ดอ โฆว 31
31
ลอง อาโกบ วี เลห ตัะ กาง อาลับ
1ปัน ตี อาโกบ ตึอน วี โทม โฆรห ปี กาลาง เฆ ฆอน อีมาย อาลับ ลอง อัน. เฆ ต็อห, “อาโกบ แฮะ ดึห โตต โกรวกราม ฆูณ เย. แคะ ปี มึห ฆูณ เย, อัน แฮะ ดึห, แตห อัน วี ครัม แคะ ตี.” 2อัน บอ ยึร นา อาลับ ตึอน, อาว ฮู ดาคึย ปี คา อาต.
3ดอ อัน ตี เฌาพรา กาลาง โฆรห ดี อัน. อัน ต็อห, “แตห แม เวณ แคง มืง บรีม แม, แคง มืง อี มูห โดง กอย ฆูณ แม. โอว ดี บอ ฮาว รึม โดบ แม.”
4ปัน ตี อัน แดะ นาง ราเอน ฆาย นาง เลอา ตัห โดง กอย อัน แคง โดง นา อัน. 5อัน ต็อห ดี ฆาย, “โอว แฮะ ยึร ฆูณ บาย. อัน อาว ฮู อึง โอว ปี คา อาต. เฌาพรา ปี กรึบ ฆูณ โอว, อัน ยี แฮะ กอย รึม โดบ โอว. 6บาย บอ นับ, แคะ มึห โอว โปลม, โอว แฮะ ดัว โตต ดี ฆูณ บาย, แตห โอว แบน แดเจณ อัน. 7ฆูณ บาย ยี แฮะ กาโลว โอว แบน เฌณ แบน เฌณ. อัน แฮะ กาปลูะ รูห ปี โลว ปึอน โอว อาดา ฆึร เฌณ. เฌาพรา ยี ตู แตห อึณ แบน นา ตู หมึอม ดี โอว. 8ดอ ต็อห อัน, ‘เฆ โดว ดีลาย ดีปาง ดี แบน รูห แม,’ ดอน โดว แฮะ ปึอน ฆอน อี ดีลาย ดีปาง. ดอ ต็อห อัน, ‘เฆ โดว ดีลาย ดี แบน รูห แม,’ เฆ ดอน โดว มึห ฆอน ดีลาย. 9ปาย ตี เฌาพรา แฮะ โบง, แตห โดว ซัดดาวา ฆูณ บาย แบน โดว ซัดดาวา โอว. 10ดอ มูห อาคราว ลาย โดบ เฆ, โอว แฮะ อึณบาว. ดอ อึณบาว โอว, โอว แฮะ ยึร เฆ อาโล็ง มาบู อี โดบ อาหยาง, เฆ แฮะ ดีลาย ดีเลน บอ ดีปาง. 11อามู อามาด เฌาพรา วี ต็อห, ‘อึย, อาโกบ.’ โอว วี ต็อห, ‘โอว กอย ดี นี.’ 12อัน วี ต็อห, ‘แตห แม ยอด โดว ซัดดาวา แม. เฆ อาโล็ง มาบู อี โดบ อาหยาง, เฆ แฮะ ดีลาย ดีเลน, ดีปาง. โอว แฮะ ยึร โตต แปะ แฮะ โบง อาลับ ดี แม. 13โอว มูห เฌาพรา อี กอย มืง เบดาเอน ตึอน, อี มูห โดง ปี เบลห แม มาว ตาง, แตห อึณ แบน กาอูน. อึณ มูห โดง ปี ดัว แม กาดีก ซัดฌา ดี โอว. ดอ ตี นี, แตห แม ยีต, เลห แคง มืง นี, แตห แม เวณ แคง มืง บรีม แม.’”
14ปัน ตี นาง ราเอน ฆาย นาง เลอา วี ต็อห ดี อัน, “ยาย ตู บอ ปึอน คาฆูน มาเซ แคง กาง ฆูณ ยาย. 15อัน แฮะ โบง ดี ยาย แตห อึณ ปี ยาย มูห แคต. อัน แฮะ ย็อง ยาย. ง็อห ยาย. ปี ปึอน อัน, อัน แฮะ ฮอต โฮม. 16โกรวกราม ตึอน, ปี ดึห เฌาพรา ดี ฆูณ ยาย, อึณ แฮะ วี แบน โกรวกราม เอ บอ ฆอน เอ. ดอ ตี นี, แตห แม โบง ปี กาลาง เฌาพรา ดี แม.”
