LUKAS 21

Sasumba ngu Singkatau Ko Wal᷊u

(Mrk. 12:41-44)

1Su Wal᷊e-Ngu Mawu, I Yesus kaputuhunge manga tau ko kala kaputahoe doi su kasi u sasumba. 2I Sie nakawua l᷊ai singkatau ko wal᷊u ko susa kahingang, nutaho doi witu dua mbua. 3Bou e'e I Yesus nangul᷊i, “Daringihe ko: tau ko wal᷊u i'i nutaho lebe maul᷊i bou taumata ko wal᷊inge. 4Watu'u i sire kaul᷊ie nungonggo bou lebe ngu kakakala i sire. Arawe tau ko wal᷊u i'i, maning we i sie ko susa kahingang, i sie nangonggo kaul᷊ie apang ko pia si sie ko mborong i kapuwiahe sisane.”

I Yesus Kapuwisarange Hal᷊i u Kal᷊aopehu Wal᷊e-Ngu Mawu

(Mat. 24:1-2; Mrk. 13:1-2)

5Pia manga taumata ko nuwisara hal᷊i u kirapa kasidadae Wal᷊e-Ngu Mawu il᷊ighahitangu watu ko masasidada dang dingang u manga rarotong ko isumba su Mawu Ruata. Kute I Yesus nangul᷊i si sire, 6“Sarung pia temponge, kaul᷊ie ko nikawua ngi kamu i'i sarung ipakaghoghahi, takoae sarang simbau watu susi'i ko sarung matatana mural᷊unsung su tampae!”

Singsara Dingang u Papahang

(Mat. 24:3-14; Mrk. 13:3-13)

7I sire nukina si Yesus, “Tuang Guru, kangereng hal᷊i e'e sarung mariadi? Dang apa tatiange ko seng nurating temponge hal᷊i e'e sarung mariadi?”

8I Yesus nangul᷊i, “Pakaingati, kumbahang sarang i kumu kaakal᷊eng. Maul᷊i taumata sarung sumongo dingang u areng-Ku, dang mangul᷊i, ‘Ia i'i I Sie!’ dang ‘Seng temponge.’ Kateho kumbahang i kumu tumuhu si sire. 9Kumbahang l᷊ai i kumu mataku boko makaringihi habaru parang dingang u pugaghara. Kaul᷊ie'e mambeng mariadi horo. Kateho e'e wal᷊inge we mupakal᷊ahe seng temponge mukiamati.”

10Bou e'e I Yesus nanurusi didato-Nge, angkung-E, “Bangsa simbau sarung muparang mundoka bangsa ko wal᷊inge dang negara simbau sarung mangalo negara ko wal᷊inge. 11Su ampang tampa sarung pia rinuhi mauha, kal᷊ahutung dingang u sahinda. Sarung mariadi manga hal᷊i ko makal᷊ahiasi dingang u makatataku su l᷊angi. 12Kateho suhoro kaul᷊i e'e mariadi, i kumu sarung i same dingang u ipahangeng. I kumu sarung i ipariksang su manga wal᷊e pukakal᷊iomanengang dang ipasu su l᷊al᷊ung u tutupang. Dang i kumu sarung irandasi sarang tingo ngu manga ratu dang manga mangangawasa ual᷊ingu i kumu ko tumatuhu-Ku. 13E'e temponge si kumu muhabaru Habari Mapia bou Mawu Ruata. 14#Luk. 12:11-12Pangakingte himoneu i kumu ta ghumagha hal᷊i u apa ko sarung iul᷊i i kumu su guna ngu mupakal᷊iwiri badang i kumu. 15Ia sisaneku sarung munggile si kau apang didato l᷊au kapapande e'e, hakiu takoae sarang singkatau bou manga roka i kumu makapundoka arako musunial᷊i apang ko nihabari kumu. 16I kumu sarung i pusingkingi mama papa ngi kumu, manga ana u sim bauikumu, manga ghe i kumu l᷊au manga ghawe ngi kumu. Simbahageang boi kumu sarung i pate ngi sire. 17I Kumu sarung ipunbinsi u apang taumata ual᷊ing i kumu ko tumatuhu-Ku. 18Kateho utau sarang simbua sarung ta mailang bou timbo u. 19Boko i kumu mukatahang dingang u musabari, i kumu sarung masal᷊amati.”

