เลห 3
3
ลอง เฌาพรา จัร อาโมวแซ โบง ฆาน อัน
1อู ซีแง อาโมวแซ ฮาว เฮียง มาบู บึร อัน. บึร อัน จืร อาเยทาโรว.#3:1 อาเยทาโรว บอ จืร อาเรอูเอน อัน มูห อาโมยว ดูอี มีดีอาน. อาโมวแซ แฮะ ตึย มาบู แตห เฆ ฮาว ปวน โดง กาฮ็อห ฌัม นา เฆต ซีแง, ฌัม กาตัด นอน โฮวเรบ. เฆ ดูอี บอ ต็อห, นอน ตี มูห นอน เฌาพรา.#3:1 มัง อี บอ ต็อห, นอน ตี จืร นอน ซีนาย 2ดอ อัน ตี อึณ มูห อามู อามาด เฌาพรา, อัน กอย แคง เงา. เงา ยี เลห แคง ยวน. อามู อามาด เฌาพรา ตึอน, อัน ตัห กาปลูห ดี อาโมวแซ. อาโมวแซ บอ ยึร เงา กอย แคง ยวน, ยวน ยี ตู กาซึม. 3อัน ต็อห แคง น็อห อัน, “โอว ดี ฮาว ยอด มาเซ อึณ มูห. อึณ หมึอม อาม กาเซา, ยวน ตู กาซึม.”
4เฌาพรา กอย แคง เงา อี เลห แคง ยวน, อัน บอ ยึร อาโมวแซ ตัห, ต็อห ดี ยอด เงา ตึอน, อัน เฌา วี กาลาง โฆรห ดี อัน, แตห โฆรห เฌาพรา เลห แคง ยวน ตึอน. อัน ต็อห, “อึย อาโมวแซ.” อาโมวแซ วี ย็อห, “อึร, โอว กอย ดี นี.”
5เฌาพรา วี ต็อห, “แกวะ ตัห เครียะ โดง กอย โอว นี. แม โลว บูต คูดีณ แม. โคว, โดง กอย แม นี, อึณ มูห โดง บอด. 6โอว มูห เฌาพรา ปี กรึบ ฆูณ เฆ ดา แม. โอว มูห เฌาพรา ปี กรึบ บอ อาบราฮัม, อาแซก บอ อาโกบ.” อัน เฌา แฮะ ฮอต กาลาง ปาย ตี ดี อาโมวแซ, อาโมวแซ วี กาบีด นา อัน โกบ โยว กาเซา อัน, ตู ยัะ ยอด เฌาพรา.
7ปัน ตี เฌาพรา วี ต็อห ดี อัน, “โอว แฮะ ยึร ดูก ตาง ปี โลว คัม เฆ ดูอี ปี อึบ โอว, อี กอย แคง มืง แอฆึบ. โอว แฮะ โทม ลอง ปี ดัด ตาง เฆ โกบ คัม กาเซา เฆ ดี ดูอี อี อึบ เฆ บอ คาหนาบ เฆ โบง ฆาน. 8โคว, โอว แฮะ เลห แคง ฆางหราว, โลง ตัห ฌัม ดี นี, แตห โอว จอย เฆ, แตห เฆ ปึอน ดี เลห แคง มืง แอฆึบ, แกวะ ฮู แตห ดูอี แอฆึบ ปึอน ดี อึบ เฆ. โอว ดี ตึย เฆ ฮาว ฌัม แคง มืง ปอ มืง, อี มูห มืง ตาง, มืง กาว็อห. กาดาย แคง มืง ตี, อึณ บอด, แตห เฆ มึห เฮ บอ เบล ดอน โมยว, แตห เฆ มึห ปี ดี โลว เฆ ดอน โมยว. เฆ ดูอี อี กอย แคง มืง ตี, อึณ มูห ดูอี แบน โมยว แบน โมยว. บอ เฆ ดูอี กานัณ, ดูอี เฮทีด, ดูอี อาโมวรีด, ดูอี เพเรซีด, ดูอี ฮีวีด, บอ เฆ ดูอี เยบูซีด, เฆ บอกาเฆลียด กอย แคง มืง ตี. โอว แฮะ ฮอต นับ โตต ลอง คัม กาเซา เฆ ดูอี อีซาเรลัะ. 9โอว บอ แฮะ ยึร โตต นา จีจีว ปี โบง เฆ ดูอี แอฆึบ ดี เฆ. 10โคว อัน ตี, โอว จัร แม, แตห แม ฮาว ฌัม โดง กอย คูนดีคัม พาโรว, แตห แม แยต เฆ ดูอี อีซาเรลัะ อี มูห ดูอี ปี อึบ โอว, แตห เฆ เลห แคง มืง แอฆึบ.”
