BOTHUBO 48
48
Ephraim ngo Manasseh Kümghatsü
1Tithiu Joseph vilo pi, “Julo, o pu ye sü anie.” Ikehu pa no pa gholo pa nu Manasseh ngo Ephraim pama sawu. 2Eno Jacob vilo asütsa tsü, “O nu Joseph ye o lau ighi anie.” Tile Israel no pa kumto kümtsü süno pa lüpa lo ithu iqave. 3Eno Jacob no Joseph vilo pi, “Akughushu Lhou no Canaan yeghi, Luz lono I lau ipeghi no I kümghatsüe, 4eno I vilo pi, ‘Julo, I no o pelo athi pithi eno kughuko lupe nani, eno timi aqokitikhi shivepe nani, eno pülhapuju mheghi shi ayeghi hipau pesü o shelo o tikughukoqo tsü nani.’ 5Eno itehi o nu kini, khuu pama Egypt yeghi lo I no ighi moke züuno o lau punu keno, pama ye Iw ake; Reuben ngo Simeon pama no Iw ketoi, Ephraim ngo Manasseh pama ye Iw shini. 6Pama thiuno nono atianuli ithulu keu ye ow shini. Eno amheghi ighi kelo panongu ye panongu pamu noqo gholo kihisüni. 7I ghengu ye, kughou I no Paddan lono ighi keno, I mlo ghimepu shi Rachel ye Canaan yeghi lo Ephrath tonike kushuo kumo lo ala lono thive, eno I no Ephrath (ti ye, Bethlehem) la lo li shiqhove.”
8Kughou Israel no Joseph nuli ithulu keno, pa no pi, “Pama ye khuu kea?” 9Joseph no pa pu vilo pi, “Pama ye I nue, Alhou no hilau no I kümgha tsükeu ke.” Eno pa no pi, “Kimiyeno hila I lau saghilo, tishianguno I no pama kümgha tsüni.” 10Israel ye kichimi shive kehu anhethi züve no pa ye ithulu move. Ikehu Joseph no pama sasü pa phivilo ighi, eno pa no pama müma no vape. 11Eno Israel no Joseph vilo pi, “Ni ye o gi ithulu nanie pi khilemu laju moe; ikemu julo, Alhou no I pelo o nuli ghi ithulu peke.” 12Tithiu Joseph no pa pu lukobo lono pama khape luve, eno ayeghi lo pa gi pishiqho luve. 13Eno Joseph no pama khape luve, Ephraim no pa u ajeu Israel u piyiu küdau, eno Manasseh no pa u piyiu Israel u ajeu küdau ishi ngope no pa zülo pama saghi. 14Israel no pa u hekütaluve no pa u ajeu pesü Ephraim, khuu ayitiu keno, pa kütsü shou be, (kughengu Manasseh no anoghiu ke). 15Eno pa no Joseph kümghatsü no pi,
“Alhou khuu zülo I pu Abraham ngo Isaac no cheche keno,
Alhou khuu no I küxü kupuju ishi kutolo I kheu keno,
16kungumi khuu no alhoksa kümtsü lono I xachilelu keno, Pa no apu pama kümghatsü peniu;
pama launo I je, I pu Abraham ngo Isaac je pewo peniu;
eno ayeghi lo pama pelo aqokitikhi shi ikowolu peniu.”
17Kughou Joseph no pa pu u ajeu no Ephraim shou bepe aghikeu ithulu keno pa mlo qimlave, eno Ephraim kütsü lono pa pu u ajeu ikhiqhepe Manasseh kütsü shou betsü niye shi. 18Joseph no papu vilo pi, “Tila kumoe, I pu; anu hipau no anoghiu ke, o u ajeu pesü pa kütsü lo belo.” 19Ikemu papu no milive no pi, “I no ithi anie, I nu, I no ithi ani. Pa ghi ashiaye kije shi ikowo nani. Tishinamu, pa thiküzüu ayitiu no pa nguno akijeu shi nani, eno pa tikughuko no aqokitikhi shiye shinani.” 20Ikehu pa no tipa tsalani no pama kümghatsü no pi,
“O vecheo Israel no kükümgha tsa ishi pi nani,
‘Alhou no o pesü Ephraim ngo Manasseh toi shitsü peniu.’”
Ikehu pa no hitoi Ephraim pesü Manasseh züu shivetsü. 21Tithiu Israel no Joseph vilo pi, “Julo, ni ye thiveni cheae, ikemu Alhou no nongu gholo anani eno nongu sasü no puasü yeghi lo idewo nani. 22Tinguno alau, o thiküzümi tsükeu nguno alau ato yeghi lakhi khikhi I no Amorimi u lono I zütakikihi ngo Iw shexilika pesü hakholu keno tipau o tsüve ani.”
The Bible Society of India
© 2023, Used by permission. All rights reserved. More
