ดอ โฆว 32
32
ลอง อาโกบ วี ยึร อีกัด อัน
1อาโกบ ตึอน บอ ฮาว โดบ อึณเตณ อัน. ดอ ฮาว อัน, อึณ มึห อามู อามาด เฌาพรา, เฆ ตัห ฌัม โดง กอย อัน. 2อัน บอ ยึร เฆ, อัน ต็อห, “โดง ตี มูห โดง คยัะ เฌาพรา.” โคว, อัน แตห โดง ตี จืร มาฮานาอีม.#32:2 ‘มาฮานาอีม’ แคง โฆรห แฮแบร, ลอง ดาง อัน มูห ‘โดง คยัะ’
3ปัน ตี อาโกบ ตึอน วี ตึย มัง อี แตห เฆ แยต ดี อาต, ฮาว ฌัม แคง มืง เซอี อี มูห โดง กอย อีกัด อัน. อึณ มูห มืง เฆ ดูอี เอโดม. 4อัน จัร เฆ โบง ปาย นี. อัน ต็อห, “เบ โลว ฮาว โดง กอย ดา กาณา โอว อี จืร อาโซว ต็อห, ‘หมาย แม อี จืร อาโกบ, อัน ต็อห ดี แม, “โอว แฮะ แบน แคต, กอย แคง กาง อาลับ. กอ ฌัม อาตึร, โอว แฮะ กอย รึม โดบ อัน. 5โอว แฮะ ปึอน มามัก เฆ มาลา, มาบู บอ มาแป, โอว แฮะ ปึอน หมาย อี มูห อีมาย บอ อีบึณ. ดอ ตี นี โอว แฮะ ตึย หมาย โอว แตห เฆ กาลาง โตต ลอง อัน ตี ดี ดา กาณา โอว, แตห อัน กาเว โอว.”’”
6ดอ วี ตัห ฌัม เฆ โดง กอย อาโกบ ตึอน เฆ ต็อห, “เย แฮะ ฮอต ฌัม โดง กอย อีกัด แม อี มูห อาโซว. อัน ดี ตัห โดง กอย เอ แตห อัน รวห แม. อัน มึห ดูอี พวน มาย็อห วี อี ตัห โดบ อัน.”
7ปัน ตี อาโกบ ตึอน บอ มึห น็อห แหม, น็อห โยว กาเซา. โคว, อัน วี กาย็อห เฆ ดูอี อี โดบ อัน แตห เฆ แบน อา พึง. บอ เฆ มาบู มาแป, บอ มามัก บอ มังปร็อง กาฮาต, อัน กาย็อห โตต ปาย ตี. 8อัน ต็อห, “เซ อาโซว ดี กาปับ อู พึง, เซ อัน บอ กาโฆห ดี เฆ, อึณ ฆีด ปอ อู พึง. เฆ ปึอน ดี เตา ฮาว.”
9ปัน ตี อาโกบ วี ซาคึร ต็อห, “อึย แม เฌาพรา, แม มูห เฌาพรา ปี กรึบ ฆูณ ดัง โอว อี จืร อาบราฮัม. แม บอ มูห เฌาพรา ปี กรึบ ฆูณ โอว อี จืร อาแซก. แม เฌาพรา, แม แฮะ ต็อห ดี โอว, ‘เซ แม เวณ แคง มืง แม, วี กอย รึม โดบ วอแว แม, โอว ดี วี โบง นา หมึอม ดัว ดี แม.’ 10อึณ ตู กาอาบ แม กาเว โอว, โบง นา หมึอม ดอน โมยว ฌึร ตี ดี โอว. อาต นี ดอ กาโลห โอว แบลง อึม ยอดาน ตี, โอว มึห มี อึณกรวน โอว. ดอ ตี นี เฆ อาโมยว โอว แฮะ แบน อา พึง. 11ดอ ตี นี โอว ยี หมาณ, แตห แม เฌา คยอด โอว ดี อีกัด โอว อี จืร อาโซว. โอว แฮะ โยว กาเซา อัน. โอว โยว อัน ดี ตัห ง็อห แวน บอ โอว บอ ฆอน โอว บอ มา เฆ. 12แม เฌาพรา ยี แฮะ ต็อห, ‘โอว ดี โบง นา หมึอม แบน โมยว แบน โมยว ดี แม. โอว ดี บอ แตห เฆ หลูกหลาน แม กืน แคะ กืน กาฮาต อี กอย ดี นัมมูกซารา. กอ ฮู แป ดี ตีห.’”
13ปัน ตี แคง หมึร อาโกบ วี กอย โดง ซาคึร อัน. อัน วี ยอด โดว ซัดดาวา อัน, ร็อห แบน โดว แบน โดว, แตห อัน ดัว แบน คอซอง ดี อีกัด อัน. 14อึณ มูห มาแป อาหยาง อา มาย็อห โดว, อาโล็ง อา ฆึร โดว, มาบู อาหยาง อา มาย็อห โดว, เฆ อาโล็ง อา ฆึร โดว, 15มังปร็อง กาฮาต โอย ฆึร โดว บอ ฆอน เฆ, มามัก อาหยาง พวน ฆึร โดว บอ มามัก อาโล็ง ฆึร โดว, มาลา อาหยาง อา ฆึร โดว, บอ อาโล็ง ฆึร โดว. 16อัน ดึห โตต โดว ซัดดาวา เฆ ตี, ดัว ดี หมาย อัน, แตห เฆ ฮาว แยต ดี อาต, แตห เฆ ฮาว อู โมยว อู พึง.