I Yesus Kapuwisarange Hal᷊i u Kal᷊aopehu Yerusalem

(Mat. 24:15-21; Mrk. 13:14-19)

20“Boko i kumu makawua Yerusalem nil᷊ikutang u sordado, i kumu sarung matitong himoneu soa e'e tamal᷊iwue l᷊ai sarung ipakarusa. 21Su tempo e'e taumata ko su Yudea mambeng tal᷊ang sarang wul᷊ure. I sire ko su soa mambeng panintang u soa, dang i sire ko su l᷊ikuru soa kumbahang sumu su soa. 22#Hos. 9:7Watu'u l᷊ou – l᷊ou e'e ko l᷊ou-l᷊ou kananawo u hukumang, tadeau dingang u kere e naganapi apang ko mawawohe su Buki Susi. 23Wal᷊inge gampang kal᷊intihie l᷊ou-l᷊ou e'e su kowawine ko pia kal᷊uwaenge, dang i ma ko mborong kapupasusunge ana! Soa i'i sarung makapundang kasusa ko l᷊abo, dang Mawu sarung muhukung u bangsa i'i. 24Pia ko sarung pateng dingang u pera, pia l᷊ai ko sarung i taweng sarang manga wanua ngu tau; dang apang taumata ko wugha ngu Mawu Ruata sarung mul᷊inda-l᷊inda Yerusalem sarang masue tempo ko nitantu u Mawu si sire.”

Rarintangu Ahusu Taumata

(Mat. 24:29-31; Mrk. 13:24-27)

25 # Yes. 13:10; Yeh. 32:7; Yl. 2:31; Kl᷊h. 6:12-13 “Hindo sarung i kawua pia manga tatia su matangutiti, wul᷊ang, dingang u manga wituing. Su dunia, patiku bangsa sarung mataku dang mubingo mupasaruang ghal᷊udu dingang u bulari u sasi. 26Taumata sarung mataku kahingang mupasaruang apa ko sarung mariadi su kaul᷊i u dunia i'i, watu'u apang mangangawasa ngu kinuang sarung mukal᷊imbuhung. 27#Dan. 7:13; Kl᷊h. 1:7Su tempo e'e Ahusu Taumata sarung ruminta su l᷊al᷊ung u winawa dingang u kawasa dang kawawantughi ko l᷊abo. 28Boko manga hal᷊i e'e seng manita mariadi, puwangungte dingang hengke e timbo u, watu'u singkodo l᷊ai i kumu sarung ipakasal᷊amati.”

Tintiro Bou Kau Ara

(Mat. 24:32-35; Mrk. 13:28-31)

29Bou e'e I Yesus nuwukengu papinintu i'i si sire, angkung-E, “Putuhungko paka pia-pia kau ara dingang u kaul᷊i u kau ko wal᷊inge. 30Boko manga tuwo e manita ikawua, i kumu matitong himoneu seng masandighi tempo ngu titi. 31Kere e l᷊ai boko i kumu makawua manga hal᷊i e'e mariadi, i kumu sarung matitong humoneu Mawu Ruata seng maehong mamarenta kere Ratu.

32Katitongte! Manga hal᷊i e'e sarung mariadi suhoro apang taumata ko mborong wiahi tempo i'i masue mate. 33L᷊angi dingang u dunia sarung mail᷊ang, arawe didato-Ku tatapi sarang kal᷊iwuenge.”

Mambeng Pudadiaga

34“Diagate badangu, kumbahang sarang i kumu tumaniu musasibungu sal᷊iwang dang manginung inung ko maringga, arako tumaniu mupikiri apang hal᷊i u puwawiahi kumu, hakiu i kumu ta nakasadia su tempo ngu l᷊ou e'e singkawawua nasupu. 35Watu'u l᷊ou e'e sarung sumongo musul᷊ungu seri su kaul᷊i u taumata sowau dunia i'i. 36Pudadiagaete, dang pukal᷊iomaneng sintinia tadeau i kumu matoghasi mupasaruang kaul᷊i u hal᷊i ko sarung mariadi dang i kumu botonge mupasaruang Ahusu Taumata.”

37 # Luk. 19:47 I Yesus su l᷊ou manintiro su Wal᷊e-Ngu Mawu, dang huwi i Sie sumaka sarang Wul᷊uru Zaitun dang natana su se'e. 38Sintinia mal᷊ukari kaul᷊i u taumata sumongo sarang Wal᷊e-Ngu Mawu guna ngu mundaringihi si Yesus manintiro.

선택된 구절:

LUKAS 21: LAISXN

하이라이트

복사