LUKAS 22
22
Komol᷊ang Ko Mundoka si Yesus
(Mat. 26:1-5; Mrk. 14:1-2; Yoh. 11:45-53)
1 #
Kel. 12:1-27
Putatinaungang u Boroti Takoae Ragi nge, ko i sigho Paskah seng masandighi. 2Manga Tumbonang u imam dang manga meteru agama kapundeae l᷊al᷊eng tadeau mangono mamate si Yesus, watu'u i sire mataku su taumata ko maul᷊i.
I Yudas Nukumire musingking si Yesus
(Mat. 26:14-16; Mrk. 14:10-11)
3Bou e'e setang nusumu su naung i Yudas ko isigho l᷊ai si Iskariot, ko singkatau boi sire mapul᷊o dua tumatuhu I Yesus. 4Ual᷊ingu e'e i Yudas natamai dang nughaghighili dingang u manga tumbonang u imam dang manga tombonang u mundadiaga Wal᷊e-Ngu Mawu hal᷊i u kirapa i sie makapanarakang I Yesus si sire. 5I Sire mal᷊uasi kahingang dang nudiandi hindo mangonggo doi si sie. 6I Yudas nukumire dang nanita mundea l᷊oahe sarang tai katitonang u taumata manarakang I Yesus si sire.
Sasadiangu Kangu Paskah
(Mat. 26:17-25; Mrk. 14:12-21; Yoh. 13:21-30)
7Nurating l᷊ounge su l᷊al᷊ung u sal᷊iwang Boroti Takoae Ragi nge humoneu domba guna ngu kangu Paskah i hata. 8Kute I Yesus nangoro si Petrus dingang i Yohanes, “Tamaite panadia kangu Paskah guna ngi kite.”
9“Suapa kao i Tuang i kami manadia?” kakina i sire.
10I Yesus nusumimbahi, “Su tempo i kumu sumu su soa, i kumu sarung musombang u tau koese singkatau kapumbawae bunsari simbau tahou ake. Tuhuke i sie sarang wal᷊e ko isukange, 11dang puhabari su tataghuangu wal᷊e e'e: I Tuang nangul᷊i, ‘Suapa tampae guna ngu Ia l᷊au tumatuhu-Ku kumang kangu Paskah?’ 12Tataghuangu wal᷊e e'e sarung manibo si kumu kamari ko l᷊abo simbau su loteng, naimuti dingang u tatahoe. Sadiaite kaul᷊ie su se'e.” 13Kute i Petrus dingang i Yohanes natamai, bou e'e nakahombang kaul᷊ie nuhino kere ko nihabari Yesus. I sire nanadia kangu Paskah e'e.
Parjamuang u Mawu
(Mat. 26:26-30; Mrk. 14:22-26; 1Kor. 11:23-25)
14Suapang seng temponge kumang kangu Paskah e'e, I Yesus nukumangiang dingang u manga tumatuhu-E su tampa u parjamuang. 15Bou e'e i sie nangul᷊i si sire, “Ia mo kahingang kumang kangu Paskah i'i singkakang dingang i kumu suhorou Ia mutatahang u singsara! 16Watu'u, pangimangte: Ia sarung ta kumang i'i l᷊ai sarang mangal᷊engu parjamuang i'i i pakal᷊ahe su Duniangu Mawu ko wuhu.”
17Bou e'e I Yesus nuhengke cawang u anggori, bou e'e mukal᷊iomaneng nuputarikase su Mawu Ruata, mbuhue nangul᷊i, “Al᷊a e i'i, dang pupapahiae; 18Watu'u katitongte: manita bou tempo i'i Ia sarung seng ta manginung anggori i'i l᷊ai sarang Mawu Ruata seng mukawasa patiku.”
