เลห 4
4
ลอง นา หมึอม อาม กาเซา ปี บยัะ เฌาพรา ดี อาโมวแซ
1ปัน ตี อาโมวแซ วี ต็อห ดี เฌาพรา, “เซ เฆ ดูอี อีซาเรลัะ ตู วี โทม, ตู วี หณึม โฆรห ปี กาลาง โอว ดี เฆ, มาเซ ปี โลว โบง โอว? เซ เฆ บอ ต็อห, ‘อึณ ตู หมาน, เฌาพรา ตู ตัห กาปลูห ดี แม.’”
2เฌาพรา วี ต็อห, “มาเซ อึณ มูห ปี โฆ็ง แม ดี แด แม ตี?” อัน วี ต็อห, “อึณ มูห อึณกรวน.”
3ปัน ตี เฌาพรา วี ต็อห, “แตห แม ฌัต อึณกรวน ตี แดง กาดาย ดี อาต แม.” อาโมวแซ วี โบง ปี จัร เฌาพรา. แฮะ ฮอต ปัน ตี อึณกรวน ตึอน แฮะ แบน มาฮัณ อู เฌณ. อาโมวแซ วี เตา.
4วาย อัน ตี เฌาพรา วี จัร อัน ต็อห, “แตห แม ตา แด แม, ฌ็อห ซีดา ฮัณ ตี.” แฮะ ฮอต, อาโมวแซ บอ ฌ็อห ซีดา ฮัณ. ดอ ปา อัน ดี ฮัณ ตี, อึณ วี แบน อึณกรวน อัน ปี บรีม. 5เฌาพรา มืร ต็อห, “อาตี โอว ดี โบง แตห เฆ ดูอี อีซาเรลัะ หณึม, อึณ มูห โอว, อี แฮะ จัร แม. อึณ มูห โอว เฌาพรา ปี กรึบ เฆ ฆูณ ดัง เบ, เฌาพรา ปี กรึบ อาบราฮัม, อาแซก บอ อาโกบ, โอว แฮะ กาปลูห ดี แม.”
6แฮะ ฮอต ปัน ตี เฌาพรา วี ต็อห, “แตห แม บลึบ แด แม แคง ซีโตว แม.” อาโมวแซ วี บลึบ แด อัน แคง ซีโตว อัน. แฮะ ฮอต, อัน วี ดึห เลห แด อัน. เซา ดูะ แฮะ วี โนะ แดง แด อัน, แตห อึณ ลูย ปี เบรีย.
7เฌาพรา วี ต็อห, “แตห แม วี บลึบ แด แม แคง ซีโตว แม ปอ อู เฌณ.” แฮะ ฮอต, อัน วี โบง ปาย ตี. ดอ วี ดึห เลห อัน แด อัน, เซา แฮะ วี หราย โตต. แด อัน วี แบน ปี บรีม.
8เฌาพรา วี ต็อห ปอ อู เฌณ, “เซ ดูอี ตู หณึม แม ดอ ยึร เฆ นา หมึอม อาม กาเซา ปี บยัะ โอว คา อาต, เฆ ดี บอ นับ ดี หณึม วาย แฮะ ยึร เฆ นา หมึอม อาม กาเซา ปอ อู โมยว ตี. 9เซ เฆ ยี ตู หณึม วาย แฮะ ยึร เฆ นา หมึอม อาม กาเซา บอ อา โมยว ตี, เซ เฆ หณัม มึห น็อห ซี โทม โดบ ปี ต็อห แม, แม โลว ฮาว ต็อะ อึม แคง แบลง นีลา. แฮะ ฮอต, แม โลว โหลว อึม ตี ดี กาดาย กาฮ็อห. อู เฌณ อึม ตี ดี แบน หนาม อี กอย แดง กาดาย กาฮ็อห ตี.”
10เฌาพรา แฮะ ฮอต ต็อห ปาย ตี อาโมวแซ วี ต็อห ดี เฌาพรา, “อึย เฌาพรา, โอว อี มูห แดเจณ แม, โอว ตู มูห ดูอี กยัะ ดี กาลาง โฆรห ดี อี เฮา. บอ ดอ ตี นี วาย แฮะ ฮอต กาลาง แม โฆรห ดี โอว มืร, อึณ บอ ปี บรีม. โอว ตู นับ ดี กาลาง โฆรห ดี อี เฮา.”
