YOHANES 4
4
I Yesus dingang u kowawine bou Samaria.
1Manga taumata ngu Farisi nakaringihi himoneu I Yesus nakarea dang nanahani lebe maul᷊i tumatuhu bou i Yohanes. 2(Suhinonge I Yesus si sane ta nanahani kateho kitangu manga tumatuhu-E.) 3Su tempo I Yesus nakatitong humoneu apang tau Farisi seng nakaringihi hal᷊i e'e, I sie natamai bou Yudea nusul᷊e sarang Galilea. 4Su l᷊al᷊ung u raral᷊eng-E e'e I Sie mambeng l᷊umiu Samaria. 5#Kej. 33:19; Yos. 24:32Kute I Yesus nurating u soa simbau su Samaria arenge Sikhar, masandighu wanua ko l᷊inau nionggo i Yakub su anae i Yusuf. 6Se'e pia pahighi ngi Yakub. I Yesus tumaniu nawau watu l᷊al᷊al᷊eng, ual᷊ingu e'e I Sie nu kumangiang su wiwihu pahighi. Tempo e'e patehang manga pukul᷊i mapul᷊o dua kal᷊ihae, 7-8dang manga tumatuhu I Yesus seng nakoa sarang soa mul᷊uang kang. Bou e'e pia singkatau ko wawinengu Samaria nusumongo nanimba ake. I Yesus nangul᷊i si sie, “Ma, botonge Ia mundo manginung?”
9 #
Ezr. 4:1-5; Neh. 4:1-2 Kowawine Samaria e'e nusumimbahi, “I Tuang taumata ngu Yahudi, ia tau Samaria; nakurawe I Tuang mundo inung si sia?” (Watu'u manga taumata ngu Yahudi takoae wuhie dingang tau Samaria.)#4:9 manga tau Yahudi takoae wuhie dingang u tau Samaria: arako tau Yahudi mandi mupake wohosi ko nipake u tau Samaria.
10I Yesus nusumimbahi, “Kiko i kau matitong u l᷊aonggo u Mawu Ruata dingang matitong ko isai kapundoe inung si kau, i kau sisane sarung mundo inung si Sie, dang I Sie sarung mangonggo ake u wiahi si kau.”
11Angkungu tau wawine e'e, “I Tuang takoae tatimba, dang pahighi i'i mal᷊al᷊ung kahingang. Bou apa i Tuang makarea ake wiahi? 12I Yakub i iupung i kami, nangonggo pahighi i'i si kami#4:12 i kami: arako i kite. I sie sisane mangal᷊a ake inunge bou i'i; kere l᷊ai manga anae dang manga binatang pal᷊iharange. Apa sunaung I Tuang I Tuang ko lebe l᷊abo bou i Yakub?”
13I Yesus nangul᷊i, “Taumata ko manginung ake i'i sarung sau marou, 14arawe taumata ko manginung ake ko sarung Daku i onggo, i sie seng ta sarung marou sarang kal᷊iwuenge. Watu'u ake ko sarung Daku i onggo e'e sarung makoa matan gu ake su l᷊al᷊ung u puwawiahe ko mamusi sumuwang dang mangonggo si sie puwuwahi kahingang dang kakal.”
15Tau kowawine e'e nangul᷊i, “Tuang, onggol᷊e ko ia ake e'e, tadeau ia l᷊ai seng ta marou; dang seng ta musul᷊e sau mangal᷊a ake sarang i'i.”
16I Yesus nangul᷊i, “Dakoe, kuie kawingu, bou e'e mai pusul᷊e sarang i'i.”
17Tau kowawine e nusumimbahi, “Ia takoae kawingku.”
“Mang tingari ridato ngu,” angkung I Yesus. 18“Watu i kau seng paka l᷊ima nukawing, dang koese ko nural᷊ahiking dingang u su orasi i'i wal᷊inge kawingu.”
19Tau kowawine e'e nangul᷊i, “Su orasi i'i ia matitong I Tuang singkatau nabi.” 20“Iupung i kami manumba Mawu Ruata su wul᷊uri i'i, arawe bangsa-Ngi Tuang nangul᷊i himoneu ko kitang su Yerusalem tampa u taumata manumba su Mawu Ruata.”
21I Yesus nangul᷊i si sie, “pangimangte”, paghisa tempo nge taumata sarung manumba si Yamang, wal᷊inge su wul᷊uri i'i dang wal᷊inge l᷊ai su Yerusalem. 22I kumu manga tau Samaria manumbah apang ko ta nikatitonang i kumu, arawe i kami tau Yahudi manumbah si Sie ko nikatitonang i kami, watu'u kasasal᷊amati nusumongo bou taumata ngu Yahudi. 23Kateho temponge sarung sumongo, dang seng nusumongo, himoneu dingang u kawasa ngu roh u Mawu Ruata kaul᷊iu taumata sarung manumba si Yamang musul᷊ungu Mawu Ruata ko tingari kere ko nikao i Yamang. 24Watu'u Mawu Ruata e'e ko Roh, dang kitang dingang u kawasa ngu Roh u Mawu Ruata manga taumata makapanumba si Yamang kerewe i Sie ene.
25Tau kowawine e'e nangul᷊i si Yesus, “Ia matitong Ratu Mananal᷊amati (ko nisigho si Kristus) sarung sumongo. Boko I Sie sumongo, I Sie sarung muhabari patiku si kite.”
26Angkung I Yesus, “Ko Ia I Sie. Ia ko su orasi i'i kapudatonge dingang u.”
27Su tempo e'e manga tumatuhu I Yesus nusul᷊e. I sire naherang nakawua si Yesus kapudidatonge dingang u tau kowawine singkatau. Kateho takoae sarang singkatau bou i sire ko nukina su tau kowawine e'e, “Mama apa kao u?” arako nu kina si Yesus, “Nakurawe I Tuang kapudidatonge dingang u tau kowawine e'e?”
