kʼoˍ hta‸ chiˇ ya‸ leh, Dawˬ-o‸. Nawˬ ve kaˍlaˍoˆ teˇ hpaˍ hta‸ ka‸ iˉ kaˆ taw piˇ shaˍ, teh‸ kʼoˆ ve yoˬ. Hkʼe te leh ngaˬ iˉ kaˆ dawˬ leh, yawˇ lehˬ ngaˬ ve kaˍlaˍoˆ teˇ hpaˍ hta‸ htawˇ iˉ kaˆ taw piˇ ve yoˬ. 47Ngaˬ yawˇ hta‸, Nawˬ a shu ve yaˇ miˇ le, teh‸ na nyi ve teˇ yanˇ, Ngaˬ lehˬ Naˍhkawˍ leh Miˆlaˍhkaˍ ve awˬ hawehˍ, Beˍtuˍlaˆ ve yaˇ miˇ hpeh‸ ve yoˬ, teh‸ kʼaw‸ yaw hkʼaw‸ laˇ ve yoˬ. Hkʼe te leh, ngaˬ yawˇ hta‸ shi la‸ peˍ leh shi la‸ kawˬ teˇ hpaˍ piˇ ve yoˬ. 48Oˇ hkʼe te peuˬ hkʼaw‸ nawˉ, ngaˬ hkui tcuhˉ teh leh Gʼuiˬsha hta‸ oˉ kʼoˍ pui ve yoˬ. Ngaˬ ve awˬ shehˍ hpaˇ ve yaˇ paˍ awˬ pon awˬ miˇ ma ca gʼa tuˬ, Aˍbraˍhanˍ ve Gʼuiˬsha lehˬ ngaˬ hta‸ choˬ kaˬ lo shiˍ veu laˇ ve pa taw, ngaˬ Gʼuiˬsha hta‸ chiˇ mvuh ve yoˬ. 49Chi hta‸ pa taw, nawˬ hui ngaˬ ve awˬ shehˍ hpaˇ hta‸ ka ti‸ cawˬ leh awˬ bon te piˇ tuˬ ve kʼo, ngaˬ hta‸ a ciˉ kʼoˆ laˇ sheˬ. Oˇ hkʼe maˇ te gaˇ ve kʼo ka‸, oˇ hkʼe a ciˉ kʼoˆ laˇ sheˬ. Ngaˬ hkʼaˬ hkʼe gʼa te cawˇ ve ngaˬ hkʼaˇ ngaˬ kʼaw‸ dawˇ nyi tuˬ yoˬ, teh‸ kʼoˆ piˇ ve yoˬ.
50Laˍbanˍ leh Beˍtuˍlaˆ yawˇ hta‸ kʼaw‸ kʼoˆ piˇ ve, Kanˉ chi ve lehˬ Gʼuiˬsha te taˍ ve kanˉ hpeh‸ ve pa taw, ngaˬ hui te‸ chiˉ kʼoˆ tuˬ maˇ cawˬ. 51Reˍbehˆka‸ awˬ to choˬ kaˬ chehˇ taˍ ve yoˬ. Yawˇ hta‸ shiˍ kʼai-o. Gʼuiˬsha kʼoˆ taˍ ve hkʼe, yawˇ lehˬ nawˬ ve awˬ shehˍ hpaˇ yaˇ paˍ ve awˬ miˇ ma hpeh‸ la piˇ-oˆ, teh‸ kʼoˆ piˇ ve yoˬ. 52Aˍbraˍhanˍ ve awˬ ceˬ paˍ lehˬ tawˇ oˇ ve hta‸ gʼa kaˇ ve teˇ yanˇ, hkui tcuhˉ teh leh Gʼuiˬsha hta‸ oˉ kʼoˍ pui ve yoˬ. 53Oˇ ve hkʼaw‸ nawˉ, yawˇ yuˬ laˬ taˍ ve mawˇ jeˬ hta‸ hpeu‸ tawˆ leh, hpu hkʼeun shi hkʼeun teˇ hpaˍ leh veu‸ kʼaˇ teˇ hpaˍ Reˍbehˆka‸ hta‸ piˇ ve yoˬ. Yawˇ ve awˬ nyi paˍ leh yawˇ ve awˬ e hta‸ htawˇ, awˬ hpfuhˇ hkʼaˆ ve mawˇ teˇ hpaˍ piˇ ve yoˬ.
54Oˇ hkʼe te peuˬ hkʼaw‸ nawˉ, yawˇ ve awˬ chawˇ teˇ hpaˍ geh teˇ geh gu taˍ ve caˇ tu‸ hta‸ caˇ leh, yawˇ hui oˇ kaˬ lo haˉ ve yoˬ. Shawˉ pawˍ mvuhˇ shawˉ yawˇ hui tu la htaˇ, Ngaˬ ve awˬ shehˍ hpaˇ geh kʼaw‸ kʼo‸-e tuˬ a hkaw-anˬ pe‸ laˇ-oˆ, teh‸ yawˇ hui hta‸ kʼoˆ piˇ ve yoˬ.