11เฌาพรา แฮะ ฮอต ต็อห ปาย ตี อาโมวแซ วี เวียะ โฆรห เฌาพรา ต็อห, “โอว ตู ยัะ ฮาว ฌัม โดง กอย คูนดีคัม พาโรว ตึอน. อาว กาอาบ โอว โบง ปาย ตี. โอว มืร โยว โอว ตู แป ดี แยต เฆ ดูอี อีซาเรลัะ, แตห เฆ เลห แคง มืง แอฆึบ.”
12เฌาพรา วี ต็อห, “โอว ดี ฮาว รึม โดบ แม. วาย แฮะ แยต แม ดูอี เลห แคง มืง แอฆึบ, เบ ดี วี ตัห ฌัม ดี นี. เบ ดี บอ กรึบ โอว แดง นอน นี. ปาย ตี แม ดี บอ นับ ซีคยา, อึณ มูห โอว เฌาพรา, อี แฮะ จัร แม ฮาว.”
13ปัน ตี อาโมวแซ วี ต็อห ดี เฌาพรา, “เซ โอว ฮี ตัห ฌัม โดง กอย เฆ ดูอี อีซาเรลัะ, เซ โอว ดี บอ ต็อห ดี เฆ, ‘อึณ มูห เฌาพรา ปี กรึบ ฆูณ ดัง เบ, อัน แฮะ จัร โอว ตัห ฌัม โดง กอย เบ,’ เซ โอว ต็อห ปาย ตี เฆ ดี บอ นับ ดี ดีหมอด โอว, นับ ดี ต็อห, ‘เฌาพรา อี ตึย แม ตี, มาเซ อัน จืร?’ เซ เฆ ต็อห ปาย ตี มาเซ ปี ดี โลว วี เวียะ โอว ดี เฆ?”
14เฌาพรา วี ต็อห, “โอว มูห อัน เฌา อี มูห โอว. แม โลว ต็อห ดี เฆ ดูอี อีซาเรลัะ, ‘เฌาพรา ตี, อัน จืร “โอว มูห อัน เฌา อี มูห โอว,” อัน เฌา ตี แฮะ ตึย โอว ตัห ฌัม โดง กอย เบ.’”#3:14 จืร เฌาพรา ตี, แคง โฆรห แฮแบร, อึณ เลห ‘ยัหเว.’ มัง อี บอ ต็อห ‘เยโฮววา.’ ลอง ดาง โฆรห ตี ยี มูห ‘โอว มูห อัน เฌา อี มูห โอว’
15แฮะ ฮอต ปัน ตี เฌาพรา วี ต็อห, “แม บอ โลว กาลาง ดี ดูอี อีซาเรลัะ, ‘อัน เฌา อี มูห เฌาพรา ปี กรึบ ฆูณ ดัง เบ, เฌาพรา ปี กรึบ อาบราฮัม, อาแซก บอ อาโกบ, อัน เฌา ตี แฮะ ตึย โอว ตัห ฌัม โดง กอย เบ.’ จืร โอว ปาย ตี. เฆ ดูอี โลว โหลห จืร โอว ตี ดอน ฌาด ดอน บาน. 16แตห แม ฮาว บาง เฆ ดา ตาง ดูอี อีซาเรลัะ, แตห เฆ บอกาเฆลียด ตัห กาฌูะ. แฮะ ฮอต, แม โลว กาลาง ดี เฆ, ‘เฌาพรา แฮะ ตัห กาปลูห ดี โอว. อัน มูห เฌาพรา ปี กรึบ ฆูณ ดัง เบ. อัน มูห เฌาพรา ปี กรึบ อาบราฮัม, อาแซก บอ อาโกบ ตึอน.’ อัน แฮะ ต็อห, ‘โอว แฮะ ตัห ยอด เบ. โอว มืร แฮะ ยึร โตต ปี โบง เฆ ดูอี แอฆึบ ดี เบ ดอ กอย เบ แคง มืง เฆ. 17โอว มืร แฮะ ดัว กาดีก ซัดฌา ดี เบ, แตห โอว ตึย เบ เลห แคง ดูก ตาง ปี โลว คัม เบ แคง มืง แอฆึบ. โอว ดี ตึย เบ ฮาว ฌัม แคง มืง โดง กอย ดูอี กานัณ, ดูอี เฮทีด, ดูอี อาโมวรีด, ดูอี เพเรซีด, ดูอี ฮีวีด บอ ดูอี เยบูซีด. มืง ตี, อึณ มูห มืง บอด. อึณ แตห เบ มึห เฮ บอ เบล ดอน โมยว, แตห เบ มึห ปี ดี โลว เบ ดอน โมยว.’
18เซ แม ต็อห ปาย ตี เฆ ดา ตาง ดูอี อีซาเรลัะ ดี โทม โฆรห แม ตี. วาย อัน ตี บอ แม บอ เฆ, เบ โลว ฮาว ฌัม โดง กอย คูนดีคัม แคง มืง แอฆึบ. เบ โลว ต็อห ดี อัน, ‘เฌาพรา ปี กรึบ ดูอี แฮแบร, อัน แฮะ ฮอต กาปลูห โดง กอย เย. เย หมาณ ดี แม, แตห แม ควาง เย ฮาว โดบ อึณเตณ อาดา โอย ซีแง, แตห เย ฮาว ฌัม แคง แปร โดง ง็อง, แตห เย หลู ปี ดี โลว หลู เย ดี อัน เฌา, อี มูห เฌาพรา ปี กรึบ เย.’ เซ เบ กาลาง ดี คูนดีคัม ปาย ตี 19โอว แฮะ นับ, อัน ตู ซี แตห เบ ฮาว. อัน โลว ยึร แคะ ตาง ปวน โอว อาต ควาง อัน เบ ฮาว. 20โคว, โอว ดี ดัว ดูก ตาง แบน โมยว แบน โมยว, โบง นา หมึอม โยว แคง มืง แอฆึบ, แตห เฆ กอ นับ แคะ ตาง ปวน โอว. วาย อัน ตี คูนดีคัม ดี ควาง เบ ฮาว.
21แดง ตี, โอว มืร โบง แตห เฆ ดูอี แอฆึบ กาปลูะ น็อห, แตห เฆ กอ อึง เบ. ปาย ตี เฆ ดี ดัว โกรวกราม กืน ดี เบ ดอ เลห ฮาว เบ แคง มืง เฆ. 22ดอ อัน ตี เฆ อีบึณ เบ ดอน อี, เฆ โลว หมาณ ดี ดูอี แอฆึบ อี กอย ดี รึม โดบ เฆ, แตห เฆ ดัว ครีว เฆ รึอน, แตห เฆ ดัว บอ ครึง ตา, ครึง ปี ดี ชึบ ฆอน อีมาย บอ ฆอน อีบึณ เบ. ปาย ตี เบ ดี ปึอน โกรวกราม เฆ ดูอี แอฆึบ, แตห เบ มึห ปี ดี โลว เบ.” เฌาพรา แฮะ ต็อห ปาย ตี ดี อาโมวแซ.
© 2021, Wycliffe Bible Translator, Inc. All rights reserved.