11เฌาพรา วี ต็อห, “อาเซ แฮะ แตห ดูอี ปึอน กาลาง โฆรห? อาเซ โบง แตห ดูอี ตู นับ ดี โทม, ตู นับ ดี โฆรห? อาเซ นับ ดี โบง แตห งาย ดูอี ลึห, วี แตห มัง อี ตู ลึห? อึณ มูห โอว. โอว เฌาพรา แฮะ นับ ดี โบง โตต ดอน โมยว ฌึร ตี. 12แตห แม ฮาว ดอ ตี นี. โอว ดี จอย แม แตห แม ปึอน แค, แตห แม ปึอน กาลาง. โอว ดี มาโนว แม, แตห แม นับ ปี ดี โลว กาลาง แม.”
13อาโมวแซ ยี ต็อห, “แม เฌา, โอว หมาณ, แตห แม จัร ดูอี เฮา ฮาว โบง ปี โลว แม.”
14วาย อัน ตี เฌาพรา กอ วี รู แคง น็อห อัน โกบ กาลาง อาโมวแซ โฆรห ตี. อัน วี ต็อห ดี อาโมวแซ, “อึณ มึห อีกัด แม, อี จืร อาโรน, อี มูห ครึร อาเลวี. โอว แฮะ นับ, อาโรน แฮะ นับ ดี กาลาง ซีคยา ดี อี. ดอ ตี นี อัน แฮะ ฮอต เลห โดง กอย อัน, ฮาว โดบ อึณเตณ, แตห อัน ตัห ฌัม โดง กอย แม นี. เซ อัน ยึร แม, อัน ดี บอ มึห น็อห ดาคึย. 15ปัน ตี แม โลว กาลาง ดี อัน แคะ ปี โลว อัน กาลาง ดี อี เฮา. โอว ดี บอ จอย บอ แม บอ อาโรน. โอว ดี มาโนว บาย, แตห บาย นับ ปี โลว โบง บาย. 16อาโรน ดี กาลาง ดี ดูอี ดาง แม. อึณ ปี, อัน ดี แบน ซีดัะ บอ โมต แม. ปี ต็อห แม ดี อัน, อึณ ยี ปี เฌาพรา แฮะ กาลาง โฆรห ดี อัน. 17แม ยี โลว โฆ็ง อึณกรวน ตี บอ ตา อึณกรวน ตี, โบง นา หมึอม อาม กาเซา.”
18เฌาพรา แฮะ ฮอต กาลาง โฆรห ตี, อาโมวแซ บอ เวณ ตัห ฌัม โดง กอย บึร อัน อี จืร อาเยทาโรว. อัน ต็อห ดี บึร อัน, “โอว หมาณ, แตห แม ควาง โอว วีว. แตห โอว วี ฮาว ฌัม แคง มืง แอฆึบ. โอว ซี วีว โดง กอย วอแว โอว, แตห โอว นับ โยว อึณ มึห มัง อี ซี กอย, โยว เฆ แฮะ ยัม, หณัม ยัม.” อัน แฮะ ฮอต หมาณ ปาย ตี อาเยทาโรว วี ควาง อัน วีว. อัน บอ ต็อห, “แตห แม ฮาว ดาคึย.”
19ดอ ซี กอย อาโมวแซ แคง มืง มีดีอาน ตึอน, เฌาพรา แฮะ จัร อัน วี วีว แคง มืง แอฆึบ. เฌาพรา แฮะ ต็อห, “เฆ ดูอี อี ซี ง็อห ยัม แม ตึอน, เฆ ดอน อี แฮะ ฮอต ยัม.” 20โคว อัน ตี, อาโมวแซ แฮะ แดะ บอ อีบึณ อัน บอ ฆอน อัน. แตห เฆ ป็อะ มาโลว, โดบ อัน, ฮาว วีว ดี มืง แอฆึบ. อัน บอ ดึห อึณกรวน ปี ดัว เฌาพรา ดี อัน, โฆ็ง ฮาว โดบ อึณเตณ.
