LUKAS 23
23
I Yesus su Tingo ngi Pilatus
(Mat. 27:1-2,11-14; Mrk. 15:1-5; Yoh. 18:28-38)
1Kaul᷊iu musasidang e'e nurumarisi, bou e'e numbawa si Yesus sarang tingo ngi Pilatus. 2Su se'e i sire nanita nangantang si Sie. I sire nangul᷊i, “I kami nakahombang Taumata i'i mupakapal᷊iri ana u wanua. I Sie nanititi taumata tadeau kumbahang mamaehi balasteng su Kaisar, watu'u ware I Sie ko I Kristus, singkatau Ratu.”
3Bou e'e i Pilatus nukina si Yesus, “Tingari I Kau ratu ngu tau Yahudi?”
I Yesus nusumimbahi, “Kere didatongu.”
4Kute i Pilatus nangul᷊i su manga tumbonang u imam dang su taumata ko maul᷊i e'e, “Ia ta nakarea punsasal᷊a sarang simbau su Taumata i'i ko makapuhukung si Sie.”
5Kateho i sire kasaunge mangosa, “Dingang u tintiro-Nge; i Sie naniti taumata su kaul᷊i u Yudea; kahorokange su Galilea, dang su tempo i'i seng nuratingu i'i l᷊ai.”
I Yesus su tingo ngi Herodes
6Su tempo i Pilatus nakaringihi e'e, i sie nukina, “Apa taumata i'i tau Galilea?” 7Suapang i Pilatus nihabareng humoneu I Yesus asal᷊e ko bou tampa ko su l᷊al᷊ung u kawasangi Herodes, i Pilatus nundohongi Yesus sarang koa i Herodes, ko su tempo e'e ene l᷊ai su Yerusalem. 8I Herodes kal᷊iaghe su tempo nakawua si Yesus, watu'u seng mal᷊iwue i sie nakaringihi hal᷊i i Sie dang mo mutuhung si Sie. I sie muharapi botonge makawua si Yesus mukoa ko makal᷊aherang. 9Watu'u e'e i Herodes nukina mul᷊al᷊ahaghi si Sie, kateho I Yesus tanusumimbahi sarang singkodo. 10Manga tumbonang u imam l᷊au manga meteru agama nutumatingo l᷊ai su se'e dang nangantang si Yesus kahingang-hingang. 11I Herodes dingang u manga tataho u sordadonge nuputaghunang dang nuhinakang si Yesus, bou e'e nul᷊oho si Sie l᷊aku u ratu, mbuhue nundoho si Sie sau sarang koa i Pilatus. 12Su l᷊ou e'e l᷊ai i Herodes l᷊au i Pilatus, ko su horou pai muraroka, orase i'i seng sau nughawe.
I Yesus niponesi hukumang papate
(Mat. 27:15-26; Mrk. 15:6-15; Yoh. 18:39–19:16)
13I Pilatus nangomol᷊i manga tumbonang u imam, manga pangaha, dingang u anau wanua, 14bou e'e nangul᷊i si sire, “I kumu numbawa Taumata i'i sarang koa ku dang nangul᷊i ware i Sie mupakapal᷊iri apang taumata. Su tempo i'i su tingo ngi kumu ia seng mbuae namariksa si Sie, kateho ia ta nakarea sarang simbau hal᷊i ko dal᷊ai ko niantang i kumu si Sie. 15Kere e l᷊ai su titong i Herodes, watu'u i sie l᷊ai seng sau nundohongi Yesus sarang koa i kami. Taumata i'i ta nukoa manga apa ko hinong i hukung dingang u hukumang papate. 16Ual᷊ingu e'e ia mul᷊uwaghi si Sie bou e'e mamilo i Sie.”
17[Su sintinia sal᷊iwang u Paskah i Pilatus mambeng mamilo singkatau hukumang guna ngu ana u wanua.] 18Kaul᷊iu taumata ko nukomol᷊i su se'e nukumiha, “Patete i Sie! Piloete i Barabas guna ngi kami!” 19(I Barabas nitaho su tutupang ual᷊ingu numarontaki su tal᷊oara u soa dang ual᷊ingu namate.)
