เลห 2
2
ลอง อาโมวแซ ฆึอด
1แคง ดูอี อีซาเรลัะ อึณ ยี มึห อีมาย อู วี แคง ครึร อาเลวี. บอ อีบึณ อัน มูห ครึร อาเลวี ปี อัน. 2ปัน ตี อีบึณ อัน บอ มึห ฆอน อีมาย. ดอ ยึร อัน, ฆอน อัน แฮะ มึห โปลม, แฮะ คัะ, อัน วี เครียง ฆอน อัน ตี อาดา โอย มาเฆียน. 3แฮะ ฮอต ปัน ตี อัน อาว ฮู ปึอน เครียง. อัน วี ดึห โฆ็ลง, ดาณ โครง, พ็อห แฆร, แกวะ แตห อึม ลึบ นา แคง. แฮะ ฮอต ปัน ตี อัน วี ดึห ฆอน อัน, เบลห แคง โครง ตี. อัน บอ ฮาว เบลห ดี กาแต กาบาง โฆ็ลง อี กอย ดี โคบ แบลง อึม อี จืร นีลา. 4อึณ ยี มึห ฆอน อีบึณ อี มูห อีกัด ฆอน งัะ ตี, อัน กอย กาโต็ง, บัร ดี ยอด วา อัน ตี, โยว อัน ดี ปาย เหมา.
5ดอ อัน ตี นาง อู วี อี มูห ฆอน คูนดีคัม พาโรว, อัน แฮะ ตัห ฌัม บาง อึม, ต็อห ดี ตา อึม. บอ หมาย อัน แฮะ กอย รึม โดบ อัน, ฮาว โคบ บาง อึม. นาง ตึอน บอ ยึร โครง ตึอน อี กอย แคง กาบาง โฆ็ลง, อัน ตึย หมาย อัน อู วี, แตห อัน ฮาว ดึห โครง ตึอน. 6หมาย อัน แฮะ ฮอต ดึห, นาง ตึอน วี วึห. อัน บอ ยึร ฆอน อางัะ กอย นา แคง บอ ยาม. ปัน ตี นาง วี กาเว ฆอน ตี. อัน ต็อห, “ฆอน นี มูห ฆอน อางัะ เฆ ดูอี แฮแบร.”
7ดอ อัน ตี อีกัด ฆอน อางัะ ตึอน, อัน วี ตัห ฌัม โดง กอย เฆ, ดีหมอด นาง ตึอน ต็อห, “แม ซี แตห โอว ฮาว เหรต อีบึณ อาโมยว แฮแบร อู วี, แตห อัน แบน มา อี เฮียง ฆอน นี?”
8“แฮะ ปึอน,” นาง ตึอน วี ต็อห. แฮะ ฮอต ต็อห ปาย ตี อีกัด ฆอน อางัะ วี ฮาว แฮ แฮ, แดะ มา อัน, แตห อัน ตัห ฌัม โดง กอย นาง ตึอน. 9มา อัน แฮะ ฮอต ฌัม, นาง วี ต็อห ดี อัน, “แตห แม ดึห ฆอน อางัะ นี, เวณ แคง กาง แม. แตห แม เฮียง อัน. โอว ดี ฌาง แม เฮียง อัน.” นาง แฮะ ฮอต ต็อห ปาย ตี มา อัน วี ดึห ฆอน อางัะ อัน, เฮียง แคง กาง อัน. 10วาย อัน ตี ดอ แฮะ แกร อัน ดี ตาง, มา อัน วี ตึย อัน ฮาว ฌัม โดง กอย นาง ตึอน, อี มูห ฆอน คูนดีคัม พาโรว, แตห ฆอน อัน วี แบน ฆอน นาง ตึอน. นาง วี แตห อัน จืร อาโมวแซ. นาง แฮะ แตห ฆอน จืร ปาย ตี โคว, อัน ต็อห, “โอว แฮะ ดึห เลห อัน แคง อึม.”#2:10 ‘อาโมวแซ’ แคง โฆรห แฮแบร อึณ ปี “ดึห เลห แคง อึม”
ลอง อาโมวแซ โลว เตา ฮาว แคง มืง อี เฮา
11อู ซีแง, อาโมวแซ แฮะ ฮอต ตาง, อัน ฮาว ฌัม โดง กอย เฆ ดูอี แฮแบร อี มูห อาโมยว อัน. อัน บอ ฮาว ยอด เฆ ดอ โบง เฆ ฆาน อี ดูก กาเซา ดอน โมยว ปี โลว โบง เฆ. ดอ อัน ตี อัน บอ ยึร ดูอี แอฆึบ อู วี. ดูอี แอฆึบ ตี วี มัห กาเซา ดูอี แฮแบร อู วี อี มูห อาโมยว อัน. 12อัน วี ยอด กาบัด, ตู ยึร อี เฮา, อัน วี ง็อห ยัม ดูอี แอฆึบ ตึอน อู เฌณ. แฮะ ฮอต ปัน ตี อัน วี ดีบ แวน ดูอี ตึอน แคง กาฮาต. 13ปา แคหณา อัน วี ฮาว ฌัม โดง ตึอน ปอ อู เฌณ. ดอ อัน ตี อัน วี ยึร ดูอี อาโมยว แฮแบร อา วี, ฆาย ลาย กามัห. อาโมวแซ วี ต็อห ดี ดูอี อี โบง นา ตู หมึอม, “เหมา อึณ ปาย ปี ลาย กามัห บาย? บาย บอ อา วี มูห บีนอง แฮแบร.”