19Bou e'e I Yesus nangal᷊a boroti. Dang suapang mbuae nukal᷊iomaneng nupatarimakase, i Sie nangangompeng boroti e'e dingang u l᷊ima-Nge mbuhue nangonggo e'e si sire, dingang nangul᷊i, “Ii badang-Ku [ko isarakang guna ngi kumu. Koako i'i guna ngu putatinaungang si Sia.” 20#Yer. 31:31-34Kere'e l᷊ai suapang bou nukumang, I Sie nangonggo cawangu anggori e'e si sire dingang nangul᷊i, “Cawang i'i ko pudadiandi ko wuhu bou Mawu Ruata, ko nitoghasengu daha-Ku-daha ko ipaansehi guna ngi kumu.”]
21 #
Mzm. 41:10
“Kateho putuhung! Taumata ko musingking si Sia ene su si'i dingang-Ku! 22Ahusu Taumata mang sarung mate kere ko seng nitantu'u Mawu Ruata; kateho silaka su taumata ko musingking si Sie!”
23Kute i sire nanita nukakina simbau dingang u kowal᷊inge, i sai bou tal᷊oara i sire ko sarung mukoa hal᷊i e'e.
Purarendehi Hal᷊i u Isai ko Kal᷊abokange
24 #
Mat. 18:1; Mrk. 9:34; Luk. 9:46 Sutal᷊oara u manga tumatuhu I Yesus nutumimbul᷊i purarendehi hal᷊i u ko isai bo i sire ko mambeng irekeng kal᷊abokange. 25#Mat. 20:25-27; Mrk. 10:42-44I Yesus nangul᷊i si sire, “Manga Ratu ngu dunia ko wugha ngu Mawu Ruata manira kawanuange dang apang mangangawasange i sigho ‘Munanirung Umate’. 26#Mat. 23:11; Mrk. 9:35Arawe i kumu tawatonge kere'e. Su simbukange, taumata ko kal᷊abokange su tal᷊oara i kumu mambeng makoa ko kadiokange, dang pangaha mambeng makoa kere paparentang 27#Yoh. 13:12-15I sai ko lebe l᷊abo; taumata ko kakangiang su meda, arako taumata ko kapusiliwirie si sie? Tantu taumata ko kokangiang e'e. Arawe Ia ene su tal᷊oara i kumu kere paparentang.
28Su ral᷊ung u kaul᷊i u kasasusa-Ku, i kumu mangkate sintinia dingang-Ku. 29Kere e I Yamang seng nangonggo si Sia haki guna ngu mamarenta, kere l᷊ai Ia sarung mangonggo haki e'e si kumu. 30#Mat. 19:28Dingang u kere i kumu botonge mahul᷊uasi dingang-Ku su tempo ngu Ia makoa Ratu. Dang i kumu sarung kumangiang su wawou mapul᷊o dua kadera guna ngu mamarenta mapul᷊o dua suku bou bangsa Israel.”
Nubueti himoneu i Petrus Sarung Musunial᷊i Yesus
(Mat. 26:32-35; Mrk. 14:27-31; Yoh. 13:36-38)
31“Simon, Simon, daringihe! Setang seng nipakawala guna ngu panal᷊uka si kumu; kere gandung nihae bou pisinge hakiu ko mapia nihae bou ko dal᷊ai. 32Kateho Ia seng mbuae nukal᷊iomaneng guna ngi kau Simon, tadeau pangangimang u kumbahang muwal᷊u. Dang boko i kau seng nusul᷊e sarang koa-Ku i kau mambeng panoghasi anau singkataungu.”
33I Petrus nusumimbahi, “Mawu, ia sadia sumu su tutupang dang mate dingang u Mawu!”
34“Pangimangte, Petrus”, angkungi Yesus, “suhoro manu kumuku silou i'i, i kau seng pakatilu musunial᷊u Ia.”
Dompeti, Patoka Arako Pera
35 #
Mat. 10:9-10; Mrk. 6:8-9; Luk. 9:3, 10:4 Bou e'e I Yesus nangul᷊i si sire, “Ndahuwite su tempo Ia nundoi si kumu dang tanupakawal᷊a ngi kumu mumbawa dompeti, patoka arako sapatu, apa pia kurange si kumu?”
“Takoe!” sasimbahi sire.