17อัน วี จัร หมาย อี แยต ดี อาต ต็อห, “เซ อีกัด โอว อี จืร อาโซว ดีหมอด แม, เซ อัน ดี บอ ต็อห, ‘แม มูห หมาย อาเซ? นา เหมา แม ดี ว็อะ? โดว ซัดดาวา ปี ตึย แม, อึณ มูห โกรวกราม อาเซ?’ 18เบ บอ โลว ต็อห, ‘โดว ซัด เฆ ตี มูห โดว ซัดดาวา หมาย แม, อี จืร อาโกบ. อึณ มูห คอซอง ปี ตึย อัน ดัว ดี ดา กาณา อัน, อี จืร อาโซว. อาโกบ ตึอน ยี โดบ ดี ปัน.’”
19บอ เฆ ดูอี อี ตึย โดว ซัดดาวา แบน พึง แบน พึง, อัน จัร เฆ ต็อห ปาย ตี. อัน ต็อห ดี หมาย อัน ดอน อี, “เซ เบ กาตูณ อาโซว ตึอน, เบ โลว กาลาง ปาย ตี.” 20เบ บอ โลว ต็อห, “บอ หมาย แม, อี จืร อาโกบ ตึอน, อัน ดี โดบ ดี ปัน เย.” อัน ทาง แคง น็อห อัน, “โอว ดี ดัว คอซอง แยต ดี อาต โอว, แตห อึณ แตห น็อห อัน วี ดาคึย, อาว ฮู มึห น็อห รู ดี โอว.” 21ปาย ตี อาโกบ แฮะ ตึย คอซอง แยต ดี อาต อัน. แคง หมึร ตี อัน ยี กอย โดง คยัะ เฆ.
ลอง อาโกบ กาลูต ดี เฌาพรา
22แคง หมึร ตี, อาโกบ ยี ยีต, ดึห อีบึณ อัน อา วี บอ หมาย อีบึณ อัน อา วี. อัน บอ ดึห ฆอน อีมาย อัน ฆึร ดี อู วี, บอ โกรวกราม อัน โตต ดอน โมยว, ตึย เฆ ฮาว กาโลห แบลง อึม ยาโบก. 23แคะ ปี มึห อัน, อัน ดึห โตต, ตึย แตห อึณ ฌัม นา ตัะ แบลง อึม ตี. 24อัน อู วี ยี กอย ดี ปัน. ปัน ตี อึณ มึห ดา อู วี ตัห กาลูต ดี อัน, แตห กอ ฌัม แปร วัห. 25ดา อี ตึอน, อัน กอ นับ, อัน ตู แป อาโกบ ตึอน, อัน วี มัห ณอย อาโกบ, แตห อึณ กอ กาเลต. 26อัน บอ ต็อห, “แตห แม เบลห โอว. แปร แฮะ วัห.”
อาโกบ ตึอน ยี ต็อห, “อาต เบลห โอว ดี แม, แตห แม ม็องการา ดัว ดี โอว.”
27ดา อี ตึอน วี ต็อห ดี อาโกบ, “มาเซ ปี จืร แม?”
อัน วี ต็อห, “โอว จืร อาโกบ.”
28ดา อี ตึอน วี ต็อห, “อู โป็ง อาตึร แม อาว ฮู จืร อาโกบ. โอว ดี แตห แม จืร อาอีซาเรลัะ. โอว ดี แตห แม จืร ปาย ตี โคว, แม แฮะ ลาย กาลูต ดี อัน เฌา, บอ ดี เฆ ดูอี. แม ยี แฮะ แป.”#32:28 ‘อีซาเรลัะ’ แคง โฆรห แฮแบร, ลอง ดาง อัน มูห ‘อัน กาลูต ดี เฌาพรา’
29อาโกบ วี ดีหมอด, “มาเซ ปี จืร แม?”
อัน วี ต็อห, “เหมา อึณปาย ปี ซี นับ แม จืร โอว?” ปัน ตี อัน บอ ม็องการา แตห ดี อาโกบ.
30อาโกบ ตึอน ยี แตห โดง ตี จืร เปนูเอน. อัน แตห โดง ตี จืร ปาย ตี โคว, อัน ต็อห, “เฌาพรา แฮะ แตห โอว ยึร นา อัน. อัน ยี ตู ง็อห แวน โอว. อัน แฮะ แตห โอว อีม.”#32:30 ‘เปนูเอน’ แคง โฆรห แฮแบร, ลอง ดาง อัน มูห ‘นา เฌาพรา’
31ปัน ตี แปร บอ วี บลาง, อาโกบ เลห ดี โดง จืร เปนูเอน ตึอน. อัน ยี ฮาว เกียง เกห โคว, ณอย อัน แฮะ กาเลต. 32โกบ แฮะ มัห เฌาพรา อาโกบ, แตห ณอย อัน กาเลต, กอ ฌัม อาตึร, เฆ ดูอี อีซาเรลัะ ตู โฮม ยัง อี ดึก ดี ณอย โดว ซัดดาวา.
© 2021, Wycliffe Bible Translator, Inc. All rights reserved.