14อาโมวแซ แฮะ ฮอต กาลาง ปาย ตี ดูอี ตึอน วี เวียะ โฆรห อาโมวแซ ต็อห, “อาเซ แฮะ แตห แม แบน ดา กาณา อี อึบ ยาย, อี ปึอน ซูงพยาด อามู ยาย? แม ดี บอ ง็อห ยัม บอ โอว, แตห อึณ ปี แม แฮะ ง็อห ยัม ดูอี แอฆึบ ตึอน?” อัน แฮะ ฮอต ต็อห ปาย ตี อาโมวแซ บอ วี โยว กาเซา. อัน ทาง แคง น็อห อัน, “เฆ ดูอี เฮา แฮะ นับ ลอง แปะ แฮะ โบง โอว อาหมึร.”
15ปัน ตี บอ คูนดีคัม พาโรว ตึอน, อัน วี โทม ลอง แปะ แฮะ โบง อาโมวแซ, อัน วี ต็อห ดี ง็อห ยัม อาโมวแซ. ปัน ตี อาโมวแซ เตา เลห โดง กอย คูนดีคัม พาโรว, ฮาว กอย แคง มืง มีดีอาน. ดอ ตัห ฌัม อัน แคง มืง มีดีอาน ตึอน, อัน บอ ตูต ดี โคบ อึม คึม อู โปละ. 16ดอ อัน ตี อึณ ยี มึห อาโมยว ดูอี มีดีอาน อู วี. อัน มึห ฆอน อีบึณ บู วี. อัน มูห ดา อี หลู ดี เฌาพรา ปี กรึบ เฆ. ฆอน อีบึณ เฆ ตี, แฮะ ตึย มาบู ฆูณ เฆ, แตห เฆ ตัห ฌัม ดี โคบ อึม คึม ตึอน, แตห เฆ ต็อะ อึม, โหลว แคง กาลัต, แตห มาบู เฆ เดียง. 17ดอ อัน ตี บอ เฆ อีมาย, อี เฮียง มาบู ปอ อู พึง, แฮะ วี ตัห, ต็อห ดี ซูต เตา อีบึณ โดง กอย อึม คึม. อาโมวแซ ยี ยีต จอย อีบึณ เฆ ตึอน, แกวะ แตห เฆ อีมาย ปึอน ดี โบง มาเซ. อัน บอ ต็อะ อึม ดัว ดี เฆ, แตห มาบู เฆ ปึอน ดี เดียง แพ อึม.
18ปัน ตี ฆอน ดีบยา เฆ ตึอน บอ เวณ ฌัม โดง กอย อาเรอูเอน อี มูห ฆูณ เฆ. ฆูณ เฆ ตี, อัน วี ดีหมอด เฆ ต็อห, “เหมา อึณ ปาย ปี เจว เวณ เบ อาตึร?”
19ฆอน อัน วี ต็อห, “อึณ มึห อีมาย อาโมยว แอฆึบ อู วี, อัน แฮะ จอย เย, แคร เฆ อีมาย อี เฮียง มาบู เฆ, แกวะ แตห เฆ ปึอน ดี โบง มาเซ. อัน มืร แฮะ ต็อะ อึม ดัว มาบู เย เดียง.”
20เฆ แฮะ ฮอต ต็อห ปาย ตี ฆูณ เฆ วี ต็อห, “ดูอี ปี ต็อห เบ, อัน กอย นา เหมา? เหมา อึณ ปาย ปี แวน เบ ดูอี ตี? แตห เบ ฮาว บาง อัน, แตห อัน ตัห โฮม โบม แคง กาง เอ.”
21วาย อัน ตี ฆอน อัน วี ฮาว บาง อาโมวแซ ตัห ฌัม แคง กาง เฆ. อาโมวแซ บอ ฮาว ฌัม แคง กาง เฆ. แฮะ ฮอต, อัน บอ โพรม ดี กอย รึม โดบ เฆ. อาเรอูเอน บอ ดัว ฆอน อีบึณ อัน อู วี ดี อาโมวแซ, แตห ฆาย ลาย คัด. ฆอน อัน ตี, อัน จืร นาง ซีโปวรา. 22วาย อัน ตี นาง ซีโปวรา ตึอน มึห ฆอน อีมาย อู วี. อาโมวแซ แตห อัน จืร อาเฆโซม. อัน บอ ต็อห, “โอว แฮะ แบน แคต อี กอย แคง มืง อี เฮา.” โคว, อัน แตห ฆอน อัน จืร ปาย ตี.#2:22 แคง โฆรห แฮแบร ‘อาเฆโซม’ เลห ‘อาโมยว ดูอี เฮา.’
23วาย อัน ตี แฮะ เหลณ, คูนดีคัม แคง มืง แอฆึบ บอ ยัม. ดอ อัน ตี เฆ ดูอี อีซาเรลัะ แฮะ คัม กาเซา ดี แบน หมาย อี เฮา. เฆ บอ หมาณ แตห เฌาพรา จอย เฆ. โฆรห ปี หมาณ เฆ ตึอน, เฌาพรา มืร โทม. 24อัน แฮะ นับ ดูก ปี โลว คัม เฆ. อัน บอ โทม ปี ซาคึร เฆ. อัน บอ วี โหลห กาดีก ซัดฌา ปี ดึอม ดัว อัน ดี อาบราฮัม ตึอน บอ ดี อาแซก ฆาย อาโกบ. 25เฌาพรา บอ ยึร เฆ ดูอี อีซาเรลัะ, อัน บอ มึห น็อห แหม น็อห กาเว เฆ บอกาเฆลียด.
© 2021, Wycliffe Bible Translator, Inc. All rights reserved.
