ดอ โฆว 34
34
ลอง ฆอน อาโกบ โบง นา ตู หมึอม
1ปัน ตี อึณ มูห นาง ดีนา อี มูห ฆอน อีบึณ นาง เลอา ตึอน. อู ซีแง นาง ดีนา ตึอน ฮาว เลห แคง กาง อัน, แตห อัน ฮาว วีน ดี แล ดี ฆอน อีบึณ อี กอย แคง มืง ตี. 2ดอ อัน ตี อึณ มึห ดา อี อึบ มืง ตี. อัน มูห ดูอี อาโมยว ฮีวีด อี จืร อาฮาโมว. ฆอน อีมาย อัน อู วี, อัน จืร อาเซเคม. อาเซเคม ตี, อัน ตา ยึร นาง ดีนา, อัน บอ เหมต ลูต นาง ดีนา ตึอน. 3น็อห อัน ซี ปึอน กาเซา นาง ดีนา. อัน มืร ร็อก บอ โบง แบน โมยว แบน โมยว, แตห นาง ดีนา วี ร็อก อัน. 4อัน บอ ฮาว กาลาง ดี ฆูณ อัน ต็อห, “แตห แม ดีหมอด นาง ดีนา ตึอน ดัว ดี โอว, แตห อัน แบน อีบึณ โอว.”
5ปัน ตี อาโกบ ตึอน บอ นับ เฆ แฮะ ลูต ฆอน อีบึณ อัน อี จืร นาง ดีนา. ดอ อัน ตี ฆอน อีมาย อัน, เฆ กอย แคง นา, บัร โดว ซัดดาวา เฆ. โคว, อัน ตู ต็อห มาเซ, หน็อะ เฆ วี ตัห ฌัม โดง กอย อัน.
6อึณ ยี มึห อาฮาโมว ตึอน อี มูห ฆูณ อาเซเคม, อัน ตัห ฌัม โดง กอย อาโกบ, แตห อัน กามวน ดี อาโกบ. 7ดอ วี ตัห ฌัม ฆอน อีมาย อาโกบ โดง กอย อัน, เฆ บอ นับ โตต ลอง อัน ตี, แตห น็อห เฆ ลึร กาเซา. เฆ บอ รู กาเซา อู เฌณ. เฆ ทาง, แปะ แฮะ โบง อาเซเคม ตึอน แฮะ แตห อาโกบ วี ชึม ซาเร. อาตี อาว ปึอน โบง.
8อาฮาโมว ตึอน ยี กาลาง ดี เฆ ต็อห, “น็อห ฆอน โอว อี จืร อาเซเคม กาปรา กาเซา, ซี ปึอน ฆอน อีบึณ แม. แตห แม ดัว อัน ดี ฆอน โอว, แตห ฆาย ลาย คัด. 9แตห ฆอน อาโมยว เบ บอ ฆอน อาโมยว เย คัด ลาย ดึห. แตห เบ ดัว ฆอน อีบึณ เบ ดี เย. แฮะ ฮอต บอ เย ดี วี ดัว ฆอน อีบึณ เย ดี เบ. 10แตห เบ โบง ปาย ตี แตห เบ กอย รึม โดบ เย. เย ดี แตห เบ โบง ปี อึง เบ แคง มืง เย นี. แตห เบ กอย ดี ตี, แตห เบ ฮาว ดอน โปละ, แตห เบ จึห โดง ดี กอย เบ ดี นี.”
11บอ อาเซเคม ตึอน ต็อห ดี ฆูณ บอ อูกัด อูวา นาง ดีนา ตึอน, “แตห เบ กาเว โอว. แคะ ปี ดี หมาณ เบ ดี โอว, โอว ดี ดัว ดี เบ. 12เบ บอ หมาณ แคะ เหมา, โอว ดี ดัว ดี เบ. แตห เบ ยี ดัว อู โมยว ตี ดี โอว. แตห เบ ดัว นาง ดีนา ตึอน, แตห อัน แบน อีบึณ โอว.”
13เฆ อูกัด อูวา นาง ดีนา ตึอน วี เวียะ โฆรห ตี. โกบ แฮะ โบง อาเซเคม นา จีจีว ดี วา เฆ, เฆ ยี ตู กาลาง โฆรห หมาน โฆรห ซืร ดี อาเซเคม ฆาย ฆูณ อัน. 14เฆ ต็อห, “เย ตู ปึอน ดัว วา เย ดี ดูอี อี ตู ซัวะ แวน ฮูน ลัะคานา อีมาย, แตห วา เย แบน อีบึณ วี ตี. เซ เย โบง ปาย ตี อึณ ดี แตห ซาเร เย ลึร. 15เซ เบ ยี แบน ปี เย, เซ เบ ดี ซัวะ แวน ฮูน ลัะคานา อีมาย เบ, เย ดี ดัว ปี หมาณ เบ. 16เซ เบ โบง ปาย ตี เย ดี ดัว ฆอน อีบึณ เย ดี เบ. บอ เย ดี ดึห ฆอน อีบึณ เบ, แตห เย ลาย คัด. ปัน ตี เย ดี บอ กอย รึม โดบ เบ, แตห เอ แบน อู โมยว.
