Luka 8
8
1Inyima wa yaga hakekeke, ya gendagenda rmu madala nomu tudala, ni yilwadza na a leta amakuva malahi gobwami bwa Nyasaye, kandi ava li likumi na vaviri va li halala naye, 2kandi avakali valala ava honnywa roho midamano netsinkudzo: navo ni Maria wa langwa Magdalene, wamademone ga twula kuye gatanu na gaviri, 3na Yoana mukali wa Chuza wa li mulindi wobutugi bwa Herodi, na Susana, navandi vanyingi, ava mu tumekira nevindu vyavo.
4Kiduma kinene lwa kya vugana, navamadala gosi va tsia kuye, ya va kupa lugano: 5Mumidzi ya tsia kumidza bugutsa bwibwe: kandi lwa ya midza, bulala bwa gwa ku inzirani bu duvugwa, namanyonyi gegulu ga bu vodza. 6Nobundi bwa gwa ku lwanda; lwa bwa mera nonoho bwuma, kigira si bwa li ha bukindu. 7Nobundi bwa gwa mu maiwa; na mafwa ga viruka halala nabwo, ni ga bu kunika. 8Nobundi bwa gwa mu marova malahi, ni bu mera, ni bwama sa lulala hali mia. Lwa ya vola vindu yivi ya hanzuka, na a vola, U veye na matu gokuhulira, a hulire.
9Navegidzwi veve va mu teva, Ni lugano ki yilu? 10Ya vola, Mwinye mu hebeywi kumanya aga viswa gobwami bwa Nyasaye: navutswa avandi va kupangwa tsing'ano; lihenza va henza va ta lola, kandi lihulira va hulira va ta manya. 11Yaga ne megidzo golugano: Ubugutsa ni likuva lya Nyasaye. 12Avoku inzira navo ava hulira; ma Setani yadza kutwulidza likuva zana mu myoyo gyavo, gase va la suuvira va hone. 13Navo va veye ku lwanda nava, lwa va hulira va bugirira likuva nobuyanzi; navutswa si va li nemiri, ava suuvira hakekeke, navutswa inyinga yeligeridzwa va twula. 14Nabwo bwa gwa mu mafwa, nava ava hulira, navutswa lwa va genda ku inzira yavo, amadidikano, nobutugi, nelikayirwa lye liva mwoyo lya ka lunu, vi va miga si va komelidza kindu. 15Nobwo mu marova malahi, nava lwa va hulira makuva, va ga gumira nomwoyo mulahi kandi mudoto, vama liama nobwikudziri.
16Si ha li nomundu lwa a hambidza itaya a gi kunikira nekihinda, kinga a gi vika mu lwalo lwekitali; navutswa a gi vika ku imeza, avingira va duke kulola ubulavu 17Kigira si ha veye nekindu kya viswa ki li vula kulang'aminywa; kandi si ha li nekyaviswa ki li vula kumanyekana nokuloleka habulavu. 18Kigira yaga mwilinde kuli mu hulira: kigira u veve nakyo, a la hebwa; no ta veye nakyo, a la nyagwa kya a ganagana a veye nakyo.
19Mama wewe navamwavo veve vadza kuye, navutswa si va nyala kuduka kuye ligali kigira kiduma. 20Ya volerwa, Mama wowo navamwavo vovo va singiye kyova venya kukulola. 21Navutswa ya tivula na a va volera, Mama wange navamwavyo vange ni yava ava hulira likuva lya Nyasaye, ni va li kola.
22Lidiku lilala ku yaga ya nina mu bwato, mwene navegidzwi veve; na a va volera, Kwambuke inyanza: ni va tsia. 23Navutswa lwa va li ni va tsitsa ya gona tsindolo: kandi kihuudzudzi kika ku inyanza; ne liato lyenya kwizula amadzi, va li mu buhimwa. 24Ni va tsia kuye Di va mu vukidza, ni va vola, Mwami, Mwami, ku veye mu budivi. Ya vuka na a gaya kihuudzudzi, nevi guvuii vya madzi: vya hera, gwa li mubng'eera linene. 25Kandi ya va volera, Lisuuvira lyenyu li veye ha li ha? Va tia, ni va genya, ni va volerana, Ibwaha uyu, a loga kali kihuudzudzi nenyanza, na vi mu hulira?
