ดอ โฆว 33
33
ลอง อาโกบ วี กาตูณ อีกัด อัน
1วาย อัน ตี อาโกบ ตึอน วี ยอด, อัน บอ ยึร อาโซว อี มูห อีกัด อัน. อาโซว มึห บอ ดูอี พวน มาย็อห วี อี ฮาว รึม โดบ อัน. ดอ อัน ตี อาโกบ วี กาย็อห ฆอน อัน, แตห เฆ กอย รึม โดบ นาง เลอา ฆาย นาง ราเอน, บอ หมาย ฆาย อา วี. 2อัน แตห หมาย ตี บอ ฆอน ฆาย แยต ดี อาต. ปัน ตี อัน แตห นาง เลอา โดบ. แฮะ ฮอต, อัน แตห นาง ราเอน ฆาย อาโยว โดบ ดี ปัน. 3อาโกบ ยี แยต ดี อาต เฆ ดอน อี. ดอ ฮาว อัน กาตัด อีกัด อัน, อัน ครึบเครา ฆึบ บู เฌณ.
4อาโซว ตึอน ยี ฮาว รวห อัน. อัน เงียม วา อัน, อูห อัน. แฮะ ฮอต ฆาย อา วี บอ ลาย ยาม. 5ปัน ตี อัน วี ยอด, บอ ยึร เฆ อีบึณ บอ ฆอน เฆ, อัน ดีหมอด ต็อห, “เฆ อี โดบ แม นี, เฆ มูห อาเซ?” อาโกบ วี ต็อห, “เฆ มูห ฆอน ปี ดัว เฌาพรา ดี หมาย แม.”
6ปัน ตี ฆาย หมาย อีบึณ บอ ฆอน ฆาย แฮะ ตัห กาตัด โดง กอย อัน, ครึบเครา. 7บอ นาง เลอา ตัห กาตัด, ครึบเครา ดี อาต อัน. แฮะ ฮอต, บอ อาโยว บอ นาง ราเอน วี ตัห ดี อาต อัน, ครึบเครา.
8ปัน ตี อาโซว วี ต็อห, “เหมา อึณปาย ปี ตึย แม เฆ โดว ซัดดาวา ปี ยึร โอว ดอ ตัห โอว?”
อาโกบ ต็อห, “โอว ทาง, แม ดา กาณา โอว ดี กาเว โอว, เซ แม ยึร โดว ซัด เฆ ตี.”
9อาโซว วี ต็อห, “โอว แฮะ มึห กืน, โอว ตู โลว มาเซ. แตห แม วา โอว อูน โกรว แม.”
10อาโกบ ตึอน วี ต็อห, “อาอึห, เซ แม แฮะ กาเว โอว, แตห แม ดึห คอซอง โอว. โอว แฮะ ยึร แม ดอ ตี นี, อึณ ปี โอว แฮะ ยึร นา เฌาพรา. นา แม แฮะ ดาคึย ดี โอว. 11โคว, โอว หมาณ, แตห แม ดึห ปี ตึย โอว ดี แม. เฌาพรา แฮะ กาเว โอว. โอว มืร แฮะ ปึอน โตต ดอน โมยว.” อัน บอ หมาณ ดี อาโซว ปาย ตี แตห อัน กอ ดึห คอซอง อัน ตี.
12ปัน ตี อาโซว ตึอน วี ต็อห, “แตห เอ ยีต ฮาว เวณ โดง กอย โอว. โอว ดี ฮาว รึม โดบ แม.”
13อาโกบ ตึอน ยี ต็อห, “แม ดา กาณา โอว, แม แฮะ ยึร, เฆ ฆอน โอว แฮะ ดีแตด, หณัม มึห โปลม. บอ เฆ มาบู อี มึห ฆอน, บอ เฆ มามัก อี มึห ฆอน โอว โลว ลึมลา, แกวะ แตห เฆ ฮาว กาเซา. เซ โอว ดี บอ ตึย เฆ ฮาว โดง โต็ง อาดา อู ซีแง, โอว โยว เฆ ดี ยัม โตต. 14แตห แม ดา กาณา โอว ฮาว นา อาต โอว, แตห โอว ยี ฮาว แกร แกร, โดบ เฆ โดว ซัดดาวา, เฆ อี แยต ดี อาต โอว. แตห โอว บอ โดบ ดี ปัน เฆ ฆอน โอว, แตห โอว กอ ฌัม มืง เซอี ตึอน.”
15อาโซว วี ต็อห, “เซ อึณ ปาย ตี แตห โอว ดัว หมาย อี โดบ โอว มัง อี, ฮาว รึม โดบ แม, แตห เฆ จอย แม.”
อาโกบ ยี ต็อห, “โอว ตู โลว มาเซ. เซ แม ดา กาณา โอว แฮะ กาเว โอว, โอว แฮะ ดาคึย.”
16ปัน ตี อาโซว วี เวณ ดี มืง เซอี ตึอน. 17อาโกบ ตึอน ยี ยีต ฮาว มืง ซูโคด. แคง มืง ตี อัน ซัม กาง อัน บอ ทึบ อาดา โดว ซัดดาวา อัน. โคว, เฆ แตห โดง ตี จืร ‘ซูโคด.’#33:17 ‘ซูโคด’ แคง โฆรห แฮแบร, ลอง ดาง อัน มูห ‘ทึบ’
18แฮะ ฮอต ปัน ตี อัน วี ฮาว ฌัม ซีคยา แคง มืง เซเคม อี กอย แคง กาดาย มืง อี จืร มืง กานัณ. อัน แฮะ เลห ตัห แคง มืง พาดานอาราม บอ ตัห ฌัม นา เรต มืง ตี, คยัะ ทึบ บีก อัน ดี ตี. 19โดง เบลห อัน ทึบ บีก อัน, อัน บอ จึห ดี ฆอน อีมาย อาฮาโมว. อาฮาโมว ตึอน มูห ฆูณ อาเซเคม. ง็อห โดง ปี จึห อัน ตี, อึณ มูห รึอน อู มาย็อห โบ็ง. 20โดง กอย อัน ตี, อัน วี โบง กาโช็ง หลู ดี เฌาพรา. อัน แตห อึณ จืร ‘เฌาพรา มูห อัน เฌา ปี กรึบ อาอีซาเรลัะ.’
© 2021, Wycliffe Bible Translator, Inc. All rights reserved.