17ปัน ตี อาโกบ ตึอน วี ยีต, ดึห อีบึณ อัน เฆ ฆอน อัน, แตห เฆ ป็อะ มังปร็อง กาฮาต. 18แฮะ ฮอต, อัน บอ ตึย เฆ เลห ตัะ โดง กอย อาลับ, แตห เฆ ฮาว ฌัม แคง มืง กานัณ. อึณ มูห มืง ฆูณ อัน, อี จืร อาแซก. บอ โดว ซัดดาวา อัน ดอน โดว, บอ โกรวกราม ปี ปึอน อัน ดอน โมยว, แคะ ปี ปึอน อัน แคง มืง พาดานอาราม ตึอน, อัน บอ ดึห โตต, เลห ฮาว ปอ โปละ.
19ดอ เลห เฆ, อาลับ บอ อึณโฮม อัน ดอน อี แฮะ ฮาว โดง นา อัน, แตห อัน กับ ฮึก มาบู. ปัน ตี นาง ราเอน ปรา อารึบ ปี กรึบ เฆ แคง กาง ฆูณ อัน. 20อาโกบ ตึอน ยี กาโลว ดี อาลับ อี มูห ดูอี อาโมยว อาราม. อัน ปรา ดี เลห ตัะ กาง อัน, ตู แตห อาลับ นับ มาเซ ลอง อัน ตี. 21อัน แฮะ ดึห โตต โกรวกราม อัน เลห ฮาว, กาโลห แบลง อึม, ฮาว โดบ อึณเตณ อี ฮาว ฌัม นอน ฆีเลอาด.
ลอง อาลับ วี โดบ ดี ปัน อาโกบ
22ปัน ตี แฮะ โนะ โอย ซีแง, เฆ อี เฮา วี กาลาง แตห อาลับ บอ นับ ลอง อาโกบ แฮะ เลห ฮาว มืง บรีม อัน. 23อาลับ ตึอน วี แดะ วอแว อัน, ฮาว โดบ ดี ปัน อาโกบ อาดา บู ซีแง. วาย อัน ตี อัน วี กาปับ อาโกบ แคง นอน ฆีเลอาด ตึอน. 24แคง หมึร, ดอ อึณบาว อัน, เฌาพรา ยี ตัห โดง กอย อาลับ อี มูห ดูอี อาโมยว อาราม ตึอน. อัน เฌา ต็อห ดี อัน, “แม แกวะ กาลาง มาเซ ดี อาโกบ. บอ นา หมึอม, บอ นา ตู หมึอม, แม แกวะ ต็อห มาเซ ดี อัน.”
25ดอ อัน ตี อาโกบ ตึอน แฮะ คยัะ ทึบ บีก อัน แดง นอน ฆีเลอาด ตึอน. บอ อาลับ เฆ วอแว อัน แฮะ ดีเหลา โดง กอย อัน ตี. 26อาลับ ยี กาลาง ดี อาโกบ ต็อห, “มาเซ ปี โบง แม? แม แฮะ กาโลว โอว, ปรา ฆอน โอว, โบง ปี เฆ ดา ซึก เหมต ดูอี. 27เหมา อึณ ปาย ปี ปรา แม ดี เวณ. เหมา อึณปาย ปี ตู ต็อห แม มาเซ ดี โอว? เซ โอว ฮี นับ ลอง ดี เวณ แม, โอว ยี ดี ตึย แม. โอว ยี ดี จัร อี ต็อห โหมว, แตห เฆ ดาคึย. โอว ยี ดี แตห อี กัร ฆรึง, บัห ดีง. 28ดอ ตี นี แม ตู แตห โอว อูห หลาน โอว, อูห ฆอน อีบึณ โอว. แปะ แฮะ โบง แม แฮะ รึร. 29เซ โอว ซี โบง, โอว แฮะ ปึอน โบง นา ตู หมึอม ดี เบ บอกาเฆลียด. อาหมึร เฌาพรา ปี กรึบ ฆูณ แม, อัน ยี แฮะ กาลาง โฆรห ดี โอว. อัน แฮะ ต็อห, ‘แกวะ แตห แม กาลาง โฆรห ดี อาโกบ. บอ นา หมึอม, บอ นา ตู หมึอม, แกวะ แตห แม กาลาง.’ 30โอว แฮะ นับ, แม แฮะ เลห แคง กาง โอว โกบ ดีเกน กาเซา แม ฆูณ แม. เหมา อึณปาย แปะ แฮะ ปรา แม อารึบ ราง ปี กรึบ เย แคง กาง?”
