BOTHUBO 47
47
Jacob Kibolomi no Goshen lo Küghünave
1Ikehu Joseph no Pharaoh lau ighi no pi, “I pu eno I thiküzümi ye pano tsü-aqu ngo lhoxü jeli eno pano no pighi akeqo kümtsü sasü Canaan yeghi lono ighivae. Panongu ye itehi Goshen yeghi lo anie.” 2Pa thiküzümi dolo pa no pano pungu sasü Pharaoh zülo puthughope. 3Pharaoh no pa thiküzümi vilo pi, “Nongu luche ye kiu kea?” Panongu no Pharaoh vilo pi, “Ni puasüqo toi o qemiqo ye ambekhemi ke.” 4Panongu no Pharaoh vilo pi, “Ningu ye ayeghi hipau lo kachena shi ighi ani, kughengu o qemiqo tsü-aqu ye atsüni mzachu kepu kühavae, kughengu Canaan yeghi lo shishe püqümiye anie. Ikehu itehi, kimiyeno o qemiqo pelo Goshen yeghi lo küghünalu pelo.” 5Tileno Pharaoh no Joseph vilo pi, “O pu eno o thiküzümi ye o lau ighivae. 6Egypt yeghi ye o zülo ani. O pu eno o thiküzümi pelo ayeghi akiviu lo ngove pelo. Panoqo pelo Goshen yeghi lo ngove pelo, eno tsala panoqo dolo shitsami aghi aye, I tsü-aqu jukuto kepushi panoqo süsülo.”
7Tishino Joseph no pa pu Jacob saighi no Pharaoh zülo puthughope, eno Jacob no Pharaoh kümghatsüe. 8Pharaoh no Jacob vilo pi, “O mpe ye khije shive akea?” 9Jacob no Pharaoh vilo pi, “I küxü lo kachena shi ighikeu hi ampe 130 shivae. Ampe aghulo likhi aphi ikemu shilusake pachi, eno I puasüqo küxü mpe qhemi kumoe.” 10Eno Jacob no Pharaoh kümghatsü no pa zülono ipeve. 11Tithiu Pharaoh no azah tsüke toi, Joseph no Egypt yeghi lo, ayeghi akiviu, Rameses yeghi pesü amheghi shi pa pu eno pa thiküzümi tsüe. 12Joseph no pa pu, pa thiküzümi, eno papu kibolomi kümtsü lau, panoqo tianuli kikihi kiqi lono achuqupu tsüe.
Joseph eno Püqümiye
13Tipa ghuloki lo ayeghi kümtsü lo achuqupu kühave, kughengu püqümiye no shishe kije shive, ikehu Egypt yeghi ngo Canaan yeghi ye püqümiye ghenguno aveküsa shive. 14Egypt ngo Canaan yeghi lo küami no athi qhülu keu pisa kümtsü Joseph no hekütsü luve. Eno Joseph no Pharaoh kilo pisa peilo tsüve. 15Kughou Egypt ngo Canaan yeghi lo küxümi no pisa kümtsü pepüha khave keno, Egyptmi kümtsü no Joseph lau ighi no pi, “Achuqupu ni tsülo. Kushiye ningu ye o nhethe lono thive peni kea? Kughengu niw pisa ye küha khavae.” 16Joseph no khochile, “Nongu tsü-aqu tsülo eno tsala nongu no pisa kühave aghi aye, nongu tsü-aqu züqhulo I no achuqupu nongu tsüni.” 17Ikehu panongu no atsü-aqu peighi no Joseph tsü, eno Joseph no panoqow khurshi, atsü-aqu, lhoxü jeli eno khurhaqo theli lo achuqupu tsüe. Tipa mpe lo pa no panoqo tsü-aqu kümtsü theli lo achuqupu pewo panongu tsüe. 18Eno kughou tipa mpe kishekhave keno, panongu no tokuu ghi ighi no pa vilo pi, “I mpeu launo ningu ye küsüve moni, niw pisa ye kümtsü peitha khavae. Atsü-aqu loji ye I mpeuw shivae. 19Ningu eno ni yeghi ye kushiye o nhethe lono thive peni kea? Achuqupu ghenguno ningu eno ni yeghi qhüluve tsülo, eno ningu ye ni yeghi gholono Pharaoh qemiqo shiveni. Apiti ningu tsülo tishianguno ningu ye thimo no xülu nani, eno ni yeghi ye pighivemo nanie.”
20Ikehu Joseph no Pharaoh ghenguno Egypt yeghi kümtsü qhüluve, kughengu püqümiye no Egyptmi ghenguno ihulove kehu kümtsü no pano luza jechuve ke. Ayeghi ye Pharaohw shive. 21Eno Joseph no timiqo pesü Egypt yeghi shekha kutolo aqemi shivepe. 22Achinemi yeghi likhino pa no qhülu tsümoe, kughengu achinemi ye Pharaoh launo atha-aqo ache eno Pharaoh no tsükeu pesü xüche; tighenguno panongu ye pano yeghi jechumoe.
23Tithiu Joseph no timiqo vilo pi, “Julo, ishi tsala lono I no Pharaoh ghenguno nongu eno no yeghi qhüluvae. Itehi nongu ghenguno apiti hi anike nongu no apiti xusülo. 24Eno ghile hukelo pungu lo saje lakhi ye Pharaoh tsülo, eno bidi no nongu sala shini, ti ye no luza ghenguno apiti, nongu eno no kibolomi ngo no tianuliqo ghenguno achuqupu shini.” 25Panongu no pi, “Nono ni küxü xaluve tsüae; hi ye I mpeu lopu shilu pelo, ningu ye Pharaoh qemi shiniae.” 26Ikehu Joseph no Egypt yeghi ghenguno akhuaye mlave tsü, eno ishi kutolo ti pecheni, ti ye Pharaoh no pungu lo saje lakhi luni; achinemi yeghi likhino Pharaohw shimove.
27Ikehu Israel ye Egypt lo Goshen yeghi lo küghünave. Eno panongu ye tile amheghi ala shiluve, eno athi pithilu no shishe kughuko luve. 28Jacob ye Egypt yeghi lo ampe chighitsüni xüe. Ikehu Jacob mpe ye 147.
29Kughou Israel thiveni keu do kupunuve keno, pa no pa nu Joseph kuno pi, “Tsala o zülo I kimiyelu kepu shi püaghi aye, I lukobo qholo o u beno kikimiye eno kuchou lono I lau mlani pi tushoqhi lo. Egypt lo I kumo shiqho kevilo, 30ikemu I puasüqo gholo I shiqholo. Egypt lono I xapu ipeve no I panoqo thigho lo I shiqholo.” Pa no khochile, “Nono pi aketoi I no shini.” 31Eno pa no pi, “I vilo tushoqhi lo”; eno pa no pa vilo tushoqhive. Tishino Israel no pa lüpa kütsü lo pishiqho luve.
The Bible Society of India
© 2023, Used by permission. All rights reserved. More