55Reˍbehˆka‸ ve awˬ nyi paˍ leh yawˇ ve awˬ e kʼoˆ ve, Yaˇ miˇ chi ngaˬ hui geh teˇ chi nyi hkʼe chehˇ taˉ piˇ sheˬ. Oˇ ve hkʼaw‸ nawˉ nawˬ hui shiˍ kʼai hpeh‸ ve yoˬ, teh‸ kʼoˆ ve yoˬ.
56Ya‸ hkʼaˇ yawˇ kʼoˆ ve, Ngaˬ hta‸ a ciˉ taˇ gʼawˬ tiˍ taˍ laˇ-oˆ. Awˬ lawn kʼo, Gʼuiˬsha ngaˬ hta‸ awˬ bon na‸ laˇ taˍ peuˬ. Ngaˬ ve awˬ shehˍ hpaˇ geh ngaˬ hta‸ a ciˉ kʼo‸-e tcuh laˇ-oˆ, teh‸ kʼaw‸ kʼoˆ piˇ ve yoˬ.
57Yawˇ hui kʼaw‸ kʼoˆ ve, Hkʼe te kʼo yaˇ miˇ hta‸ a ciˉ na nyi shaˍ. Yawˇ hkʼaˬ hkʼe kʼoˆ la naˍ, teh‸ kʼoˆ ve yoˬ. 58Yawˇ hui Reˍbehˆka‸ hta‸ kuˬ leh, Nawˬ yawˇ hui geh kʼai yoˬ laˇ, teh‸ na nyi ve teˇ yanˇ yawˇ lehˬ, Yoˬ, ngaˬ kʼai tuˬ yoˬ, teh‸ kʼaw‸ kʼoˆ piˇ ve yoˬ.
59Hkʼe te leh, yawˇ hui Reˍbehˆka‸ leh yawˇ ve awˬ ceˬ ma hta‸ Aˍbraˍhanˍ ve awˬ ceˬ paˍ teˇ hpaˍ geh kʼai peu ve yoˬ. 60Yawˇ hui Reˍbehˆka‸ hta‸ bon na‸ piˇ leh kʼoˆ ve,
Yaˇ miˇ-oˬ, nawˬ lehˬ chaw moˍ chaw cuˇ lonˉ ve awˬ e hpeh‸ la piˇ-oˆ.
Nawˬ ve yaˇ teˇ hpaˍ htawˇ, yawˇ hui ve canˇ paˍ teˇ hpaˍ ve venˇ hta‸ gʼa uˉ peunˍ piˇ-oˆ, teh‸ kʼoˆ ve yoˬ.
61Oˇ ve hkʼaw‸ nawˉ, Reˍbehˆka‸ leh yawˇ ve awˬ ceˬ ma teˇ hpaˍ kaˍlaˍoˆ ciˇ leh, Aˍbraˍhanˍ ve awˬ ceˬ paˍ hkʼaˇ suh kʼai ve yoˬ.
62Awˬ yanˇ oˇ ve awˬ hkʼaw lo, Iˉ caˆ lehˬ, Ngaˬ hta‸ mawˬ shehˍ hpaˇ Gʼuiˬsha ve nanˬbawˍ, teh‸ kʼoˆ ve hteunˍ lo hkʼa gaˬ laˬ leh, Hkaˍnanˍ mvuhˇmiˬ awˬ hawˉ hpawˇ teˇ tawn lo chehˇ taˍ ve yoˬ. 63Teˇ haˉ yawˇ ya‸ kʼaw ca toˇ guiˇ chehˇ ve teˇ yanˇ, kaˍlaˍoˆ teˇ hpaˍ laˬ chehˇ ve hta‸ yawˇ gʼa mawˬ ve yoˬ. 64-65Reˍbehˆka‸ lehˬ Iˉcaˆ hta‸ gʼa mawˬ ve teˇ yanˇ kaˍlaˍoˆ hkʼoˆ ya‸-e leh, Oˇ kaˬ ngaˬ hui gʼuˇ suhˍ lo laˬ chehˇ ve chaw oˇ ve a shu le, teh‸ awˬ ceˬ paˍ teˇ gʼaˇ hta‸ na nyi ve yoˬ.
Awˬ ceˬ paˍ kʼoˆ ve, Yawˇ lehˬ ngaˬ ve awˬ shehˍ hpaˇ hpeh‸ ve yoˬ, teh‸ kʼoˆ piˇ ve yoˬ. Oˇ htaˇ, yawˇ uˉ nyiˉ teˇ maˬ yuˬ leh yawˇ ve mehˆ hpfuhˇ hta‸ beh taˍ ve yoˬ.
66Awˬ ceˬ paˍ oˇ ve lehˬ, yawˇ te taˉ peuˬ ve kanˉ hkʼa peu-eˬ Iˉcaˆ hta‸ hto maˍ piˇ ve yoˬ. 67Iˉ caˆ lehˬ Reˍbehˆka‸ hta‸ aˉ po kʼo hkʼaw shiˍ lo‸-e leh yawˇ hta‸ heuˆ ve yoˬ. Yawˇ Reˍbehˆka‸ hta‸ ha‸ jaˇ ve pa taw, yawˇ ve awˬ e suh-e leh dawˇ haˍ chehˇ ve nyi ma mehˉ kʼai ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