21เฌาพรา วี กาลาง โฆรห ดี อัน ต็อห, “แม ฮี ตัห ฌัม แคง มืง แอฆึบ, แม โลว บยัะ นา หมึอม อาม กาเซา ปี ดัว โอว แม โบง. แคะ ปี ดัว โอว ปวน ดี แม, แม โลว บยัะ โตต ดอน โมยว ดี คูนดีคัม พาโรว. โอว ยี ดี โบง แกวะ แตห อัน บยอง น็อห, ตู ควาง แตห เบ ฮาว. 22ปัน ตี แม โลว ต็อห ดี คูนดีคัม พาโรว, ‘เฌาพรา ต็อห ดี แม, เฆ ดูอี อีซาเรลัะ ปี ฆอน โอว. เฆ ปี ฆอน ฆีณ โอว. 23โอว มืร จัร แม, แตห แม ควาง ฆอน โอว เฆ ตี, แตห เฆ ฮาว กรึบ โอว. แม ยี ตู ควาง เฆ ฮาว. โคว, โอว ดี โบง แตห ฆอน ฆีณ แม ยัม.’”
24ดอ ฮาว อัน โดบ อึณเตณ, ดอ ตัห ฌัม อัน ดี เฌโรบ อู โปละ, เฌาพรา ตัห โดง กอย อัน, ต็อห ดี ง็อห ยัม อาโมวแซ. 25-26ดอ อัน ตี นาง ซีโปวรา, อี มูห อีบึณ อาโมวแซ, อัน เหรต มาว ลัม อู โบ็ง, ซัวะ แวน ฮูน ลัะคานา อีมาย ดี ฆอน อัน. แฮะ ฮอต, อัน บอ ฌัต ฮูน ตี ดี เปลา อาโมวแซ. อัน บอ ต็อห ดี อาโมวแซ, “อึย, อีมาย โอว, แม โลว โบง แตห หนาม เลห.” วาย อัน ตี เฌาพรา ตู วี ง็อห ยัม อาโมวแซ.
27ดอ อัน ตี เฌาพรา ยี ต็อห ดี อาโรน ตึอน, “แตห แม ฮาว เหรต อาโมวแซ อี กอย แคง แปร ง็อง.” ปัน ตี อาโรน ตึอน มืร ฮาว เหรต วา อัน. ดอ ลาย กาตูณ ฆาย, อาโมวแซ กอย ดี นอน เฌาพรา ตึอน. อัน แฮะ ยึร วา อัน, อัน บอ อูห วา อัน. 28ดอ อัน ตี อาโมวแซ วี แค โตต ดอน โมยว, แตห อาโรน วี โทม ลอง โฆรห ปี จัร เฌาพรา อัน กาลาง. อัน บอ แค ลอง นา หมึอม อาม กาเซา ปี จัร เฌาพรา อัน โบง.
29วาย อัน ตี อาโมวแซ ฆาย อาโรน, ฆาย บอ ฮาว ฌัม โดง กอย เฆ ดา ตาง ดูอี อีซาเรลัะ. ฆาย มืร แดะ เฆ ตัห กาฌูะ อู โปละ. 30อาโรน วี กาลาง โตต ดอน โมยว ดี เฆ ลอง โฆรห แปะ แฮะ กาลาง เฌาพรา ดี อาโมวแซ. อาโมวแซ บอ โบง นา หมึอม อาม กาเซา ปี ดึอม บยัะ เฌาพรา ดี อัน, แตห เฆ ยึร. 31ปัน ตี เฆ ดา ตาง หณึม โฆรห ปี กาลาง ฆาย. เฆ บอ นับ, เฌาพรา แฮะ มึห น็อห กาเว เฆ ดูอี อีซาเรลัะ. เฆ บอ นับ, เฌาพรา แฮะ ยึร ดูก ตาง ปี โลว คัม เฆ. วาย อัน ตี เฆ ครึบเครา บอ กรึบ เฌาพรา.
© 2021, Wycliffe Bible Translator, Inc. All rights reserved.