36“Arawe i'i,” angkungi Yesus, “I sai pia dompeti, arako patoka, mambeng wawa; dang isai takoae perange, mambeng puwal᷊u jubange guna ngu pul᷊uang pera. 37#Yes. 53:12Watu'u, pangimangte, su nasi u Buki Susi ko nangul᷊i kiri i, ‘I Sie nirekeng kere singkatau taha pukoa ko dal᷊ai’, mambeng mariadi su watangeng-Ku. Watu'u apang ko kawawohe su Buki Susi hal᷊i u Ia, seng kakariadinge su tempo i'i.”
38“Mawu,” angkungu manga tumatuhu I Yesus, “Tuhungte, su si'i pia pera darua.”
“Kuhate!”#22:38: Kuhate: arako Sembotonge. sasimbahi Yesus.
I Yesus nukal᷊iomaneng su Wul᷊uru Zaitun
(Mat. 26:36-46; Mrk. 14:32-42)
39I Yesus nanintang u soa dang kere narange nakoa sarang Wul᷊uru Zaitun dang manga tumatuhu-E natarai l᷊ai dingang-E. 40Suapang nuratingu e'e, i Sie nangul᷊i si sire, “Pukal᷊iomanengko, tadeau i kumu tamukoa dosa boko i kumu isal᷊ukateng.”
41Bou e'e i Sie natamai lebe marau singkodo bo i sire, pari manga singkapal᷊o u watu karaunge, mbuhue nusuba dang nukal᷊iomaneng. 42“I Yamang,” angkung-E, “kere wotonge, pakarauko bou Ia singsara ko mambeng Daku l᷊al᷊engang i'i. Kateho kumbahang tumuhu kao-Ku, kitang tumuhu kao I Yamang.” 43[Singkatau malaekati nusumongo si Sie dang nupakatoghasi si Sie. 44I Yesus nutatahang u singsara kere e kahebate su naung-E, hakiu i Sie nanamba nukal᷊iomaneng. Liagha-Nge musul᷊ungu daha nutumudo su tana.]
45Nasue kal᷊iomanenge, I Yesus nusul᷊e sau sarang manga tumatuhu-E. I Sie nakahombang si sire katikie ual᷊ingu naung tumaniu masusa. 46Bou e'e i Sie nangul᷊i si sire, “Nakura we i kumu natiki? Puwangungte dang pukal᷊iomanengte tadeau i kumu tawe kahinongang u sasal᷊uka.”
I Yesus Nisame
(Mat. 26:47-56; Mrk. 14:43-50; Yoh. 18:3-11)
47Tintal᷊a Yesus mborong kadidatonge, nasongote taumata singgapang. I sire niaha i Yudas, singkatau bou tumatuhu I Yesus. Bou e'e i Yudas nusumandighi si Yesus, mbuhue nangimbu si Sie. 48Arawe I Yesus nangul᷊i si sie, “Yudas, apa dingang u l᷊aimbu e'e i kau musingking Ahusu Taumata?”
49Suapang manga tumatuhu I Yesus ko ene su se'e nakawua apang ko nariadi, i sire nangul᷊i, “Mawu, mapiang timboung i kami dingang u pera!” 50Bou e'e singkatau boi sire namili l᷊angu imam ko l᷊abo dingang u pera hakiu tul᷊inge kuaneng nasahing.
51Kateho I Yesus nangul᷊i, “Kuhate.” Bou e'e i Sie naniliri tul᷊ingu tau e'e dang nipakaul᷊enge.
52Bou e'e I Yesus nangul᷊i, su manga tumbonang u imam l᷊au su manga parawira mundadiaga Wal᷊e-Ngu Mawu, dang manga pangaha u tau Yahudi ko nusumongo su se'e guna ngu maname si Sie, “Apa la i'i ko tahapukoa ko dal᷊ai sarang i kumu nusumongo dingang u pera dang tatutu guna ngu maname si Sia? 53#Luk. 19:47, 21:37L᷊ou-l᷊ou Ia ene dingang i kumu su Wal᷊e-Ngu Mawu, i kumu tananame si Sia. Arawe i'i seng tempo i kumu mukoa, tempongu kawasa ngu kararundung makoa panehere.”
