BOTHUBO 49
49
Jacob no Pa Nuli Kümghatsü
1Tithiu Jacob no pa nuliqo kuno pi, “Nongu aqoshi hekütsülo, tishianguno ighini keu tsala lo nongu lau kiu shinani keno I no nongu vilo pini.
2“Hekütsüpe inilo, O Jacob nuliqo,
nongu papu Israel tsa inilo.
3“Reuben, no ye I nu anoghiu,
I küka, I kumto xathi amsüu,
angualei keu lo ichushei eno aküka lo ichushei ke.
4Azükuqo toi a-a shimoe, no ye akighiche shimo nani,
kughengu nono o pu lüpa lo iku;
tishino nono ti shikitiqeve—pa no I lüpa lo ikue!
5“Simeon ngo Levi ye athiazü;
pama zütakikihi ye kütsakungo keu ghünanu ke.
6I ngulho ye pama hoho lo kuloji moe; O I juküvü,
pano loji lo küqha kevilo.
Kughengu panongu no amlo kighide lono timiqo pithike,
eno ithipüqai amshitsü püka love tsüe.
7Pano xukighide ye angusüpue, kughengu ti ye ayiküsae,
pano loghu ye angusüpue, kughengu ti ye ayisalo kütüe!
Jacob lagha lono I no panongu kijethave tsüno
Israel lono panongu haleveni.
8“Judah, o thiküzümi no o sheqhe nani; o u no o ghümi
kuo tsüqü luvetsü nani; o pu
nuliqo no o zülo pishiqho nani.
9Judah ye abongshuu ti lhothe;
I nu, nono lhoxü tsüqhive no iqhoghive ke.
Pa no itsaqi ihozü no abongshuu toi ipuwue; khuu no
ighü mono pa küda puthuni kea?
10Sükusho süqha Judah lau süghi moke kutolo
kükaküsü ye Judah phevemo,
momu yepeu küsü ye pa pukhu dolono kühave monani;
eno ashiayeqo no pa lau aghokulu shi nani.
11Paw khurhati atsaibo lo tshü
eno khurhali atsaibo akiviu lo tshüpe qhino pa no
atsaizü lono pa phimini ishile eno
atsaizü kuhu lono alouphi ishie.
12Pa nhethi no atsaiji nguno tsüngtsüi eno pa hu no
akichhizü nguno metsüghoi ke.
13“Zebulun ye azüghimkü lo küghüna nani;
pa ye zükiluqo kungo-a shi nani,
eno pa lughi ye Sidon lo anani.
14“Issachar ye khurha kumtoe,
ambeloji dolo ipu-itsa nani.
15Akulhokiqhi-a kivi pa no ithulu, eno ayeghi ye
azüküvüpu shi aghi, ikehu pa no abighi lono
akho xapuni ye itsaqi, eno anguka
lono mlakeu qeu shiuve.
16“Dan no Israel shiaye lakhi
shino paw timi küghatha nani.
17Dan ye ala lo apighi toi nani,
alaghi lo athicho no khurshi
phitsü mighitsü kelo ti sakicheu
no athiu iluqive ketoi nani.
18Ow xakulupu I no ngokhe anie, O Ampeu.
19“Zülekilemi no Gad le nani,
ikemu pa no panoqo thiuno apape lewu nani.
20“Asher chuqupu ye kinikülü shi nani,
kükami chuqupu pa no tsü nani.
21“Naphtali ye ashe ali phepupo
ketoi, tino ati jukivi pitie.
22“Joseph ye athi pithi keu loka,
azüpuki phivilo athi pithi keu loka lakhie;
pa lokaqo ye aliwo veche ikue.
23Asüzü kipemi no mijimlai pa kaqhi, apiji
vepuwu no shishe pa kijipüsae,
24tishinamu paw shexilika ye ithamoe; Jacob Lhou
Akumtou u ghenguno,
(Israel Tuqu, Akheu ghenguno)
pa umlo ye mthüthei anie,
25o pu Lhou, o kuphu tsükeu,
Akughushuu kükümgha, kunguu atsütsü lo eno
aqhou azü kutho lo akeu,
akichhi ngo atita kükümgha pesü
o kümgha tsüke ghenguno ke.
26O puw kükümgha ye I puasü
noqo kükümgha nguno akijeu,
mulholo toghiqow kükümgha nguno akijeu ke.
Tipaqo no Joseph kütsü lo apelo,
pa thiküzümi launo kütüta shive keu kütsü shou apeniu.
27“Benjamin ye mihemzai keu
tüngtügha, inaqhe no tsüqhi
kijiliu no ti xulepuwu ke.”
Jacob Kithi eno Akumo Kuqho
28Hipaqo no Israel shiaye chighikini. Panongu papu no hitoi panoqo kümghatsüe, lakhikhi no aküzüpu shi aghikeu kiqi lono pa no kümghatsüe. 29Tishino pa no panoqo azah tsüno pi, “Ni ye Iw timi gholo hekütsü luve niye shivae; Hittimi Ephron luza lo atuki akeu lo I puasü gholo I shiqhove lo, 30ti ye Canaan yeghi lo Mamre kipelau Machpelah luza lo atuki, khikhi Abraham no Hittimi Ephron luza lo akumoki shiniye qhüluve keno tipau ke. 31Panongu no Abraham eno pa nipu Sarah tilehi shiqhove. Tilehi panongu no Isaac ngo pa nipu Rebekah shiqhove eno tilehi I no Leah shiqhove— 32aluza eno atuki tilehi akeu ye Hittimi launo qhüluve ke.” 33Kughou Jacob no pa nuliqo azah tsü tave keno, pa no alüpa lo pa pukhu peqhe luve no pa tuthu kishekhave eno paw timiqo gholo hekütsü luve.
The Bible Society of India
© 2023, Used by permission. All rights reserved. More