26Kandi va duka mu kivala kya Vagadara, ki henza Galilaya. 27Lwa va mala kwika ku luginga, mundu mulala welidala yilyo ya vugana naye, wa li namademone; kandi u tivika tsingubo madiku manyingi, kandi si ya menya mu inyumba, navutswa mu vilindwa. 28Kandi lwa ya lola Yesu, ya hanzuka, na a gwa imbiri wewe, na a vola nomwoyo munene, Mbeye na ki nive Yesu, Mwana wa Nyasaye Uveye Igulu Ligali? Nku saala u ta nkupidza kivi mba. 29Kigira y a li na a heve roho mudamano munwa kutwula ku mundu uyu. Kigira madiku manyingi gwa li ni gu mu gumira: naye ya lindwa na a bofwa neminyororo nevivya; navu tswa ya kalanya vya a boherwa, na lidemone lya mu kunga ni li mu hila mwigendanyama. 30Yesu ya mu teva, Lieta lilyo ni bwaha? Naye ya vola, Legiona; kigira amademone manyingi ga li muye. 31Nago ga mu saala, a ta ga laga kutsia mu bogo. 32Ha zana ha li nekyayo kyetsimpidzi tsyaya mu kigulu: ni ga mu saala a ga laga kwingira mutsyo. Na a ga ha munwa. 33Namademone ga twula ku mundu ni gingira mu tsimpidzi: kandi kyayo kyosi kya sulunguta tsimbiru kukisulungutu kuduka munyanza, ni tsi kudzira mu madzi. 34Avayi lwa va lola vindu vya kolwa, viruka ni va tsia kuvola mu lidala nomu kivala. 35Va twula ni va tsia kulola vya kolwa; ni va duka ku Yesu, ni va lola mundu wamademone ga twula kuye, ni yiviki tsingubo, kandi a veye nobugeeri bwibwe, ni yikaye ha virenge vya Yesu: ni va tia. 36Navo ava lola va va volera kuli wa li namarlemone ya honnywa. 37Avandu vosi avevivala vya himbi vya Vagadara va mu saala a twule kuvo: kigira va gumirwa nobutii bunene: naye yingira mu bwato ni yirana. 38Navutswa mundu wamademone ga twula kuye ya mu saala a menye naye: navutswa ya mu tuma, na a vola, 39Wirane iwowo, kandi wilwadze vindu vinene ndi vya Nyasaye a ku koleye. Naye ya tsia ni yilwadza mu lidala lyosi, vindu vinene ndi vya Yesu ya mu kolera. 40Yesu lwa yirana, kiduma kya mwaganira nobuyanzi; kigira vosi va li ni va mu lindirira. 41Kandi, henza, mundu mulala munene weli vugana wa langwa Jairu, yadza kuye na a gwa ha virenge vya Yesu, na a mu saala kwingira mu inyumba yeye; 42kigira ya li nomwana mukana muderwa, ya li nemihiga gyenya kuduka likumi na gyiviri, naye yenya kukinda. Navutswa lwa ya tsia, viduma vya yumba kuye. 43Kandi mukali wa lwala na a tadza masahi imihiga likumi na gyiviri, ya malira avetsinyasi vindu vivye vyosi, navutswa kali mulala si ya nyala kumuhonnya, 44ya tsia kuye ha inyima na a dira ku lukigiti lwengubo yeye: na nonoho litadza lilye lya kalidzira. 45Yesu ya vola, Ibwaha u ndira? Lwa vambakana vosi, Petro navakye va vola, Mwami, viduma vi yumbi ku ive ni vi ku mina. 46Navutswa Yesu ya vola, Ha veye nomundu u ndiye; kigira nzelola tsingulu tsi twuli ku inze. 47Mukali lwa ya lola si ya nyala kwivisa, yadza na a degera, na a gwa hasi imbiri wewe na a vola imbiri wavandu vosi kya ya mu dirira, kandi kuli ya honnywa bwangu. 48Naye ya mu volera, Mkana wange, lisuuvira lilyo li ku honnyi; u tsie nemirembe.
49Na a ki vola, mundu womunene welivugana yadza, na a vola, Mukana wowo u kudzi; u ta nyangidza Mwegidzi. 50Navutswa Yesu ya hulira na a mu tivulira, U ta tia: u suuvire vutswa, kandi a la honnywa. 51Lwa ya duka ha inyumba, si ya leka mundu kwingira naye, navutswa Petro na Yohana na Yakobo na ise mukana na mama wewe. 52Kandi vosi va lira ni va syoma: navutswa ya vola, Mu ta lira; si ya kudzi mba, navutswa a gonanga. 53Kandi va mu seka ni va mu kolera kihenyahenye, va manya u kudzi. 54Navutswa ya mu gumira mukono, na a langa, na a vola, Mukana, vuka. 55Mwoyo gwigwe gwirana, na a singira nonoho: kandi ya ha munwa a hebwe vyokulia. 56Avivuli veve va genya: navutswa ya veganehidza va ta volera mundu kali mulala, aga kileywi.
©Bible Society of Kenya, 1967