20I Pilatus mo mamilo I Yesus, ual᷊ingu e'e i sie nudidato sau paghisa l᷊ai su taumata ko maul᷊i e'e. 21Kateho i sire nukumiha, “Ghantongte i Sie, Ghantongte i Sie!”
22Bou e'e su katilunge i Pilatus nukumiha si sire, “Kateho apa sal᷊a-Nge? Ia ta nakarea sarang simbau punsasal᷊a-Nge ko mambeng ihukung dingang u hukumang papate! Ia mul᷊uwaghi si Sie, bou e'e mamilo I Sie.”
23Kateho i sire turusi nukumiha nahimbatu uha i sire ko I Yesus mambeng pakighantong. Dang samuringe kiha i sire e nituhukang. 24Kute i Pilatus nunawo hukumang papate si Yesus nutumuhu kaou apang taumata e'e, 25dang namilo u taumata ko nipundokang i sire, taumata ko nitaho su tutupang ual᷊ingu nukoa ghara dang namate. Mbuhue I Yesus nisarakange si sire tadeau balae sire nukoa.
I Yesus nighantong
(Mat. 27:32-44; Mrk. 15:21-32; Yoh. 19:17-27)
26Kute I Yesus niwawa i sire. Su tal᷊oara u l᷊al᷊eng i sire nusombang dingang u singkatau arenge i Simon, ko asal᷊e bou Kirene, kasue su soa. I sie nisame i sire, bou e'e nipaksa ngi sire pamasang salipi e'e su l᷊ikuri Yesus.
27Maul᷊i taumata katuhue nurumal᷊eng sul᷊ikuri Yesus – su tal᷊oarae pia l᷊ai pirangkatau manga kowawine. Manga kowawine e'e kasangie dang kapukahuangi Yesus. 28Arawe I Yesus nuwihu si sire dang nangul᷊i, “Manga wawinengu Yerusalem! Kumbahang sumangiu Ia. Sangie watangengu sisane l᷊au manga ana u. 29Watu'u sarung ruminta temponge taumata sarung mangul᷊i, ‘Wal᷊inge gampang untungu manga kowawine ko mborong ta nakapundang numbawa kal᷊uwaeng, ko mborong takoae ana, dang mborong ta nupasusungu ana!’ 30#Hos. 10:8; Kl᷊h. 6:16Su tempo e'e taumata sarung mangul᷊i su manga wul᷊ure, ‘Ntungete i kami!’ Dingangu su manga bongkonge, ‘Ambungte i kami!’ 31Watu'u boko su kau ko wiahi, taumata seng mukoa keri'i, apa l᷊ai ko sarung koateng i sire su kau ko seng nahango!”
32Pia l᷊ai duang katau kowal᷊inge–i sire rua kaul᷊ie tahapukoa ko dal᷊ai ko niwawa i sire tadeau ihukung pateng singkahindo dingang I Yesus. 33Suapang nuratingu tampa ko i susigho “Rarangu Timbo”, i sire nunggantong I Yesus l᷊au i sire rua ko tahapukoa ko dal᷊ai e'e-singkatau su kuaneng dang singkatau l᷊ai su kuihingi Yesus. 34#Mzm. 22:19Bou e'e I Yesus nukal᷊iomaneng, “I Yamang, ampungeko i sire! I sire wugha apang ko nikoa i sire.”
Pakeang I Yesus ni pupapahia i sire su se'e su tal᷊oara i sire dingang u undi.#23:34: Su l᷊al᷊ung u pirambau wohe takoae ayeti 34. 35#Mzm. 22:8Manga taumata ko kararisi su se'e apiru kapuwiange, tintal᷊a manga pangahau tau Yahudi kapuheghese si Yesus dingang nangul᷊i, “I Sie seng nanal᷊amati taumata kowal᷊inge; kenangte su orasi'i i Sie panal᷊amati watangenge si sane, boko i Sie tingari-tingari Ratu Mananal᷊amati ko nipilengu Mawu Ruata!”
36 #
Mzm. 69:22
Manga sordado l᷊ai kapuheghese si Sie. I sire nusumongo dang nangonggo anggori ko mahingisi si Sie. 37Apiru nangul᷊i, “Boko i Kau ratungu tau Yahudi, panal᷊amate watangeng-Ngu!”