31อาโกบ วี เวียะ โฆรห ตี. อัน ต็อห, “โอว โยว แม ตู แตห ฆอน อีบึณ แม โดบ โอว. 32เซ อึณ มูห อารึบ ราง, แตห แม เหรต ดอน โปละ. แม บอ ยึร ดี อาเซ, ดูอี ตี, แฮะ ชึม อาซาก อัน. แตห บอ วอแว เอ ยอด. เซ แม กาตูณ โกรว แม, แม ปึอน ดี ดึห.” มาแล, อาโกบ ตู นับ, อึณ มูห นาง ราเอน, อี แฮะ ปรา อารึบ ตึอน.
33ปัน ตี อาลับ ตึอน บอ ลึบ แคง ทึบ บีก อาโกบ. แฮะ ฮอต, อัน วี ลึบ แคง ทึบ บีก นาง เลอา, บอ แคง ทึบ บีก หมาย อัน. อัน ยี ตู กาตูณ มาเซ. อัน แฮะ ฮอต เลห แคง ทึบ บีก นาง เลอา ตึอน, อัน วี ต็อห ดี ลึบ แคง ทึบ บีก นาง ราเอน. 34นาง ราเอน ตึอน ยี แฮะ ดึห อารึบ เฆ ตี, เบลห แคง ฮู อี ดึก ดี กอบ มังปร็อง กาฮาต อัน. แฮะ ฮอต อัน แฮะ ตูต นา แดง. อาลับ ยี เหรต แคง ทึบ บีก อัน, ตู กาตูณ มาเซ.
35อัน วี กาลาง ดี ฆูณ อัน, “อึย, ฆูณ โอว, แกวะ แตห แม รู ดี โอว, เซ โอว ตู ยีต ดี อาต แม. โอว มึห ครึง กาปลูะ.” อาลับ ยี เหรต, ตู กาตูณ มาเซ.
36ปัน ตี อาโกบ ตึอน บอ รู กาเซา, บอ ปึณ ดี อาลับ. อัน ต็อห, “มาเซ อึณ มึห หมาบ โอว, มาเซ ปี โบง โอว ดี แม, แตห แม วี โดบ โอว? 37แม แฮะ ฮอต เหรต โตต โกรว โอว, แม บอ กาตูณ มาเซ? แตห แม ดึห โตต, เบลห ดี อาต วอแว เอ, แตห เฆ ซูงพยาด ดารา ดี อาย.
38อาดา อา ฆึร ซีนัม โอว แฮะ กอย รึม โดบ แม. ดอ อัน ตี, เฆ มาแป แม ตู มึห ฆอน ยัม. มาบู อาโล็ง แม โอว มืร ตู โฮม ดอ เหมา? 39เซ โดว แปร แฮะ ก็อะ อู โดว, โอว ตู ปึอน ดัว ดี แม. โอว โลว วี ดัว โดว ซัด โอว ดี แม กาดาง โดว อี ยัม ตี. อึณ บอ มึห โดว อี หราย กาแต ซีแง, โดว อี หราย แคง หมึร, แม แฮะ วี หมาณ โตต ดี โอว. 40กาแต ซีแง, โอว กอ รีน ดี ยัม แคง ซอดาด. แคง หมึร, โอว แฮะ ฆัด กาเซา, อาว ปึอน อีด. 41โอว แฮะ กอย แคง กาง แม อาดา อา ฆึร ซีนัม. ฆึร ดี พวน ซีนัม โอว แฮะ แบน หมาย แม, แตห โอว ปึอน ฆอน อีบึณ แม อา วี. บอ เดา ซีนัม โอว แฮะ แบน หมาย แม, แตห โอว ปึอน มาบู โอว. แม ยี แฮะ กาปลูะ รูห ปี โลว ปึอน โอว อาดา ฆึร เฌณ. 42เซ โอว ตู มึห เฌาพรา ปี กรึบ โอว, เซ เฌาพรา ปี บึง อาแซก ตู วี จอย โอว, แม ดี บอ แตห โอว ฮาว เวณ แคง มืง โอว. แม คัม ซัะ ดัว มาเซ ดี โอว. เฌาพรา ยี แฮะ ยึร ดูก โอว. อัน แฮะ ยึร แคะ นังฆัน โอว ดี โบง ดอน โมยว. แฮะ ฮอต อัน แฮะ ดัม ซาดีก ดี แม แคง หมึร.”