I Petrus Nusunial᷊i Yesus
(Mat. 26:57-58,69-75; Mrk. 14:53-54,66-72; Yoh. 18:12-18,25-27)
54I sire naname si Yesus dang numbawa si Sie sarang Wal᷊e-Ngu imam ko l᷊abo. I Petrus katuhue bou raunge. 55Su tal᷊oara u lilahi e'e putung rararang seng kahenange dang i Petrus tamai nukumangiang dingang u manga taumata ko kokangiang nul᷊iku putung e'e. 56Singkatau paparentang kowawine nakawua si Petrus kakangiang su sindihangu putung rararang e'e; bou e'e paparentang kowawine e'e nutuhung pakapia-pia si Petrus, mbuhue nangul᷊i, “Taumata i'i l᷊ai kanini ene dingangi Yesus!”
57Arawe i Petrus nusunial᷊i. I sie nangul᷊i, “Ia tinga-tingari wugha ngu tau e'e!”
58Tanal᷊iwue bou e'e, singkatau kowal᷊inge nakawua si Petrus dang nangul᷊i, “I kau l᷊ai singkatau bo i sire!”
Kateho i Petrus nusumimbahi, “Ta, wal᷊inge ia!”
59Patehang manga singkaorasi bou e'e, singkatau ko wal᷊inge l᷊ai nangul᷊i mauha, “Tingari taumata i'i tumatuhu I Yesus, watu'u i sie l᷊ai tau Galilea!”
60Arawe i Petrus nusumimbahi, “Apa ko sunaungu e'e, ia wugha!”
Su tempo e'e l᷊ai, tintal᷊a i Petrus mborong kadidatonge, manu kumuku. 61I Yesus l᷊ai nuwihu dang nutuhung si Petrus. Bou e'e i Petrus nakatinaung Mawu mbuae nangul᷊i si sie, “Suhoro u manu kumuku silou i'i, i kau seng pakatilu nusunial᷊u Ia.” 62Kute i Petrus nusumuwang bou e'e dang nusumangi susahindokaneng.
I Yesus niputaghunang dang nipukul᷊i
(Mat. 26:67-68; Mrk. 14:65)
63Manga taumata ko kapudiagae si Yesus, nuputaghunang dang namukul᷊i si Sie. 64I sire nanaka mata-Nge, dang nukina si Sie, “Kenang tika i sai namukul᷊i si Kau?” 65Maul᷊i l᷊ai manga didato l᷊ahinakang ko nihabari sire si Sie.
I Yesus Su tingo ngu Pangadilangu Agama
(Mat. 26:59-66; Mrk. 14:55-64; Yoh. 18:19-24)
66Su mal᷊ukari e'e, manga pangaha u tau Yahudi, manga tumbonang u imam, l᷊au manga materu agama nukomol᷊i, bou e'e I Yesus niwawa sarang tingo ngu Pangadilangu Agama ngi sire 67“Habari ko si kami,” angkungi sire si sie, “Apa ko i Kau i'i Ratu Mananal᷊amati?”
I Yesus nusumimbahi, “Boko Ia muhabari si kumu, i kumu sarung ta mangimang. 68Dang boko ia makina si kumu, i kumu ta sarung sumimbahi. 69Arawe manita bou tempo i'i, Ahusu Taumata sarung kumangiang su simbuka kuaneng#22:69 kumangiang … kuaneng: Putuhung Luk. 20:42. u Mawu Ruata ko Makawasa Mawu Ruata ko Makawasa.”
70I sire kaul᷊ie nangul᷊i, “Boko kere'e, i Kau i'i Ahusu u Mawu Ruata?”
I Yesus nusumimbahi, “Kere'e nihabari kumu.”
71Kute i sire nangul᷊i, “Seng tawahal᷊uasi l᷊ai mborong pia saksi! I kite seng nakaringihi bou mohong-E sisane!”
2014 Indonesian Bible Society (Lembaga Alkitab Indonesia)