28Kuteu kowawine e'e nanintang u bunsari e su se'e, wuhue nutumal᷊ang sarang soa dingang u nuhabari su manga taumata pai se'e, 29“Maite putuhung taumata ko seng nuhabari si sia kaul᷊iu apang ko seng daku nikoa. Apa seng I Sie e'e Ratu Mananal᷊amati?” 30Kute manga taumata e'e l᷊ai nanintang soa, wuhue natamai nakoa sarang koa I Yesus.
31Tatal᷊a e'e manga tumatuhu-E nuhawu si Yesus kumang. I sire nangul᷊i, “Tuang Guru sal᷊amati kumang.”
32Kateho I Yesus nusimimbahi, “Si Sia pia kang, ko ta nikatitonang i kumu.”
33Kuteu manga tumatuhu-E nanita nukakina, “Apa pia taumata numbawa kang-E?”
34Bou e'e I Yesus nangul᷊i, “Kang-Ku e'e ko tumuhu kao I Sie ko nundoi u Ia, dang nanginsue hal᷊i ko nisarakang-E si Sia. 35I kumu nangul᷊i. ‘Kate pau wul᷊ang tempo ngu manipo.’ Kateho Ia nangul᷊i si kumu: Tuhungete manga anseri ko seng naririhi, seng tempo nge i tipo! 36Taumata ko manipo seng manita manarima u wawaehe dang kapangomol᷊e wuange guna ngu puwawiahi kahingang dang kakal. Kuteu taumata ko nusuang dingang u ko manipo seng kaul᷊ie botonge mahul᷊iaghi singkahindo. 37Papinintu i'i nuhino l᷊ai, ‘Singkatau nusuang, ko wal᷊inge manipo.’ 38Ia nundoi si kumu tarai panipo sarang awuhi ko tanihal᷊ikang i kumu; taumata kowal᷊inge seng nuhal᷊i darase e dang i kumu manarima u l᷊uange bou hal᷊i i sire.”
39Maul᷊i tau Samaria tataho u soa e'e mangimang si Yesus, watu'u tau kowawine e'e nangul᷊i, “I Sie nuhabari si sia kaul᷊iu apang ko seng daku nikoa.” 40Kuteu suapang manga tau Samaria e'e nusuma I Yesus, i sire nundo singapang botonge tadeau I Sie matana dingang i sire. Inau I Yesus natana dua l᷊ou kal᷊iwuenge su se'e.
41Bou e'e borong natamba nangilembo maul᷊i l᷊ai taumata mangimang si Yesus ual᷊ing apang ko nitintirong-E si sane si sire. 42I sire nangul᷊i su tau kowawine e'e, “I kami mangimang su orasi i'i, wal᷊inge we l᷊ai ual᷊ingu apang ko niul᷊i u si kami, kateho ual᷊ingu i kami sisane seng nakaringihi si Sie, dang natitong himoneu I Sie mang tingari mananal᷊amatu dunia.”
I Yesus nupakaul᷊engu ana u mul᷊ahal᷊i su istana
43Nal᷊iu dua l᷊ou bou natana su Sikhar, I Yesus natamai sarang Galilea. 44#Mat. 13:57; Mrk. 6:4; Luk. 4:24I Yesus si sane seng bou nangul᷊i, “Singkatau nabi ta adateng su wanuange si sane.” 45#Yoh. 2:23Kateho su tempo I Sie nurating u Galilea, apang taumata pai se'e kaul᷊ie mal᷊uasi nanarima I Sie, watu'u su sal᷊iwang L᷊ou ngu Paskah i sire ene su Yerusalem, dang seng nakawua kaul᷊iu apang ko nikoa I Yesus.
46 #
Yoh. 2:1-11
Bou e'e I Yesus nusul᷊e sarang Kana su Galilea, pia pai se'e I Sie mbuae numal᷊u ake nakoa anggori. Su soa e'e pia singkatau mul᷊ahal᷊i supamarenta, ko pia ana e'e masaki su Kapernaum. 47Su apang i sie nakaringihi humoneu I Yesus seng nusumongo su Galilea bou Yudea, i sie natamai sarang koa I Yesus dang nundo si Yesus patamai sarang Kapernaum tadeau pupakaul᷊engu anae seng masandighi mate. 48I Yesus nangul᷊i su mul᷊ahal᷊i supamarenta e'e, “Manga i kumu ta nakawua kaul᷊iu tatia ko makal᷊aherang, i kumu ta mangimang.”
49Tau e'e nusumimbahi, “Tuang kaehong tamai su horo u ana ku mate.”
50I Yesus nangul᷊i si sie, “Dakoe tamai ana u seng naul᷊e.”
Tau e'e nangimang didato-Ngi Yesus, bou e'e i sie natamai. 51Sural᷊eng manga paparentange nasongo sarang koa-E dingang nuhabari, “Ana i Tuang seng naul᷊e.”
52Bou e'e I Sie nukina si sire pukul᷊i pira ana e'e naul᷊e. Angkung i sire, “Kahuwi patehang manga pukul᷊i simbau kal᷊ihae nailang l᷊ahange.” 53Wuhue iamangu ana e'e nakatinaung himoneu su tempo e'e I Yesus nangul᷊i si sie, “Ana u seng naul᷊e.” Kuteu i sie l᷊au manga ghe e nangimang si Yesus.
54E'e ko makal᷊aherang karuange nikoa I Yesus su Galilea suapangu I Sie nusumongo bou Yudea.
2014 Indonesian Bible Society (Lembaga Alkitab Indonesia)