43อาลับ ตึอน วี ต็อห, “เฆ อีบึณ แม มูห ฆอน อีบึณ โอว. เฆ ฆอน อีมาย แม มูห ฆอน อีมาย โอว. บอ เฆ มาบู บอ ปี ยึร แม โตต ดอน โมยว แฮะ มูห โกรว โอว. โอว ยี ตู ปึอน โบง นา ตู หมึอม มาเซ ดี ฆอน อีบึณ บอ ดี ฆอน เฆ. 44แตห แม ตัห, แตห บอ แม บอ โอว ลาย โพรม, แตห ปี ลาย โพรม ตี วี แบน ซักเซ ลอง อาเร อาย.”
45ปัน ตี อาโกบ ตึอน ดึห มาว ตาง, เบลห แตห อึณ แบน กาอูน. 46อัน วี ต็อห ดี วอแว อัน, “แตห เบ กาฌูะ มาว.” แฮะ ฮอต เฆ วี ดึห มาว, โบง เบลห อึณปึม. เฆ วี กอย รึม, โฮม โบม ดี โคบ อึณปึม มาว ตึอน. 47อาลับ วี แตห โดง ตี จืร ‘เย ฆา ซา ฮู ดู ตา.’ แคง โฆรห อัน, อาโกบ ยี แตห อัน จืร ‘ฆาน เอด.’#31:47 แคง โฆรห ฆาย, จืร บอ อา โมยว, ลอง ดาง อัน มูห ‘อึม คึม อี แบน ซักเซ’
48อาลับ วี ต็อห, “อึณปึม มาว ตี, อัน แบน ซักเซ ดี อาย.” โคว, อาโกบ แตห อัน จืร ‘ฆาน เอด.’ อาลับ ตึอน บอ แตห อัน จืร ‘มีฌาพา.’#31:48 ‘ฮามี ฌาพา’ แคง โฆรห อัน, ลอง ดาง อัน มูห ‘โดง บัร’ 49โคว, อัน ต็อห, “เฌาพรา ดี บัร บอ โอว บอ แม. เซ อาย วี ลาย กาย็อห, 50เซ แม โบง นา ตู หมึอม ดี ฆอน อีบึณ โอว, เซ แม บอ วี ดึห อีบึณ ปอ วี, อึณ ตู มึห อาเซ ยึร. เฌาพรา ยี กอย ดี กาแต อาย. อัน ยึร โตต.”
51ปัน ตี อาลับ วี ต็อห, “แม ยึร, บอ กาอูน บอ อึณปึม มาว แฮะ กอย ดี ตี. โอว แฮะ เบลห อัน ดี อาต แม บอ ดี อาต โอว. 52กาอูน ตี, บอ อึณปึม มาว ตี, ฆาย ดี แบน ซักเซ ดี อาย. บอ โอว ตู กาโลห ปวน มาว เฆ ตี, ฮาว โดง กอย แม. บอ แม ตู วี กาโลห ปวน มาว ตี, ตัห ดี โอว, เซ อาย ตู มึห น็อห ดี ลาย โบง นา หมึอม. 53เฌาพรา ปี กรึบ อาบราฮัม, อี มูห บอ เฌาพรา ปี กรึบ อานาโฮว. อัน มูห เฌาพรา ฆูณ ดัง อาย, อัน เฌา ตี ดี ซูงพยาด ดารา ดี อาย.”
ปัน ตี อาโกบ ตึอน วี ดัว กาดีก ซัดฌา, แตห บอ เฌาพรา วี โทม. อัน ยี ต็อห, “เฌาพรา ตี, อัน มูห เฌาพรา ปี บึง อาแซก.” 54แฮะ ฮอต ปัน ตี อาโกบ วี หลู มาบู ดี เฌาพรา แดง นอน ตึอน. อัน มืร บาง เฆ วอแว อัน ดอน อี, แตห เฆ โฮม รึม. เฆ แฮะ ฮอต โฮม แพ, เฆ วี ตัม แดง นอน ตี.
55ปา แคหณา อาลับ วี เจว ยีต. อัน บอ อูห บอ ม็องการา ดัว ดี หลาน อัน บอ ฆอน อีบึณ อัน. แฮะ ฮอต อัน วี เวณ โดง กอย อัน.
© 2021, Wycliffe Bible Translator, Inc. All rights reserved.