17เซ เบ ตู ซี โบง ปี หมาณ เย ฌึร ตี, เย ดี ดึห ฆอน อีบึณ เย, ฮาว ปอ โปละ.” 18เฆ แฮะ ฮอต กาลาง โฆรห ตี, อาฮาโมว ฆาย ฆอน อัน อี จืร อาเซเคม ตึอน, ฆาย อึง ปี ต็อห เฆ. 19อาเซเคม ต็อห ดี โบง ปี หมาณ เฆ อู เฌณ. โคว, อัน ร็อก กาเซา ฆอน อีบึณ อาโกบ ตึอน. เฆ อี กอย แคง อึณโฮม ฆูณ อัน, เฆ ดี บอ วี โทม โดบ ปี โบง อัน. 20ปัน ตี อาฮาโมว ฆาย ฆอน อัน อี จืร อาเซเคม, ฆาย ฮาว ฌัม บาง มาโลห มืง เฆ. ฆาย วี กาลาง โฆรห ดี อีมาย ดอน อี, อี กอย แคง มืง เฆ. ฆาย ต็อห, 21“เฆ ดูอี ตึอน, เฆ มึห น็อห หมึอม ดี เอ. แตห เบ ควาง เฆ ฮาว วีน ดี แล แคง มืง เอ, แตห เบ บอ แตห เฆ กอย แคง มืง เอ. มืง เอ แฮะ ตาง, แตห บอ เฆ ปึอน ดี กอย. เอ ดี บอ ปึอน ดี ดึห ฆอน อีบึณ เฆ, แตห เอ ลาย คัด. บอ เอ ดี ดัว เฆ คัด ลาย ฆอน อีบึณ เอ. 22เซ เฆ ยี ดี กอย รึม โดบ เอ, แตห เอ แบน อู โมยว, เฆ หมาณ แตห เอ โบง อู โมยว. เฆ หมาณ, แตห เอ อีมาย ดอน อี ซัวะ แวน ฮูน ลัะคานา เอ, แตห เอ ปี เฆ ดอน อี. 23เซ เอ โบง ปาย ตี มาบู เฆ มาแป เฆ บอ โกรวกราม เฆ ดอน โมยว บอ โดว ซัดดาวา เฆ ดอน โมยว, อึณ ดี แบน โกรวกราม เอ ดอน โมยว. โคว, แตห เอ โบง ปี หมาณ เฆ, แตห เฆ กอย รึม โดบ เอ เซเซ.”
24ฆาย แฮะ ฮอต กาลาง ปาย ตี เฆ ดา อี กอย ดี โคบ มาโลห มืง ตึอน, เฆ ดอน อี อึง. เฆ อีมาย ดอน อี บอ ซัวะ แวน ฮูน ลัะคานา เฆ.
25วาย อัน ตี แฮะ โนะ โอย ซีแง, อึณ มูห ดอ แฮะ เซา เฆ ดี ดีม ดอน อี, ฆอน อาโกบ อี จืร อาซีเมโอน ฆาย อาเลวี, อี มูห อีกัด นาง ดีนา ตึอน, ฆาย วี ดึห มาปัวะ ลาง อู วี อู บลัะ, ฮาว แคง มืง, ง็อห แวน อีมาย ดอน อี. เฆ ดูอี แคง มืง ยี ตู นัมโหลห นัมรอย มาเซ. 26ฆาย บอ ง็อห อาฮาโมว บอ ฆอน อีมาย อัน, แตห ฆาย ยัม ดี มาปัวะ ลาง ฆาย. แฮะ ฮอต, ฆาย วี ดึห นาง ดีนา, เลห แคง กาง อาเซเคม ตึอน, วี เวณ โดง กอย เฆ. 27ปัน ตี เฆ ฆอน อีมาย อาโกบ วี ฮาว แคง มืง, ดึห อูน โตต โกรวกราม เฆ ดูอี ยัม. โกบ แฮะ ลูต อาเซเคม ดี วา เฆ, เฆ แฮะ โบง ปาย ตี. 28บอ มาบู, มามัก, มาลา บอ โตต โตต ปี มึห เฆ, บอ แคง มืง บอ แคง นา, เฆ ดึห โตต ดอน โมยว. 29เฆ บอ เหมต อีบึณ เฆ ฆอน, วี ตึย ฮาว ฌัม โดง กอย เฆ. แคะ มึห โกรวกราม แคง มืง ตึอน, เฆ ดึห โตต, แตห อึณ แบน โกรวกราม เฆ.
30ปัน ตี อาโกบ ตึอน วี กาลาง โฆรห ดี อาซีเมโอน ฆาย อาเลวี ตึอน. อัน ต็อห, “บาย แฮะ โบง แตห โอว ฌัม ดูก ตาง. บาย แฮะ โบง แตห เฆ ดูอี อี กอย แคง มืง ตี วี รู ดี โอว. บอ เฆ ดูอี อาโมยว กานัณ, บอ เฆ ดูอี เพเรซีด, เฆ ดี รู ดี เอ. เฆ ดูอี อี กอย รึม โดบ โอว, เฆ ตู กืน. เฆ ดูอี อี กอย มืง ตี, เฆ ดี วี กาโพรม ดี กาโฆห ดี เอ. แฮะ ฮอต, บอ โอว บอ อึณโฮม โอว, เอ ดี ชึม.”
31ฆอน อัน อา วี ตึอน ต็อห, “อัน แฮะ โบง แตห อึณ ปี วา ยาย มูห ยา มาลัม. แม ทาง, ยาย ดี แตห อัน โบง ปาย ตี? อาว ปึอน.”
© 2021, Wycliffe Bible Translator, Inc. All rights reserved.
