เลห 1
1
ลอง เฆ ดูอี แอฆึบ คาหนาบ เฆ ดูอี อีซาเรลัะ
1ฆอน อาโกบ ตึอน บอ อึณโฮม เฆ, เฆ แฮะ ดึอม ฮาว รึม โดบ อาโกบ, ฮาว กอย แคง มืง แอฆึบ. เฆ จืร ปาย นี. 2อารูเบน, อาซีเมโอน, อาเลวี, อายูดา, 3อาอีซาคา, อาเฌบูโลน, อาเบนยาม 4อาดาน, อานาบทาลี, อาฆัด, บอ อาเซน. 5ดอ ฮาว เฆ หลูกหลาน อาโกบ ตึอน ฌัม มืง แอฆึบ, เฆ บอกาเฆลียด กอย บู ฆึร วี. อาโยว ยี แฮะ กอย แคง มืง แอฆึบ อาต ตัห เฆ.
6วาย อัน ตี แฮะ เหลณ, อึณ บอ ฌัม อาคราว ดอ แฮะ ยัม เฆ บอกาเฆลียด. บอ อาโยว เฆ อูกัด อูวา อัน, บอ เฆ ดูอี ดอน อี อี แฮะ ดึอม กอย ฌาด ตึอน, เฆ ดอน อี แฮะ ฮอต ยัม. 7เฆ หลูกหลาน ดูอี ฌาด ตึอน, เฆ อี แฮะ มูห อาโมยว ดูอี อีซาเรลัะ, เฆ แฮะ แบน ดูอี กืน กาเซา, แตห เฆ กอ โนะ แคง มืง บอ มืง.
8วาย อัน ตี อึณ วี มึห คูนดีคัม กามาย อู กาดัง อี อึบ มืง แอฆึบ. คูนดีคัม ตี ตู นับ มาเซ ลอง อาโยว ตึอน. 9อัน ต็อห ดี เฆ ดูอี อาโมยว อัน, “อึย, เฆ ดูอี อีซาเรลัะ นี, เฆ แฮะ แบน ดูอี กืน กาเซา. ปวน เฆ ตาง หลึอม ปวน เอ. 10เซ อึณ ดี มึห ดูอี ดี กาโฆห ดี เอ, เฆ ดี บอ นับ ดี จอย รันซู เอ. เฆ ดี บอ กาโฆห แป เอ. แฮะ ฮอต, เฆ ดี บอ เตา เลห แคง มืง เอ. โคว อัน ตี, เอ โลว ปีหล็อก ดี เฆ, แกวะ แตห เฆ แบร ปอ อึณปัว.”
11ปัน ตี เฆ ดูอี แอฆึบ จัร ดูอี มัง อี, แตห เฆ บัร ดูอี อีซาเรลัะ, แตห เฆ โบง นา จีจีว ดี เฆ, คาหนาบ เฆ โบง ฆาน กืน กาเซา. คูนดีคัม วี จัร เฆ ดูอี อีซาเรลัะ แด มืง เตียะ ปอ อา มืง อาดา อัน. มืง ตี จืร มืง พีโทม ฆาย มืง รามาเซด. อึณ มูห โดง ปี เบลห อูน คูนดีคัม พาโรว โกรวกราม อัน. 12เฆ ดูอี แอฆึบ บอ โบง นา จีจีว แคะ เหมา ดี เฆ, ดูอี อีซาเรลัะ ตึอน บอ แว กาปัว กืน. โคว, ดูอี แอฆึบ กอ โยว กาเซา เฆ. 13-14เฆ บอ วี คาหนาบ เฆ ดูอี อีซาเรลัะ โบง ฆาน, แตห เฆ กาวัร กาดาย กาปีด, โบง มา มาอูด, ซัม กาง บอ โบง ฆาน แบน โมยว แบน โมยว แคง โดง นา. ปาย ตี เฆ ดูอี แอฆึบ จัร กาเซา เฆ ดูอี อีซาเรลัะ, แตห เฆ โบง กืน, แกวะ ฮู แตห น็อห เฆ ดาคึย.
15กาแต เฆ ดูอี อีซาเรลัะ อึณ ยี มึห ยา มอมีบ อา วี. ฆาย จืร นาง ซีพรา ฆาย นาง พูวา. คูนดีคัม แคง มืง แอฆึบ บอ จัร ยา อา วี ตี ฮาว ฌัม โดง กอย อัน. อัน ต็อห ดี ฆาย, 16“เซ บาย ลึมลา อีบึณ แฮแบร ดอ ฆอน เฆ, เซ ฆอน เฆ มูห ฆอน อีมาย, บาย โลว แตห อัน ยัม. เซ อึณ ยี มูห ฆอน อีบึณ, บาย โลว แตห อัน อีม.”#1:16 ดูอี แฮแบร ฆาย ดูอี อีซาเรลัะ มูห อู โมยว 17ยา มอมีบ อา วี ตึอน ยี มึห น็อห โยว เฌาพรา. โคว, ฆาย ตู โบง ปี ต็อห คูนดีคัม ตึอน. ฆาย แตห ฆอน อีมาย อีม. 18ปัน ตี คูนดีคัม วี จัร ยา มอมีบ อา วี ตึอน, แตห ฆาย ตัห ฌัม โดง กอย อัน. อัน ดีหมอด ฆาย ต็อห, “เหมา อึณ ปาย ปี โบง บาย ปาย นี? เหมา อึณปาย ปี ตู ง็อห ยัม บาย ฆอน อางัะ อี มูห อีมาย?”
19ยา มอมีบ ตึอน วี ต็อห ดี อัน, “เฆ อีบึณ อาโมยว แฮแบร ตู ปี อีบึณ อาโมยว แอฆึบ. เฆ มึห โปลม, แตห เฆ เจว ฆอน อาต ดัน ตัห ฌัม ยาย โดง กอย เฆ.”
20-21เฌาพรา บอ อึง ยา มอมีบ ฆาย ตี. อัน แตห บอ ฆาย มึห ฆอน โกบ โยว ฆาย เฌาพรา. เฆ ดูอี อีซาเรลัะ บอ แกร ดี กืน หลึอม คา อาต. 22ปัน ตี คูนดีคัม พาโรว บอ ดัว อามีง ดี ดูอี ดอน อี ต็อห, “เซ เฆ ดูอี แฮแบร แฮะ ฆึอด ฆอน อางัะ อี มูห อีมาย, เบ โลว แวน ดอน อี แคง แบลง. ฆอน อางัะ อี มูห อีบึณ, เบ โลว แตห อัน กอย, แตห อัน อีม.” คูนดีคัม ต็อห ปาย ตี ดี ดูอี ดอน อี.
© 2021, Wycliffe Bible Translator, Inc. All rights reserved.
