YOHANES 3
3
I Yesus dingang i Nikodemus
1Pia singkatau tumbonang u agama bou tal᷊oara u tau Farisi arenge i Nikodemus. 2Pia sihuwi i sie nusumongo sarang koa I Yesus dang nangul᷊i, “Tuang Guru i kami matitong I Tuang niroi u Mawu Ruata. Watu'u takoae sarang singkatau ko makakoa ko makal᷊aherang kere ko nikoa I Tuang, boko Mawu Ruata ta muhindangang i sie.”
3Yesus nusumimbahi, “Pangimangte takoae sarang manga singkatau ko makoa umat u Mawu Ruata, boko i sie ta sau ipahinding.”#3:3: sau ipahinding: arako bou rasie.
4Angkung i Nikodemus si Yesus “Seng tumaniu taumata seng matilang sau ipahinding? Apa botonge i sie sau sumu su kal᷊uwaeng i mamange dang sau ipahinding?”
5I Yesus nusumimbahi, “Mambeng tingari didato-Ku i'i: boko taumata ta sau i pahinding bou ake dingang bou Roh u Mawu Ruata, taumata e'e ta makoa umat u Mawu Ruata. 6Taumata ituhu bandange nipahinding bou taumata maghurang, arawe ituhu su roh i sie nipahinding bou Roh u Mawu Ruata. 7Ariwe kaherang boko ia mangul᷊i: I kumu kaul᷊ie mambeng sau ipahinding.#3:7: sau ipahinding: arako bou rasie. 8Anging tumiu sarang apa koae; i kite mangaringihi ruhunge. Arawe i kite wugha bou apa nutumiu dang sarang apa tumiu kere l᷊ai taumata ko nipahinding bou Roh u Mawu Ruata.”
9I Nikodemus nukina, “Kirapa hal᷊i e'e botonge mariadi?”
10I Yesus nusumimbahi. “I kau meteri su Israel; tumaniu ikau wugha? 11Pangimangte: i kami kitang mudidato ngu hal᷊i ko nikatitonang i kami, dang i kami mangonggo u kasaksiang u hal᷊i ko seng nikawuang i kami; kateho i kumu mandiri manarima u kasaksiang i kami. 12I kumu ta mangimang, boko ia muwuke si kumu manga hal᷊i u dunia i'i; Kirapa we i kumu mangimang boko ia muwukengu manga hal᷊i u sorga si kumu? 13Ta koe sarang singkatau ko seng mbuae naawi su sorga, sul᷊ikuri I Sie ko Ahusu Taumata ko seng nul᷊umintu sarang dunia.
14 #
Bil. 21:9
Musul᷊ung i Musa nundui katoang witu su kau simpoto su tana linggi. Kere l᷊ai Ahusu Taumata mambeng i rui, 15tadeau apang taumata ko mangimang si Sie makahombang putatumbiahi kahingang dang kakal.”
16Ual᷊ingu Mawu Ruata kere'e nukumindaghi u taumata su dunia i'i, hakiu I Sie nunggile u Ahus-E mang simbau, tadeau apang taumata ko mangimang si Sie ta mawinasa, kateho makahombang puwawiahi kahingang dang kakal. 17Watu u Mawu Ruata nundoho Ahus-E wal᷊inge tadeau puhukungu dunia i'i, kateho tadeau manal᷊amati dunia i'i. 18Taumata ko mangimang si Sie ta ihukung. Arawe taumata ko ta mangimang seng nihukung u Mawu Ruata, watu'u i sie ta mangimang su Ahusu u Mawu Ruata ko mang simabu. 19I Sie nituntukang ual᷊ingu hal᷊i i'i: kasasua e'e seng nusumongo su dunia, kateho taumata nangilembo mo u kararundung bou kasasua, watu u kakanoa i sire ko dal᷊ai. 20Apang taumata ko mukoa ko dal᷊ai, mubinsi kasasua; i sie mandiri sumongo su kasasua tadeau kumbahang kakanoae ko dal᷊ai e'e i kawua. 21Arawe taumata ko mukoa kao u Mawu Ruata; sumongo sarang kasasua tadeau mal᷊ahe himoneu apang ko nikoae e'e nutumuhu su kao u Mawu Ruata.
I Yesus l᷊au i Yohanes Mananahani
22Bou e'e I Yesus l᷊au manga Tumatuhu-E tamai sarang Yudea. Pai se'e i sie natana pirang katempo dingang i sire dang nanahani taumata. 23-24#Mat. 14:3; Mrk. 6:17; Luk. 3:19-20Su tempo e'e i Yohanes borong tana taho su tutupang. I sie nanahani su Ainon, masandighu Salim, watu'u pai se'e maul᷊i ake. Manga taumata nusumongo si sie, dang i sie nanahani si sire.
25Pirang katau tumatuhu i Yohanes seng nanita nurarendehi dingang u tau Yahudi#3:25 tau Yahudi: pirambau wohe horo nangul᷊i singkatau tau Yahudi hal᷊i u atorang u kababursi. 26I sire tamai nakoa sarang koa i Yohanes, dang nangul᷊i, “Tuang Guru, apa I Tuang borong makatinaung taumata ko l᷊inau dingang I Tuang susimbukangu sal᷊uhu Yordan e'e, ko nitibo I Tuang kangereng si kami? Orasi i'i i sie l᷊ai nanahani dang apangu taumata kaul᷊ie tamai makoa sarang koa-E!”
27I Yohanes nusumimbahi, “Taumata ta makarea manga apa boko i sie ta onggol᷊ang u Mawu Ruata. 28#Yoh. 1:20I kumu sisane seng nakaringihi si sia nangul᷊i, ‘Ia wal᷊inge Ratu Mananal᷊amati. Ia niroi pangihoro si Sie.’ 29Boroiti e'e ko koa ipardegong. Gawe ngu pardegong e'e kitang dumarisi manundughi dingang mundaringihi, dang i sie l᷊umiaghi boko makaringihi tingihiu pardegong. Kere l᷊ai ia. Su orasi i'i ia mal᷊uasi kahingang. 30Ko i sie mambeng ipangilebe, dang ia seng kaghaghahinge.”
I Sie ko nusumongo bou sorga
31Ko nusumongo bou rasi nangilebe bou kaul᷊ie. Ko nusumongo bou dunia nataho taumata ngu dunia, dang mudidato ngu manga hal᷊i u dunia. I Sie ko nusumongo bou rasi nangilebe bou kaul᷊ie. 32I Sie mudidato ngu apang ko seng nikawua dang nikaringih-E, kateho takoae sarang singkatau mangimang su kasaksiang-E. 33Taumata ko mangimang su kasaksiang-E e'e nangaku humoneu Mawu Ruata ko tingari. 34Watu u taumata ko niroi u Mawu Ruata muhabari u apang didato Mawu Ruata, watu'u Roh u Mawu Ruata nasuku nionggo si Sie. 35#Mat. 11:27; Luk. 10:22I Yamang kumindaghiu Ahus-E, dang seng nanarakangu kaul᷊iu Kawasa si Sie. 36Taumata ko mangimang su Ahusi e'e sarung makahombang puwawiahi kahingang dang kakal. Arawe taumata ko ta tuhu su Ahusi e'e ta makahombang puwawiahi. I sie sarung ihuku ngu Mawu Ruata sarang kal᷊iwuenge.
2014 Indonesian Bible Society (Lembaga Alkitab Indonesia)