38Su wawou salipi Yesus pia wisara i'i kawawohe: “Ko i'i Ratu ngu Tau Yahudi.”
39Singkatau taumata ko dal᷊ai ko maghaghantong su se'e nuhinakang si Yesus. I sie nangul᷊i, “I Kau aru Ratu Mananal᷊amati? Ho, panal᷊amate watangeng-U dingang i kami!”
40Arawe tau ko dal᷊ai simbau nanogori ghawenge e'e, dingang nangul᷊i, “I kau ta mataku u Mawu Ruata? I kau ihukung mate singkahukung kere i Sie. 41Kitangu hukumang si karua nukita dingang u kakanoa i karua. Arawe i Sie tinga-tingari takoa e sal᷊ange!” 42Bou e'e i sie nangul᷊i, “Yesus tinaunge we ia, boko i Kau ruminta kere Ratu!”
43“Pangimangte,” angkungi Yesus si sie, “su silou i'i i kau sarung ene dingang-Ku su Firdaus.”
Papate-Ngi Yesus
(Mat. 27:45-56; Mrk. 15:33-41; Yoh. 19:28-30)
44Patehang manga pukul᷊i mapul᷊o dua kal᷊ihae, matangutiti tanu suminang, dang kaul᷊i u soa e'e narundung sarang pukul᷊i tatilu wawul᷊aeng. 45#Kel. 26:31-33Pampele maghaghantong su l᷊al᷊ung u Wal᷊e-Ngu Mawu, natingkasi nakoa rarua. 46#Mzm. 31:6Bou e'e I Yesus nukumiha mauha, “I Yamang! Su l᷊al᷊ungu l᷊ima-Ngu Ia manakarangu watangeng-Ku!” Suapang mbuae nangul᷊i kere'e, i Sie namal᷊usi sasinda-E.
47Su tempo parawirangu pasukang nakawua apa ko seng nariadi, i sie nundalo Mawu Ruata. Bou e'e i sie nangul᷊i, “Mang tingari i Sie tanunsal᷊a!”
48Taumata maul᷊i ko nusumongo su se'e tadeau muwia, nakawua apa ko nariadi. I sire kaul᷊ie napul᷊e dingang u naung napene u pusasili. 49#Luk. 8:2-3Dang kaul᷊i u apang taumata ko matitong I Yesus, dingang u manga kowawine ko nutumuhu si Sie bou Galilea, kararisi bou raunge dang nakawua kaul᷊i e'e.
Pul᷊al᷊uwingi Yesus
(Mat. 27:57-61; Mrk. 15:42-47; Yoh. 19:38-42)
50-51Pia tau singkatau arenge i Yusuf, asal᷊e bou soa ngu Arimatea, su tana Yudea. I sie singkatau ko mapia ko l᷊uadateng u taumata, dang ko kapangampal᷊e temponge Mawu Ruata manita mamarenta kere Ratu. Maning i sie tataho u Pangadilangu Agama, i sie tamasanang dingang u ponesi dang kakanoa u mahkama e'e. 52I Yusuf i'i natamai nupasaruang si Pilatus dang nundo tadeau badang I Yesus pakisarakang si sie. 53Bou e'e i sie nupal᷊intu u badang I Yesus bou kau salipi, mbuhue nipikungu sapu bou heka leneng. Nasue e'e nipiloe su l᷊al᷊ung u kubul᷊i ko nikoa su l᷊iangu wul᷊uru watu – kubul᷊i e'e mborong ta nipake. 54L᷊ou e'e natarang l᷊ou kol᷊imange; dang l᷊oungu Sabati masandighi manita.
55Manga kowawine ko nusumongo dingang I Yesus bou Galilea nutumuhu si Yusuf dang nakawua kubul᷊i e'e. I sire nakawua l᷊ai kirapa badang I Yesus nipilo su l᷊al᷊ung u kubul᷊i e'e. 56#Kel. 20:10; Ul. 5:14Bou e'e i sire napul᷊e mbuhue nanadia manga rampa dingang u l᷊anisi guna ngu pul᷊ana badang I Yesus.
Su l᷊oungu Sabati, i sire nangiro nuhal᷊i guna ngu mangadati atorang u agama.
2014 Indonesian Bible Society (Lembaga Alkitab Indonesia)
