YOHANES 2
2
Sal᷊iwang u Kawing su Kana
1Dua l᷊ou bou e'e pia sal᷊iwangu kawing su soa ngu Kana su Galilea, dang mama-Ngi Yesus ene pai se'e. 2I Yesus dingang u manga Tumatuhu-E ninoti l᷊ai sarang sal᷊iwang e'e. 3Su tempo ngu anggori seng nasue, i mama-Nge nangul᷊i si Yesus, “I sire nikasuengu anggori.”
4I Yesus nusumimbahi, “Mama, kumbahang mu parenta si Sia. Borong ta nurating u temponge Ia mupakal᷊ahe u watangeng-Ku.”
5Kateho mama-Ngi Yesus nangul᷊i su manga koki, “Koa ko apang ko iul᷊i-E si kumu.”
6Su se'e pia bunsari nung ko nisadia tampa u ake guna ngu l᷊auhasi tumuhu adati u tau Yahudi. Tatahou bunsari simbau e'e patehang manga mahasu su litere. 7I Yesus nangul᷊i su manga koki e'e, “Tahoneko ake apang bunsari e'e.” Bunsari e'e kaul᷊i nitahonangi sire nipakapene. 8Wuhue I Yesus nangul᷊i si sire, “Pangal᷊ako ake e'e singkodo wawa sarang tumbonang u sal᷊iwang,” I sire numbawa ake e'e sarang tumbonang u sal᷊iwang, 9dang tumbonang e'e nanemang ake ko seng nuwal᷊u nakoa anggori. (I sie wugha minsang anggori e'e bou apa, kitang sire koki ko nutaho u ake e'e matitong.) Kute tumbonang sal᷊iwang e'e nusumandighi su pardegong koese, 10wuhue nangul᷊i si sie, “Biasange taumata manadia ngu anggori ko kapiange horo dang hindo apang manga sake seng masahe manginung, wuhuewe pilonangu anggori biasa. Arawe i'i ikau nundeso u anggori ko kapiange sarang silou i'i!”
11E'e ko makal᷊aherang kahimotongange nikoa I Yesus. E'e nikoa-E su Kana su Galilea. Dingang u tatia e'e I Sie nanode u kawawantughi-E. Kuteu manga tumatuhu-E nangimang si Sie.
12 #
Mat. 4:13
Bou e'e I Yesus tamai nakoa sarang Kapernaum singkahindo dingang i mamang-E, dingang i manga-Nge, manga ana u simbau-E l᷊au manga tumatuhu-E. Pai se i sire natana manga pira l᷊ou l᷊iwuenge.
I Yesus nusumu su Wal᷊e-Ngu Mawu
(Mat. 21:12-13; Mrk. 11:15-17; Luk. 19:45-46)
13 #
Kel. 12:1-27
Su tempo seng masandighu L᷊ou ngu Paskah tau Yahudi, I Yesus nakoa sarang Yerusalem. 14Su Wal᷊e-Ngu Mawu su Yerusalem I Sie nakarea manga muwal᷊u u sapi, domba, dang manga paluma; dang l᷊ai apang mananukari doi kakangiang se'e. 15I Yesus nukoa samboki tal᷊i simbua bou e'e nanguseri apang binatang e'e, maeng domba dingang u sapi, bou l᷊al᷊ung u Wal᷊e-Ngu Mawu. Manga meda ngu mananukari doi nasue niwal᷊intuing-E hakiu manga doi ngi sire nukaesi tamai-mai. 16Wuhue I Sie nangul᷊i sumanga muwawal᷊u paluma, “Hengke kaul᷊ie bou i'i. Kumbahang wal᷊e-Ngi Yamang-Ku koateng tampa u pundaganeng!” 17#Mzm. 69:10Inau manga tumatuhu-E nakatinaung nasi su Buki Susi i'i, “Kakindaghi-Ku su Wal᷊e-Ngu, o Mawu Ruata, nakasahoka naung-Ku.”
18Manga Mawu mangangawasa ngu tau Yahudi nundoka si Yesus, angkungi sire, “Kenangko pukoa ko makal᷊aherang, mariadi kere tatia si kami himoneu i Kau pia haki mukoa kere i'i.”
19 #
Mat. 26:61, 27:40; Mrk. 14:58, 15:29 I Yesus nusumimbahi, “Akaopehi wal᷊e i'i dang su l᷊al᷊ungu til᷊u l᷊ou sarung sau Daku i pararisi.”
20Bou e'e i sire nangul᷊i, “Pau pul᷊o nung su taunge nupararisi u Wal᷊e-Ngu Mawu i'i. Dang i Kau sau nupararisi su l᷊al᷊ungu tilu l᷊ou?”
21Kateho pandungu Wal᷊e-Ngu Mawu ko ihabari I Yesus e'e ko Badang-E sisane 22I nau samuringe, I Yesus nipuwangung bou papate, manga tumatuhu-E nakatinaungte hal᷊i e'e ko seng bou l᷊inau nihabari-E. Kute i sire nangimang su apang ko mawawohe su l᷊al᷊ungu Buki Susi dang su apang ko niul᷊i I Yesus.
I Yesus matitong u apang taumata
23Tintal᷊a I Yesus su Yerusalem tempo e'e pia Putatinaungangu Paskah, maul᷊i taumata nangimang si Sie ual᷊ingu manga ko makal᷊aherang nikoa-E 24kateho I Yesus sisane ta nangimang si sire, watu'u I Sie matitong kakanoa u apang taumata. 25Tawahal᷊uasi u taumata manintiro si Sie bou hal᷊i isai-sai, watu'u I Sie seng matitong u apang ko su l᷊al᷊ung u naung u taumata.
2014 Indonesian Bible Society (Lembaga Alkitab Indonesia)
